Красавица

ГIянтIикIа

Урегал анцIбукьла, урчIемал суратла пьеса

 

БутIакьянчиби:

ГIянтIикIа, дебали жагаси жагьси рурси, сунела жагадешличи пахрубируси, уктемси, давлаличи гъаргъси.
Жага, ГIянтIикIала неш, 40 дусла, кункти хIял-тIабигIятла, хамси.
ГIялибег, хIисабла мугIяллим, 24 дусла, малхIямти хIял-тIабигIятла, абадчевси.
ГIябидат, ГIялибегла неш, 45 дусла, духуси хьунул адам.
Базриган, вачрукья, 30 дусла, зантси адам.
Кандидат, 40 дусла гIямрула, гьаланачиб хIянчурбазиб ва гIямрулизиб гьарбизурси, хIякьикьатличи чедихIяртли хIерикIуси адам.
Жагьси, жагьси хьунул адам, Базриган гьалав къаршииркули калунси.

ГIурра ц1уба халатунар к1ел мурул адам.

АнцIбукьуни гьаннала замана шилизир ва шагьуртазир кадиркули сари.

 

АНЦIБУКЬ ЦАИБИЛ

Цаибил сурат

ГIянтIикIахъала хъали. Хъа бяхIличиб кьалтин, гIямзилаб халаси тIашси дяхIимцIала. Диванничи кариибси Жага ралрирар, дях1имц1а гьалар лукьуси рурсиличи дугьарилзан.

ЖАГА (кIелра някъра сунела кьукьубачи кадихьили)

Дикьурти цIедеш чили
Даталра галгаличир,
Заядирути кьалли –
ХIедра ца гIяхIси мурул
ВикIес замана кьалли.

Музыка дехIдирхьу.

ГIЯНТIИКIА (михъирира хIяршбарили)

Бархьли бурасли нуни,
Ну арикьур гIязиз неш,
Наб хъубзар мурул хIейги:
ХIеху дила гIямрулис
Арши-мурали шаддеш,
Нясси дярхъли эркиндеш.
Дура ялчнад вашули,
Яшавла вегIра хIейги –
Бузрадли арашули,
Хьунул хъулир гамъали.

ЖАГА

Гьари, рурси, дураса
Нешлис уркIила хIукму,
Лебил Къяба-Даргазир
Дила руриб исбагьи.

Дигулрив хIед чи, бура,
Белики, вакIес хапли
Хункар пачала урши,
ХIу аррукес гьалакли.

ГIЯНТIИКIА

Пачала урши хIейги –
Ил хабуртазив валтас.
Шила учитель виги,
Базли алапа бихул,
Умули шикад вашул,
Хьуна мякьлав камхIейрул.

ЖАГА

Ва дила белкIа кIанра,
«Китти башул къарчигъас
Уттикъайла кьаркьала» -
ХIебакьирив бурала!

Чинав лева учитель,
КъяйцIрухъадра шилизи?
Зубразивад вархьахъес
Рулгулрив Аллагьлизи?

ГIЯНТIИКIА

Дила лишанниув ца
Лев, неш, багьи хIунира.
Илала хIулби набчи
ДалкIахъес риублира,
УркIи ясирбуцесра
Диур дила дагьрира.

ЖАГА

Саялра чи сая ил,
Нешлизи гьанхIевшибси?
Ну инжитхIерарили,
Ура, асубиралли.

ГIЯНТIИКIА

БемцIур уркIила нигет
ДурабилтIасра нуни –
Учитель – ГIялибег сай,
ВикIибси пикрумини.

Музыка тамандирар. ЛехIдеш. Тамашариубси Жагала сабур бетихъур.

ЖАГА

МехIурли-маг саррив –
ГIялибегла гелешмеш
Лерни сен хIебалуси?
Гъамливан мукъри дарес
БегIти хIядурли саби.

ГIЯНТIИКIА

Ва дила дигуси неш,
ХIуни аргъа ца секIал:
Дузаб сарху цIакьсили
Яра дагьри дахъсили.

ЖАГА

Эй, мехIур, сен хIергъулри,
Дузаб сархуси биъни
Дусмала хIядурдешли,
Кьяшми агарли ралтни
Хапли бакIиб пикрили.

ГIЯНТIИКIА

Симгализирад шинван
ДигIянни дашахъули,
Дигайли иркира ил –
ХIядурдеш ахIену ил!

ЖАГА

ДяхIни мурхьхIебиалли,
Иркибти хъуми дуръар.
Дигай кункти диалли,
Рурсби биргIякабирар.

ГIЯНТIИКIА

Э-э, чина хабара, неш!
Илала буцIар хIерли
Ну цIали игулрагу! –
Сунна ученицази
МукIурвакIес вирару!

ЖАГА

ХIерличицун хIулбала
Вари, рурси, марирхуд,
Багьес нигет уркIила
Гъайэс азгъин марируд.

ГIЯНТIИКIА (нешличи кIапIрикили)

Баркалла, ахIерси неш,
Марка керхурли гIергъи
Варгьи чегьес чевкъину.

Музыка. Нешлира рурсилира далай бучIа.

ХIечила цIумрикIули,
РахIятдеш хъумкартурра,
ЧIянкIли кьас белгибара –
ХIейги цархIил жавабра.

Пардав

 

КIиибил сурат

ГIялибегла хъали. Стол, цачумал ута. Хъа бяхIличиб Н.И. Лобачевскйила сурат. ГIялибег уталичи, неш г1янайчи кабиили саби.

ГIЯБИДАТ. ДуцIрумла гIергъиси баз мекъ барес вягIдаригу, дила урши. Гелешмешла бегIтасра гьанна бархIи белгибарили дигули саби. БегIла дурхъати сари хамис, сут, бурхIни. Чиди декIарбирулри?

ГIЯЛИБЕГ. КъалабамарикIудгу, аба.

ГIЯБИДАТ. Замана баили кьалли: вягIдаладиубси манзил чесабаэс хIябал базра кали ахIен. Бугъа мекълис белгьес батурли, ца-кIел хала хIяйван базарличир дицес чебиркур.

ГIЯЛИБЕГ. Аспирантурализи керхайчи яхIбарагу, аба.

ГIЯБИДАТ. ХIисабла дурсри хIуни гIяхIил кадирхьули бикIаргу – бицIибси бархаличи гIурра ризкьи какьес гIягIнидеш лебу!

ГIЯЛИБЕГ. Наб, аба, хIисабла гIялим ветаэс дигулра.

ГIЯБИДАТ. Наб, абала, къалаба-къалабали мекъра барили, мицIирли лерай хIела дурхIнира дуклабуцес дигулра. Дила мурад барагу.

Унзализи кьутIла тIама. ШалкIуб жузра сарира, жагали регIриубси ГIянтIикIа хъули арицIур. ГIялибег харчилзан, иличи тамашали хIерикIар.

ГIЯНТIИКIА (урузриубсиван, дебали малхIямли ГIябидатличи дугьарилзан). Асубирару ракIес? Гьу, неш, сена арадеш?.. Аргъес хIерируси ца масъала арзахъес ГIялибег Рабадановичличи ракIибсира.

ГIЯБИДАТ. Иншааллагь, дила рурси. ХIябилра гIяхIси барилри. Наб дигахъис илдигъунти къайгъичебти. ИмтихIянра гъамли дургар?

ГIЯНТIИКIА. ХIисабла экзаментас ца баз саби калунси. Лер хIергъути, къиянти, амма дагьес кьас саби.

ГIЯБИДАТ. Гьу, дила ахIерти, бекIмаххIерухъес аркьяс. (уршиличи дугьаризурли.) Лерилра хIергъутигъунти аргъахъа, абала.

ГIябидат аркьян. ГIянтIикIа ГIялибегличи ванали хIеррилзан, малхIямли пишрирхъур.

ГIЯНТIИКIА. Чевверхи, ГIялибег Рабаданович, иш масъала саби хIергъуси. (ШалкIубси жуз бяхIсайхъу.)

ГIЯЛИБЕГ (жузличи хIеризурли). Карии, гьари, карии. (Столла гIела ута кабирхьу. ГIянтIикIала мякьла сайра кайрар.) Гьари, чиди масъала саби?

ГIЯНТIИКIА (бяхIсахъибси жузла кIапIиличи тIул чебуцили). ХIера, иш.

ГIЯЛИБЕГ. Иш арзахъес хIушачи хъарбарибси ахIенгу?

ГIЯНТIИКIА (дигайли ламбикIуси хIерличил мугIяллимличи хIерризурли, гIяшикьриубсила вяштIала дарили). ХIу хIисабчи сайхIели, лерил арзес дигулра.

ГIЯЛИБЕГ (разивиубли, иличивяхI гьуцIулхъан).

Валлагь – биллагьрагу, хIу
Нуни умайриради,
Кадирхьуси хIед дурсри
Учительли хIейасри.

ГIЯНТIИКIА (дукаркIули)

Бунагь биусив гъари
Дигай дакIударалли?
Дунъя булъусив гъари
Учитель байикалли?

ГIЯЛИБЕГ (ГIянтIикIачи дяхI гъамдарили). Кири биуси саби, кири! (Уммайдарес алавулхъан).

ГIЯНТIИКIА (хихриубли).

Э-э, хIисабчи, масхурти
ХIедалуси левригу,
ЦIикури кес хIядурли,
УрхIличи байикIули.

Буреси хIебалули, ГIялибег тIашилзан. ГIянтIикIа, илала пиджакла кисалихIи авкбарибси кагъарла кIапIи къужбарили, гьаррухъи аркьян.

ГIЯЛИБЕГ (кисалихIибад къалабали дурасили, кагъар ахъли бучIа).

Музыка.

«НуникIун хIу чейулри…
Наб хIура дигахъулри.
Илкьяйда лехIкахъадли,
Аркулра ну цархIилли».

ГIялибег кьакьадешлизив къунзулхъан.

Агь, ГIянтIикIа, ГIянтIикIа,
ХIуни наб адикьур цIа!

Ягъари, набзи ну сен усес хIейрусирав викIули, ил руили уркIилизир улукьули, дигайли дигай дала бикIуливан.

ТIашванизурли, илала кагъарлизирад дугьби гIурра дучIа, илдачила сунела пикруми дуру.

«НуникIун хIу чейулри…» - хIебиалли, наб сари дигни балули руили сари. «Наб хIура дигахъулри…» - дила гIямрулизир чIянкIли ца ил сари «хIу дигахъулри» рикIуси. ЛехIкахъадли, аркулра ну цархIилли» - хIерагу ца, сунес хIейгусилис нешли гужли шери редлугули рургар! Иличила хабар хIергъирагу! Чис?! Юх. Илгьуна зулму барес бегIтазиб ихтияр лебси ахIен! ГIе, ахIерси ГIянтIикIа, рархьли рикIулри: ну «лехIкахъили», нушала дигайла хъу хIедухъар!

Пашманти музыка. Далай бучIа.
Дигуси кариили,
Гелешмеш рисахъишав?
ХIейгуси сарукили,
Дигай тIутIударишав?
Нешла амру бухили,
ГIилму гIелар датишав?

ХIяяла чIалтIалиур
ХIябалра цугли сари,
УркIила хIяланазир
ГIянтIикIа мурхьли сари.

ХIу мякьла ракIибхIели,
Бацла шала шявбиуб,
Хапли аррякьунхIели,
Дунъя наб цIударбиуб.

Пардав

 

АНЦIБУКЬ КIИИБИЛ

ХIябъибил сурат

ГIянтIикIала хъали. Сунела жагадешличи пахрубирули, дяхIимцIалала гьалар ГIянтIикIа шайчирад шайчи шуррикIули сари. БехIтIулбани нудби хIяршдирули, дямдизурти михъуртачибад хъат кабуркIули сари. Диванничи кариибси нешра рурсиличи пахруличил хIеррикIули сари.

