Черный день

ЛухIи кьини

КIира пардавлийсса, арулла суратрайсса драма

Гьуртту хъанахъими:

Амату, лас аьрай ливчIсса фронтовикнал кулпат
Шамсият, Аматул душ
Чаргас, Аматул арс
Сияли, Аматул ласнал ссу (маз къакIулсса)
Шамала, Чаргаслул буцай душ
Аьлилав, сельсоветрал председатель (ка дакъасса жагьил)
Къадара, колхозрал парторг
Шалласу, финагент
ХхуйтIу, шяравусса авдал оьрчI – жагьил
Аьлишаев, райкомрал цалчинма секретарь
Къаландаров, обкомрал уполномоченный
Аьбидинов, НКВД-лул начальник
Кассада, Аматул чIаххущар, фронтовикнал нину

ЦАЛЧИНМУР   ПАРДАВ

ЦАЛЧИНМУР СУРАТ

Дяъвилул шину. Зунттал шяравусса мискинсса, лазилавкьсса кьатта. ЧIавахьулттил чIаравсса лахъру-тахлийгу щядиркIун, бизарсса нунулул макьангу дурцуну, зукка-чIакIулуха зий дур Амату. Вания чансса тиннайну, ппал дуцай къатIуйх лахлай, ппал дуцлай дур Сияли.

КьатIату щала щяравун гъалгъа тIисса радиолул чIу:

«От Советского Информбюро:

В полосе среднего течения Днепра наши войска успешно форсировали Днепр и захватили плацдармы в трех местах: северное Киева, южнее города Переслав, юго-восточнее Кременчуга, Немцы ведут против наших, переправившихся через Днепр войск, ожесточенныетконтратаки, которые отбиваются с большими для противника потерями. Наши войска шаг за шагом расши­ряют плацдармы».

АМАТУ (зукка-чIакIугу дацIан, дурну, радиолух вичIилийгу диркIун). Ама-анкьай, ци бувсурвав?.. Ва зиялий бавцIусса мазвагу кIулну бивкIссания... Валлагьи, дяъви кьуртал хьуссар тIий бунуккива... (Цила увкумунил цурда ххари дурну). Бавал Чаргас!.. (Дирзун, ци зунссарив къакIулну, къатлувух тиху-шихуннай лечлай). Шавайн най усса ур ттул бярду яру! Ттул щаллагу дуниял!.. Ттул ятIул муси!..

СИЯЛИ (хъумур къабувчIлай, лап личIлулну Аматул хъири-хъирив дуруглайгу диркIун, Цакуну ларай дирзуи, бакIрал ва каруннил гьимру дуллай, Аматухь цIухлай). Му-му-му?.. Гьав-гьав-му?..

АМАТУ (СияличIаннай хьуну, ганин чIу баян бан кунна, лахъну). Чаргас най ур тIар!.. Чаргас!.. Бавал бюрни!..

СИЯЛИ (Чаргаслул цIа увкусса бувчIуну, ххари хъуну). Гьо-гьо-гьо! Мамм-мамм!.. («Чаргас ххира уллай», кIирагу кагу хъазамравун ч1увин дурну, кIутIу-кIутIу шай).

АМАТУ (чIавахьуттичIаннай хьуну). Шамсият!.. Ва Шамсият!.. Ина тIикI кьаучивуй, ванин кьабавхьунссар... (БакIбахIулул энттугу дакьин дуллай, кьатIурдай анавар дуккай. Ялагу цирив дакIнин багьну аглан шай) КIюххи!. кIюххи!.. Цал кIюххи бизан… Ккашилнур учIантIисса бавал бюрни! Тунукьай тунукьай – ккашилну... (Анаварну. кьурувунгу дурххун, шанччаннай кIюххигу канихьну гассят дуккай).

Сияли цирив учин, бувчIин бан ччай, Аматул. лагма дуклайгу диркIун, тамур къатлувун духхай. КьатIату Къадараннул чIу баяй.

КЪАДАРАНУЛ ЧIУ. Тавш-тавш!.. Ина мангъавлул бугьивуй, ва ци тарсъсса ттуккурияртал?!..

АМАТУ (кIюххигу щяв бивхьуну, анаварну чIавахьулттичIан лечай). Къадаран, ва дяъви кьуртал хьусса вингу баврив, бавал?..

КЪАДАРАННУЛ ЧIУ. Къабавннихха... къуртал хъуну буриввар?.. Му нясив кьабиву!..

АМАТУ. Къуртал хьуну? бавал, кьуртал хьуну!.. Ттул Чаргасгума шаваийн най ур тIар...

КЪАДАРАННУЛ ЧIУ. Да му лап ххарисса хавар бурххакьаий!.. БацIула, вихь му щил бувсурар?..

 АМАТУ (ца хIаллай учинмур бакьагу диркIун). Ттухь?.. Ттухьрив, бавал?.. Ттухь вана ва ттула дакIнил бувсунни... Яла кIа радиолулгу.

КЪАДАРАННУЛ ЧIУ (пашман хьуну). Гьа-а!.. ДакIнил бувсуриввар?. Букьу туну щялмахъ бувсун бурча...

АМАТУ (Къадарануйнн вих хьун къаччай). Укьу кьаикIуча, радиолул щялмахъ къабусайссарча...

КЬАДАРАННУЛ ЧIУ. Вар, Амату буттарссий, му радиолух нагуния вичIи дирхьуссия...

АМАТУ. Дирхьуссияв бавал?.. Тунy ци бувсуна, чани?..

НукIурами лирккун, чансса марцIсса гьухъа ва лачакгу ларххун, духхай Сияли, лялух цирив ца мухIлу дахIлай, дахIин къахъанай, щядикIай тиккуннай лахъурттуй.

КЪАДАРАННУЛ ЧIУ. Тавш-тавш!.. ДинипIир тIисса неххай талатаву хьуну, жуламиннал тамансса пашистурацIухсса бунни тIива...

АМАТУ (пашман хьуну). ТIивав, чани?.. Ца неххал цинияв лсуннавча ци, бавал... Я, Аллагь!.. Ухьува ина мий, ххирасса Аллагь!.. Дяъви кьуртал шаврия цичIав къаувкурив, бавал?..

КЬАДАРАННУЛ ЧIУ. Цалсса къаувкунни... Жула аьрал чачун душманнал ялун бивгьуну най бур увкунни...

МухIлугу дакьин дурну, тиха-шиха цила лагма цурда дуруглайгу диркIун, цирив ца мурмулул макьангу дурцуну, Сияли кIюххи бизан кьатIурдай дуккай.

АМАТУ. Ялату Аллагьнал ласуннавча ци, бавал... Ва дакIнил аьжаивну арсначIан хъит увкунача, най ухьунссар тIий, ххари хьуссияв... Насу-насу, бавал, вила ттукку тий-шинмай шайча... (ЧIавахьулугу лавкьуну). Я, Алагь!.. Я, ххирасса Зал, лича ттул арснал ялтту Жабраиллул Хъа!.. Уручча ттул арс оьсса душманнал ккуллалуя!..

Духхай Сияли, нукIура кунна ххарину.

АМАТУ (Сиялил гьухъух, лачакрах, мухIулттухгу дурургун). Гьуя-яв!.. Ина Аллагьнал шала буцивуй!.. Ва мискии уссил арс хьуна акьин xlaдyp хьуну бунуккар... (Мазрайну ва канил ишаннайну бувчIин буллай). Букьу-букьу, хъяврин хьуннуча... Дяъви уттигу къуртал хьун
бувассар тIар...

СИЯЛИ (пашманну цила гьухъух ва мухIулттухгу дурургун, къащи хьуну чансса хIалай лахъурттуй щядикIай. Яла, якьамагу хьуну, мухIлугу ттирихIлай, янна даххана дан лагай. Hyзaйн кьутI тIисса чIу шай).

АМАТУ. Буххияра, цума уру?..

Духхай Кассада.

КАССАДА. Хула, бурув-бакьарув?.. Цума цукун уру?..

АМАТУ. Дачу, чIаххущар... Оьккину бакъару. Зула ци тIар?

КАССАДА. Инаралу дураххагъар, чIаххущар, душру, Сияли чуври?..

АМАТУ. Душругу лавгунни шяравух пурунтран махру, пюркьурду батIлан... Сиялигу шивах бур... Ци дуллай буру, чIаххущар?.. МахIаллилгуния чагъар бувкIсса хавар бур... Цувагу увкIсса кьини ккакканнавча... Ци буслай ур?.. Цукун ура тIар?.. (Зукка-чIапа канил дугьай).

КАССАДА (АматучIаннай, лахъурттучIан хьуну). БувкIунни, чIаххущар... Вилгу Чаргас дакIххарину учIаннав... Ама-ан, ттун дакIний личIайсса ххай дурав?.. Чуврив ца чил билаятрайсса пурунтрал хавар бия... Ваци... Вай душругуния ттурудавайлийн нанисса хавар бур?..

АМАТУ. Наниссар, чIаххущар... Гьунттий мигу ттурудавайлийн наниссар... ЩяйтIан кунна, наралу личIан най дура... (Духхай Сияли).

КАССАДА. Инаралу циванни?.. Вацири Сиялигу буну... (Сиялихь бакIрал гьимлийну ва мазрайну цIухлай). Цукун бура?..

СИЯЛИ  (цич1ав кьабувчIай тIий, кIирагу канил ххяпри кIутIу дуллай). Ммамм-ммамм-мамма... (Пашманну цила ппал дуцай кьаттIух щядйкIай).

АМАТУ. Сиялигу гьунттйй Хьургъав наниссар...

КАССАДА (интIирис бивзун). Циваннивав?

АМАТУ. Навтлих-цIийх булун бикIанхьуви куну, ххуйсса гъенттул нагьлил ччарччала буллуссия хъамалущарнихьхьун, чансса арцул шагьи

бан тихах баххи куну... Ва шанма барзри тIар-хавар бакъа...

КАССАДА. ЦитIиссарвав?..

АМАТУ. Алан-чалан тIий, миннатру буллайи дия, ранг щуну

муркъая xxютla щащан бурчакьай, чансса хIаллай кумагран Сияли гьан ба тIий. Чансса гъили дагьукун гьан банна увкуссия. Утти ва бучIаннин ялугьй бухьунссар тIий дура...

КАССАДА. Бухьунссар-бухьунссар... БикIанхьувича цинма чансса бизар лихханмагу…

АМАТУ. Вагъар, чIаххущар, лахъурттуцIух дарцIуну дикIаннав?.. Шиннай хьуча, щярагу дикIу…

КАССАДА. Щягу къадикIланнача, чIаххущар, вай арснал оьрчIру чIукьа буклай буну дуркIссияв зучIа чансса накьлий дищинсса аьгъушиву кьалякьинавав тIий?..

АМАТУ (дакIнихтуну). Валлагь, чIаххущар, вилгу, ттулгу жандалийн... (Цирив дакIнии багъну). Гьа-гьа,… ДацIу-дацIу... Ххуйсса касак ссугъанчалул буссар... (Зукка-чIапагу кьадиртун, анаварну къурувунгу дурххун, зана шай). Ма, ласи, чIаххущар... Мюрщисса оьрчIал ялун на ина дачIра гьан къадитайссара...

КАССАДА (ссугьаничалул касакгу лавсун, ххари хьуну). Я, Аллагъ, вил Чаргас дакI ххарину учIаннав!.. Вил танай баргъгу, барзгу бацIаннав!.. Ина тIиртIунийн ка диллай личIаннав!..

АМАТУ. Вилгу МахIалли дакI ххарину увкIун, дакIниймур Аллагьнал барт лаганнав!..

КАССАДА (кьатIурдай най, нузачIан дирну махъ, махъуннай кIура дарну). Цирив цIуххинна тIий дуссиявча, хъама бивтунни... Гьа-гьа... ДацIулагъар, чIаххущар, ва лак авхнавун бизан баврил хавар зунгу баврив?

АМАТУ. Къабавннихха... Ци хавар?..

КАССАДА. КъакIулли... Лахьхьу Базалавхъаннин дуркIсса Аьхъара щарсса дия лак Авхнавун бизан бансса хавар бур тIий...

АМАТУ (хьисрагу вих къархьуну). Дукьула кьадикIуча... Ци-ци-бунугу шярал хавардайн вих хъанан дикIара ина...

Нузайн кьутI тIисса чIу.

КАССАДА. КъакIулли... Хъинмур Аллагьнал банхьуви... Гьаннача, чIаххущар... Барчаллагь…

Кассада лагай. Буххай Аьлилав ва финагент.

АЬЛИЛАВ. Бивзрув!.. БучIирив буххан?..

Арамтал ялун бувххукун, Амату ва Сияли бусурман аьдатрай лавай бизай. Сияли ца хIаллай урвав-акъарвав тIий, финагентнах дypyглайгу диркIун, анаварну цIурихьулувун лечай.

АМАТУ (финагент учIаврия ххари дакъа). Ивзрав инагу... Чабувкру.

ФИНАГЕНТ. Буккарухха.

АЬЛИЛАВ (цайва цирив ца тахсир хьусса куна). Ва хъамаличувнал гьайгу-дайгу ачу тIий зуннин бувкIссияв... Ци дуллай, цукун буру?..

АМАТУ. Забакъар, ттул арс, бувкIун хъина...

ЦIурихьулува цIу дишай кьяцIагу лавсун, духхай Сияли

СИЯЛИ (урчIамур канил къяцIагу бувгьуну, киямур каних финагентнан нуз-кьунттуйн ккаккан буллай). Гьов-гьов-гьов…Ммамм-ммамм-ммамма...

ФИНАГЕНТ (бунияла Сиялия нигьа увсун, жагь Аьлилавл, жагь Аматул махъун лякIлай). Да-да-да-а!.. Ва... Ва... Ванихь цичIав учара…

Сияли финагентнайх бищун, кьяцIагу гьаз бувну хъирив хъанан дикIай. Амату ва Аьлилав, Сиялил хъирив лечлай, га паракьат буллан бикIай.

ФИНАГЕНТ (щала сценалийх Сиялияту лихълай). Бу-бугьияра... Бугьияра му!.. Мунища му кьяцIа... КъяцIа зеххияра.!..

Сияли гайннащагу итххявххун, цIунилгу финагентнал хъирив шай. Финагентнал, кьурувун ххявххун, махъа нуз аьнт дай. Аматул ва Аьлилавл Сияли гуж-балагьрай паракьат дай.

АЬЛИЛАВ  (кьуруваллил нузайн кьутIа тIий). Укку паракьат хьуннича.

ФИНАГЕНТ. КъяцIа... КъяцIа зеххардув мунища?..

 АЬЛИЛАВ. Зеххардуча укку...

ФИНAГEHT (лап сситтулну кьурува увккун). Иш ххал барартал... Муххал кьяцIа бакIрайх бивщуну ивчIангу махъунмай хьун тIий бакьар. Ва ци тарсъсса жяматрив кьакIулли... Цавай ккаччив кус буллай буссар вайми – кьапурду аьнт буллай, тайми – бакIрайх къяцIри бишлай...

