Кӧтӝож
Вовкалэн ымнырыз суаськем. Эрезезлэн (штаниезлэн) бур кукыз пыдес вылланёзяз ӝутэмын. Бадӟымъёсыз пиос озьы дэмлазы. Сотэк угось эрезь кук великлэн жильыез улэ пачка.
Зэм, Вовкалы ворттылэмезлэсь тросгес корт валзэ тупатъяса выроно луэ. Вуж маке – со ӝог тӥяське. Выльзэ басьтыны нэнэезлэн уждунэз уг тырмы. Та великез но, бубытэм будӥсь шӧртчи пиез жаляменыз, куштӥськем корт пӧлысь люкаса бичаз музон ульчаын улӥсь Николай агай.
Вовкаос сямен ик, мемиеныз гинэ улэ Николай. Армиысь пал пыд луыса бертӥз. Афганистанын, пе, служить карем. Бадӟымъёсыз пиос Николай агаез, ачиз ӧвӧл дыръя, Чут Микол шуо. Сыӵе дыръя Вовалэн кӧтыз ӝож луэ. Ассэ исало кадь потэ. «Э-э, тодэ вал, мар но лэсьтыны уг быгаты Коля агай. Вот мынам атае ке со луысал...» – ас понназ малпалляз Вовка. Али но тазьы уйбыртонъяз, корка ӧссэс усьтэмзэ ик ӧз вала кадь.
– Ой кӧты-сюлмы! Ма нош ик штан куктэ кесемед ук, лэся?! – пиез вылэ омырскиз нэнэез. Но солэн куараез таяз учыре малы ке но лек ӧз поты пияшлы.
Пыласькон доры мыныкуз гинэ Вовка адӟиз ӝӧк сьӧрын пукись пиосмуртэ. Шуак луыса, интыяз ик пумем пизэ нэнэез ӝӧк пала донгиз:
– Я, мар долкад? Тодматскы куноен.
«Оло, со мынам атае? – чилектӥз пияшлэн йыраз. А мар-о?! Вань эшъёсызлэн атайёссы вань. Иське, Вовкалэн но луыны кулэ!
– Тон мынэсьтым великме лэсьтод-а? – тодмотэм пиосмурт доры чик муртатэк вамыштӥз Вовка.
– Нырысь тодматском. Монэ Рудик агай шуо, – пияшлэсь пичи кизэ юн кырмиз воргорон.
Пиосмуртлэн нимыз но, ӵыжектэм ымнырыз но Вовкалы ӧз яралэ. Озьы ке но, великен ворттылон мылкыдыз вормиз. Пияш утыр великезлэсь усьтонъёссэ но насоссэ вуттӥз ини.
– Ойдо, иське, липет улэ. Великез корка пыртаны нэнэе уг лэзьы, – пиосмуртэ китӥз кыске Вовка.
– Дугды ай, пичи воргорон. Мон туннэ уг ваньмиськы. Вуонояз шутэтскон нуналам тупатъялом, ява, – пияшлэсь йырсизэ тугаз но ӧс пала вамыштӥз Рудик агай.
Арня ӵоже Вовка чидатэк возьмаз пиосмуртлэсь лыктэмзэ.
– Таяз арня нуналэ ке ӧз, вуонояз лыктоз, – буйгатъяз пизэ нэнэез.
Зэм но, кык арня куспатыса, Рудик агай Вовкаос дӥне пыриз.
– Мар, Вовка, нырдэ кыскаськод? Оло, малы ке йырыд кур-а? – пияшлэсь ӵуж йырсизэ пештыръяз воргорон. Солэн сыӵе выросэз Вовкалы ӧз кельшы ке но, куатаськонэн йырин ӧвӧл.
– Великме тупато шуид вал ук, – ёртэ пияш Рудик агайзэ.
– А-а. Зэм, озьы шуи вал кадь. Только мон таяз учыре но уг ваньмиськы ведь. Озьы ик медло: вуонояз арняе мон тыныд выльзэ басьтыса ваё, – оскытӥз пияшез пиосмурт.
… Нуналъёс ар кузьда кыстӥсько кадь потэ пияшлы. Олокӧня пол син азяз пуктылӥз ни со выль великсэ. Эшъёсызлы ушъяськыса но вуттӥз.
Нош огпол вазь ӵукна Вовка сайказ куараослэсь. Нэнэез кыӵе ке пиосмуртэн вераське.
– Ура-а! Рудик агай! – валесысьтыз тэтчиз пияш. Коркась чилясь кӧтурдэсо великсэ адӟымтэеныз, ӧжытак кунэрскиз:
– Нош велик кытын?
– Велик? Кыӵе велик? – паймиз воргорон.
– Тон мыным выльзэ басьто шуид вал ук! – пеперскиз пияшлэн ымдурыз.
– А-а, вунэтӥськем ведь, Вовка. Вождэ эн вай ини. Оло вужзэ ик тупатом ай, – буйгатӥз пияшез воргорон. Нош Вовкалэн йыраз шуак таӵе малпан чилектӥз: «Коля агай ӧй вунэтысал».
– Ойдо соку азбаре, – пияш нош ик насос но усьтонъёссэ поттӥз.
– Мар карод ини таин – потытэк уз луы, – Вовкалэн нэнэез пала берытскыса шуиз Рудик агай.
Кема бергазы сузмем велосипед котыртӥ.
– Ну, Вовка, акылес ик тон. Таид куштӥськем кортэ сяна уг яра ни, – киоссэ ӵушылонъяз шуиз пиосмурт.
Вовкалы чидантэм ӝож луиз. Кызьы куштӥськем корт пӧлы куштод тае? Коля агай ӧвӧллэсь но вань кариз, нош таиз сэрпалтыны косэ. Пияш юн куртчиз ымдурзэ. Бам кузяназ васькись синкылиоссэ китышкыныз ӵушиз.
«Коля агай пал пыд ке но, солэсь умойгес», – бӧрдонъяз малпаз Вовка.