ГIЯНТIИКIА (вяшатIала дирули, далайра рикIар)

Урхьназирад берхIиван
ГьарракIили хъа гьала,
«Урхьва дублир чIигIяван
Зирзирдирис хIела чарх»,
Ва хIисабла мугIяллим.

ХIела хIерла шалали
Ну шалахIерирасли,
ХIед дунъя шавлабирис

Дила хIулбала нурли. (ГIур нешличи дугьарилзан). Ва неш, ГIялибегли ну сунела кабинетлизи жирарили, се бурибал баладу: «ХIу чехIераибси сягIятлизиб наб бархIи цIябли саби», – викIар.

ЖАГА. Сен мукIурвакIибсил баладу? ХIебалад. МукIурвакIахъес нуни илиу цIа бикьурра. ГIялибегличила хIелара дилара гъай диубли гIергъи, шилизирси бегIлара мезлукь МухIлисатлизи ца иткъиван шивкIивбатурра, валлагь хIисабла учитель ГIялибеглис ГIянтIикIа дигахъули адамти хабурта бугьули саби или. МухIлисатли ил хабар шилизи къалабали тIинтIбарили, «Мурт мекъ бирулрая?». «Учитель ученицачи хъайчикайахъес хIукуматли валтусив?» или, адамти набзи хьарбикIули саби. Ну биалли, я рурсили я нуни балуси селра агара рикIулра. Дила рузикьарли набзи гIуркъ булан бяхъиб: «ХIушани сен хIебалуси, ГIялибегли сунела гелешмешлизи савгъатуни чардарахъес булан бурили, бегIти къалмакъарлизиб саби бикIаргу?!».

ГIЯНТIИКIА (тамашариубли). Ягъари, неш, илгъуна анцIбукь цархIилтани дигIянабирули бираргу, хIуни биалли... шилизи тIинтIбарилри. Сен? Школа таманбарайчиалра яхIбарес хIериуб бикIаргу шанти?

ЖАГА. Э-э-э, дила исбагьи! ХIуни гьанналис гIямрула кьячIикIуни далули ахIенри. Учительличилара ученицаличилара ил хабар директорличира биур. ХIуни ГIялибеглизи кагъар бедили гIергъи, нуни хIу школализи хIерархьибсира илбагьандан сарри. ГIячихълигу, директорли буру: «Учительлис ученицачил дигайлизи вархес асубирусив? ХIуни ученица белчIудилизирад къябрердахъилри. Илди гъай-мез районнизи кадаалли, хIела аги сегъуна бирарал балулрив?!» Илгъуна гьунибаъни биубли бургар. ХIебиалри, гелешмешлис сукни духибти секIал чардирахъниличила хабар дурахIебирки.

ГIЯНТIИКIА. ХIерагу ца, илдигъунти секIал наб гьанхIедирки.

ЖАГА. Сунела гелешмеш леркъи ученицачил кIушикIули сай хIебикIахъес кацIибси ганз саби ил – сукни бухибси мас чарбирахъни.

ГIЯНТIИКIА Неш, нуни хIела гъайлизиб иргъулра: шантала мухIлилизи ну рикили гIергъи, анцIбукь къалабабарес гIягIнили саби. Нуни гьанна се барасли гIяхIси вара?

ЖАГА. Баркалла хIед, дила лагьа, бархьли аргъилри дила пикри. Мегь буцIарли лебай кьутIбарни гIяхIси саби, бикIар. ХIуни мухIли буца, ну мегь буцIарбарахъес директорличи аркьяс, хIехара рурсби – ученицаби цIахбирахъес кабатуртив хIушала учительти, илгъуна сабив нушала дурхIнас хIушани лугуси бяркъ или. ГIур директорра лехIкахъес хIейрар.

ГIЯНТIИКIА (разириубли, делхъ диру, далай бучIа)

Агь, неш, дила гIязизси,
ХIуни далути макру,
Ну мурадли раахъес
ХIуни дирути сихIру.

УмцIути шараб хIулби
ГIяяр чина дашалра,
Лишанниувси дурхIя
ДугI нунира хIейисра.

ЖАГА (пикрикарухъи). Наб ишгъуна секIалра уркIила башули саби: нушаб гIяхIла шайчидяхIцун пикридикIули ахIенрара нуша? Гелешмешлис мекъра барили, «ничего не знаю» или ГIялибег рахли лехIкахъалли?

ГIЯНТIИКIА Юх, неш, ил секIал хIебиру: ГIялибеглис ну дигахъулра.

ЖАГА. ХIу дигахъули хьалли, сунела гелешмешличи ил хъайчикайэс асубирар. ГIямрулизир камлив гьатIи илдигъунти анцIбукьуни – ца ригахъули, цархIилличи хъайчикабирути! Мас-хазналис дигай кьурбандирути! Юх, ну гьанна директорличи ар … (Унзализи кьутIла тIамали буруси чебудахъу.)

Хъули уруз-хIяцIли ГIялибег айцIур.

ГIЯЛИБЕГ. Чердерхирая, хIушала рахIятдеш буунрану.

Жагара ГIянтIикIара хабарагарси гIяхIяйчи тамашали хIербилзан: неш – рачарархибсиван, рурси – белгидеш агарли. Цалилра жаваб чархIебиру.

ГIЯЛИБЕГ (анарханавиубли, селичивад вехIирхьусил хIебалули). ГIяхIти аргъ-бархIи дакIибгу… ХIяйван-къача дуки-мага дашулив?.. ХIела арадеш сен саби, неш?

ЖАГА. ХIу, дила пикрили, аргъ-бархIиличилара, хIяйван-къачачилара, дила арадешличилара хьарикIес ахIенри вакIибси. Рурси шантас цIахрарили, дай хIерили иша вакIесра урузхIейубрив?!

ГIЯЛИБЕГ. ГIянтIикIа наб дигулра.

ЖАГА. Ши хабурта бицIайчи хIу чинаври? ЦархIилтачи сукни вашули, дилайчи, дудеш агарси рурсиличи, шадир вашес дигули валанри?! ТанбихI гIебхIебиур или гьанбиркулив?! ГIеббиахъис: хIушала директорличира аркьяс, районна хIякимтачира аркьяс! Учительлис ихтияр бедибсив ученицаби цIахбирахъес! Яра, нуша мехIурти саррану, лехIкахъили дуар или, гьанбиркулив?!

ГIЯЛИБЕГ (цакьадар чIумайубли). Учительлис дигай дихьес асухIебирусив?! ЦархIил ураркьили гIергъи ГIянтIикIачи дигай дихьилра нуни. ГIур се бариша, дуравхъи дубурличивад вявикIусирав, лесличивад тIяхIулхъусирав?! ГIянтIикIас нура дигахъулра.

ЖАГА. ГIянтIикIа хIела ученица сарни балулрив?! ХIехара рурси! ХIу – учитель! Нуни прокуратурализи багьахъасли, хIу учительла хIянчиличивад дугIаилицун хIелтарину, танбихIра биру. Ну хIушала директорличира илара рукьес хIядурриубсира.

ГIЯЛИБЕГ (хIербикIутачи ласяхъили). ГIе, дугIра иура, цIахра ирура. (ГIур Жагачи дугьаизурли). Гьайгьай, дила неш, наб хIу рикIуси бетаэс асубирар. Амма аргъа: нуша цалис ца дигахъулра. Ца-кIел базла гIергъи ГIянтIикIани школа таманбирули саби, илхIели мекъ барес дирехIе. ХIела рурсилара дилара талихIлис хIу диргалахIерухъни тиладибирулра. Дила нешлизира гIячихъли бурира, ну ГIянтIикIачи ахIенси цархIилличи хъайчи кайруси ахIенра или. Гелешмешлизира набчи хIерли хIеруахъес бурахъира. Илис дедибти нушала савгъатунира цIали игехIе бикIули саби. Дигалли дигаб – наб тряпкабала авара агара.

ЖАГА. «Дигахъулра…, дигахъулра…» чуйна бурулри! Сунела учительлизи «хIейгахъулри» рикIес рирару, гьатIи?! УрузкIули рикIуси сари.

ГIЯЛИБЕГ (ГIянтIикIачи дугьаизурли). Бурагу нешлизи хIела пикри, ит набчи белкIунсигъуна.

ГIЯНТIИКIА Бурибси саби, ГIялибег Рабаданович.

ЖАГА. Чериулрив, гьаннара «…вич» рикIулри! УрузкIули сари сунела учительлизирад. ХIу сейкIули хьалли, ГIялибег, иш анцIбукь ца набзибадцун дигахъуси ахIен. Директорли хIу тIалабвариб бикIули лебригу, сейкIиба?

ГIЯЛИБЕГ. СейкIеса, учитель сунела ученицачил дигайла масъултази вархни балбикибси ахIен, викIи. ГIурра урус мезли чебатур «Знаешь, чем это пахнет?» Чебиулрив, нуни хIушазибад селра дигIянабирули ахIенра.

ЖАГА. ХIуни се ири гьатIи?

ГIЯЛИБЕГ. ХIу бекIли пикриикIулри, ну – уркIили. Дигайли бекIлизиб гIякьлулис мер хIебалта, ира. «Ишди жагьилти...» бизахъурли, бекI гьакI-гьакIсабариб.

ЖАГА. Дила пикри лебсири рурси цархIиллис редес. Гьанна аба-рурси гIяхIил пикрикадулхъехIе. Эгер нуша хIечи кьабулдикахIелли, къалабали сукни бархьаэс чебиркур. «Чем это пахнетла» мягIна хIунира иргъули ургуд? ХIед кумекладиэс кьасбирехIе.

ГIЯЛИБЕГ. Баркалла. ГIяхIил пикридухъадалли, ишди гъай-мез шилизи тIинтIдиубли гIергъи, ГIянтIикIас цархIилличибван ахIи, набчиб гIяхIил бирар. Сукнира бурхьис, ГIянтIикIала экзаменти тамандиубмад, мекъра бирехIе. Гьанна ну чарулхъас. (ГIялибег аркьян.)

Музыка дирхъу.

ЖАГА (ГIянтIикIачи разили дугьаризурли)

Гьанна илди нушала
ТIимкьлизиб саби, рурси,
ХIули белкъари исла
Лерхахъисра хабарла.

ГIЯНТIИКIА

Дахъал гIягни лугIилис
Наб гIягIнили ахIен, неш,
Бура хахъес мургьи-арц
Ва импортный палтар-кьяш.

ЖАГА (кIелра някълизи буцили, кIанала дуб лусахъули)

Ишкьяйдали ГIялибег
Гьанна нуни гIянчIикIис:
ХIед гIямрулис баэс мас
Хахъили, къазван лутIас.

ГIЯНТIИКIА

Агь, неш, дила рзидеш
Багьадри гьанна хIуни,
СархибхIели чедибдеш
БегI гьалар пикрумани.

ЖАГА

Вари, рурси, хIулкIудеш
Дати хIела уркIилис:
Гьаладуцес адамдеш
Гьаларла гелешмешлис.

ГIЯНТIИКIА (нешличирад ласряхъили, някъ гьакIбарили)

Мажалисла кьакьара,
Дургба дирцIул тIакьара,
Иша раши, гелешмеш,
ХIед дурути дакьара.

АлхIятличир мяхIярван,
Ай, хIу бахъли хIясибраркь,
МяхIяр умцул бархаван,
Вай хIу хIела хъулир реркь.

ЖАГА

ХIейгу-хIейгули хьалли
ХIу ГIялибеглис аркьни
Чебаахъес шантази,
Биахъа куц пашманни.

ГIЯНТIИКIА

Савлила нуранани
Демжахъурти биркIанти
Ца биштIаси уркIили
ТяхIударес рирулрав!

Някълаб халаси бергарагра сарира, ГIябидат хапли хъули арицIур.