АЬЛИЛАВ (ссибизлай). Жяматрая матIурда... Жямат цуппа бити...

АМАТУ. Вагъар, цайми жяматирттал зюрнав-дачIу рирщуну къамул арав?..

 ФИНАГЕТ. Зюрнав-дачIугу къарищурча, бакIрайх къяцIри бишлангу къабикIай…

АМАТУ. Вин бавссарив: «Магъ кьуркьусса шатлун хъама. Кьабитайссар», тIисса учала?.. Таксса никирттайн багьлай, миннатру буллай буна, увкIун милицанащал архIал ва байчарасса, маз кьакIулсса хъамитайпалул бивкIу-буккулийн лаххайсса бусса-бакъасса ца дарайлул гьухъуй аьрис кьарирщуссания, ва хьамитайпа, шатта хьуну, вийнма кьаххяхлантIиссия…

СИЯЛИ (ихтилат ссая буссарив бувчIуну, мучIай мачIру дирзсса цила гьухъа ва кьабакI тIартIусса лачак ккаккан дуллай). Ммамм-ммамм-ммагь... (УрчIамур канил кIива кIиссагу тIивтIуну, финагентнал иттав щун бачай).

ФИНАГЕНТ (кIири ичлай). Да, ва инсаннахь паракьат хьу учара...

АЬЛИЛАВ (Сиялигу кьурувунмай гьан бувну, финагентначIана хьуну). КIири маичларда... Та байчарасса, бугьарасса инсанни...

ФИНАГЕНТ (Аматухь). Гьула буси утти, заем циван къачичлай бура?

АМАТУ. Ци заюм?.. 3aюмру на арийлла чичав – арийлла...

ФИНАГЕНТ (папка тIитIлай, Аьлилавхь). Памилия ция вайннал?

АЬЛИЛАВ. Чупанова...

ФИНАГЕНТ (чагъардугу ххилтIу бувну). Чупанова... Цал налогирттах бурганну: хьунил налог – дуллуну дyp, кьатлул налог – дуллуну дур, балчан – бакьари, оьлияту – дуллуну дур, ттуккуяту – дуллуну дур, индивидалный налог – дуллуну дур.. Вагь... Ва цукунни...

АМАТУ. Мукун…

ФИНАГЕНТ (чагъарданул тамур чулухун урувгун). Гьа-гьа... Яттил… Яттияту ппал кьадуллуну дур...

АМАТУ. Бакъасса яттияту ппал цукунни дулайсса?..

ФИНАГЕНТ. Цукунни бакъасса?.. Шиккуния щанма хIайван чивчуну бур.

АМАТУ (кIирагу хъачIгу гъуз чин дурну). ЛивтIуну…

ФИНАГЕНТ (вихшала дакьа Аматухгу урувгун). Цукун ливтIуну?..

АМАТУ. Утти цукун учивигъартал – ссихI бувккун...

ФИНАГЕНТ КъалитIун битан аьркинссия... Ятту-гъаттара литIун битавугу паччахIлугърансса диверсиялун ккалли хьанахьиссар…

АМАТУ. Вирсияртту къакIулли, амма утти нажагьлий оьл-ттуккуза бивкIларча, кьакьари бугьан, вийн оьвчин дучIанна...

ФИНАГЕНТ (ялагу чагъардах уруглай). Чупанова Шамсият цури?..

АМТУ. Ттул душри.

ФИНАГЕНТ. Чупанова Сияли?.. (Кьуруваллил хьулувунгу урувгун). Гьа-а... Ва та бухьунссар... 0ьрчI бакъа налогру кьадуллуну дур... (Цамур чагъардаьнух уруглай). Утти бурганну заемру циксса чирчуну ду­рив... Чупанова Амату... Цалчинмур – чирчуну дур... КIилчинмур – чир­чуну дур... Шамилчинмур – чирчуну дур... Мукьилчиимур – чирчуну дур... Ххюлчинмур… Ряххилчинмур… Арилчинмур... Заемру цанярда чирчуну дур…

АМАТУ. Миннул чIарав диша ялагу: (КIиссурттай ккаккан буллай).

КIира пут хъалул – чиваркI дяъвилийи биян бан нанисса дучран дишин дуллусса... КIира ссалу хъурунхъуссаннул ва бадаку нагьлил – ттурудавайлийн наниминнан кумагран буллусса... КIиазарда кьуруш – Шамиллул ттанккувай дивизиялун дуллусса... КIиазарлий ххюттуршра къуруш ва арцул камал мухIлу – Гьарун Сяидуплул ишккадрундалун дуллусса... КIира ппасирка ппалул гьухърал ва кIира ппасиркIа аьрайн гьавккурттал – дяьвилул цIараву талатиминнан тIайла дурксса... Ялагу...

ФИНАГЕНТ (Аматугу бяличIин бувну). Мy ттун аьркинсса нагъил дакъари ина ккалаккисса… Зул хазайствалия х1укуматран уттигу дагьлай дур шамма яттил хIайвандалиясса ппалул налоггу, Чупанова Шамсиятлуясса ва Чупанова Сиялиясса оьрч1 бакъа налогругу…

АМАТУ «Утту ихьу, Вац1адай, чув ишива, Мисидуй»!.. (Залданувун). Явара утти ванай хъямахъри!... (Хъит куну ларгун, кьурува дурцуну Сияли финагентнал хьхьич1ун дакьай). Ма, ванача, бува уча ванихь оьрч1…

Сияли, кару-каругу дуллай, финагентнайн ххяхлан дикIай. Сиялия нукIува нигьаувсъсса финагентгу щала сценалийх гания лихълан икIай.

ФИНАГЕНТ (Сиялия лихълай). На... На... На тIисса... Ва... Ва бала… Ванихь...

АМАТУ (Сияли паракьат дуллай). Ваъ-ваъ тIий циван лечлай ура?.. Бува уча ванихь оьрчI.

ФИНАГЕНТ. Бургув... Ина къатIайлассара...

АМАТУ. Ина тIайлассарача, бува уча…

AЬЛИЛАВ. ЩяикIу... ЩяикIу утти ина папа буннича...

ФИНАГЕНТ. Щил?.. Нариввар папа байсса?.. На папа къабайссар...

АМАТУ. АцIулагъар, кьабайхьунссарча, зуятура начнагу цIуххиннача... (Аьлилавхь). Багьишла дити ттул арс... Хъамитайпалул оьрчI щицIа байссаргьар?..       

ФИНАГЕНТ. ЩицIа байсса-ар?.. АдаминацIа...

АМАТУ. Ява туну вай жул, душру-хъаннин, луххайх ккуру дирхьуну, оьрчIру байсса элму лахьхьин да... Жул чиваркI душманнащал талай, дяъвилийри буссача...

ФИНАГЕНТ. Бургув... Ина мукун тIурча... Мукун тIурча, на вацIана бучIан бувну милица... (Аьлилавхь). Гьалмахчув советрал перседятIил!..

АЬЛИЛАВ. АцIу... Анавар маукларди…

ФИНАГЕНТ (сситтулну кьюнкьарахун ккаккан буллай). Да адиминай, на вияту ва кIанттайн ивунна!.. Шикку– анавар мауккара... Тикку – сса вур да!.. Тамур кIанттай рахIму-цIими ба!.. На шикку паччахIлугърал даврийсса инсанна!..

АЬЛИЛАВ (сситтул щара-кIама лавхъун). На учакьай вия (цала бакIрал ялтту ка галай дай) шийн ивсса!.. АцIу туну, ина инсантал, сагъну бунува гьаттавун бакьинна тIий урав?..

ФИНАГЕНТ. Акъача, зущал рахIму-цIимилий тIуркIу тIун увкIун ура!

АЬЛИЛАВ. Ухьурча, зана кьаикIай ххуллийх гихунай гьантIиссара ина!..

ФИНАГЕНТ (банмур бакьа, сситтулну). Хъинни... На гьанна шичча... Амма зана ча, цума къаикIайсса уривгу на вин ккаккан банна!...

Хъит-шитлий увккун лагай.

АМАТУ. Аманкьай, бавал, вийнма махъ бучIансса даву къадурния.

АЬЛИЛАВ (сситтулну тиху-шихунай занай). БучIарча, бувкIунма бикIувча... (Дакъамур канийн ккаккан буллай). Ванияр хъунмассания къабучIанссар!..

Сияли Аьлилавл канийн, лажиндаравун ппай т1ий, ххира уллан дик1ай. Пюркьурдал чуваллугу мукьавну, буххай Шамсият ва Шамала.

ШАМСИЯТ (къярз учин бувну, чувалгу щявн бувтун). Ухьва-ай!.. Рyxl дуккавай ливчIуннихха...

ШАМАЛА (мукунма чувалгу къярз учин бувну). Къурталссар... Бакъассар шяраву утти я муххал, я дувссилул касак...

АМАТУ. Аманкьай, бавалхъул, ми тийхва, кьатIув кьабивтнияра...

ШАМСИЯТ (лулттутува Аьлилавхгу бурувгун). Жува бувсса давла Советрал пирседятIилнангу ккаккан бан ччай бия...

АЬЛИЛАВ (мадара аьч увккун). Советрал председательнан, зу кка­ккан къабарчагу, кIулссар зу, дуллалимур...

Кьурува варякъигу лавсун, Сияли щинав лагай. Ттявх-шавх увкIуну, тIитIай нузкьун. Ттуршая бувсса «балчаннуйгу» бурттий, уххай ХхуйтIу. Ца вичIигу зулчIай тIисса вичIивду кьяпа, духсса солдатнал шинель, галапай хIажак, синттул усру. ХъарацI хъунмасса нисрукку-чантай. Чантайлуву – Жура-журасса аьтта-ттяркьи – тIаннул ттупанчартту, турду, чIиллу, варсул ттупру. Шинельданий – хъазамравун лачIун дурну чув думур орден-медаллу, значокру.

ХХУЙТIУ (балчаннул хьхьури кIункIу дуллай). Ппю-ппю-бю-бюпI!.. Твр-р-р!.. Гъаджа бидан вил тику батIу!.. (Мархь галай буллай). Гьай-ай!.. Тантта хьхьитIунмай хьу!.. Мукун… Твр-р-р…Тти батIу…

ШАМСИЯТ. О-о-о! Ттул мусил симовар, магьилул тIутIи!.. ХхуйтIуй, нанула шиккун, ххирама…

АМАТIУ. Ина вихава инава лащаннавча, бавал… Ва кIусса лахIзалуву иная лун къаувхссания, пIякь учинссияв…

ХХУЙТIУ. Амату буттарттий, на а ттула матиналий здиннин увкIра.. УвкIун къахъинав?

Амату. Хъинакьай, бавал, хъина… Къахъинну бикIайссарив!.. Ачу, бавал шинай хьуча. Жухь ца-кIива хавар буси.

ШАМСИЯТ (хъярч буллай). Итияра ттул гьалмагъай…Му ттучIанни увкIсса…Нану, ХхуйтIуй, щяикIу ттучIа…

ШАМАЛА. КьабикIула, ци вили икIайссача…ХхуйтIу ттулли гьалмагъай Акъарав, ХхуйтIуй?..

АМАТУ. Бусила, ххирай, цумур буцинна вайннуя – Шамси буциннавкьай – Шамала?..

ХХУЙТIУ (Шамсиятлуя бунияла нач дуллай, ганихь). Ина хъяврдин бутлай буда…

Шамсият. Бакъара, ХхуйтIуй, на мяйжаннугура тIутIисса…

ХХУЙТIУ (ххари хьуну). Ина джуннинма бутIаннав туну?.. Кьуннуба…

ШАМСИЯТ (чIаравппай хъанай). Ттул мусил симовар, магьилул тIутIий!.. Ххагу-ххарину бучIанна…

АМАТУ (бунияла). Ил, бунагьссарча, ма лав-лавтIи улларди му оьрчI. Му чIивисса оьрчI акъар…Щар дуцай хьусса жагьилли…Ачу, бавал, ачу шинай, ттучIанай щяикIу…

Шамсият (хъярч буллай). УнутIийрахха на ванан хьунна тIисса… На ванал цала машиналий щябивтун, Москавливгу буцинтIиссара… Буциннав, ХхуйтIуй?..

ХХУЙТ1У (ххари хьуну). У-у.. Бакъа-а.. Бадзаллувун…

ШАМСИЯТ. Гьа-гьа, базаллувун-базаллувун…

АЬЛИЛАВ. АцIула да, ХхуйтIуй, ва ина буртти ивкIсса ва машинаривкьай – балчан?..

ХХУЙТIУ. Балтан-матина…

ШАМАЛА. Ина ух къауккивуй!.. Махъругу, цувагу ва за!..

ХХУЙТIУ (тIаннул ттупанчагу Аьлилавлуйн тIайла бувну). Ина у-у.. Ина патитра (фашист)… Ттавх-ттавх-ттавх!...Агьттара!.. Тти ина ивкIуттара… Амату буттарттий, ивкIу утала ванахь…

АМАТУ. Асттавпируллагь!.. Къаучайссар, ххирай… Инания мунан ххирасса ура…

ШАМАЛА. ХхуйтIуй, ацIула дарман, вийн ХхуйтIу циван учайссар?..

ХХУЙТIУ. Ххуйва-ххуйтта унутIий…

АЬЛИЛАВ. Цукунна ина ххуйва-ххуйсса?..

ХХУЙТIУ. Ххуйтта бавалгу, ххуйтта бутталгу увтта, ххуйва-ххуйсса унутIий… (Циняв хъян бикIай).

АМАТУ. Мукун улуча, бавал, мукун улуча… Ина Аллагьнал яивуй!..

ХХУЙТIУ (Аьлилавхь). Ттун кIулттар ина тиккун тибан увкIттарав…

АЬЛИЛАВ. Циван увкIссар?..

ХХУЙТIУ (сситтулну) Тамтиятлух яруй буллан… (Ца ша хьхьичIунмайгу лавсун).  На ина ва ттупанталух бивтун утанна…Яла ва ххаржандалух ихханна…(«Балчаннуй» буртти икIлай). Амату буттарттий, на ва ттула матина къур бан гьанната, ина ва тамтиятлух яруй буллан маитара, хъиннив?.. (Аьлилавхь). Акъахьурта, на ина бивтун утанна… (Машина къур буллай). Твур-р-р! Бю-бю-юпI!.. (КьатIувай ачай).

АМАТУ. Хъинни, бавал, хъинни… Къаитанна…

АЬЛИЛАВ. АцIула, ХхуйтIуй, вин Шамсият муксса ххирасса бурив?..

ХХУЙТIУ. Бур ута-чав!.. Вин къаххиратта бур... Вин тамур ххиратта бур.

АЬЛИЛАВ. Цумур цумур?.

ХХУЙТIУ. Ти-ийхтта–тамур... (Шамсиятлухь).  Ххуйтта урив на?..

ШАМСИЯТ. Ххуйсса уркьай – ххуйсса ур... Оьккисса икIайссарив ттул    мусил симовар, магъилул тIутIи! Утти на вин бакъа, шинчIав къахьуннахха... Нанула ца-ца ппайгу учиннуча... Каругу тIитIйн дурну, ХхуйтIу-чIан бачай).

ХХУЙТIУ (бунияла нач дуллай). У-у… Тай яру буллантIиттар...

ШАМАЛА. Къабулланну, ХхуйтIуй… Жу яру лакьиннуча уча.

ШАМСИЯТ. Буллайнма бикIича... Вай яруй буллан бикIайссарча тIий, жула кьадавай дурсса нацIу эшкьи оьнин дуккан дитаннув?.. (Каругу тIитIин дурну). Нану, барххуй, ттучIан... (Ххира ан нанимунил дай).

ХХУЙТIУ (вев тIий лихълай). У-у... Къаттва... КъалакьинтIиссар... Тай ттух яруй буллантIиссар… Ттву-урр… Бю-бюпI!.. (Увккун лагай).

Нузайн кьутI тIисса чIу шай. Шамсият цу урив ккаккан, буккай,

АМАТУ. Ина Аллагьнал яивуй чаний, ца ххуйну бизар ххиен дайхха... Авдалтал шяраваллин барачатссар тIий бyccaр...

АЬлилав. Ттунгу ца савитIрайн иян буссарча, ачинна...

АМАТУ. Насу, бавал, насу... Базаллувунза бувккун, ца чаран лякъиннуча...

АЬЛИЛАВ. ЦичIав аьркин бакъассар... Мунилсса на банна... Барчаллагь... (Лагай).

ШАМАЛА. ХхуйтIул хавардахух лавгун, оьл щинайн буцин хъама битавай ливчIунни... Нагу гьаннача, Амату буттарссий... Кьунниялгу бучIанну.

АМАТУ. Хьинни, бавал, бухьхьу... (Шамала лагай).

ШАМСИЯТ (нуз тIиртIуну, хьулувухва/. Бавай, шярайх укку ур...

АМАТУ. Цу ур, бавал?.. Ласича тива ца ххячча ччатIул дула...

ШАМСИЯТ (кьурувун най). Тиву дурагу ца ххячча лирчIун дур...

АМАТУ. Думур, дула, бавал. Гьанттайнссанун лархьхьу накьлихун ини баннуча... Шярах уккугу кьатлун барачатссар тIий буссар…

ШАМСИЯТ (кьурувату кIарттул ччатIул ххяччагу ларсун, хьулухунмай най). Ишпигьуннал лащин дусса за ур цувагу…

АМАТУ (тIааьн кьабивзун). КъаикIайссарча, винма бунагь маласларди... (Шамсйят кьатIуппай буккай). Шярайх буккултралгу чIявушиву!.. Гьа-ай, дуниял... дуниял! ДучIайсса кьини инсантурал бакIрачIан...

Радиолул чIу, Радиолувух ккалай бур Ризван Башировлун СоветI Союзрал Виричувшиврул цIа дуллусса указ.

Пардав.

КIИЛЧИНМУР СУРАТ

Шяраваллил дянивсса хъун бакъасса майдан. Ца чулух щинал кьулла, Тамур чулух арамтал батIайсса ккурчIа. КкурчIнил махъ, тталлуй рирщусса ччергъилу-радио. Майданнив бавтIун щарнил жямат, тIайла буклай бур трудовой армиялийн наними.

Пардав тIитIай

КЬАДАРАН (дазгaxl нани дурну). Гьалмахтал!.. Гьалмахтал!.. Тавакъюри вичIи дишаву! Аьлагъужа чансса лагь барча ччива!.. Урув уттигу махъ учин ччисса? Ухьурча, тавакъюри хьхьичIунай уккаву!

AМАТУ. На учивияв ца-кIива махъ, бучIихьурча?..

КЪАДАРАН. БучIиссаркьай... цанни къабучIисса!.. Гьалмахтал! Махъ буллалиссар Чупанова Аматухьхьун.

АМАТУ (халкьуннал хьхьичIун дурккун, бакIрайсса лачакгу хьа-чIунттайн гьан дурну, цал хьхьичIунмай, яла махъунмай бувну, бакIвахIу бакьин бай. Яла бакIрайн лачакгу диян дурну). Я Аллагь, нанинан ххуллухъин баннав! Цайва бивхьусса буржругу лавхъун, дакI ххарину шаппайнгу зана хьуннав... ЦIуллушиврущал архIал!.. Лагавунияр, бучIаву ххарисса хьуннав... Оьсса чувнал бази Аллагьнал даннав!.. Оьсса душманнан бакьаймургу Аллагьтааьланал баннав!.. Дяъвилийн лавгцири цIинявппагу ттул Чаргас бакIчину, цIуллуну, сагъну, дакIру ххарину, ххувшаврищал архIал цала-цала язинал ялун, цала-цала ужагъирттайн зана хьуннав!.. (Лагмава чIурду: аммин я аллагь!.. Иншаллагь!..)

Ххирахъул, оьрчIрув, душрув – щарнил жямат, хIакьину ва жулла цинявннал бакIрачIан дуркIсса – щаллагу СавитIискки Саюзрал бакIрачIан дуркIсса хъуннасса кьинири. Жула буттахъал учайссар; «Маагьара яхIливун, маххяххара цIаравун» – куну. ХIакьину жула щалагу билаят яхIиравун багьлагьисса кьинири. ЯхIиравунгу багьукун, жунма багьлай бур утти цIаравунгу ххяхлан. Дурксса кьини лахъан цIакьсса вирттал бикIан аьркинссар. Вирттал дяъвилул цIараву бухьукун, миннал яхI щяв къабишинсса хъами-оьрчI махъгу бикIан аьркинссар!.. Цал уттигу нанинан ххуллухъин баннав! ДакI ххарину зана хьуннав!.. (чIурду: Аммин... Аммин я аллагь!.. Иншаллагь!.. Вил маз-зума цIуллу дивуй, ххира Аматуй!... Вил Чаргас дакI ххарйну учIивуй!..)

КЪАДАРАН. Так-значйт... аьлагъужа, гьалмахтал!.. Тавакъюри вичIи дишаву!.. Ттул пикрилий... Так значит...

(Цакуну гъалгъатIий дайдишай радио. Цинявппа, бакIру гьаз дурну, бургай радио-тарелкалул чулинмай).

А теперь передаем информацию о сборе средств на строительство Авиаэскадрильи имени Гаруна Саидова в Кулинском районе.

Воодушевленные братским приветом; Великого Сталина и благодарностью Красной Армии колхозникам и колхозницам Дагестана за их участие в строительстве танковой колонны «Шамиль» Колхозники и колхозницы высокогорного Кулинского района в дополнение к суммам, собранным в фонд строительства танковой колонны "Шамиль", с большим подъемом вносят средства на строительство бое­вых самолетов имени верного сына лакского народа, героя гражданской войны Гаруна Саидова. Только от тринадцати колхозов в отделе­ние Госбанка поступило 700 тысяч рублей.

На Родине Гаруна Саидова в колхозе им. Тельмана за один день собрано 120 тыс. рублей.

Следом за тельмановцами колхозники колхоза им. Гаруна Саидова внесли 120 тыс. рублей, колхоза «Красный партизан» – 125 тыс.

Председатель колхоза «Красный партизан», инвалид Отечественной войны Буграев внес 10 тыс. рублей.

Сбор средств на самолеты авиаэскадрильи имени Гаруна Саидова продолжается по всему району... (Музыка. Радио лагь шай. Цинявппа «Гьурра!» тIий ххари шай.)

КЪАДАРАН. Вагу ца ххуйсса хавар!.. Радиолувух кIицI къалагарчагу, гайннувухра дуссар хъун бакъасса жула жяматрал дартIусса 80 азарда къурушгу, ряхра кило гъаргъ арцулгу, арулва мусил кIиссагу, шаннайра вичIилусругу... Цивгу кIирисса ккуллардуну къутIинтIисса лавмартсса душмантуралл аскисса дакIурдивун... Ва щалагу жула миллатрал цIа бюхттул дуллалисса бусравсса хаварданулгу, хIакьину аьрххилий турудовой фронтрайн наниминналгу савлугъран оккину къахьунссия цIана ва кIанттурдай чансса тяхъашивугу дарча... (Зюрнавлул ва дачIул ца увин дай) Цийчару?..

ЧIУРДУ: Гъаксса хъинни учару!.. Рязиру, учару! Хъинсса даву хъунссия.

КЪАДАРАН. Мукун бухьурча, зюрнав-дачIулухьхьун булуннин, цал махъ балайлухьхьун булурча хъинну хьунссия!.. Цичару?..

ЧIУРДУ: Балайлухьхьун! Балайлухьхьун! Мукун хъина... Шамалал балай! учин барча хъина... Шамалал... Шамалал...

АМАТУ. Уча, ттул душ, уча ца балай... Я Аллагь, балай къаучайсса ссят вил оьрмулуву тачIав къадучIаннав... Зулгу… Зулгу, ххирасса жямат...

(Щиллив Шамалахьхьун ччергъилу дулай. Шамалал, нач дуллайгу бив-
кIун, итабакьай балай:)

ДИЛЬБАР.

ЧIУРДУ: Агь, ина цIуллу бйвуй!.. Вил ччисса хъинну учIивуй!.. Агь, вин мурад буливуй...

КЪАДАРАН. Так значит!.. Ути зюрнав-дачIулухун чансса тяхъашивугу дурну, ттурудовойлийн наними тавакъюри ххуллийн буккаву. Шярах хьунппалничIа пIайтIун ялугьий дуссар... Шамсият, Шамалай... Бахттун... цанявппагу чIал машари...

(Зюрнав-дачIулухун къавтIий, тяхъяшиву дуллай буна, чагъарданул кьютIлищал ялун учIай ХхуйтIу. Була тIий буна, щихьхьунчав къабуллуну, тIайлана лавгун булай! Шамсиятлухъхьун.)

ХХУЙТIУ. Ма... лати... Тййх путбатIул буллунни... Ххуйтта урив на?..

ШАМСИЯТ (ХхуйтIуща чагъар ласлай). ХхуйтIуй... ттул дакIнил дарман... На тIайла буккан эшкьилул чагъарвагу къачичав, мусил кIичI?,. (Цаппара душру Шамсиятлул лагма лавгун, гьалмагъайл эшкьилул чагъар буллурив? ТIий, хъярчру буллан бикIай... Яла цийва бияла бакъа, лахъну: МахIалли!... учай. Музыка кьабагьай. Цанявннал, варх куну, Кассадахгу бурувгун, бакIру хьхьичIун дичай.

КАССАДА (зарзала рутанну леххаву тIий). МахIал-ли-ий! Ттул xхирасса арс! Левшссарив ттул нурданул чирахъ!.. Шюршуссарив ттул лякьа, ххюттуй!? (цакуну щях рирщуну лагай. Цанявннал вав-щав тIий, маоь бай).

Пардав.

КIИЛЧИНМУР ПАРДАВ

ШАМИЛЧИНМУР СУРАТ

Тава нукIувасса Аматул къатта, лахъру-тахлийгу щядиркIун, зукка–чIакIулуха зий дур Амату. Пашмансса макьандалий, лахъ бакъасса чIуний, лахъину кIункIу хьуну най бур Аматул балай:

КIира яттил ттурзан ца зунттуй яшай,
Дяъви-дав бакъа,
КIира оьллал газу мащилий яшай
Дяъви–дав бакъа,
Къумасса ххяллаву яшай аврудугу,
Дяъви-дав бакъа,
Яшай Каспии хьхьирий зунттал нехругу
Дяъви-дав бакъа…

Уххай лап пашманну ХххуйтIу.

ХХУЙТIУ. Амату буттарттий, на здиннин увкIра…

АМАТУ. УвкIун хъина, чани… Балчан бакъа увкIуннахха, бавал ина чув уссияв?... Ча увкIра…

ХХУЙТIУ. Матиналий увкIра… Каттада буттарттийтIа уттияв… Инна танихь мааьтIра утала…

АМАТУ. АьтIий дияв, бавал?.. Цибанссар…Яраппий, душманнангу нясив къабаннавча та кунна аьтIун…

ХХУЙТIУ. Ждуланийн увкIукун, на дутман ва ххаржандалух… бакъа-бакъа…ва ттупанталух (тIаннул ттупанча ккаккан буллай) ивтIанна… (чансса хIаллава). Яла ва ххаржандалух каругу кьукьинна…

АМАТУ. Кьукьа, бавал кьукьа… тика-тика ува, урусари иву…

ХХУЙТIУ. Амату буттарттий, ина Каттада буттарттихь мааьтIра утиннав?..

АМАТУ. Учинна, бавал, учинна… На укуннагу цIана тиккун гьанна тIийяв дусса…

ХХУЙТIУ (ххари хьуну). Каттада буттартти къааьтIурта, МахIалли уттагу тавай утIантIйттар... (пауза).

Яла танал ттун ттупантагу бантIиттар. Ттутта ТIанкIул (ЧIанкIул) зевххутта ттупанта...

АМАТУ. УвкIун ккакканнавча, чани... Ина тIутIимур Аллагьу тIий лякъинхьуви... Баянхьуви хъунасса заннангу вил – малаикнал дакIнил тIутIимур... КассадачIа цу Ия, чани?.. Цурдалу дияв?..

ХХУЙТIУ. Каттада буттарттийтIа Ханита (Ханича) буттарттигу дия, ттилтIав интанталгу... АьтIий бия... Яла нагу аьтIий уттияв...

АМАТУ. Цибанссар, чани... Ниттил лякьа кIириссар... Я Аллагь, ккавккун кIул къабаннав!.. Танил утти та аьтIаврияр ххишала арснан байссагу, бан шайссагу цамур хъинбала бакъассар… Асттавпируллагь... Асттавпируллагь... Хъинмур ина бува, Аллагь...

ХХУЙТIУ. Амату буттарттий, дутман цукунтта якIайттар, ненттабакIраву та я бутта, див?..

АМАТУ. Душманнив, чани?.. КъаикIайссар... НенттабакIраву ца
я бусса – магьлувусса деври якIайсса...

ХХУЙТIУ. Туну тукунтта икIайттар дутман?.. лахъи-йтта витIив дутта, див?..

АМАТУ. Акъар, бавал... Душман икIайсса инсан кунассар...  ХХУЙТIУ (лап махIаттал хьуну, энадрай). Тукун интан кунатта?!.

АМАТУ. Инсан кунасса... Ина кунасса, на кунасса... Аьлилав кунасса...

ХХУЙТIУ (лап къаччан бивкIун, хъиннува энадрай). КъаикIайттар. Хъяврин буслай бура!..

АМАТУ (хъяй). Туну цукунсса икIайссар, чани?

XXуйтIу. Душман интантал букайтта икIайттар... бувтIурив вин? Ина ттухь хьяврин бутлай бура... На утти витIан къаутIанна... (увккун ачай.)