ГIЯБИДАТ. РакIес асубирару хIушачи? ГIялибег ца гьарракIигу викIули, ракIибсири. (Хъа гIямзила сунени хибси бергараг кабирхьу. ГIянтIикIа итил хъули аркьян).

ЖАГА (хIейгу-хIейгули илизи дивайчи карии или). Нушаб гьанагарти гъай-мез сарригу ишди, ГIябидат. Учительлис асубирусирив гъари сунела ученицаличила ишдигъунти хабурти тIинтIдиахъес? Дила рурсиличи бугьтанти чедушес? Илдигъунти авара дирути диалли, нушала рурсби школализи хIебашахъехIе или бегIти дурабухъалли, хIушала анцIбукь чина бетиркулил балулраяв? Иш анцIбукь районна хIякимтани багьалли, ГIялибег учительла хIянчиличивад дугIеилицун хIелтану, туснакълизи зямилзахъа. ГIянтIикIа ученицацунра ахIи, васавлара раибси ахIен кьалли!

ГIЯБИДАТ (урухриубли). Вари, вари, дила рузи Жага, анцIбукь ил даражаличи бетикахъес асухIебирар. ХIела рурсили школа таманбарес халаси замана кали ахIен. Мукъри дарили, гъай-мез тамандирахъехIе. Гьаларла гелешмешра, балхIебикибси баркьуди биалра, нушачирад черрикахъира.

ЖАГА (пикририкIули лехIкайхъур. Кьан-кьанни рехIрирхьур). Бархьли бурасли, нушала пикри сабри ГIялибег туснакъварахъес. ГIур, хIушала тилади чекасили, мекъ баресли барира.

ГIЯБИДАТ (разириуб). Баркалла хIушаб, дила ахIерти, баркалла. Нушаб дигуси секIал хIушани барибхIели, хIушаб дигусигъуна нушанира бирехIе.

ЖАГА. Мукърала бархIи сукни хибти ваяхI багьандан – камти сари, вайти сари бикIули – бегIти жалбирхъули бирарну, илгъуна балагардеш хIебиахъес, хес гIягIниси секIал гьанна бурасли гIяхIси ахIену?

ГIЯБИДАТ. Саби, саби, дила рузи, бура.

ЖАГА (тIулбачир дуйгIули). ГIянтIикIас вецIдехI жура-журала импортный костюм, авцIали хIевалис дурхъати чIянкIи, илцад гьаннала модализирти кIунби, шудехI дабри, мургьила хIябал тIулека, якьутла чинтIла дегIти; мургьила урцIри, рахаж ва сягIят, арцла ца-хIябал тIулека ва кулеха, ца дубленка – таман!

ГIЯБИДАТ (уркIсарухъи). Гьуя-я, дила рузи Жага, илдицад секIал сукни хес ну гамъа хьуна ахъри чинаб бируси гъари! Гьаларла гелешмешла бегIтанира дила духибти дайхъала чархIедарибгу!

ЖАГА. ХIушала чардарибти-хIедарибти хIисаблизи касили ну гъайрикIес хIерирус, ГIябидат, сенкIун ил шайчиб ца къарапулцадалра нушачиб гIяйиб агара. Нуни дурибти секIал бахъалтигъунти рурсбала бегIтани тIалабдирути сари. Дила рурси цархIилтачир жагасира сари, гIяхIсира сари. Бунагь-хатIа сунезир агарси хIурулгIянгъуна исбагьи сари ил.

ГIЯБИДАТ (тиладиличил). Ва дила рузи Жага, ГIянтIикIачиб нунира сегъуналра багьана чебиули ахIенра, гьарли-марси исбагьи сари. Илгъуна хIериалри, хIушайчибра давлачебтала рурси-гелешмеш урратурли, дила ГIялибегра ГIянтIикIачи гIяшикьхIейри. Дила лертигъунти хIяйван-къачара дицили, риубсигъуна секIал лебхисну, кам-гьамси секIайчи хIура мариуд. Узи-уршидеш гъамдирухIели, бекIбархIил гъай-мезра гIяхIти хIедирар.

ЖАГА. Дила уркIира къаркъала ахIенгу гъари, ГIябидат.

ГIЯБИДАТ (дивайчирад аризурли). Баркалла ил гъайлисра. ХIебиалли мукърачи хIядурдикIехIе.

ГIябидат аркьян. Итил хъулирад ГIянтIикIа ляркьян.

ГIЯНТIИКIА (пишряхъили). ЦагIяхIил «гIянчIакIири» ит хIуни, неш.

Музыка.

ЖАГА (далай бучIа)

Ва дила берхIила нур,
Вари, хIерриэс багьи,
Балусилис иш дунъя
ХупIра-кIучIра сабину.

Ва дила бацла шала,
Вари, руэн духули,
ЦIа билкьа дяхIилизи
Духули вяшикIалли.

Пардав

 

АНЦIБУКЬ ХIЯБЪИБИЛ

Авъибил сурат

ГIялибегла хъали. Илар имцIадиубли сари цIикурила ваяхI: тIашси халаси дяхIимцIала, диван, базла гIянулби ва цархIилти дибгIян-кьяш. ГIялибег столличи жузала бекIара кабихьили учIули сай. ГIянтIикIа хъули арицIур.

ГIЯЛИБЕГ (хьунул чераили алзан, пяхI-пяхIиубли чIикьилтIан). Адам талихIчевли виалли, бузериличи илала гъира имцIабирули саби. ХIера, нуша хъайчикадиила, ца дусли, аспирантурализи имтихIян дедес хIядуриэс виубра.

ГIЯНТIИКIА (кьяркьли). Нунив гъари хIед илцад талихI хибси?!

Музыка.

ГIЯЛИБЕГ (далай бучIа)

ХIу мякьла ракIибхIели,
Бацла шала шявбиуб,
ХIу уммайрикунхIели,
Варъара кьутIкьубиуб.

ЦIябдешлизир дугила
Дурарухъадли рахли,
Бацла малхIямси шала
ГIягIнихIебиркур, марли.

ГIЯНТIИКIА. Варъа викIули хьалли, кьак мурихIебираргу.

ГIЯЛИБЕГ (хьунул уммайрирули). Иш муридешра биур нушаб. ВецIъибил класслизиб хIябэсил дарс лебну, гьанна школализи аркьяс.

ГIялибег хъуливад дураулхъан. ГIянтIикIани, дивайчи кариили, пашмай далай бучIа.

Музыка

ГIЯНТIИКIА

Эй, дила дигайла вегI,
ХIечи дигай кавлану,
Наб дигуцад давлала
Дайлизир хIериасли.

Эй, дила карцIайла вегI,
ХIечи карцIай кавлану,
УрхIла мас-хазналичи
Ну карцIли каратасли.

Хъули Жага арицIур. Шел-урегал баз дурар кали, гьанна шилизи чаррухъунси ил рурсиличил ихтилатрикIар.

ЖАГА. ХIу хъайчир дусличирра имцIали ишар хIеррирули риадра, уркIигьаргли гъайдухъес гьачамалра замана хIебиуб. ГIяйиб, гьайгьай, набчиб саби: гьар-гIергъили ца жумягIялра шилизир хIеруира – даим гьундурачир сарра, вачар-чакарлизи рархили, Маскавлизи булан ретаайчи къунзрикIули.

ГIЯНТIИКIА. ЦархIилтира илкьяйда саби, неш, гьанна. Давла бучес къунзбикIули.

ЖАГА. Дила кьалли халаси секIал гIелаб кавлули ахIен, гьуни-хIекьлис ва беркайс харжбирули. Беркала дурхъали саби. Ну цархIилтиван тIулби ижули хIерриэс хIерирус. Гьу, хIела яшав, берк-берж, мурул-хьуна ургала, хъубеш неш – гьар секIал сен сари?

ГIЯНТIИКIА. Бархьли бурили, неш, ну пашманриублира учительлис шери ракIниличи.

ЖАГА (тамашариубли). Сен?! ДурхIяалра агарагу хIушала?

ГIЯНТIИКIА. ДурхIя нуни алкIахъули ахIенра: биштIатала сиркьназир гьачамлис шямкьриэс дигули ахIенра, деклизи гIяргIяван халтIрикIули. БиштIати акIалли, чархла жагадешра пулукIбирар.

ЖАГА. ВишIтаси ахIелкIахъниличи ГIялибег, ГIябидат разилив гьатIи?

ГIЯНТIИКIА. Нуни бируси илдани балули ахIен.

ЖАГА. Се бирулри гьатIи?

ГIЯНТIИКIА. ОК пайдаладирулра.

ЖАГА. Се сари илди?

ГIЯНТIИКIА. ВиштIаси ахIекIахъес бегIлара имцIали асарбирути ва заралагарти таблеткаби саби.

ЖАГА. ХIед хIейгахъути хIяйван-къача адилкьен, арши-мураличи рашен бикIули къагъсарахъули-мага рургуд?

ГIЯНТIИКIА. Се рикIулри гъари хIу! Илди набчи хъардирули диалри, ца бархIиалра ишар хIеруирагу. Илди лерилра хIянчи хъубеш нешли дирули сари.

ЖАГА. Мурул пяхъ-мага викIулив?

ГIЯНТIИКIА. Чина хабара гъари. Ну ГIялибеглис дебали дигахъулра.

ЖАГА. Лерилра илди гIяхIил диалли, гIур се хIебиули гьатIи хIед? Сен пашманриубсири? Яшав, берк-берж-мага вайтив?

ГIЯНТIИКIА. ГIе, неш, дила разиагардешла мякьи илизир сари, яшавлизир.

ЖАГА. Гьуя-я! ХIела гIямрулис даари бегIлара дурхъати палтар-кьяш сукни хахъирагу, ГIябидат бяхъибси гурдаван цIумрикIахъули! Се камли хIед?! Беркала-мага вайсив? Муйли бирути кьалли гидгариличирад бала лугIянти, гъез гъярианти.

ГIЯНТIИКIА. ГIялибегличи бугьтан чебушес хIерирус, неш: гьар базла алапа хъули хили набзи луга. Се исасра, се букасра, я мура я хъубеш нешла набзи гъай хIебирар.

ЖАГА. Вай гьарай!! ГIур се яшавличила гъай сари хIела, иргъули ахIенрагу?!

ГIЯНТIИКIА. Гьачам хибти палтар, сецад дахъал диалра, илди, гIямрула бурхIнала дахъдешли, дуркьдирули сари ва мода барсбирули саби. Наб биалли цархIилтас гIелакарикес дигули ахIенра. ЦацабехI хьунул адамтала лерилра тIулбачир мургьила тIулкми, жавгьар духурила чинтIла дегIти, чумдехI сарил мургьила рахажуни, урцIри лер. Дила биалли цадехI сари лерти, итхIели сукни хибти. Илдигъунти дурхъати секIал исес учительла алапа биули ахIен. Ца гIядатла яшавлис саби биуси, бикIуливан, гаша хIедебкIес. Ну кьалли илгъуна яшавличи ахIенри хьулрикIуси. Кисми дацIсиличи се дигай дирути! Учитель чеввикIили, ну хатIарикилра. Илала базла алапа зузбирули, лерилра гIямру дуркIишав?! Юх, юх, сай сецад гIяхIси виалра, нуни иличил гIямру хIедуркIис.

ЖАГА. ХIу дила рурси риубли хьалли, илгъуна сарни хIебагьурра.

ГIЯНТIИКIА. Сегъуна?