АМАТУ. Ди, чани... Ина тIийкунсса икIайссарча, хъювсул мауккара… Ачу шиккунай ва лахъурттуй щяикIу ттучIа…

ХХУЙТIУ. У-у… Инна хъяврин буслай бура…

АМАТУ. Ва, чани, тти къабусаннача, магьари…Мала… ургу… Шинай хьу бибиъру дулуннача…

ХХУЙТIУ. Къатта… Къааьркинни…

АМАТУ. АцIу туну, ина Шамсият бувкIукунгу къаучIаннав жуннин?.. Утти га бучIавайссархха…

ХХУЙТIУ (цакуну ххари хьуну). БутIавайттарив, Амату буттарттий! УтIанна!.. На тиккува атIанна!.. ТунтIав къагьанна… (Зана икIай, ЛахъурттучIанай хьуну). Кьуннува бутIантIиттарив?

АМАТУ. Кьунниял къабучIантIиссар…Гьунттихавай. Гьунттихавай кьунниял бучIантIиссар, чани…

ХХУЙТIУ. Кьуннува бутIантIиссар уча…

АМАТУ. БучIантIиссар, бавал, бучIантIиссар…Мала, на вин нацIу марххалагу булуннахха (лахъурттуйсса кIараллила дуккан дурну, бюкь-качарданул къурхъ дулай).

ХХУЙТIУ (цал лавсун качарданух уруглан икIай. Яла ца-кIийла ганийн ланцIгу куну, ххари хьуну) Би-би-иъ… НатIу марххала… НатIу марххала… Амату буттарттил натIу марххала! (ТIанкIа тIий, лагма уклан икIай.) На ва Тамти бутIаннингу букьантIиттар…

АМАТУ. Мабукьарача, инава буки, чани…

ХХУЙТIУ. Къабукайттар… Тамтил букангу битайттар…

АМАТУ. Шамсият цуппагу вин лавсун бучIантIиссар… (Цихьва цила кунма). ДакI ххарину, х хари-цIуллуну бучIивухъул…

ХХУЙТIУ. Ти лавтун бутIантIиттар?..

АМАТУ. НацIу марххала лавсун бучIантIиссар…

ХХУЙТIУ. Та (ча) лавтун бутIантIиттар?

АМАТУ. Га цуппа лавгния…

ХХУЙТIУ. ТIанава бутIантIиттарив?..

АМАТУ. БучIантIиссар (цихьва цила) Ина ух кьауккивуй, ххирашиву цанма Шамсйятлул... Пуй-пуй, ина винасса аьщун инава хьуннавча...

ХХУЙТIУ. Гьур-ра-ав! (Цунилгу тIанкIа тIун йкIай). Тамтият-лулгу наIу марххала!.. Гьур-ра-ав!.. (Ца-кIила къавтIисса къуцгу увкуну) Амату буттарттий, на къавтIун изан ттай ура...

АМАТУ. Изу, чани...

ХХУЙТIУ. Ина макьан дутала...

АМАТУ. Дуцивив, чанй?..

ХХУЙТIУ. Дута...       

АМАТУ. Цукунсса дуциви, чанй?..

ХХУЙТIУ. Ххуйтта…

АМАТУ (хъатгу ришлай). ТIюлуххуми тIюххуми, тIюхху-тIюхху тIюххуми, тIюххулуми тIюххумй, тIюххугуман тIюххуми...

ХХУЙТIУ (Аматул макьан дуцлай буна, тамансса хIаллай каругу гьаз дурну, гай цукун дугьантIйссарив къаляхълай, тйху-шихунай кIура аллай лйчIай. Яла цакуну ссибивзун, лахъсса чIунияй, ччангу щях бйвщуну) Ттюххуламй маутара.,. Оьккитта дур!..

АМАТУ. Туну цумур дуцави, чани? ;

ХХУЙТIУ. Ххуйтта дута...

АМАТУ. Ххуйсса цукунссар, бавал?.

ХХУЙТIУ. Таргу-чаргу тIитта дута…

АМАТУ. Гьа-а! Чаргу дуцивив, чани?..

ХХУЙТIУ. Дута...       

АМАТУ (цIунил хъатгу pирщуну). Чаргy, чаргулул макьан чаргу бувара душрув...

ХХУЙТIУ (дахъисса ххарххйв ласлай тIанкIа тIий, дюхъ дакъа къавтIун йзай. Яла пащагу тIйй Аматул чIарав увкIун). Амату буттарттий, на ххуи оьртI куна ивзрив къавтIун?..

АМАТУ. Ивзунни, бавал, ивзунни... ЦIуллу аннав... Аллагьнал цIуцIаву цIал дукканнав.

ХХУТIУ. Ххуйсса уракьай, чани…ххуйсса ура. (цихьва цила кунма) Вил дакIнил марцIшиву илданунгу дулуннавча, чани…

ХХУЙТIУ. Мутил тимаваргу утала… Магьилул тIутIигу…

АМАТУ. Му на къаучайссар, чани… му Шамсиятлулли учайсса…

ХХУЙТIУ. Инагу ута…

АМАТУ. Гьу, увкуссар, чани…

ХХУЙТIУ. Ута туну утти…

АМАТУ. Ттул мусил симовар, магьилул тIутIи… Асттавпируллагь…Асттавпируллагь… Инна вихава инава лащаннавча, ххирай. (Гьавалувун ссунтI ссунтIгу куну). Ччучлачисса ссвллив кьанкь дунуккар.

ХХУЙТIУ (качарданул къурхълийн ланцIгу куну). Ва нацIу марххала…

АМАТУ (ХхуйтIугу аьличIан увну, цирив дакIнин багьну). Аман чани, вищал гъалгъа тIий дуна, ттул дакI ччурччунниххакьай. (Чярхни кьурувун лечай. Лап хъювсулну ялун ухай Аилилав).

АЬЛИЛАВ. Амату буттарссий!.. (ХхуйтIу хIисав хьуну) Салам алейкум!

ХХУЙТIУ. Къатталам илейкум! Тамтият бакъаттар до-ов… Инна ттитIан увкIра?..

АЛИЛАВ (ссибивзун). Да, ацIуварч, ци Шамсиятгу инавагу хьуну уссарав…

ХХУЙТIУ (ссибивзунн). Тамтият вин къаххираттар!

АЬЛИЛАВ (яла гьан ан куна).  Къаххирассар, хуйтIу…къаххирассарча, нахIуну зума ахъуварч… (цахьва цала кунма) На вил буттал хъус къадукавча…

ХХУЙТIУ (лахъсса чIуний, сситтуй Аьлилавл ялун бивгьуну най). Тамтият на бутинтIиттар!.. Авлия!..

Аьлилав. Буца, уссу… Буцача, лажинни на ити… (Ххуйтуя лихълай). Ванартал зунма бала…

ХХУЙТIУ (хъарацIсса тIанттул ттупанча Аьлилавлуйн тIайла буллай). На ина ва ттупанталух ппавх (тIанкI учай) утин бувну, бивтун утанна… Яла ми яругу букканна… (Иттав кIисса щавай личIай)…

АЬЛИЛАВ. Утти ина хъиннува чIяву буллан ивкIунна… На ина СавитIрал ппалав акьавай ура…

ХХУЙТIУ (нигьа увсун, тинай хъанай). У-у-ую! Къаакьайттар… авлия!..

АМАТУ (кIирисса кIюххи-кудугу аццавух тиха-шиха дургьуну, кьурува дурккун). Вай, ттул бакI бивчIивуй, щаралахъан джирхьусса накIлия цичIар лирчIун дакъари… ДачIи ялтту ларгун дур, дачIигу ччурччуну.

АЬЛИЛАВ. Амату буттарсий, бивзрав…

АМАТУ. Ивзрав, ттул арс…Аьлилав, инагу увкIрав, чани?.. ХхуйтIущал хавардай дуна, накI щаран дирхьусса кIюххи ччувччуну лявкъунни…

АЬЛИЛАВ. Уссиявкьай ва ци тIааьн дакъасса кьанкьри тIий…

ХХУЙТIУ. Амату буттарттий, мунахь на ппалав маакьара утала…

АМАТУ. Къаакьайссара, бавал… Ванал ва хъярчри буллалисса…Ва чIавахьулувагу тIитIиннача, бавалхъул… ва кьанкь лагайрив ккаккан… Аьлилав, кьатIуппай ци хаварду бур, ххирай?..

Аьлилав. Амату буттарссий, на левчуна шиккун увкIссавагу кьатIатусса яла хъунмур хавар вихь бусанья…

АМАТУ (нигьа дурсун). Ци хаварди, ттул арс?..

АЬЛИЛАВ. КIюххи ччуччаву гьична, кIюххуцIун утти жула къатригур ччуччин нанисса…

АМАТУ (лапра нигьа дурсун). Асттавпируллагь!.. Ина тIутIимур цира, ттул арс?.. Ттул Чаргас…Шамсиятлун…

АЬЛИЛАВ (ганияр утти цувагу нигьа увсун). Юх-юх! Бакъача… (АматучIанай лечай). Амату буттарссий, хавар я Чаргаслуя, я Шамсиятлуя бакъари…

АМАТУ (никирттайх кару рищай). Вав-шав, тти на цибавикьай… Туну щияту бур, ттул арс?

АЬЛИЛАВ. Бакъача-бакъача…Хавар цамур бур…

АМАТУ. Цамур ци хаварди, ттул арс… Аман ттул къюкI пIякь учавай дурчакьай, бувсун къуртал хьу…

 АЬЛИЛАВ. ХIакьину жува авхнавун бизан буллалиссару…

АМАТУ (лахъурттучIаннай хьуну, кару гиккун кьючин дурну.) Инна тIутIимур цира, ттул арс... Муния цакьнийва леща-лекьа хьусса хаваръя?

АЬЛИЛАВ. Ванна къалеща-лекьа хьуну бивкIун… Гьаннайсса, на вичIан хьхьичI-хьхьичI увкIсса, вила дукьаймур, лакьаймур, дишаймур, ласаймур чанссарагу сантирай дува учинна… ЧIал къавхьуну шиккун чIаххув шярава ницай аьравалтту диянтIиссар… (Уккан ачай).

АМАТУ. Инна ци тIиссара, ттул арс?.. Му хъярчрив, бунияларив?..

АЬЛИЛАВ. Вар, нания чIивисса оьрчI-за акъара мукун духIин дакъасса хъярчру буллан…

АМАТУ. Вав-шав, гьуя, тти на ци бави!.. (Никирттайх кару рищай) Ва ттул арс му туну цу духIин дакъул кьамул бувсса хIукмури?.. ТIар-хавар бакъа, утти ва дязаннийсса чIумал…

АЬЛИЛАВ. Тайннахьгу цIуххин хъина, духIин дакъултран ца ккалли буллай бурив?.. Тай бур дарагру нухьхьал, саломалул кунма, бакIру аькьлулул бувцIусса къуллугъчитал, хъуними…

АМАТУ. Хъуними тIисса махъ цири, ттул арс… Ва захIматсса чIун… Дукан-дан дакъасса, къаркIазрайн багьсса инсантал… Гьунтти-сара дугьансса хъуру…Ми ца хъунимири мукссава бакI бакъа, мукунсса даву дан багьарча?..

ХХУЙТIУ (хар-хавар бакъа ихтилатравух хIала увххун, Аьлилавхь). На вихь утав Тамтият бакъаттар куну, до-ов… авлия…

АЬЛИЛАВ (ххуйтIух хъисрагу къулагъас къадурну). Мива махъру нагу тIий ура…Амма на тIутIимур щинчIав баллай бакъари…

(Шяраваллил мангъушнал чIу)

Ба-я-Ра Да-а-а! ЧIивири къакуну, хъунни къакуну, шяраву усса гьарца чув ХъунккурчIнил майданнив буккияра тIар. Шяраваллингу, шяраву ялапар хъанахъиминнангу агьамшиву дусса масала ххал бигьлагьиссар тIар… (Мангъушнал чIуния хари хьуну, ХхуйтIу, баяра да-а-а! тIий хъяй, лечлай, тIанкIа тIун икIай). Му агьамсса масала ххал бигьин райондалиягу, хъунмур кIанттавагу хъунисса къуллугъирттаясса инсантал бувкIун бур тIар… Бая-Ра да-а-а!

Амату ва Аьлилав, бивщусса мярду кунма бу-бунийва бавцIуну личIай. ХхуйтIу мангъушнал чIу хъяврин бихьлай, гайннал лагма лечлай икIай.

Лап пашмансса макьан.

Пардав.

Мукьилчинмур сурат

Хъун ккурчIнил майдан. Халкь батIиннин ялугьий, шиккун бувккун бур: Аьлилав, Къадаран, Кьаландаров, Аьлишаев, Аьбидинов ва цайми.

Тиха-шиха, гьарца чулуха ца-ца, кIи-кIи тIий батIлай, батIай майданнив жямат.

Жяматрал хьхьичI бавцIуну къуллугъчитал цащала цивппа цирив тIий, бушу-бушу буллай, гъалгъа тIий бур. БувчIлай бур Аьлилав сситтулну, Кьаландаровлущал рязи акъа ушиву.Кьаландаровлул кIисса бувну Къадараннуйн оьвчай. Мунал Къадараннухь цирив учай. БувчIлай бур Къадаран бакIрал гьимру дуллай, мунащал къаччайна рязи хъанай ушиву.

КЪАДАРАН (чансса хьхьичIунай хьуну, хъугьу-хъугьу куну, чIугу бакьин бувну). Гьалмахтал! Гьалмахтал! Тавакьюри вичIи дишаву! ХIакьину, цIанакул, ванна ва ссятраву, ва кIанттурдай ххал бигьлагьиссар жула шяраваллингу, жяматрангу хъуннасса агьамшиву дусса масала…

Жяматрава щиллив чIу: Агана му масала мяйжаннугу щарнил жямат шичча цамур кIанайн бизан баврил ялувсса бухьурча, му жу нанихва тIутIиссару, нахIакь гьаз буллалисса масалари тIий…

КЪАДАРАН. Гьалмахтал! Учин ччимур – ихтилатру яла буллан, тавакъюри цал вичIи дишаву. Му масалалул ялув жучIанма бувкIун бур райкомрал секретарь Аьлишаев, обкомрал уполномоченный Кьаландаров, НКВД-лул начальник Аьбидинов.

ЖЯМАТРАВА ЩИЛЛИВ ЧIУ: Ттун бучIирив му обкомрал уполномоченнныйнахьхьун ца суал булун?

КЪАДАРАН. Гьалмахтал! Тавакъюри чансса ссавурданий вичIи дишаву…Ва ххишала бакъа агьамсса масалалул хIакьираву ихтилат бан цал махъ буллуну Лагьбар МахIмудович Кьаландаровлухьхьун. Учин ччинал яла–махъгу учинссар, яни ихтилатгу банссар, суалгу булунссар…

КЪАЛАНДАРОВ (чансса хьхьичIунай-загу хьуну, ца ляличIину агьамсса куцгу дургьуну). Ххирасса гьалмахтал! Уссурвал, ссурвал! Зун гьарцаннанма ххуйну кIулссар, так значит, цукун аьрщи-щиналгу, хъу-лухччинулгу, дуву-дитулулгу, значит, кьянатсса кIану буссарив ва жула Лаку кIану. Так значит, цукун захIматсса оьрму бутлай буссарив жула инсантал вай къума-цIансса ххяллаву ва дарардаву. Циксса жула пухълуннал оьрму оьнин лавгссар шику цала кулпатру ябан хIалтIилухун, куралий ва кирилий лаглай…

ЖЯМАТРАВУССА ЧIУ. Нагъил лахъи къадуллай, учин ччимур кутIану бусарча хъина…

КЪАДАРАН. Гьалмахтал, тавакъюри анавар къабувккун, ссавурданий вичIидишаву…Инсаннал буллалисса ихтилат бяличIан буллалаву къаххуйссар…

КЪАЛАНДАРОВ (сситтулну чIукIа хьумур чулинайгу урувгун). Му бакъассагу, цIанакул гьарца кIанттурдайва давуртту–хъу гъайчаву хьуннав, хIаллил лакьаву хьуннав, дуллай бур машинарттал, трактордал, так значит, техникалул кумаграйну…ЖучIава му техника щурущи дансса я ххуллурду бакъари, я хъу–лухччи дакъари. Мунихлуну…

ХХУЙТIУ (цакуну ккурчIнил мурцIниха ливчуну, ттуршая бувсса балчаннуй бурттий, лагмара тIаннул ттупанчарду, ххаржантгу дархIуну). Бю-ппю-бю-бюпI! Тпу-у-р-р-р! ТцIач-тцIач-тцIач… Тику батIу… БатIу утав, гъаджа бидзибуй (Цинявппа бургай ХхуйтIул чулухунмай… Ца лахIзалийсса циняв кьабагьай).

ХХУЙТIУ (ца лахIзалийсса тамашалий ккурчIав бавтIминнахгу урувгун). Ба-я-Ра до-о-ов! Ба-я-Ра до-о-ов! (КIирагу кагу гьаз дурну, баяра да-а! тIий, тIанкIа тIун икIай).

КЪАДАРАН. Да, ХхуйтIуй, аьлагъужа битича, укьу шичча…

ХХУЙТIУ (сситтулну Къадараннухгу урувгун). Къаукьанна!..

КЪАДАРАН (урчIамур кагу палцI дурну, ччангу щях бивщуну).Укьу тIий ура на вихь!

ХХУЙТIУ (нукIува куна тIанкIагу тIий). Дадан – дадан Къададан Къададан – дададан… Дадан-къадан Къададан…

(Милицанал начальник ци зунссарив къакIулну, къазразан лавгун, жагь Кьаландаровлух, жагь ХхуйтIух уруглай личIай. Кьаландаровлул мунахь цирив учай. Му ХхуйтIучIан ачай. Ва лахIзалуву халкьуннава дуккай Амату).

АМАТУ (ххуйтIучIаннай хьуну, ганал кА дургьуну уцай). Нану, чани, нану… Аьлагъужа мабулларди… акъахьурча тайннал винма оьккисса бала байссар.

ХХУЙТIУ (хьхьичIунай най уна, махъунай уруглай). На та ва ттупанталух иххайттар…

КЪАЛАНДАРОВ (цIунил тара агьамсса куцгу дургьуну). Так значит, мунихлуну, гьалмахтал, коммунист партиялул ва жула цинявнналагу зунттал халкьуннал аьзизсса ппу ХЪунасса Сталиннул жула цIанну ливчIсса халкьуннах гьарца кьини ва гьарца ссятрай дуллалисса аякьа иширайну ккаккан дуллай, хIукму хьунни вай кьянатсса вакъума-цIансса зунттаву ялапар хъанахъисса инсантал цимурцаннул гьарца чулуха лащу-щаллусса, аьчухсса, так значит, вацIралгу хъу-лухччинулгу авадансса, значит, хьулухунма машина, трактор – ччимур техника дучIан бюхъайсса, значит, яла-ялагу электрический токралгу чана лахъан дурсса щархъурдугу, къатта-къушругу бусса арнил кIанттурдайн бизан бан…

ЖЯМАТРАВАССА ЧIУ: Да, му ялувва тIивтIусса алжан бувагу чув буссаривгу бусикьай, да!

КЪАДАРАН. Гьалмахтал!.. Гьалмахтал!.. Тавакъюри…

ХЪАМИТАЙПАЛУЛ ЧIУ. Му жува шанаши бан оьрчIал кIанттух «Лайла» руцин увкIсса урив гъартал?... (Ялагу рязи бакъасса чIурду. Кьаландаров Къадараннух эц ивкIун ургай).

КЪАДАРАН. Да!.. Гьалмахтал… Тавакъюри вичIи дишаву!.. (Ялагу аьлагъужа гьаз шай. Ссибивзун). Яртал, адиминал буллалисса ихтилат къуртал хьуннин вичIи дишара!.. Учин ччимур яла учингуния бюхъанссар!.. Жувания Аьндархъиял базаллуву бакъару!..

КЬАЛАНДАРОВ (къаччан бивкIсса лугъатрай). Зун бавхьунссар лакрал ца укунсса учала…

ЖЯМАТРПВАССА ЧIУ: Ци учала биявав?..

КЬАЛАНДАРОВ. ЦIукухь бивкIссар тIар: «Ма цIукуй вина ппал»– тIийча, цIуку бивкIссар тIар: «Къачча ттун гъал дакъа» тIий… Яртал…

ХАЛКЬУННАВАССА ЧIУ: Гьакссагу тIайлану тIий бивкIун бур… ЦIукун ппал аьркинну диркIссания, Аллагьнал цала дулунтIиссия…

ЦАМУРГУ ЧIУ: Гьунттийнин ина ттуккухь хъирттугу ма тIунссара…

ЦАМУРГУ ЧIУ. Оьлий кIилигу дихьланссара…

КЬАЛАНДАРОВ (учинмур бакъа ливчIун). Яртал, на…да… яртал МахIатталсса инсантал буру зу (цала чIарах бавцIминнал итта-иттав лагмава ургай. Га бан-битан бакъа ливчIшиву чIалай, ихтилатравун хIала ухай райкомрал секретарь).

АЬЛИШАЕВ (яну-кIукIлусса чIуний, кIу къабизан куна). Гьалмахтал! Тавакъюри чансса хIаллай вичIи дишаву…Ва зул хьхьичIун увккун гъалгъа тIутIисса гьалмахчув, ва я кIия зунттава, я гила къутанная къаувкIссар…Ва шиккун тIайла увкссар партиялул областной комитетрал ва паччахIлугърал органналл. Обком партиялул бакъассагу, ванал махъ Дагъусттаннал паччахIлугърал органнал. Обком партиялул бакъассагу, ванал махъ Дагъусттаннал паччахIлугъгу, Верховный Советгу буссар…Аьркин багьарча НКВД ва цайми органнугу бусссар…

ХАЛКЬУННАВАССА ЧIу: НКВД-лийну жу нигьабусан мабулларди…

АЬЛИШАЕВ. На зу нигьа бусан буллай акъара…Амма зувагу лапва нигьа къабусайми махъанарди… Нигьа къабусайсса бунутIийри цIиникь ттупанграх бутайсса… Ва зула хьхьичIун увккун гъалгъа тIиманал къабарча, ва шиккун тIайла увкманал хIурмат буварача, ва инсаннал ци учайрив, ци бусайрив ккаккан ссавур дурну, вичIи дишара… (Кьаландаровлухь) Тавакъюри…

КЬАЛАНДАРОВ (нукIуванияр чансса сивсуну). Гьалмахтал, шику Къадараннул чансса гъалатI итабавкьунни «масала ххал бигьлагьиссар» куну. Масала Дагъусттаннал ВКП(б)-лул обкомралгу, Совнаркомралгу, Верховный Советрал Президиумралгу цакьнийва ххал бивгьуссар. ЦIанакул зу гьаз буллалисса аьлагъужагу ппурдуйх заккунттив бишлашаву хъанахъиссар. ЦIанакул, яни кIира ссятрава шиккун дучIантIиссар щаллагу райондалия 50-лла ницай аьрава, кIира хозяйствалун ца аьрава хIисаврай. ЦIанакул зу цинявппа аьркинссару, лавгун шаппа-шаппайн, кIира ссятрал мутталий хIадур хьун, цIусса минардайн бачин…

ХАЛКЬУННАВАССА ЧIУРДУ: Огьо-гьо! Иш ххал бара цал!.. Диришиву яла цала…КIира ссятгу ссаннивав – шиччава бачин къабувну?..

КЪАДАРАН. Гьалмахтал!.. Гьалмахтал. Тавакъюри вичIи дишаву…

АЬБИДИНОВ (чансса хьхьичIунай хьуну, сивсуну). Тавакъюри вичIи дишаву!..

КЪАЛАНДАРОВ. Зущала ласун аьркинссар так чара бакъа аьркинмур: дуки-хIачIия, лаххи-ликкия, лултту-ялттусса. Мигу, так ххуллийх зува каши-мякь къахьун, бявкъу-гъили къахьун. ЦIусса минардай зух ялугьий буссар ттизаманнул кьяйдалийсса, аьркинсса манкьулатралгу, сурсатралгу лащу-щаллусса гъилисса, чаннасса ва гьартасса къатта-къушру. Гьарца къатлул хьхьичIгу буссар жура-журасса ахъулсриннул мурхьирдащалсса багъру.

ХАЛКЬУННАВАССА ЧIУ (рихшантрай.) Неъмат!..

ЦАМУРГУ ЧIУ. Лажинни му алжаннавун изансса, жуйн бияннин гилува цучIав акъаяв?..

АЬБИДИНОВ (чIунийн хьхьичIунайгу хьуну). ВичIи дирхьунни!..

КЬАЛАНДАРОВ. Ми цимурца зу кьамул бан аьркинссар дакIнихтунусса хъунмасса барчаллагьращал, щалагу дунияллул миски-гъаривнал хъунасса ппу Иосиф Виссарионович Сталиннул чулуха зунма буллалисса бахшишну… (ца буниялану лагмава ягу бивтун). ЦIуллу хьуннав бюхттулсса Сталин!.. Гьурра-а!.. (Жяматрал бакIру хьхьичIун дичай. Кьаландаровлул чIарах бавцIуминнал бакъа яла щилчIав гьура къаучай. Так жяматрава хьхьичIунай увккун, кIирагу кагу гьаз дурну ХхуйтIул).

ХхуйтIу. Бая-Ра до-о-ов! Атътталин! Атътталин! Бая-рра до-о-ов!

(Кьаландаров цал тIанкIа тIисса ХхуйтIух ургай, яла жяматрах, яла ва ца «Варув зу» тIисса куна, цала чIарах бавцIуминнах ургай).

КЪАДАРАН (нигьа увсъсса чIуний). Да… ж…жямат…зу…зу дуллалимур циру, зу къюкI хьуну буруввартал?.. Яртал, цамур бакъахьурча, Сталин тIисса цIарагу къабаврив?.. Гьурала, цIунила-цIунил…ца, кIи шан… ЦIуллу хьуннав бюхттулсса Сталин!... Гьур-Ра-а!

(Цинявппа бакIру хьъхьичIун дирчуну, бавцIуну бур. Кьадараннулмур «гьура» щилчIаввагу гьаз къабай).

ХХУЙТIУ (нукIуванияргу бюхттулсса чIуний, ваца хъинну агьамсса даву дуллалисса куна). Ба-я-Ра до-о-ов!.. ТIулду хьундав Атътталин!.. ТIулду хьундав Атътталин!..

КЪАЛАНДАРОВ (лап сситтуй ХхуйтIухь). Да!.. Акъа къахьуннав шичча!.. Безобразие, понимаете ли!.. Так значит, гьалмахчув Аьбидинов!..

ХХУЙТIУ (цакуну кьаагьну, махIатталну Кьаландаровлух уруглайгу ивкIун). Къаакъа хьунда титта! Инна титта акъахьу (ка тIиртIуну ххуллу ккаккан буллай) титта тихунай…

(Аьлишаевлул Кьаландаровлул вичIилухун цирив щурщу бай)

АЬБИДИНОВ (чансса тихунай, ХхуйтIу авцIусса чулухунайгу хьуну). Лагьбар МахIмудович, ва чансса бакIрал…

КЬАЛАНДАРОВ. БакIрал сагъ акъасса ухьурча, цува кунмами бунийн тIайла укки…

КЪАДАРАН (нигьгу, начгу, хIала дурхсса хIалданий). Гьалмахчув, уппалнамучинный… Лагьбар МахIмудович…тавакъюри… бакъача, хъунмасса миннатри, ялтту учIаву… Ва иш хар-хавар бакъасса хьуну, агьали буруккинттарахьхьун лавгун бур…

КЪАЛАНДАРОВ (сситтулну ккарччивгу, ккарччайх дуклай). Так значит, му ихтилат вищал чансса махъ банну… Без-зобразие, понимаете ли… Позор какой-то…

КЪАДАРАН. Ппанимает, гьалмахчу уппалнамучинный, ппанимает…

КЬАЛАНДАРОВ (лапва ялун бигьлай). Такие как вы должны быть повешены на первом же столбе… (КIиссагу кутIу буллай). И я этого добъюс… Увидите…

(Милица, ка дургьуну, ХхуйтIу чулинай кIункIу уллай ур… ХхуйтIу хъит-шит тIий, къанай ур… МилицаначIанмай хьуну, Аматул ганахь цирив учай. Милицанал ХхуйтIу итаакьай. Аматущал халкьунначIанай най ур…)

ХХУЙТIУ. Къа тIуллу хьуннав вил Атътталингу!... Авлия… На ина ва ттупантачух бивтун утанда…

КЪАДАРАН (хъювсул уклай). АцIула да, гьалмахчув Кьаландаров, ина ахиргу ци укъавкуну къаацIанна тIий ура?..

КЪАЛАНДАРОВ. Учин аьркинмур на вихь чансса махъ учинна…

ХАЛКЬУННАВА ХЪАМИТАЙПАЛУЛ ЧIУ. Ва баларивгъартал, мусиватрив ва ци тIиссар…

ЦАМУР ЧIУ. Занная ливксса сситарар…

КЪАДАРАН. Инна шичча инсантал буттал буттахъая нанисса цала ХIала-жалалсса буттахъал минардугу, буттахъал аьпагу щяйтIантрайн аманат бувну, цимурцагу дун-дуний кьадиртун, чунмайриввагу къакIулну, щютIагу тIий, тIиринтгу бивщуну, вила хъирив бачинсса ххай уссияв, барчаллагь учинсса ххай уссияв? На зухь цимилагу учав: му кIирисса ссятрал мутталий бакъача, кIира кьинигу щаллу бан шайсса масала бакъари, куну.