ЖАГА. ГIякьлу агарси. Муйли, гьар хьулрухъунхIели хIед дигутигъунти хъярбиван абулцIес, кьяшмау лайкабакIили лебти ахIен. Духуси хьунуй – левси мяхIкамиру. ЯхIбарили, хъалибарг хIейхъахъу. Ну чериулрав гьанна сегъуна даражаличир саррал! ЦацабехI рурсбачирра къулай-къулайли лералра, амма набчи хъайчикайэс дигуси чилра агара. Сен?! СенкIун ну ралутани балули саби хIела дудеш нуни мяхIкамварес хIебагьни. «Итичил гIямру деркIес хIебагьурси илини, нура хIерхIейрура» или пикрибиру ну гьанрикибсини. Духуси адамли сунес хьунул карирухIели, ил чи сарил, сегъуна сарил, чила сарил гьала-гьала ахтардибиру. ДяхI хIясибли къалабахIеркурну. ХIедра илгъуна секIал биэс асубирарну, руэн хIела муруйчир.

ГIЯНТIИКIА. ХIела пикруми дархьти диэсра асубирар, неш. Амма наб агри-гашила гIямру хIейги, Дила никализи агарти рурсби давлумазиб бумхIули, ну учительла къарапулта руйгIули, гIямру деркIес хIерирус.

ЖАГА. ХIед се гьалаб саби – давла яра нягIна?

ГIЯНТIИКIА. ХIунира чебиулригу, неш, гьанна адамти давлаличи саби хIербикIути, нягIналичи ахIенну. ХIела давла лебу - хIу духусири сарри, гIяхIсира сарри, хIела хIурматра бирули саби. Давлачебтас гьанна цацабехI поэтунани булан назмурти цаладирхъулигу. Чинабад, секьяйда бучибсил ил давла балули биалра. Цалра мискиннис цалабирхъулив?! Ил духусилизи, гIяхIгъабзализи халирулив?! Юх, неш, хIу се рикIадра, ну хъусли хIерриэс хIерирус!

ЖАГА. ХIела гIурла кьисмат гьанналичибра гIяхIси бирниличи сен илцад рирхусири?

ГIЯНТIИКIА. Дила жагадешличи рирхулра, неш. Ну кьяраэсгъуна саби набчи мурул адамтала хIер. Чи-дигара набчи гIяшикьварес рирус.

ЖАГА (рурсиличи мурхьли хIерризурли). ХIуни пикри бяхIчиаибси-мага леву?

ГIЯНТIИКIА. Тамай уркIи кабизурси-декIар чилра агара. Ит гьанна ГIярасайлизивад чарухъунси левгу, Базриган. Дебали давлачевси сай бикIули аргъирагу. Итала хьунул лерсив?

ЖАГА. Валас. Шилизир агара. Ишав я хъайчикахIейиб. Амма хьунрукь сай бикIули аргъира.

ГIЯНТIИКIА. Гьачам дила някълизи викалли, ил нуни, гIежас гIергъи гежбаван, наб гIергъи вашахъис.

ЖАГА. ХIебиалли хIуни сеннира цархIил варгес кьасбарилри? Дила насихIятличи лехIхIейхъулри, гIе? ГIур пашманрируд кьалли, рурси.

ГIЯНТIИКIА. Дила лерилра пикруми хIези уркIигьаргли дурира. Аргъа, неш, ГIялибегличир руэс дила кьас агара.

ЖАГА (пикрикарухъи). ГIе-е, бархайчибра сяхI халаси замана бакIили саби. Биаб хIу рикIуси. ХIела талихI – дила талихI… Базриган дусмала халал кьадин? Амма куц кабизлизив рурсбас дигахъеси сай – зантси, жагаси.

ГIЯНТIИКIА. Чум дус виуб вара?

ЖАГА (пикрирухъи). Дила пикрили, хIу раркьибси дус ил кIиибил яра хIябъибил класслизив учIули леври. ХIуйчивра ца-вецIал дус халаси сай. ГIе, гIе, хIябцIали дусра-сера виуб.

ГIЯНТIИКIА. Илди дахъал-декIар ахIен, сай давлачевси виубли гIергъи. Гьанна гьатIира халатасра жагьти рурсби шери башули саби.

ЖАГА. Давлачеввиубли сай бикIули нунира аргъира. ХIебиалли иличил ца иткъиван, бикIаргу, хабарагарливан къарширикес кьасбара. Дигайли бицIибси уруз-хIяцIси хIер, малхIямси пишбяхъ, жагати ва мягIна бухIнабуцибти гъай ва, гьайгьайрагу, ил бекIлибиубсира саби, хьунулдеш дихIнилашал хIела чIумадеш чедаахъа. Мурул адамлис илгъуна тIабигIятла регI шерикариэс дигахъу. Шадир вашесцун биалли, сегъуна риалра пикрихIебиру. Ил секIал гьанна саби нунира багьурси.

ГIЯНТIИКIА. ГIялибегличир лерай иличил къаршириркахъес маслигIятбирулрив?

ЖАГА. МаслигIят кьалли нуни ГIялибегличир руахъес бирулра. Сеннира хIу иличир хIеруули гIергъи, сунени хIу дугIеадри гIяхIсири. Эгер хIу Базригайчил къаршириркни багьалли, хIу рурхьури, сецад сунес ригахъадлира. Илгъуна саби нушала шантала гIядат.

ГIЯНТIИКIА. ГIялибегли дугIеайчи, ну иличирад дуракарухъасли гIяхIси ахIену гьатIи?

ЖАГА. Давла диги рикIули ахIенрив гьатIи хIу? ХIу гIяхIулали муруйчирад аррукьядли, чIянкIурарили дуракайури, хIед сукни хибти ва хIед нуни гибси мас архIебухахъили. ХIу муруй рурхьадли, лерилра илди хIед кавлути сари. Илгъуна саби нушала гIядат.

ГIЯНТIИКIА. Ца мурул виъхIейули, урхIличил кIушрикIули сари, бикIар. Амма нягIналичи хIеррикIули, давлализирад мяхIрумриэс хIейги. Башахъен – урхIли дурутала авара агара. Базригайчил къаршириркухIели секьяйда регIриишара? Шагьарла рурсбачил къаршииркули калунси виалли, ну илдачирра чихъси даражаличир чериэсли регIриэс чебиркур.

ЖАГА. Илди масъултазир хIу чисалра гIелахIериркуд.

ГIЯНТIИКIА. (дуцIли рякьи, итил хъулибад ца хIева хили). ХIерризи гьари, секьяйда балбиркулил. (Челгьа гIеркъаси, ганз кацIибхIели лутIи кьяшлизи хьар чейгули рашес диргалабулхъуси, урдуби чедиэсли гъярбердибси ва дебали дямбизурси, чархла лерилра биркIанти чедиуси хIева. Нешла ва дяхIимцIалала гьалар шайчирад шайчи шуррикIар). Гьу, балбикилив? Куй бакIахъилив?

ЖАГА. Падишагь-дигара гIяшикьиэсли сарри.

Музыка. ГIянтIиIка сценаличир къакъбаван къунзрикIар, далай бучIа.

Гьай аман ретаасри
Гъагуллизиб шинна кIантI,
УркIили викIибсила
Карикес хъуцIарличи.

Пардав

 

Шуибил сурат

Адамти камли къаршибиркуси шила гъярцIа кьакьа. Къянариличил шичи аркьуси ГIянтIикIас Базриган къаршииркур.

ГIЯНТIИКIА (уруз-хIяцIли). Дуравхъунрив, Базриган. Шилизи мурт чарухъири? Сен сайри?

БАЗРИГАН (исбагьи рурсила малхIямти яхши-хушличи тамашавиубли). Леврагу ца шадив дуравхъи. Шилизив чумал бархIи виублира. ХIу ГIянтIикIа ахIенрив?

ГIЯНТIИКIА (малхIямси хIер иличи атIахъи). Сарра.

БАЗРИГАН. ХIерагу ца, сегъуна исбагьи ретаурлирил! Шилизивад ну аркьухIели, риштIаси рурси риради. Школа таманбарилрив?

ГIЯНТIИКIА (илала якьутла чинтIли нурани иргьуси симатIулличибси мургьила тIулекаличи хIерризурли). Школа таманбарила дус-имцIа дикили сари.

БАЗРИГАН. Институтлизи-мага кахIерухъунрив?

ГIЯНТIИКIА. РучIес дигусиригу, нешли шери редира.

БАЗРИГАН (гьалаксаурли, хIейгибизурли). Шери?! Чис?! Наб кьалли гьанбикиб...

ГIЯНТIИКIА (бекI гIяшбуцили). ГIялибег бикIуси учительлис. (Аркьян.)

Базриган алавчар хIерилзан. Чилра чехIеили, ца гIямзила тIашилзан.

БАЗРИГАН (сунези сай). Агь, сунела жан дат, сен жагасирил! Авхазан курегагъуна сари. Набзи жагали хьар-хъарра даибгу?! «РучIес дигусиригу, нешли шери редира» рикIи. Вя-я-хI, сунес хIейгукъира редилив?.. ГIурра кьабулагарсигъунаригу… Гьаригу, чарриайчи ишав кали, ца-кIел гьатIи суал дедлугас. ГьимхIерукIесгу. Чилра агара. Чилилра чейули ахIенра.

ГIянтIикIа шин гIяхъили чаррулхъан. Базригай ил тIашиу.

БАЗРИГАН. ХIела жан датабну, ца минут тIашризи. Ца секIал хьарбаасли, гьимруркIуду?

ГIЯНТIИКIА. СекIал вайсира бирар, гIяхIсира.

БАЗРИГАН. ХIугъуна исбагьис вайси секIал бурес вирару! (КIелра илди алавчар хIербилзан – чилра агара.) БусягIятла хIела агиличи хIу разиагарли риъниван наб гьанаургу. Гьайгьай, ил - дила къуллукъ ахIен, балулра, суал я балбикибси ахIен.

ГIЯНТIИКIА (бекI гIяшбуцили). Илгъуна пикри сен бакIиба?

БАЗРИГАН. Бархьли бурасли, уркIи набзира мукIурбакIили ахIен. ХIуни бурири кьалли «…нешли шери редира» или.

ГIЯНТIИКIА. Гьарил дев умцуси адам уилри хIу. Илди кьакьурбазир дурути гъай ахIенгу. Я бурили хьалли барсбируси-мага лебу? (МалхIямли пишряхъили аркьян.)

БАЗРИГАН (ГIянтIикIас гIелавад). ХIедра Аллагьлисра дигули ахъадалли, белики, барсдешра биэсну, жаваб чарбарни тиладибирулра.

ГIянтIикIа, ласхIеряхъили, аркьян. Базриган итатIибван чебиуси къаркъаличи кайрар.

БАЗРИГАН (ахъли пикриикIар). ГIялибег наб дигахъулра эс хIериубгу. Белики, яхI-хIяяли тIашиули хьалли… «Илди кьакьурбазир дурути гъай ахIенгу…» рикIар – хIебиалли, цархIил мерличир набчил гъайкарухъес къаршидеш агара. Итичирад дуракарухъес кьабулрикалри, аррукили шаргьарлизи аркьира. Кулпетра биахъубли, набра паргъатиэс замана баили саби. Дила неш-дудеш, узи-рузи лебти биалри, гьанналичи бикайчи ишкьяйда цунни хIелтира. ГIянтIикIа, ГIянтIикIа! Тамашали гIяхIкаризурри кьаллии хIу наб! УрхIла хьунул.

Музыка. ГIяшли далай бучIа.

Дигай дирхьни балули,
ХIякьяси ну хIела ша,
Ши-алавла шиниш кьар
Арилра шушел тумен.

КарцIай дулхъни балули,
ХIякьяси хъали-алав,
Хъулри-алав хIябкIапIи
Арилра хIяб-хIяб тумен.
Гьари, се-дигара биаб, таваккалбарили, гьачам гьатIи итичил къаршиикес кьасбирис.

Базриган аркьян. Сцена цIяббирар, ГIур ил ГIянтIикIачил гъайикIули чейур.