КЬАЛАНДАРОВ (сситтул щара-кIама лавхъун, чIаллуха ттупанча буклай). Я тебя сейчас на месте пристрелю за срыв мероприятия государственной важности. (Аьлишаевлухь.) Так значит, гьалмахчув райкомрал секретарь, на тIалав буллай ура вай укунсса бузутертураща багьайсса ххуллу ласаву…

(Аьлишаевлул сюлкъирая кА дургьуну, Къадаран цачIанайва кIункIу увну, ганахь цирив учай.)

ХАЛКЬУННАВАССА ХЪАМИТАЙПАЛУЛ ЧIУ. У-му цува рухIру ласун увкIсса изрияил урив? ТIайла уккияра му увкIсса ххуллийх гихунай…

ЦАМУР ХЪАМИТАЙПАЛУЛ ЧIУ. Инна инава часа ура, чани… Вилмур щарнил жямат цакьнийва гилун бивзссарив?..

КЬАЛАНДАРОВ. Къабивзссар…Бизан аьркинну бухьурча, гайгу бизантIиссар…(Лагмава чIурду: Огьо-гьо! Вабабай, ххал бара цал! ВичIи дишара тти!).

КIАВА НУКIУВАССА ХЪАМИТАЙПАЛУЛ ЧIУ: Ва, чани, базан бан аьркинми жу бияв?.. Жу цичIав тахсирданухьхьун, ягу акIлухьхьун багьну бияв? Хъиншивугу, хъинбалагу цал цанмагу, цаламиннангу бувну къахъинав?

ЦАМУРГУ ЧIУ. Жува бигьа бивзхьунссару!..

(Кьаландаров ца лахIзалийсса учин-бусан бакъа личIай. Лагмава циняв пахъ багьай).

КЪАЛАНДАРОВ. Так значит, гьалмахчув райкомрал секретарь, тавакъюри вай ттул ялун бигьлагьисса гьужумру бацIан баву…Акъахьурча…

АЬЛИШАЕВ (хъяр уклай). Акъахьурча цивхьуссар?... (Цахьвалу кунма лагьну) Ккурчгу ина лархьхьуннича, дугу инара дуки!..

АЬЛИЛАВ (шинмай КьаландаровлучIанмай ца шагу лавсун, сситтулну). АцIулар да, (бяния лавайсса цала чурхгу хъюлчу-кIутIу бувну) Лагьбар МахIмудович… МахIмудовичгу акъарача ина «МахIмузович» ура… Ина му ттупанча цу нигьа усан ан буккаввар?

КЬАЛАНДАРОВ (махIаттал хьусса куна). Ачу тти… Утти вагу… Так значит, ва Советрал председательли…ПаччахIлугърая мажиб ласайсса…

АЬЛИЛАВ (рихшантрай). Так изначит!.. Цалчин, ци къуллугъгу, ци мажибгу булурчагу на миннух, ина кунма, ттула миллатгу, буттал улчагу къабаххайссар. КIилчингу… (Кьаландаров цирив учин ачай, Аьлилавл га, чIу лахъ бувну, къукъу-ццума акьин ай). КIилчингу!.. Вин кIуллив му ттупанча чув, щийн буккайссарив?.. Агар винма къакIулхьурча ванихь цIухха… (Ттап учин дурну, дакъамур канил хъачIрайх ка рищай). Ванил бусантIиссар вихь…

(Халкьуннава кув Аьлилавлуй язугъ хьуну аьтIун бикIай, куннал чIурду гьаз бай.)

Халкьуннавасса чIурду. Вил му жан цIуллу дивуй, чани, мукун уча мукун…

ЦАМУРГУ ЧIУ. Инна оьрмулул уччин итивуй!..

АЬЛИЛАВ. Ина адамина ивкIссания, му ттупанча шику хъаннилгу, къартту-къужралгу, мюрщи оьрчIалгу хьхьичI къабувккун, му чара бакъа букан аьркинний, тийх букан гьантIиссияв… (Жяматрахь) Алши бакъул ккаччи ичIунмай хIап тIун бикIайссар… Жулагу ва алши бяйкьусса чIунни…

КЪАЛАНДАРОВ (жагьилнал хаварбакъулий бувсса кьянкьасса ихтилатрал гьанавиххул увну). Да!.. Да!.. Инна чIяву буллай ура… ЧIяву буллай ура…чIяву буллай ура тIий ура на вихь… Так значит…

АЬЛИЛАВ (Къадараннухь). Инама ци «гьурра Сталин» тIий урар да?.. Вин кIулливар ва цIанакул хъанахъисса иш жула щалагу миллатрал дайлитIулул дайдихьу душиву? КIуллив жула махъа наниминал ва бучIантIиминнал жунма ва тачIав багъишла къабитаншиву?..

АМАТУ. Я аллагь, вин мурад булла, чани… Ина оьрмулулгу, талихIралгу уччин итаннав…

ЦАМУР ЧIУ. Вил ниттил рухI хъинний дишивуй, ххазинай…

АЬЛИЛАВ. Цал махъ бусан бюхъайма, чIарав ацIан бюхъаймагу цIаравун ххяххан тIайлабувккун, утти шику ливчIсса алтта-къалан, къари-къужрахь, кьадиртун буттахъал минардугу, лявхъу кIанугу, вайварттайх гихунмай бивзун бачияра тIар. Циван?.. Ци тахсир хьуну! Ссал къумашиврувун багьну?.. (Каландаровлухь) АцIулар, ина яла къума-цIаннугу, байшбатарнугу ливчIми лакри чин ччай урав?.. Гичча лавай Лаккуйн нани ххуллий, гай гада бацIансса лухччинулгу, хъарас щунсса хъунилгу касак бакъасса, чачунсса някI-чарил ххяллаву ялапар хъанахъими вил итталунмагу къабагьрив?.. Гай циван бизан къабайссар му вил алжаннул кюрттарайн?.. Тай ттукку-чувагу гужрай лагайсса вахIшисса зунттаву ва вацIраву ялапар хъанахъими цан бизан къабайссар?

ХЪАМИТАЙПАЛУЛ ЧIУ. Вин аруллагу дуниял тIитIивуй, чани… я аллагь, вий баргъ ва барз бацIаннав, ххазинай…

Аьлилав. Бакъача, тайннал миллатругу буну тIий, миллатрахлу махъ бусанми, мунил чIарав бацIанмигу буну тIий!.. Жула жунма цала-цала бакIурдилссагу, къуллугъиртталссагу буллай бакъа тIий…Цал бургияра лагмава цайми миллатру ци дуллай бурив: цаннал маз цаннан къабувчIлачIимигу ца миллатшиврий бихьлай, миллатрал аьдад хъун дуллай, хъун урцIух тямадатал хъанай… Жулами тIурча – ххяппаксса миллат кIибачIлай… КIибавчIуну, ччяни бухлаганшиврул…Жуяра арх бакъа, тийх, Абхазнаву ялапар хъанай бивкIссар жува кунмасса убыхтал тIисса бусурман миллат. I864-ку шинал, Турциянаву жунна дирзунна урцIигу, бувцIунма кьуругу бикIантIиссар, жува тихун бизарча, алжаннаву ялапар хъанантIиссару тIисса ца-кIия кьаландаровхъал хавардайн вих хьуну, оьруснавух хIала къабикIан, Турциянавунбивзун лавгун, хIакьинусса кьини щаллусса миллатрая цуя ца сагъну ливчIсса инсан акъассар!.. Буттал кIану Багъдадри. Шиккусса дачIрасса аьрщи-чарилва жувунма гуж бучIан буллалиссар. Шичча бивзун гьарча, жулами бакIурдичIангу тава кьадар бучIантIиссар. Ва даву дуллалимигу жула оьрчIал оьрчIайгу жула душманшиврий бикIантIиссар. Ва даву цурдагу жула ххаллилсса миллатрайгу, ххаллилсса миллатрал бюхттулсса тарихрайгу мяшминнал дуллалисса давури…

ХАЛКЬУННАВУССА ЧIУРДУ. Хъинну тIайлассар!.. Ай ца хъинну увкуннича!.. Цуппа муна мукунни!.. Жува къаччиминнал давур!.. Ца шагу чунчIав къаласунтIиссар!..

КЪАЛАНДАРОВ (чIаравминнахь тиху-шихунмай кIиссагу кIутIу буллай). Это уже провокация…А как с провокаторами поступать мы знаем… (Аьбидиновлухь). Немедленно арестовать!.. Я вам приказываю!.. (Райкомрал секретарьнахь) Вы не видите, что мероприятие срывается?.. Я один не буду за это отвечат!.. Ва зу дан аьркинсса давура на дуллалисса…

АЬЛИШАЕВ. Анавар мауккара…ДакIнийн шачлачимур учин бити… Ссавур да чансса… Цивппа паракьат хьунтIиссар… Ва мукун хъап-шаплий, кIункIу-хъитлий дайсса даву дакъассар…Ва хъинну ссавурданий, сантирай дайсса давур…

АЬБИДИНОВ (Аьлишаевлул увкумунил ялату гьиву ларсъссаксса рахIат увккун). Сантирай… Даву сантирай дарча хъинни…Акъахьурча шикку оь экьи гьангу бюхъайссар…

АЬЛИЛАВ (сси лякъаливну). Дуки-хIачIиягу, лаххи-ликкиягу ларсун, щютIагу тIий, аьравалттай бурттий бачин тIий бусса бур!.. Жула халкьуннал учалагума буссар: «Цуцумунин ци бантIиссарив къакIулну къаличIаннав», тIисса…Вай цу-цумунин цибан хъиннивав тIий ливчIсса инсанталли… Гьухъа барча хIажак дакъа, хIажак дарча – гьухъа бакъа ялапар хъанахъисса…Ци дуки-хIачIиягу, ци лаххи-ликкиягу дуссар оьлища ттирзусса накIгу, аьнакIул бувсса ккунукгу яттил хIайвандалия дуркьусса ппалгу, кIиссурайсса кIиссагу, канийсса канишгу фронтран кумагран тIайла дуклай, лархьхьу никьлий, уртту-щинай чIунну лахълахъисса инсантурачIа… Буссарив инсантурай цIанакул шичча бивзун, ва дяркъусса оьинтнил гьантрай, марххалттанивух, гъаравух, кьяркьаравух ххюва-ряхва гьантлий бачинсса аьмалгу, хIалгу!..

ЧIУРДУ: Бакъассар…Бакъассар… Ци хIал бикIайссар къари-къужрай ва мюрщи оьрчIай?.. Вил маз-зума цIуллу дивуй, чани, ина акъассания жу цидулланссия…

АЬЛИЛАВ. Ца ялагу: Гай жухьва бизияра тIиния бизан бувсса мичиххичгу жува кунмасса инсанталли… бусурманталли… Жува кунма, бавалгу, бутталгу бувсса… ЩилкIуй бакIрацIух ларчIсса цIарай кару гъили дуллалаву, ххишала бакъа кьюкьаласса затри…Гьунттийнин ци кьини дучIавив къакIулссар… Ва дуниял, – учайссар, – цал кьяпа лагма букканнин, шамийлла лагма дуккайсса затри, куну… Гайнналгу буссар жуярва хъунмасса миллатргу, миллатраха лавхьхьусса тарихгу…

КАССАДА (щалла лухIилуву, ххют кунна хьхьичIуннай дурккун). Бавалхъул, арсрув... Ттул МахIалли кунмасса арсрув… гьархьхьуну ттул МахIалли, цан нязаннийсса булуннав, аскисса душманнал ккуллалул увтун арийлчинсса гьанттар… Гьархьхьуну арилку хьхьури…

КЬАЛАНДАРОВ. Лахъи къабувну… КутIану…КутIану… (Аьлилав ва Къадаран мунах лап сситтулну бургай).

КАССАДА (чIу баяншиврул вичIилуха лачакгу махъуннай кIункIу дурну). КутIану бусанна, бавал, кутIану…МахIаллил буттал кIанттул цIаний жан дуллуссар, шанма мюрщисса ятингу махъ кьабивтун… Ттул зухь ва бакIрайсса лачак ласайсса миннатри, ттул, ниттил ккуккулул хатир бувну, жула бусурман аьдатрай гьархьхьунусса ва ттул арснах хьхьудулун, хIатталий зикри бишин битияра… Гьунттий цинявннал хьхьичI хьуну, зу дурцунийн на нара дачинна…

КЬАЛАНДАРОВ (цал зунххи Аьлишаевлухгу урувгун, Къадараннухь ва Аьлилавхь, Кассадайн ккаккан буллай). Вана… Вана зул даву…Партийнай организациялул секретарь… Советрал председатель… Насияра утти, ттарацIув ччаргу кьадиртун, ччитул оьрчIру махь буллан! Зикри бихьлан…

АЬЛИШАЕВ (ругьан къархьуну). Слушай!.. Надо же иметь элементарное уважение к своему прошлому!.. Кроме того, вищал гъалгъа тIий дур арс аьрай ливчIсса Нину!.. Кьяпа букьа увкуннича куну, бакIру личин дуллан къабикIайссархха…

КЪАДАРАН (цирив ца хIайплий). Жура-жандара инсаннал чIаларчагу, гьич ина инсаннацIа лявхъусса инсан акъахьунссарарч…

АЬЛИЛАВ (сситтуй). Ккунук бивхьуну лявхъусса…

КЪАЛАНДАРОВ (бан-битан бакъа, къазразан лавгун, райкомрал секретарьнахь). Да адаминай, на цуксса хIаллайра шику вай кьюкьалартту духIлантIисса?..

АЬЛИЛАВ. Да, жува щищал гъалгъа тIиссару?.. Бачиярала шаппа-шаппайн…(Аьлилав халкьунначIанай шай, халкьгу шаппа-шаппайн бачин суку-кьютIу шай. Ва ппурттуву хъуниминнайн лажинну, халкьуннал хьхьичI авцIусса милицанал начальникIнал бакIрая, хъап куну, кьяпагу лавсун, ХхуйтIу лихъай).

АБИДИНОВ (хъап-шаплий ХхуйтIул хъарив агьлай). Да!..Да!.. АцIу тIий ура на вихь!.. ХIарамзада… Угу-угъраш!.. (Лагай ХхуйтIул хъирив хьуну. Халкьуннава щилчIав минах къулагъас къадай. Гьарцама ур цаламур дард ххихьуну).

КЪАЛАНДАРОВ (чIарав авцIусса Аьлишаевлул тиха-шиха ХхуйтIул хъирив агьсса Аьбидиновлух уруглай). Ванна да… Ачу тти…Вай инсанталли… Ва порядокри… Да!.. Аьбидинов!.. Аьбидинов!..

АЬЛИШАЕВ (иш оьнивун багьлагьишиву бувчIуну, цимурца цала канихьхьун ласун ччисса чIуний; кьянкьа-кьурчIину). Гьалмахтал!.. Да, гьалмахтал!.. Тавакъюри ца дакьикьалийсса вичIи дишаву…

КЪАДАРАН. Гьалмахтал! Тавакъюри вичIи дишаву… Ихтилат бан ччай ур райкомрал цалчинма секретарь!..

 АЬЛИШАЕВ. Агана жува цинявппа укун, кув тихунмай, кув шихунмай кIункIу-хъит хъанарча, жула иш хъиннийн къабуккантIиссар… Ва хIакьину дуллалисса даву я ттул, я ваг ила увкIсса гьалмахчувнал, ягу шивахвасса цаманал хушрай дуллалисса даву дакъари…

ХАЛКЬУННАВАССА ЧIУ. Щил хушрай дулларчагу, ххишала дакъа кьадарсса даву дуллалиссару тIиссару жу…

АЬЛИШАЕВ. Тавакъюри вичIи дишаву!.. Ва даву дуллалиссар паччахIлугърал кьамул бувсса кьянкьасса хIукмулийн бувну…Ттул зухь учин ччимургу мури: ва хIукму кьамул бувсса куццуй, паччахIлугърачIа ва бакIуйн букан бансса гужругу буссар, сурсатругу дуссар… Мунихлуну на зухь тIий ура, аьркин бакъасса, зула зува кьуцIу буллалисса аьлагъужагу гьаз къабуллай, къакIулманал кIулманах, чIивиманал хъунаманах вичIи дирхьуну, маслихIатрай ва сантирай даву дувара тIий…

КЪАДАРАН. Жяматрал хьхьичIун уккан кIулманал, даврил санти кIулманал иш личIиссава бикIайкьай…

АЬЛИЛАВ. КутIану учин, жун тIайлану бувчIлай бухьурча, ина жухь тIий ура: бахIи куний бахIияра, акъахьурча бахIлахIи банну, тIий…Мукун да?..

АЬЛИШАЕВ (ссибивзун). Бакъа… БахIлахIи банну бакъача… бахIлахIи бантIиссару!.. Вин муксса къабувчIлай бухьурча…

АЬЛИЛАВ (лап хъювсул увккун). Да, инсантал… Да, арамтал… да, зуй яру бурча, бургияралартал шиккун ттух… (Дакъасса ка ккаккан дуллай) Зун кIуллив ттун цими шиннив?.. Ттун оьрмулул дурагу къура шинни… Щил цIаний, ссал цIанийра на ва жагьилсса оьрмулий укун ливчIсса? Яртал, ва ттула буттахъал мина – вай зунттурду, рахIру, Ххяллава, муруллава буклай, мукьав чартту ххилай. Жула буттахъал бувсса кюртти ябан, шику душманнал чакмалувусса ша къабизан акъаяв на шичча тихунай тай вайварттайх лавгун талатисса? Гьурала туну, тIайлассарив утти та дужжагьирал цIаравух лавгун махъ, бахIи куний бахIлахIи увну, ттула хIала-жалалсса миналия, ттула тIювая изан увну, на чунниввагу къакIулну, кьунча куна хьхьичI авкьуну ачин уллалаву… Ва ци паччахIлугъри, ци аьдлу-ццугъар?.. Ва цу авлиянал кьамул бувсса хIукмур?..

КЬАЛАНДАРОВ. Гьалмахчув, секретарь райкома…Пора разобраться с этим провокатором… Итлайгу урачала тIий, ва утти паччахIлугърайнма аь-аь буллан ивкIунни… Ца цалалу Берлин лавсун увкIсса хханссар шику…

АЬЛИЛАВ. Нагу, на кунмамигу лавгун душманнащалгу талай бивкIссару, урчIвагу базу сагъми уттигу талайнма буссар, Берлингу ласунтIиссар…Инагу, ина кунмамигу, оьлил уксса лякьригу хьхьичIух дургьуну, оьрмул оьрмулухун миски-гъаривнал Жанну ласлай, оь цIупI тIий бикIантIиссару… Вин кIулну бикIан, ва ттуккул бакI уксса шяравун уттинин зувивахъул бивкIулул чагъарду бувкIссар… Ссал цIанийри тайннал жагьилсса оьрмулий Жанну дуллусса?.. Вил лякьлулгу, вил къуллугъралгу цIаний да?

КЬАЛАНДАРОВ (лагмава яру битлай щихрив луглай). Да, в конце концов, ссавурданулгур дикIайсса ахир… Аьбидинов!.. Гьалмахчу Абидинов!..

АЬЛИШАЕВ (ссибивзун). Да адиминай!.. (Аьлилавн къабаян кунма) Инна инава ура та инсан щара-кIама лахъан уллай,.. танава махъру кIункIу буллай… Вай инсантурал учин ччимур увкуну, рахIат букканнин ссавур дан бюхълай буривкьай вища бакъарив?..

АМАТУ (халкьуннава хьхьичIуннай дурккун, ка тIиртIуну Аьлилавлуйн ккаккан буллай). Хъинну тIайлассар, ттул арс… Вил му мазгу, бакIгу цIуллу баннав, мурад булуннав…оьрмулул уччиннин итаннав… Ххирасса жямат!.. Уссахъул!.. Арсрув!.. Ва Аьлилавл тIутIимур цимурцагу тIайлассар…Инсаннал ляхъан увсса нинугу ца дикIайссар, лявхъу кIанугу ца бикIайссар… Мунийн буттал кIану учайссар…Нину диркIуну, ягу дуккан дурну дурцумур щар– буттал щар шайссар, Буттал кIану кьабивтун мина дирхьумур кIану гъари-гъурбат шайссар. Буттал щарнил биялларалун багьавугу, гъари-гъурбатрай ялапар хъанахъавугу цава цар. Жун къачру гъари-гъурбатрайсса алжангу, миккусса качар-чассаггу, алжаннул шаравгу…Вассалам!..

(Пащагу тIий, бакIрай кьяпагу бакъа зана шай Аьбидинов.)

АЬБИДИНОВ. Агь, угъраш, я угъраш!.. Акъассар кьяпагу лавсун,.. Акъассар, вин ккакку, ттун ккакку… аьрщарал оьвкьуссарив, ссавнил лавсъссарив…

(Жяматрава щилчIав ваннах къулагъас къадай. Кьаландаров ва Аьлишаев цал цалчин ккаклакисса цирив ца къунтаннарах кунма, махIатталну Аьбтдтновлухгу бурувгун, яла цаннах ца бургай).

КЪАЛАНДАРОВ (кIирагу ка Аьбидиновлул чулухуннай тIитIин дурну, цувама Аьлишаевлул чулухунай кIура авну). Ургу утти шиккун НКВД-лул начальникнахь…Ачу тти, вайннащал шику даву дуллалу…

АМАТУ. Ца ялагу!.. Буттал кIанттухлу талай, Буттал кIанттул цIанийсса дяъвилуву ттул ласналгу жан дуллуссар, арс хIакьинусса кьинигу талайна уссар… Ва минагу, гьанугу, вай зунттурдугу, ратIругу душманная дуруччин…Ттурудавайлий душгу буссар…

КЪАДАРАН. Зу на багъишла итияра, амма ттун ва даву жува къаччиминнал, жула гьарца ишираву итххявхсса, зираксса, дунияллул шиха щуну, тиха личайсса миллат, бюхттулсса тарихгу, бюхттулсса Ватангу дусса миллат къаччиминнал, муницIухсса цукун, ци чулий банхъиннивав тIиминнал дуллалисса кунма чIалай бур…

КЪАЛАНДАРОВ (къадаран ккалли къауллалисса лугъатрай). Да, щяикIукьай ци къаччиминнал тIий уссарав…

УЪАДАРАН. Бакъахьурча, да гьалмахчув Кьаландаров (хъюлчу-кIутIугу хьуну) Лагьбар МахIмудович, бувчIин бакьай туну жунгу: Гьухъаллал Къайдардуя, ПартIу ПатIимая байбивхьуну Хан Муртазааьлийн бияннин цикссагу вирттаврал, жула ппухълуннал цикссагу душмантурая бурувччусса буттал улчагу. Цикссагу лекьа-пIякъурдава, лухха-ххиттува гьаз дурсса щархъурдугу, ми цимурцаннул лув бацIан бюхъусса чумартсса миллатгу цал утти кIибачIин, кIибавчIуну яла паса-пархха бан щинни дакIнин багьсса?..

(Аьбидинов халкьунначIанай хьуну, ХхуйтIул мачча-гъансса уссарив, му цува чув лякъин бюхъайссар тIий, сурагъ буллан икIай).

Аьлишаев (сситтулну вев куну). Аьбидинов!..

АЬБИДИНОВ. Багъишла ити, цалчинма…Кьяпа лякъин бюхълай акъара…

АЬЛИШАЕВ (хъиннува вев тIий). Ци-ци?

АЬБИДИНОВ. Кьяпа, гьалмахчув цалчинма, (бакIрай хъат дихьлай) кьяпа…Ца хIарамзаданал бакIрая кьяпа лавсун, ливхъунни… (Цаппарава хъяхъаву дайгьин къабюхълай, кьацIливу хъатру дихьлан бикIай).

АЬЛИШАЕВ. БакI буриввар?.. БакI?..

АЬБИДИНОВ. Бур, гьалмахчув цалчинма!..

АЬЛИШАЕВ. Бушиву къакIулли…Инна шику цалсса паракьат хьу… А кьяпулмур масала жува райкомрал бюрорай ххал бигьинну. Вила бакIрайсса кьяпа ябан къашайсса ци НКВД-лул начальник уравгу ххал анну…

АЬБИДИНОВ. Гьалмахчув цалчинма!..

АЬЛИШАЕВ (ккарччавух). Къуртал хьу учав!..

АЬЛИЛАВ (Кьаландаровлухь). Ттун къакIулли ина ча, цукун, щийхчIин агьссарав му къуллугърайн…Амма ва хIакьину шику хъанахъимур лаласунсса аькьлугу, духIингу диркIссания, вай хIакьину шику жу вихьва тIутIимур гилу ина цакьнийва цайминнахь учинтIиссия…

КЬАЛАНДАРОВ. Ттул къуллугъралссагу, ттул аькьлу-духIиндаралссагу булланнин ина му вила май марцI бан лахьхьи…

АЬЛИЛАВ. Ай, вирттал, я вирттал!.. Да жямат, зу бизар къавхьурув вай ихтилатирттая… Вайнна… Бургияра вайннах…ДакIний битияра вай, зула оьрчIахьгу, оьрчIал оьрчIахьгу бусан… Вайри жула кашилул заллухъру…Ичи-къичи къучитал, миллатрал мукьахчувтал… Вайри оьрмул оьрмулухун жула миллатрал кьакьарттух личIантIими…Вайннахьри абадул абадлий жула миллат «барчаллагь» тIунтIисса…(Дакъамур канил хъачIгу думуних кIутIу дурну.) Хайп, щищал талан, чунья на лавгсса, душмантал шиккува вилаххав буна?.. (Тамансса хIаллай ссихI дакъа бацIай).

АЬЛИШАЕВ (сси ляливну). Ургу, жагьил…ВичIи диша ттух… Ца хозайннал бивкIссар тIар, чIивинува бувцуну, махь буллай, хъунма бувсса цуша. Цухьлул хозяин шанашисса чIумал ганал чIарав цичIав гъан хьун къаритайсса диркIссар тIар. Мукун цал хозяин шанашисса чIумал, ганал ненттабакIрай зимиз щябивкIун бур…Зимиз бивчIан цухьлул цила залинсса ххяппа хазайннал ненттабакIравух рирщуну гьан дурну дур. Зимиз бивкIуну бур. Амма зимизращал ивкIуну ур хазаингу.

АЬЛИЛАВ. ИвкIухьунссар…Мунийну ина туну ци учин ччай ура?..

АЬЛИШАЕВ. На нигьачIий ура жувагу ва ишираву цухьлул къадан…

АЬЛИЛАВ. Цкунни му дайсса?..

АЬЛИШАЕВ. Цукун бикIави… Ми ина тIутIисса цимурца, бюхъайссар ттувува нава нагу тIий икIан, цаймигу тIий бикIан…Амма, бушаврил ци бави…Ца чIапIул кIира лажин дикIайссар… Ца лажиндарай ца чивчуну бикIайссар, гамур лажиндарай – цамур… На вихь нукIува учав: ва паччахIлугърачIа, ва хIукму кьамул байсса кунма, ва биттур бансса гужру ва аьркинмургу лякъинтIиссар, куну…

Аганаки иш ми гужирдахун багьан битарча, муна мунири Жура цухьлул дантIисса…БувчIурив? (Тамансса хIал шай циняв кьабагьну).

АЬЛИЛАВ (ца хIаллай бакIгу хьхьичIун руртун, пикри буллайгу ивкIун, цакуну ццах куса куна). БувчIунни…бувчIунни…(ца хъис хIаллай кьаагьну) Амма цамур затгу дакIнин багьунни…

АЬЛИШАЕВ. Ци?..

АЬЛИЛАВ (цIунилгу, бакIгу хьхьичIун руртун, кьаагьнугу ивкIун). Хьхьирил кьюрщалттул, крокодилданул тIиссар, цихьхьунма биривсса ав букайссар тIар цIимилул макьгу рутIлай…Амма утти муния гъалгъа тIийгу ци хьунссар…(Цакуну хъит куну, хьхьичIунайгу увккун, лахъсса чIуний) ДикI цух учирча, цIу бичайссар, цIу цух учирча, банмур къалякъайссар!..Бачияра, ххирасса жямат!.. Бачияра… Хъунмасса ва дакIнихтунусса барчаллагьращал кьамул дурну ва «паччахIлугърал жухара дуллалисса аякьагу», бачинтIиссару цинявппа ттул хъирив бувкнийн букан, ливтIуний литIун… (ХIатталлил чулухуннай кагу палцI дурну). Цал шийва кьабитлатиминнахь – ппухълуннахь, уссур-ссуннахь барчаллагь учин тихун, зумащарнийн, хIатталлив…Яла шютту-шярай бацIаннин – жагьаннамравух гихунмай!.. (Вав-шав, агьи тIий, аьгу аьтIий, Аьлилавл ва Къадараннул хъирив лагай жямат. ШанмурцIу бувну бавцIуну, бу-буний пIапIрусругу тIий, бакIру хьхьичIун дирчуну сахIналий личIай Кьаландаров, Аьлишаев ва Аьбидинов).

АЬЛИШАЕВ (дуллай, дуллай, тамансса пIапIрусгу ссур дурну, цакуну гагу щях рирщуну). Да-а…Аьлилавл тIутIимур тIайлассар… Нааьна…ИвчIаннинссагу, ивкIуну махъссагу нааьна…(Чансса ссавур дурну). Шюшлай шюшин къашайсса… (Тиху-шихунмай ца кIива шагу лавсун, ялагу гиккуна зана хьуну, цIунилгу пIапIрус кIиян дай. Яла цахьва цала кунма). Малодушие… Преступное малодушие я проявил в отношении своего народа… Тула тIимуний кьянкьану ацIан аьркинссия…(Кьаландаровлухгу эц ивкIун, лахъну). Миллатрал ттун ва тачIав багъишла къабитантIиссар… БувчIайрив вин, гьалмахчув упол-но-мо-чен-ный?.. (Чансса лагьну, сситтуй ккарччавух) Карьерист несчастный…

КЬАЛАНДАРОВ. АцIу, утти ина щала тахсир ттуйн бутан ччай унуккара?..