БАЗРИГАН. Наб, ГIянтIикIа, я гъайлизир я баркьудилизир кьячIикIуни хIейгахъис. Чераибмад наб дебали гIяхIризурри, уркIилизи атIунри. Набзи ца секIал бархьли бурни тиладибирулра. Ну цуннира. Хъайчикайэс дигулра. Рахли ГIялибегличил хIед хIерриэс хIейгули риадли, набчил кьисмат бархбяхъни тиладибирулра.

ГIЯНТIИКIА (бекI гIяшбуцили пикририкIар. Кьан-кьанни гIяшли иру). Гьайгьай, хапли хIед жаваб гес хIерирус. Амма хIу дила агиличи бусягIят шакикири. Се бирусилра балули ахIенра.

БАЗРИГАН. Се бирусил нуни бурис, хIу кьабулрикадли.

ГIЯНТIИКIА. Хьарбиадли, хатIах1еркуд, бикIар.

БАЗРИГАН. ХIу наб ригахъулри. Дуракарухъен муруйчирад. Хъайчикадиили, ГIярасайлизи аркьехIе. Илар дила хъулрира лер.

ГIЯНТIИКIА. Пикрикарулхъас. Нешра хьарриис.

БАЗРИГАН. Тилади саби, жавабличи вахъхIи хIерли малтаба. (ГIянтIикIачи гъамирар ва ил уммайрарес валилзан.) Нуша чедиуси чилра агара.

ГIЯНТIИКIА (тяйдириубли). Ну хIед чи сари или гьанбиркулив?!

БАЗРИГАН. Черрерхи, ГIянтIикIа, черрерхи. ХIу рахъ гIяхIризурли, гьандуцес хIейубра.

ГIЯНТIИКIА (кьяркьли). Наб гьамадлив гIяхIил хIелуси адамличил ишгъуна ихтилатлизи ахъес?!

БАЗРИГАН. Ну хIуни чеввикIасли, хатIахIериркуд: гьалжанализирван хIеррирури, гIямрула лигIматуназир румхIяхъули. (Музыка. Далай бучIа.)

Шила дублав шурличив
Ну хIечи хIерли вирус.
РакIес кьабулрикадли,
Дунъя гибсиван вирус.

ГIЯНТIИКIА

Кьакьал уркIила хIукму
Дураасес кьасбирис,
ТалихIла умхьу баргес
Риубцад къайгъибирис.

ГIянтIикIа аркьян. Базриган илис гIелавад гIяшикьли хIерикIар.

Пардав

 

АНЦIБУКЬ АВЪИБИЛ

Урег-ибил сурат

ГIялибегла хъали. ДурхIнала тетрадуни ахтардидирули ГIялибег. ГIянтIикIа арицIур.

ГIЯНТIИКIА. Гьари, лехIизи набчи – хIези дурути лер.

ГIЯЛИБЕГ (ручкара кабихьили, бекIра ахъбуцли). Гьу, дила къакъба, дашахъен.

ГIЯНТIИКIА. Гьалабал хIези бурес дигусири, амма абадбилзули, селра эс хIериубра. Нуша дарх хIердирула кIел дус диркули сари, Нушала виштIаси алкIули ахIен. Наб берхъибси хъалибарг биубли дигулра. ХIед биалли аспирантура ахIенси гьанбиркуси агара.

ГIЯЛИБЕГ. Нуни хIези гьачамалра дурхIни адмалкIахъад ирав?! Нешлисра акIубли дигулигу! Дила шайчибад се хатIа леба!

ГIЯНТIИКIА. ДегIнубала кьисмат гьелизибад дигахъу.

ГIЯЛИБЕГ. Хъу сегъуна сабил балулрив?

ГIЯНТIИКIА. Хъу берхъахъес шуртIрира гIягIнити диъни балулрив? ХIелагъуна биштIаси алапаличил дурхIни абикьес вирару!

ГIЯЛИБЕГ. Цакамси яхIбара: аспирантурара таманбирар, алапара имцIабирар. Сабурла хьулчи – мургьила, бикIар.

ГIЯНТIИКIА. Наб гьанна дигулра адамсун хIерриэс.

ГIЯЛИБЕГ. ГIур нуни се бариша гьатIи? Аспирантура бархьбатасли, алапара имцIабиубли, бусягIят дурхIнани хъалира бирцIули хIебиалли! Ахирра ахир адамла талихI ца яшавлизибцун ахIен.

ГIЯНТIИКIА. Наб пукьалихIибси арцес хIебируси чякала биштIаси дурхIялагъунти гIямру хIейги, миликъ хили мурт аба бакIесара или лехIси.

ГIЯЛИБЕГ (рахIятли, гьимхIевкIили). ГIячихъли бурагу, мягIна хIергъирану.

ГIЯНТIИКIА. Дила никализира хIебухъести нутукь рурсби шериб талхъунтиван хIербирули саби, чархлис дигусигъуна секIал бихули. Ну биалли мурталра хIела къарапултачи хIерлира.

ГIЯЛИБЕГ (децIагили). Гьа-а, анцIбукь илизибу! Хьунул хIулбани чермариркIидну, лихIбани черрикIа бикIути хIязлис буили ахIен. ХIу наб шери давла багьандан ракIибсирив?! ХIед дигусигъуна секIал хIунира исадри, лебил дила алапа хIези лугулрану!

ГIЯНТIИКIА (мискъилладиличил). Чайлис лугути хIела къарапултас се асахъили дигулри?!

ГIЯЛИБЕГ (мар-марли кайзурли). ХIела илди гъай гьархIебизурси масхарализи халбирулра нуни. ХатIариркулри, ГIянтIикIа.

ГIЯНТIИКIА. Ну масхурта ругьули ахIенра. ХIези хIебурили хьалли, бурирагу, жявлил дила илгъуна пикри лебри.

ГIЯЛИБЕГ. Сегъуна?

ГIЯНТIИКIА. Наб хIечил хIерриэс хIейгулра.

ГIЯЛИБЕГ. Се ири, се?!

ГIЯНТIИКIА (тIама ахъбарили, хамли). ГIянцIиублирив! Наб хIечил хIерриэс дигули ахIенра, учитель.

Буреси хIебалули, ГIялибег тIакIилзан. Илала неш хъули арицIур. Мурул-хьунул лехIкахъили саби.

ГIЯБИДАТ (тамашариубли ярга-яргали илдачи суайчил хIеррилзули). Се бетаурли? Сен гъайхIедикIулрая? (ГIурра лехIдеш.) Дубша шин дуцилраяв яра гъай деткахъилив?

ГIЯЛИБЕГ (гIямал буи, кьан-кьанни вехIирхьур). Нушала мискиндеш чекасес хIерирули, ГIянтIикIас нушачирад аррукьес дигули сари.

 ГIЯБИДАТ. Бухънабази илдигъунти масхурти дурути хIедирар. Илди – хIехара дурхIнигъунти бирар, масхуртачира бирхарути.

ГIЯЛИБЕГ (ГIянтIикIачибяхI бекI гьакIбарили). Хьарбаа илизи, масхурти сарил, мар-марли рикIулил.

ГIЯБИДАТ (бекI гIяшкабуцибси ГIянтIикIачи дугьаризурли). Масхурти сари а, дила рурси, масхурти.

ГIЯНТIИКIА (ГIялибегличи хIерризурли). Ишис, аспирантура белчIи, гIялим ветаэс дигули сай, мурул ветаэс дигули ахIенну.

ГIЯБИДАТ. ГIялимтала хьунри хIебирни нуни хIебагьуррагу, абас датарти. Гьаннала пачани илгъуна хIукму барилив гъари?

ГIЯЛИБЕГ. ГIялимтала, аба, гьатIира духути хьунрира бирар, духути дурхIнира бирар. ДурхIя бергес хьулбухъалли, житали ил чяртли бялсахъа, бикIар. Набчир руэс хIейгули, сабабти сари ишини дурути.

ГIЯБИДАТ. ГIялибегли яра нуни хIед хIейгибизеси секIал бурирав? Барирав? Сен гьатIи хапли илгъуна секIал пикрибаррив?! ВегIла хъали-цIа датес илцад гьамадси секIал ахIенгу, дила рурси? Сабаб лебхIели булан хъалибарг хIебехъахъес яхIбируси саби. УрхIлагъуна яшавра лебгу: кьацIлис гушли ахIенра, палтарли дурдили ахIенра.

ГIЯНТIИКIА (закибяхI тIул бяхIчиаили). ИкIавад кацIили Аллагь тиладиикIалра, ну хIушачир рууси ахIенра! Аргъираяв?!

ГIЯБИДАТ. Тавба дара, дила рурси, тавба! Аллагьли цIа кадирхъуну. Я-я астахъпируллагь!

ГIЯЛИБЕГ. ХIу гIур пашманрируд, ГIянтIикIа. Рашигу илди гъай дати.

ГIЯНТIИКIА. Набзи тиладимадикIудая – ну хIушачир рууси ахIенра.

ГIЯЛИБЕГ (харчизурли, някъ хIяртбарили). Рашен, верхIдехI дубурти ахъабину хIуни!

ГIЯНТIИКIА (ГIялибеглизи). БекIбара дила суал, рашусну.

ГIЯЛИБЕГ. ХIуни бекIбарили ахIенрив?! Рашен, унза гIекIили ахIенну.

УнабурхIличир ГIянтIикIала неш рагьаррирар.

ЖАГА. Се тIама-гьама сари ишди?

 ГIЯБИДАТ. КIа-мага барили хIебиалли ишис – ГIялибегличир хIеруус или рархили лер.

ЖАГА (тамашариубсила дарили). ХIерургар гъари. Се биубли, дила рурси?

ГIЯНТIИКIА (рисириили). Наб дурхIни дигулра, неш. ГIялибеглизибад алкIули ахIен. Аспирантура гьанни, я илди акIахъес къайгъи агара ишала. Илбагьандан рархьили дигулра.

ГIябидат уршиличи суайчил хIеррилзан.

ГIЯЛИБЕГ. Бугьтан чебирхьулри. Ну хIейгули риадли, умули аррукьен гьатIи.

ГIЯНТIИКIА. БекIбара дила суал.

ГIЯЛИБЕГ. Гьалабра буррагу, хIуни бекIбарилри. (Унза гьаргдиру.) ХIера, рашен.

ЖАГА. Рашен или дурареркIес хя ахIен иш, ГIЯЛИБЕГ. Сецад наб хIейгасра, гIяйиб хIечиб биубхIели, магьарра кабушили рархьаа.

ГIЯЛИБЕГ (хапли чевсаргъибсиван ГIянтIикIачи дугьаилзан). ТIаш, тIаш!! Нуни хIу чуйнал хIисабрарри набзибад дигIянали таблетка кьяриули. Се дарман сарри итди?!

ГIЯНТIИКIА. БекIла.

ГIЯЛИБЕГ. БекIла дарман муруйзирад дигIянадирес хIяжатдеш лебсив?! ХIерагу ца, сунени виштIаси ахIелкIахъули, набчи бугьтан чебуршули!

ЖАГА. ГьакIарбикIуси цула мурт-биалра кахIебикили хIебуарну, гIяйибкар кайзахъес бурги хIейзахъули, магьар дура, ГIЯЛИБЕГ. Нушала секIал арбухес нуни машинара лебкис. Шантас цIахдиубли, дахъал гъай-мез гIягIнили ахIен.

ГIЯБИДАТ (райличи някъ кабуцили). Нуша мехIурти сарра или гьанбикили, давлачерриэс шери бедибсив уркIи-хIял агарси хIела иш начи?!

ЖАГА. УркIи-хIял лутIи кьяшмазирад дурадикаб хIела – дунгъузла! Итан жершила цулаван чIянкIрарили, дураруркIехIе дикIулраяв!

 ГIЯБИДАТ. Нушани дурареркIайчи, я хIела – къехIбала (тIул бяхIчиаили), я хIела начила яхI абаилив! Аллагь тиладиикIалра хIушачир хIеруус или, сари аркьули ахIену?! Илала чеди, бугьтан чебушесра хIедурриубли! Нуни сукни хибси ил сунечибси хIева булан хIебалтас! ХIедалутив хIуни шантала гIядатуни?!

ЖАГА (рурсиличи вайтIа хIерризурли). ХIези нуни се ира, бемхIур гIяргIяла бекI!

ГIЯНТIИКIА (ца шайчи бекI ласбарили, сунези сари). Базрига гъайличи раили, къалабарикилра.

ГIЯЛИБЕГ (нешличи). Ишди аба-рурси вягIдалабиубтигъунти саби.

 ГIЯБИДАТ. Биахъа. Ишгъуна мер чинаб бургу чули - берхIихIели бусанти, хъянихIели бисанти.

ЖАГА. Нуша сегъунти диахIелра, шантала муйлас дигахъутира.

ГIЯБИДАТ. ХIерагу ца – вачарли рикес аркули раланри?! Базарличи бикуси ахъуша унцла цулбиван гьар къаршиикибсилизи ахтардирирахъес.

ЖАГА. Ахтардибареси хIебиркули калаби хIу, билхIлализибси гамуш! ХIуни, ГIялибег, мурул адам сайрину, хьунрала гъямличи хIеили, нушала къуллукъ бекIбара.

ГIЯБИДАТ (ГIялибеглара Жагалара урга тIашрилзан). ГIялибегли я магьар кахIебуршу, я нушани рурхьули ахIенра. Нушачир руули риалли – иш хъалира, иш мурулра. ХIеруулив – итди гьаргти унзара, хъалтали хIедуцибти ихди гьундурира. Нушала гIур цархIилти гъай агара!

ЖАГА (рурсилизи). ХIези буреси лебну, дура раши гьари. (ГIялибеглизи). ХIу учитель сайри, гьаларла гIядатуначи хIермайкIуд.

Нешра рурсира гьаргала дурабулхъан. ГIялибег дивайчи гугирур.

ГIЯЛИБЕГ (пашманни). Сегъуна даражаличи дикилра гъари гьанна нуша – интеллигенция! Нушала алапаличиб дукаркIулигу. Хъямчибира базригантирацун саби адамтази буйгIути. Марлира, давлализибцуну адамла талихI?! РухIла давла хIисаблизи кахIейсуси се пачалихъ бируси?! Юх, гIядатла адам давлаличилацун пикриикIес хIейрар! Итцад дигичерси ГIянтIикIа давла гьанни мехIурриублив?! Нешли черралкIахъив?!

ГIЯБИДАТ (уркIецIиличил). Вари, абала, вари, кьакьамайкIуд. ХIед рахъ гIяхIил ригахъули или ну селра хIерикIули хьалли, ГIянтIикIагъуна хьунри муйлала хъябличиб даим чебхIебиркуси декIси махгъунти саби. Нушачи сарукила илиникIун хъулиб ца анкIила кьякьцадалра секIал хIебариб. Ца унцли дукI хIебиху, ца хIуцун узули, се яшав, се хъали-цIа детарара?!

Нешра уршира хъулиб гъайбикIули лебли, дураб шутIбикIули Жагара ГIянтIикIара чебиур.

ЖАГА. Сен хIу ишдази ну хIушачир рууси ахIенра рикIусири? Нуша кьалли вягIдаладиубтири, чули рархьеси сабаб бургехIе или.

ГIЯНТIИКIА. ГIялибеглизи хIезивад виштIаси алкIули ахIен рикIуси, сунечиб гIяйибли ну аркьни кабизахъес багьанданра кьалли.

ЖАГА. Се рикIадра, хIу хIеруулрив – мас архIехахъу. ГIялибег нешличи лехIихъули сай.

ГIЯНТIИКIА. Набра, неш, мас ахIенну, масла дяхIцIи булан дигулра. Амма ГIялибегли рархьайчи лехIкахъасли, Базриган ветахъесгу или урухкIулра. Сунела хьунул цархIилтачил кIушрикIни балухIелира, ил «чехIериутира» къаршибиркургу.

ЖАГА. ХIела яхI ахIебиули гIергъи пайда агара. Ну арацIасли, къалмакъар дахъдирарну, хIуни кIел секIайчила хъуммартид: сеннира магьарра кабушахъа, хIела кьаниларти мургьи-арцла ваяхIра дублёнкара хес кьасбара.

ГIЯНТIИКIА. ГIяхIна, неш. ХIехахъалли, се бариша?

ЖАГА. ГIур се биру! Давлачевси чеввикIили риадли. Жан духаб чулану, магьар кабушахъа.

Жага аркьян, ГIянтIикIа хъули арцIур. Хъа гIямзилабси кьаниличи гъамрирар, иларти ваяхI чIябарличи лайдикIу, тIулбачи мургьила тIулкмира, някъбачи кIикIел кулехара чергьу, хъябличи рахаж чейхъу ва дубленка гIебсайхъу.

ГIЯНТIИКIА (мура гьала хамли тIашризурли). Масра хIедал биаб, давлара! Гьанна магьар дура. И досвидание!

ГIЯБИДАТ. Аргъа, ГIянтIикIа, иш хъулибад буребацадалра секIал архIехид хIуни. ТIулбачирти илди тIулкмира, ца хIела бати, някъбачирти кулхмира, хъябличибси рахажра, лихIбачирти урцIрира ит устулличи кадихьа. ДублункIара чеббати. Ил секIал хIебарадли, хъулирад дурахIерулхъад, я магьар кахIебуршу.

ГIянтIикIа ГIялибегличи суайчил хIеррилзан. Ил, бекI гIяшбуцили, лехIкайхъур. ГIянтIикIа ташмишрикIули гIяхIцадхIи тIашли кавлан. ГIур хапли тIулкми, кулхми, урцIри, рахаж къяб-къябдарили чIябарличи иргьу. Дубленкара чеббатурли чIябарличи лайбикIу, иличи четIяхIрулхъан, багьриубли вяврикIар.

ГIЯНТIИКIА. ХIерая, кьяртIилис деркабая!

ГIЯБИДАТ. ХIечибси ил хIевара нуни хибси сабину, чеббати! ДяргIиб шинни бицIибси шинчча буртли бицIили архис рикIулрив!?

ГIЯЛИБЕГ. Рати, аба.

ГIЯНТIИКIА (гьимиличил). Гьу, гIур набчиб чебла лебу?! Кадуша хIябалра тIалакь!

ГIЯЛИБЕГ. Белики, пашманриэши? Пикрикарухъеши?

ГIЯНТIИКIА (гIясили). ХIебурахъили хIевъули виадли – наб цархIил дигахъулра! Гьалжанализирван ну хIеррируси!

ГIЯЛИБЕГ. ХIера, духану рукьен. (Магьар кабуршу.) Халаси давла баргаби, талихIчерли хIерриэс багьандан!

Тамашали гIелалара силтIбарили, ГIянтIикIа хъулирад дурарургьар.

 ГIЯБИДАТ. Балагь чеббикиб (пашманти музыка. Далай бучIа).

Давлачевла давлали
ЦIерхьмадараб хIела чарх.
ЦIили варгиб дунгъузли
Шаламадаркь хIела дяхI.

ГIЯЛИБЕГ (далай бучIа)

Шараб шин сари или,
Шадли дубша дуцира,
Загьрула держ дуили,
Закъумли велкъахъунра.

ХIечивяхI шуряхъибил
Шуриааб дила чарх,
Шуряхъили хIеръибил
Шинааб шараб хIулби.

Пардав

 

АНЦIБУКЬ ШУИБИЛ

ВерхIъибил сурат

Шагьарлизиб Базрига хъали. Столличир дуку-дужути. ЧIябарличир ва хъа бяхIяначир кьалтинти. ДяхIимцIа гьалар нудби ва никуби дикули ГIянтIикIа.

Музыка

ГIЯНТIИКIА (разили далайрикIар)

Къярдла лутIми къаплайсван –
Кьакьалири ит хъали,
Дянг авлахъ гурдалисван –
Гьарзабиуб иш хъали.

Гьалжаннизиб чатIаван
Гьайбатли хIеррирулра,
Ахъ дубриб мукьараван
Давлализир румхIулра.

(Столличи гъамрирар, жагаси пигьалализи картIили, шампанскоела хупIбиру). Гьай, лаззат я! (Лерилра тIулбачи мургьила тIулкми, хъябличи чумал рахаж чергьес рехIрирхьур). Ишди гьанна дила урхьула дублар къажлицад лергу! Пякьир учительли авал-шел тIулека халаси хазнализи халдирулригу. ХIябилра духуси барра кьалли иличирад дуракарухъни. (Някъличибси мургьила сягIятличи хIеррилзан.) Базриган хъули чарухъес вецIал-вецIну шура минут кали сари. Нуша хъайчикадиила ишбархIи кIел дус диркули сарину, чина-биалра дякьи, нушабцун биштIаси юбилей бирехIе викIусирину, кьанхIейэсгу. Сагаси сягIятгъуна сай дила Базриган, дурусси. Чарирар гьанна.

Унзализи кьутIла тIама.

ГIЯНТIИКIА. Чумал минут жявли чариуб. (УнзаличиряхI хIерризурли.) Умхьу хIезибра лебну, хIуни абхьа.

ГIурра кьутIла тIама. ГIянтIикIа унзаличи гъамрирар, унзала хIуйзибад дура хIеръиру. Илар тIашли жагьси хьунул адам.

ГIЯНТIИКIА. ХIед чи гIягIнили?

ЖАГЬСИ. Базриган.

ГIянтIикIани унза ибхьу.

ЖАГЬСИ (хъули арицIули). АрацIес асубирару? Базриган хъулив агарав?

ГIЯНТIИКIА. Гьанна чарулхъуси сай. Карии. (Жагьси уталичи карирур).

ЖАГЬСИ (суайчил ГIянтIикIачи хIеррикIули). Базриган хIед чи сая?

ГIЯНТIИКIА. Мурул сай.

ЖАГЬСИ (тамашариубли). Мурул?!

ГIЯНТIИКIА. ГIе, мурул...

Базриган хапли хъули айцIур. Умхьу унзала шайзибси шкафличи кабирхьули, Жагьсини ил чейу.

БАЗРИГАН (уркIсавхъи Жагьсилизи). ХIурив гъари?

ЖАГЬСИ (рачарархили). Иш раргили, дигIянаикилрив?! Набзивад дигIяникес багьандан уилригу гостиницализив хIерирулра викIуси. Чумилра гостиница ахтардидарра – хIела къел-хIерзи даргес хIериубра. ИшбархIи, ца игъбарлисван, хIела мер-муса далуси къаршиикиб.

БАЗРИГАН (вяхIла ранг дарсдирар, урузиубли хьунуйчи хIерилзан, Жагьсиличи дугьаилзан). ГIур гъайкадулхъехIену, гьанна аррукьен.

ЖАГЬСИ (цакьадар кьяркьли). Ну риргIяриргес къайгънамаркьуд. Нушала ургала ишизибад дигIянабарес хIяжатдеш чебиули ахIенра. ХIела се пикри сабил бура.

Буреси хIебалули, Базриган тIягIямагарли тIашкалзан.

ГIЯНТIИКIА (Жагьси вяврирули). Дила муруйзибад се дигулри? ПяхIли ретахъи!

ЖАГЬСИ (гIясириубли). ХIугъуна хьунул рирару – накрашенная кукла!

ГIЯНТIИКIА (гьимили руржесриили черулхъан). Агь, подлюга, мокрая курица! ХIела нуни..! (Жагьсилис хункIи дирхъу.)

Базриган ургаулхъан, ГIянтIикIа рирхъес даимрирар.

БАЗРИГАН (Жагьсилизи). Илди гъай-мезличил гьанна иша хIеракIили, набчилцун гIур гъайрухъес рирадигу! ГIур иша лагмарилзад!

ЖАГЬСИ (децIагили). Набчи хъайчикайрус или хъяма иркьули, ил аждагьачил хIеркайрули валанри?! Иличи че – ритра ритахъира, хIу хIерсайкIули. Ну миликъ сари или гьанбиркулив, ганзбарес вируси! «ГIур иша лагмарилзад!» - ил балан хIела бегIла гIергъиси хIукму!

БАЗРИГАН. ГIе, ил саби! Рашен ишарад!

ЖАГЬСИ. Илди ламартдеш дурхъали кадилзан хIед! (Рисириили, шкафличибси умхьура чехIебаэсли хапбарили, къалабали аркьян.)

Базриганра ГIянтIикIара, цаличи ца суайчил хIербикIули, хъулиб дадкабилзан.

ГIЯНТIИКIА. ХIу илгъуна виъни хIебагьурра нуни.

БАЗРИГАН. Сегъуна?

ГIЯНТIИКIА. ГьарракIибси дигахъан, гIеларикибси хъумуртан. Нуйчирра жагаси цархIил къарширикалли, нура дугIиурав, ит Жагьси кьяйда?

БАЗРИГАН. ХIу илдигъунтази руйгIули виасри, бусягIят магьар хIедирхьахъира. Гьар гIяхIризурсиличи хъайчикайруси ахIенгу.

ГIЯНТIИКIА. Къунба угьулри. Ит се рикIил хIунира аргъири.

БАЗРИГАН. Нуни ит гIяхIил ралусира ахIен. ГIяхIризурли, ца-чумал дуги варх кайхьунсири. МехIеагар риргIяриргес мурул адамли се-дигара чейсу, буру.

ГIЯНТIИКIА. Нура илгъуна рургус, хIечи рирхаурли муруйчирад дуракарухъунси?

БАЗРИГАН. Набчи гьиммаруркIуд, ГIянтIикIа: хIу рагьайчи сайри итичил къаршииркуси. ХIуни аргъиригу – итини ну хIерирути мер-мусаалра далули ахIенри.

ГIЯНТIИКIА. Илдигъунти «гIяхIли» хIела гIурра бургар. Илди лебхIели, се барес ну сарукибсира?!

БАЗРИГАН. Вари, вари, дила лагьа. ИшбархIигъуна анцIбукь гIур тикрархIебирарну, уркIилизи къизмабикIахъид. (Гъамиубли уммайриру.) ХIу игит руилри: наб кьадин жавабра бедира, гIяхIил дикра дикахъири, гIур иша лагхIеризесли. Сепайда, нушаб дигусиван шадибгьуни барахъес бетхIеахъур кьадин. Гьанна чина-биалра дукьес кьанни саби. Раши, нунира кумекбирисну, ванаси беркала хIядурбирехIе, холодная закуска сегъуна-дигара нушала леб.

Беркала хIядурбирули, мурул-хьунул хъулиб къунзбикIар. Столличи жура-журала берк-берж кадирхьу. Кабиръур.

ГIЯНТIИКIА. Эгер хIуни Жагьсилизи иткьяйда чIумали хIебурибси виадри, ну хIечирад черхIерерхес асубири.

БАЗРИГАН. Нушала мекъ барила дурусли кIел дус дикибси бархIи гьимдукIес асухIебирар. (Пигьлумази коньяк кертIу.) Рирхаи, ГIянтIикIа, нуни хIед къянадеш хIедарра. ХIу наб дебали дагахъулри. Наб дигуси барили шери ракIибхIели, хIела хIурмат хIебарес хIейрус.

ГIЯНТIИКIА. Наб хIура хIейгахъули риасри, итгъуна секIал барес рирасив! Наб шампанское картIа.

БАЗРИГАН (хьунуйс шампанскоела кертIули). Баркалла. Дигай пулукIхIедирехIе. Дерхъаб! (Пигьлуми кьутIдирули, кIелра бужар, букар...)

ГIЯНТIИКIА. АркьухIели хIед урехи багьахъургу итини. Се гьунарла адам сари?

БАЗРИГАН. Буррагу, гIяхIил хIералас. Вайнукья сайли, муруйчирад аррякьунсира рикIули лерри.

ГIЯНТIИКIА. Ламартриэс асубирарну, мяхIкамли уэн. ГьимрукIибси хьунул адам се-дигара барес гIелумхIерилзан.

БАЗРИГАН (някъ гьакIбарили). Э-э, рашахъен. Сабигъунти чехIебаилрав! Амма ца шайчиб хIелара бархьси саби – урехила хIянчи саби дила. Дахъал арцличил вашуси адам сайра.

ГIЯНТIИКIА. ХIезир илди лерни багьалли, хъярла шинван ветихъахъури. Базриган, дила ца пикри буришав?

БАЗРИГАН. Гьу, гьари, башахъен.

ГIЯНТIИКIА. Нушала яшав ишаб сецад-дигара гIяхIси саби: дигалли мургьи-арцла ваяхI лер, дигалли пачкнадли – долларти. «Гьалжанализирван хIеррирури, гIямрула лигIматуназир румхIяхъули» или итхIели хIуни дурибти гъай дархьтили урдухъун. Ну сецад разили хьалли, хIечи гьимикарти цархIилтира биэс асубирарну, Дагъистайзи чардухъахIелли?

БАЗРИГАН. Дурала пачалихъунала фирмабачил дила бархбасуни дихIес, илабад бихуси товар мерлабирес, заказчикуни бургес къиянбулхъан. Амма хIуни наб ца гIяхIси секIал гьанбикахъири: МяхIячкъалализиб юрт асили, хIербиахъес ила адамти кабалтехIе. Хъулрала халаси ужра сабашар, бамсриихъес нушара урга-ургади дашехIе, ца-кIел хъали нушаб акьули датурли.

ГIЯНТIИКIА (хъябруцриркур). ИлгъунахIелири хIу наб ишцад дигахъуси – кункли халаси давла бучес балуси.

БАЗРИГАН. ГIе, заманаличил валкайкили ганзикIес балес гIягIниси саби. Майъа картIили узули-декIар давлачеввиэс вируси ахIен. Илди масъултачила гIурра дарх пикрикадулхъехIе.

ДяхIличи пардав баршибти хIябал бекIбяхъ хапли хъули бухIнабиркур ва, селра барахъес Базригайс пурсат хIебедили, илис бирхъесбирур, четIяхIбашар. ДекIси бяхъли ГIянтIикIа къагъриру. Аргъайзибад бухъунти илди чIябарличи чIикьбитIунхIели, вайнукьабани хъулибси лебилра давла арху. ГIянтIикIала ва Базрига мургьила ваяхI черуду. ГIур пяхIли бетихъур. ГIянтIикIа аргъайчи ляркьян.

ГIЯНТIИКIА. Вай-й-й, дила Аллагь, се баришара?! (Муруйчи гъамрирар. Ил цIумикIар. Телефойчи дуцIрулхъан – «скорая» бакIахъес тиладибиру. Алавчар хIеррилзан.) Гьуя-я! Се гIямал баришара! Хъали хIяшкабарилигу! Итдицад дила мургьи-арцла ваяхI, хрустальти, дурхъати палтар, кьалтинти! Чизи гIярзрухъиша! ГIярзрикIасли, илдани каруршура. (Хъа рухIнар сарулхъан.) Лерилра кьани-тIакьара дацIдарилигу!

ЦIуба халатунарти кIел мурул адам хъули абицIур.

ХАЛГIЯТЛА ВЕГI (аргъайчи хIекIибси Базриган ахтардиварили). Ишала кьяшми дячи сари. Къагъдешлизив сай.

Базриган азарханализи арху. ГIянтIикIа рисули чIябарличи кариръур.

ГIЯНТIИКIА. Ишар ну чили кьацIли ралхусира?! Иличи че, секьяйда хIерариша, эгер мицIирли калалли, ит чулахъ?! Гьанбалрав ну къакъличив вихес. Чулахъуни хIукуматли саби хIербирути. Чевверхи, Базриган, дила аги хIунира аргъа. ХIела бунагьунас ну кьурбанриэс хIерирус. БекI дигалли, гьу, кьяшми, ДагъистайзидяхI! (ЧIума-чIумариубли арилзан, бекIла гъез далдиру, уталичи кариръур. ПикририкIар.)

(Хапли харчризурли, хъа гIямзилабси чIябарла ца уркьули убису ва илабад биштIаси бергараг кайсу. Гьаргбиру - илар лер мургьила тIулкми, рахажуни ва урцIри. Разирирар.) Ишди хIедаргнира ца игъбар саби. Дицили, гIяхIти палтарра исис, Дагъиста тахшагьарлизиб ца биштIаси хъалира бурцис. Шилизиб дила яшав бетхIерар: цаибилгъуна, кIиибил муруйчирадра гьаррухъун или, шанти набчи душмайчиван хIербикIар. Я чилилра шери хIекура. Ну кьалли гIямрула гIямру гамъали руэс хIерирус. КIиибилгъунара, шилизир хьунул адамтани къакъ булкIахъули дирути хIянчи нуни дарес хIерирус.

Шагьарлизиб жагаси чархличи саби хIербикIути. Ца давлачевси ясируцес риишагу. Амма наб гIур я учительти, я базриганти хIейги – илди цалра баракатхIебиуб. Сепайда, шагьарлизив чи чи саял бусягIят ахтардиварес къиянни кьадин. Нугъунти жагатира илаб бахъал бургар. Се гIеббурибал, нешалра мицIирли калунси риалри. Чинабад-биалра ца игъбар дакIубухъесгу. Жагасилис дигай дягIли лерху, бикIар. Сен-дигара биаб, жагIялал аркьяс! Ит харабат набчира сариурал чили бала! ХIерагьесли ар-кьяс.

Музыка. Пашманси далай бучIа.

Вай дила анцIдукьала
Дагьалри дубуртани –
Даргдердили дайларад,
Дулхъи анцIкьила хIуркIби.

Дила дисути хIулби
Чедаалри урхънани –
Дегъубли лутIикьутIли,
ЛибхIли дирцIиб нургъбани.

Пардав

 

АНЦIБУКЬ УРЕГ-ИБИЛ

ГехIъибил сурат

Дагъиста тахшагьарлизиб биштIаси хъали. Мегьла буркьа ца кровать ахIи, илар селра-декIар ваяхI агара. Столличир газетаби хIердирули, жагали регIриубси ГIянтIикIа чериур.

ГIЯНТIИКIА (пашманни). Гьу, иш пукьалихIи гечриубли, ца дус язихъли хIеррирулра. Чархла ца кам саби дила жагали лебалси. Итди мургьила ваяхI дицес калунти хIедиалри, гьанна се букусири нуни?! ЛигалихIир хяван къяйцIрикIули, дугIли замана арбякьун. Гьанна ишичил гьарбизесгу. (Ца газета декIарбиру ва ахъли бучIа.) «Республикала Халкьла Собраниелизи депутатунас кандидатуни». (Кандидатунала цала суратличи тIул чекабурцу.) ХIушаб кумекбирисра или, гьунивиухIели, ишван набчи ванали, дигайла хIерли хIерикIуси цархIил хIейуб. Ишис ну ригахъулра. Дусмала халаси-дигара виаб - арцлира гIяхIил пухIикIули сай, сай вегIси иномаркара леб. Дила пикрумас диргалабухъеси ишала чIянкIли ца секIал саби лебси - дурхIялис раибси хьунул. Риаб гьатIи. Иш ватхIейис. Сай гIевурцути чум баргирал бурисну парклизи вакIи ибхIели, дебали разивиубгу. ВягIдаладиубси замана баили саби. (Арилзан, дяхIимцIалаличи хIеррилзан, нудби ва бекIла гъез хIяршдиру, далдиру.)

Хъулирад ГIянтIикIа дурарулхъан. Сцена камси заманалис цIяббирар. ШалабиубхIели, адамти агарси мерличи Кандидатличил гъайрикIули ил чериур.

ГIЯНТIИКIА (разили). ХIу гIевурцути хIябцIали баргилра. Илдала гьариллира, бегIлара камли, вецI-вецIал бургули саби. ХIебиалли, дила шайзибад хIябдарш абиули саби. (Кандидатличи буцIарси хIер алтIахъа).

КАНДИДАТ (талихIчевли). Халаси баркалла хIед, ГIянтIикIа. Ма ишди арцра, се-биалра чус асахъес деда. (Арцла пачка гьабурцу). ХIедра дихIен.

ГIЯНТIИКIА. СейкIулри гъари хIу, наб селра гIягIнили ахIен. Нуни къайгъибируси – хIу дила уркIили кьабулварибхIели саби. Амма цархIилтанира избирательтас арц лугулину, цакамти нушанира дедлугехIе гьатIи. (Арцла пачка сасили, илдазирад камтигъунти чардиру).

КАНДИДАТ. ГIяхIсицунра ахIи, дебали жагасира лерри кьалли хIу, ГIянтIикIа.

ГIЯНТIИКIА (уруз-хIяцIсила гIердарили, бекI гIяшбуцили). Масхурта мавгьудгу хIу.

КАНДИДАТ. Масхурта чина угьусира, дила уркIи хIед гьаргбарес булан урузкIулра.

ГIЯНТIИКIА. ХIечи ну рирхухIели, хIуни-декIар сен уркIи гьаргбарес хIейрусири?

КАНДИДАТ. ГIяхIна. ХIела мурул левсив?

ГIЯНТIИКIА. Мурул левси виалри, хIечил ишкьяйда гьунириэс рирасив? Иличирад дуракарухъунхIейчирад ца дус дикили сари.

КАНДИДАТ. ДигIяндеш хIебиалли, се багьандан?

ГIЯНТIИКIА. Паркьагарси, держлукь сайхIели.

КАНДИДАТ. ХIу илгъуна тIалабчерси, яхI-хIяяличи чекаризурси сархIели бурги бегI гьалар къарширикибхIелил наб гIяхIризурси, гIур хъумартес хIейруси. Гьайгьай, хIела жагадешлира ясируцира.

ГIЯНТIИКIА (БуцIарси хIер иличи атIахъи). ХIела хьунул?!

КАНДИДАТ. ХIуни хIергъибсив: дигайли «ахIен – саби» хIедала.

ГIЯНТIИКIА. Набчи дигай дихьилра эс дигули хIейиши?

КАНДИДАТ. Эс дигули ахIенрану, дихьилра. (Иличи гъамирар, байрарес валилзан).

ГIЯНТIИКIА (гIеларяхI хихриубли, гьимрукIибсила дарили). Ну къехIба-мага сари или гьанбикилив?!

КАНДИДАТ. Илгъуна вайси пикри бакIибси биалри, хIечи гъамра хIейрира. Ну марли викIулра – хIу наб ригахъулри.

ГIЯНТIИКIА. Нура къунба ругьес хIерирус. Набра сецад дигули хьалли, дила мурул ахIенси хIу набчи гъамиахъес хIерирус. ХIела пикрира мабиаб илгъуна.

КАНДИДАТ (пикриулхъан). ГIяхIна. Гьалавла муруйчил магьар бехъубсив?

ГIЯНТIИКIА. Динна лерилра секIал далуси адамличи рякьи хьарбаира: «Муруй ну хIеррарес вирули хIейалра, илини дила магьар кабуршули ахIен. Нуни се барес рируса?» Илини иб: «Илгъуна анцIбукьлизиб магьар бехъес сари хъунул адамлизиб ихтияр лебси саби, фасхла тяхIярли.» Илкьяйда бекIбиубси саби дила анцIбукь.

КАНДИДАТ. ХIебиалли, хIу азадси хьунул адам сарри. Раши ишгъуна вягIда бирехIе: нушаб магьар дирхьахъехIе. Ну хIечи вашус.

ГIЯНТIИКIА (кьабулагарли). Юх, ну хIуни райхъу хьунулла даражаличи, ригнабала даражаличи, каралтулра. ХIейги наб дигIянаси хьунулли риэс.

КАНДИДАТ. Выборти тамандиубхIели, дила гьаннала хьунуйчила дарх пикрикадулхъехIе. ХIура дила юртлизи аркури. Яхши? Иш – дила хапси хIукму ахIен. ХIу азадси риадли, ил барес гьалавал ну пикриикIулри.

ГIЯНТIИКIА (жаваб чархIебарили пикририкIар, гIур кьан-кьанни рехIрирхьур). Набчил дарх гIямру деркIес мар-марли кьасбарили виадли, магьар дихьахъес кьабулриркус. Амма дила заманалис буцибси биштIаси хъали саби. Шилизирад ракIибсира ну.

КАНДИДАТ. ХIела хъайчи ахIенгу нуни дигай дихьибти, хIечи сари. Сен биалра, камси заманалис яхIбирехIе.

ГIЯНТIИКIА. ХIу викIуси биаб.

КАНДИДАТ. Нушаб гьачамлис, дила пикрили, мукърира шадлихъунира гIягIнили ахIен. Раши, магьар дихьахъес мижитлизи аркьехIе.

КIелра аркьян. Сцена камси заманалис цIяббирар. ШалабиубхIели, ГIянтIикIа сунела хъулир кариили чериур.

ГIЯНТIИКIА (рачарархили). Вай сунела вегIебш, дила-декIар мурталра сен гьархIебилзуси! Саби бетерхес багьандан арцли пухIбикIухIели, лебил кандидатуни давлачебти бургар или гьанбиркусири. Выборти тамандиайчи магьар хIедихьахъес гIягIниси буилри. Байтарман, ветхIерхур кьалли!

Музыка. Далай бучIа.

Шишим-шишимрикIули,
Шинаурли чархра леб.
Пикри-пикририкIули,
Аркьули гIямрура лер.

Хъули Кандидат айцIур.

КАНДИДАТ (пашманни). ГIегуди сасибти арц чардарес багьандан, ишбархIи ну-вегIси юртра бицес чебуркъуб.

ГIЯНТIИКIА (кьабулагарли). Даг иномарка бицири, ишбархIи – юрт. ЖагIял се бирцида? Ну?!

КАНДИДАТ. ГIур се бариша гьатIи! Депутат ветаурси виасри, гьар секIал далкадиркутири. ЧархIедарасри, анцIбукь гьатIира вайси даражаличи бетирки.

ГIЯНТIИКIА. АхIерси Кандидат, ца секIал бархьли буришав? Нушала хъу дарх хIедухъар.

КАНДИДАТ. Сен? Депутатли ветхIерхурли, дунъя буи хIебиэсгу! Нуша ара-сагъли диахIелли, селра камхIебирар.

ГIЯНТIИКIА. КIел хьунул чинаб хIербирути хIуни, цара урхIласун хIеррарес ахъри агара хIела.

КАНДИДАТ. Ягъари, ГIянтIикIа, ит рурхьис, нушаб ЗАГС бирахъехIе. ХIедра чинаб-биалра хIянчи бургехIе, нура акьули хIевъусра. КIелра дузухIели яшавра бетарар.

ГIЯНТIИКIА. ГIягIнилив наб хIела ЗАГС. Илини дила даража ахъбурцулив? ДурхIялис раибси хIела хьунул ну багьандан рархьаахъасли, Аллагьли набчи цIа кадирхъу.

КАНДИДАТ. Чинара хIела дигай?! Давлачевси депутатрив хIед гIягIниси? Аллагьла къакъла гIела дигIянамариркуд.

ГIЯНТIИКIА (кьяркьли). ХIечил рарх хIерриэс хIейгулрану, дила бекI хIейзахъули арукьен.

КАНДИДАТ. ХIу кьалли дила магьарла хьунул сарри.

ГIЯНТIИКIА. Дила тIалабуни тамандирес хIела я ахъри агара, я вирхIейруд. ХIебиалли, магьар нуни ихъулра.

КАНДИДАТ. Муйлачир хIу къугънариркьулри, хIела фасхра хIура! Мукукури даргес арбашуси эмхIегъунари хIу, лихIбира детахъахъили чарбируси! (Хямкдарили унзара, аркьян).

ГIЯНТIИКIА (децIагили рисириили). Гьуя-я! Дигайра жагьдешра хIябкьайтачир дутIили уррухъунрагу. Бац някълабли зубартачи хъямрикIули калира. Шилизирси дила унра – ятим рурси, учительлис шери рякьи, кIел дурхIяра баркьиб, гIядатла яшавра леб. Сай ГIялибегра гIялим ветаурли, шагьарлизив хIеркайрули сай. Илизибад дурхIни алкIули ахIен ибси дила бугьтанра шантас цIахкабиуб. Се леба гьанна дила?! Даари цундеш лер. ХIянчилра агара кьадин. Кандидатла дикибти арцра тамандиуб. Чили ралхусира?! Секьяйда хIеррирусира? Мурталра мура хъябличи кариили хIеррирус или пикририкIирагу! Илра адам сайну, сегъуна-дигара анцIбукьлизи викес асубирни пикрихIебаррагу! ХIера Базригайс се бетаура.

Музыка. Кьакьадешлизиб далай бучIа.

Аллагьла балагь бакIаб
Мас гьанти дигайличи,
Сай бекIлил узхIевзути
ГIямру дигусиличи.

Пардав

 

УрчIемъибил сурат

Шагьарла кьакьа. ГIянтIикIас хапли ГIялибег къаршииркур.

ГIЯЛИБЕГ. ГIяхIси сягIят бираб, ГIянтIикIа?

ГIЯНТIИКIА (уркIсарухъи). Гьуя, хIурив гъари, ГIЯЛИБЕГ. Мубаракирулри хIела пикруми детерхниличил – гIялим ветаъниличил.

ГIЯЛИБЕГ. Баркалла. (Тикрарбиру). ХIед гIяхI сягIят бираб?

ГIЯНТIИКIА. Нушагъуна абдултас «гIяхI сягIят» чинаб бируси! ТалихIагарсира ну.

ГIЯЛИБЕГ. Гьанна-декIар сен абдал ретаурсири?

ГIЯНТIИКIА. Нуни кацIибси цалра ганз гьархIебизур. ХIуни бурибси дила бекIличи бакIиб.

ГIЯЛИБЕГ. ВегIла хатIаличи мукIурвакIнира гъабзадеш сари.

ГIЯНТIИКIА. ХIела пикрили, се саби дила бегIлара халаси хатIа?

ГIЯЛИБЕГ. Давлаличи гъаргъдеш. Чархла жагадешра талихIра вегIла бузерили сари дихIути. Бузери агарав – илди пулукIдирар. Бузерилизи ахъи. Гьу, гIяхIил калаби. (Аркьян.)

ГIЯНТIИКIА (сарицун кьакьала тIашризурли). ХIерагу ца, итцад ну ригахъуси ГIялибегра мучлахIерарили арякьун. Марлира, илгъуна даражаличи ретикилрав? ГIякьлу бурнилисра баркалла сунес. Чинар-биалра тукенчилилра рузес риишагу. Набчила кьакьаикIули, Базрига шилизи бакIили кагъар лебри, бикIаргу. ГIяйсначив вашесра вирулра викIули. Чевверхахъес тиладира барили, иличи чаррухъасли? Илала тукеннихIирра рузули, ил чулахълис кумекра бирис. ИлхIели набчибад Аллагьра шантира чебберхесгу.

Сценаличиб дабзти цIудара гъалгултазибад берхIила журуга къяжа гьаббикIур, илала шалати нуранани ванза чахьбиру, разити макьамти гIералгьан, гIур – поездла тIама. Поездличи арицIуси ГIянтIикIала къаралди гьанарар.

 

Пардав.