АЬЛИШАЕВ. Му кьацIвагу бащиярч утти!.. На вихь ттуршийла увкуссия: къабучIиссар чIивисса миллат тихун-шихун кIибачIлан, куну. Вивун бия ччуччи багьну, хъуниминнан хъин чулий ккаккан,.. паччахIлугърал ххуй зузала хьун…Къуллугърал шачIанттайх ххарххурду личлан…Зат бакъар… бикIуча вагу ттун ца дарсну – ина кунмасса карьеристътал ххишала къуллугърайн гьаз къабуллан. (Аьлилав лавгсса чулухунмай кIиссагу кIутIу бувну) Но загубишь парня.. смотри, не прошу!.. (БакIрай кьяпагу бакъа, бакIгу хьхьичIун дуртун, лап пашманну авцIусса Аьбидиновлухь). Вищалмур ихтилат гила зана хьуну махъ банну, начальник ЭН-КIЕ-ВЕ-ДЕ!.. (КьатIувай ачин най уна, кьатIату Аматул леххаву тIисса чIу).

АМАТУЛ ЧIУ. Жя-мя-ат!.. Гьуя, леххаву, жямат!.. Кассадал цилла ссурссу цилла дурккуну ду-ур!.. Вав-шав, цучIав акъарувкьай, нанияра кумагран!.. (Аьбидинов чIунийн лечай. Аьлишаев кIирагу канил бакIгу бувгьуну, цал цал лагма цува укай, яла чансса хIаллай, гава куццуй бакIгу бувгьуну, кьусгу ивкIун, бакIгу канил бувгьуну лахъисса ххарххурду ласлай, увккун лагай. СахIналул дянив цувалу ливчIсса Кьаландаровлул цаятува цува рязину, ца пасила дусса пишгу куну, урчIамур ка лажиндаравух, лунттубакIрайх дуккай, яла галстук бакьин буллан икIай).

Пардав.

Лап пашмансса музыка. Цакуну музыкагу дацIан дурну, радиолувух ккалан бикIай Лакрал захIматкашнайнсса Сталиннул телеграмма…

ХХЮЛЧИНМУР СУРАТ

Ххютххутулла ратIух лавайсса ххуллу. Гъаравух буллалисса марххала. Аьравалттил зертI-зертIлихун «Вогьа-гьай» тIисса чIурду.

КЪАДАРАННУЛ ЧIУ. Кьючара... кьючара!.. Гьурала, чансса ттигу…Гьура-гьура!.. Ттигу-ттигу!..Мукун… Ай, машаллагь!.. Ухь-ва-ай!.. Бачин бара утти, бацIан къабивтун!..

ХЪАМИТАЙПАЛУЛ ЧIУ. Ил, душ!.. БучIу му аьравалттия, ми ницру бацIавай бурча!..КIийн, кьанийн лавхъукун, щябикIанссарача!..

КЪАДАРАНУЛ ЧIУ. Да, Аьлилав, кьатIу-шав уккан ччай акъарав… Ачу ца-ца хьухь бюкьаннуча, ваймигу хъирив лаяннин… (БакIрая ччаннайн бияннин кьяркьаравухгу бувккун, хъачIниха буккай Къадаран ва Аьлилав).

АЬЛИЛАВ. Ва пассат дурсса гъарал къадагьайссания уссил…

КЪАДАРАН. Ванил бурххарч жула щала ттукку лиллай…Ва хIуну-тунушиву къадиркIссания, жува нукIува Лаващав бикIанссияв…

АЬЛИЛАВ (чарил ххялчIи ляркъуну, ганий щяикIлай). Ухь-ва-ай!.. Чурххай хIал къаливчIунни…

КЪАДАРАН (Аьлилавъя чансса тинайну щяикIлай). Ххячча дакъасса адамина – ина инава ура гьарманан кумагран ххяхлай…

АЬЛИЛАВ. Къартту-къужри бурда… Да, ина му атилсса аьрщарай щяивкIнуккара?.. Ци-дунугу лув дишакьай да… Инагу къашай хьурча, яла на ива-ивчIанссара…

КЪАДАРАН (лув дишинмуних тиху-шихунай уруглай). Валлагь, уссу, ва мяйдужагьраву сагънунияр, ттуршийлагу ивкIуну, гьаттаву хъина…

АЬЛИЛАВ. Мяйдужагь…Ява ина му хъинну увкунни…Халкьуннайн дуккан дурсса кьини халда цал…

КЪАДАРАН. Бакъариввар туну?.. Пикри бала цал, ва оьрмурив?.. Ва дунияллив?.. Улу, дужжагьравугума вайксса ккаккан байшиву къакIулли инсаннан…

АЬЛИЛАВ. Ай ду-ус!.. Ва дайдихьури – дайдихьу… Ци кьини дучIанссарив ттигу жула миллатрал бакIрачIан… Ми бикIанссарча, вичIа цичIар пуркIу букан бансса зат лирчIриввар?..

КЪАДАРАН (хъаралун ка дукIлай). Буссар чансса бюруврал мюрш…

АЬЛИЛАВ. Ми лапва кьурчIисса бикIай…

КЪАДАРАН. Мискиннал махорка бурда…

АЬЛИЛАВ. Жува шику лахъи лаглан къабучIиссару…Тай махъсса шанна аьравалттил ттупру чап учин кунма чIала бура… Тайннулгу бурузин барча, жула иш къурталссар…

КЪАДАРАН (Аьлилавхьхьун, пIапIрус дахIин, чагъарданул кьютI буллай). Ярч, кIа уполномоченный тIисса угърашнайнни ттун уттива-ттигу ссибизлазисса…

АЬЛИЛАВ (никирай бивхьуну, кказитрайн бюруврал мюрш бичлай). Оьтруку дияча, дукьан да-а! Учин увкусса подле-ец!..

КЪАДАРАН. Райкомралма – маладиц…

Аьлилав. Ци маладицри икIайссача…КIа маладиц ивкIссания, жуйхра ва кьини къадуккантIиссия…

КЪАДАРАН. Мукссагу тIиссара, да…

АЬЛИЛАВ (пIапIрусрайн). Ва пассат диву ца каних дахIин цукунчIав лахьхьин тIий бакъар…

КЪАДАРАН (цала дархIумур Аьлилавхьхьун дуллай). Ма, ва уча, му на дахIиннача…КIа личIину цичIав тIиI акъая, да…

АЬЛИЛАВ. Лажин лухIи хьувкун, мазгу кутIа шайссар!..

КЪАДАРАН (цал Аьлилавл, яла цала пIапIрусругу кIиян дурну). Кьабитила цивппа, щин-бунугу бавну, цIухху-бусурду байбишайча…

АЬЛИЛАВ. Утти шиккугу щил ци бусанххурарч?..

КЪАДАРАН. Ялтту левххун нанисса лелуххул бусайссар, тIиссагума учала буссар…

Аьрччагу тIий увкIун, ХхуйтIу, Аьлилавлуя ва Къадараннуягу хавар бакъа, чансса тинайну хIажакрах мухIлу ттирихIлан икIай.

КЪАДАРАН. До-до!.. Анавар дурххунвагу акъарав?.. Ява хIаллиххьу…

ХХУЙТIУ (гайннан цува хIисав хьусса тIааьн къабивзун). Къадурххун дур анава-ар!.. Жюржу бан ччай ура-а!..

КЪАДАРАН. Жюржю ба-ан? Гьа-а, бува – бува…

ХХУЙТIУ (ччангу щях бивщуну). Зу яруй бантIитта-ар!..

КЪАДАРАН. Къабаннуча, бува…

ХХУЙТIУ (хIажакрахун дурчIусса бартрахIин дахIлай). БантIитта-ар!

АЬЛИЛАВ. Гьа, улу, мухъачIнихун лавгун, бува туну…

ХхуйтIу хъачIнихун лагай.

АЬЛИЛАВ. Ттун та оьрчIай язугъ хъанай бур… На учирча, ттущал ччалантIиссарча, танал та ччаннан цивхьуну бурив ххал баларч…

КЪАДАРАН. ЦIанакул…

ХХУЙТIУ (бартрахIингу дахIлай увххун). Къадаран уттай, дутман тиккунгу утIантIиттарив?..

КЪАДАРАН. Цу душман?..

ХХУЙТIУ. ДитIлир…

КЪАДАРАН. КъаучIантIиссар…Цибанна вин танал?..

ХХУЙТIУ. Танал ттул ттан цIуцIи бунни… На та ттупанталух ихханна.

КЪАДАРАН. Ччан цIуцIи бурдив?.. Щи-ил – Гитлерду-л?..

 Аьлилав хъян икIай.

ХХУЙТIУ. Ттай хъяй ура. До-о, авлия-я!...

КЪАДАРАН. Агь, ду-ус… Вин кIулну бивкIссания вила ччан цума Гитлердул цIуцIи бувссарив?!.. Хула, шинай хьу, цивхьуну бур ччаннан?..

ХХУЙТIУ (КъадараннучIанай хьуну). Бюрубусса бувххун бур, цIун бикIантIисса-ар…

КЪАДАРАН (Алилавхь). Ци тIарар ванал?

АЬЛИЛАВ (хъяй). Бюрубусса кьувтIуну бур тIар…

КЪАДАРАН. Бюрубусса ци дурвав?.. Гьа-а, ва бюруврайн тIий ухьунссар… Хула ус лики ххал баннуча…

ХХУЙТIУ (Аьлилавхь). Вин Тамтиятгу къаххираттар…

КЪАДАРАН (ХхуйтIул ус лирккун, ччаннах уруглай). Ва ина Аллагьнал яивуй… Шиккунниярч лал дагьну диркIун дур…

 АЬЛИЛАВ. Дуриввар?..

КЪАДАРАН. Дурарч…Да ва кьянкьасса за ивкIун ур…Укунсса ччаннащал цаманаща ша ласун къахьунтIиссия...

АЬЛИЛАВ (ХхуйтIул ччаннахгу урувгун). Мяйжаннугу лал дур… Ургуварч яла цалагу цIий бур – бакъар къаувкусса?!..

ХХУЙТIУ. На тавай ттай ура…

КЪАДАРАН. Ци-и?

АЬЛИЛАВ. Шавайн ччай ура тIар…

КЪАДАРАН. Огьо-гьо-о! (УрчIамур канил ххяппагу ХхуйтIул хьхьичI гьанагьи дурну).  Дакъассар, уссу… Утти жула шардалугу дакъассар – буттал кIанугу… Цимурца шотту шярай дарцIуссар…

ХЪАЧIНИХА ХЪАМИТАЙПАЛУЛ ЧIУ. Ве-е-е!.. Аьрава ккуру ларгунне-е!.. Аьлилав!.. Къадаран!.. ОьрчIрув!.. Вав-шав, цучIав акъарув, аьрава куру ларгунни!..  (АрхIала гьаз шай цайми хъаннилгу гьуя-гьарайлул чIурду).

АЬЛИЛАВ. О-гьай!.. (Левчуну най уна). Къатта ччувччунни!..

КЪАДАРАН (ХхуйтIугу кьаивтун, лечай). Да му цукунникьай!..

ТАРА ХЪАМИТАЙПАЛУЛ ЧIУ. Вав-шав, аьравалттищал Сайдиллагу лавгунни!

ЦАМУР ЧIУ. Гьуя, тти цибанну?..

КЪАДАРАННУЛ ЧIУ. Агь, вил заллий… Да га цукун куру ларгурартал?..

ХЪАМИТАЙПАЛУЛ ЧIУ. НикIа бувцунуккар…

ХХУЙТIУ (нигьа увсун, хъап куну, бурчул усгу канил дургьуну лихъай). БуртIил ука-ан! Амату буттарттий, на буртIил укан кьаивтун!..

АМАТУЛ ЧIУ. Гьай, чани, гьай… Ци тIий ура, ци къелла хьур?..

ХХУЙТIУЛ ЧIУ. На буртIил укан тийх кьаивтун!..

АМАТУЛ ЧIУ. Къаукайссар, чани… Дяхтта барцIру къабикIайссар… Му ус циван ликкав?.. Ачу, щяикIуча вила ус лаххи…

ХХУЙТIУЛ ЧIУ. На тавай ччай ура…

АМАТУЛ ЧIУ. Утти жула шардалу дакъассар, чани, паналий дарцIуссар…

ХХУЙТIУЛ ЧIУ. Къатайнналий дарцIуссар, тийх дуссар…

АЬЛИЛАВЛ ЧIУ. Сайдиллай, ва Сайдиллай!.. Вартал вания баштан хьуну ур…Хурала мивах хъа дурив, варси бурив?..

АМАТУЛ ЧIУ. Вана шику – чансса лавайну аьравалттия багьсса мунал цала ххютIача, ва ласияражантал... БацIияра на булуннача…

КЪАДАРАННУЛ ЧIУ. Кьяркьи дур…Жува ласуннуча, ина бацIу…

ХЪАМИТАЙПАЛУЛ ЧIУ. Вав-шав кьияма! Я Аллагь, ва кьини жуйх дуккан дан дакIнин багьнал вилах лещаннав?..

ЦАМУГУ ХЪАМИТАЙПАЛУЛ ЧIУ. Аммин, я, Аллагь!..

АЬЛИЛАВЛ ЧIУ. ТIитIин ба ва чулух, шийх…

КЪАДАРАННУЛ ЧIУ. Гьар ара утти… ХIаллих, ччех къагьанну… Мукун, мукун… Утти, гьаз бувну ва ххютIа, кIура аен ара тихунай… БакI хьхьичIунну… Укун… Гьа, бачияра утти…

Лагмара арамтуннал ва хъаннил дургьусса хъаттирай дирхьуну, духан дай Сайдиллал нурчIи.

КЪАДАРАН (цалалу махъа бувгьуну нанисса ххютIагу щяв бивхьуну, ненттабакIрава гьухъ лихьлай). Ва ца затья жунма ккаккан ливчIсса…

 Хъаннил, аьтIий, маоь тIитIай.

АЬЛИЛАВ (мукун гьухъ лихьлай). Утти циру дуллантIисса?..

КЪАДАРАН. Вай жула буюр-агъаталгу бакъахьунуккар…

АМАТУ (жаназалул ялтту лухIисса варсигу ливчуну). Цал ва адаминал рухIрая алхIам буккияражантал…

Къадараннул «патихIа» учай, цинявннал алхIам буккай.

Аьлилав. Буюр-агъатал нукIува Лаващав хьхьу рутансса санти дан лавгнуккар…

КЪАДАРАН. Зана къабикIанссар цийча, ми аьравалтту, дацIан къадиртун дачин дара…

АЬЛИЛАВ. Аьравалттуния дачин данссар…Ва жаназалун ци баннувартал.

КЪАДАРАН. Дуччин багьанссар Шивах…Сурув бишин мачIрагу дурвав жучIара?..

АМАТУ. Ци? МачI? МачI дуссар ттучIа… ЦIанакул… (Лагай).

АЬЛИЛАВ. АцIу, ина ва шиккува уччинну тIий ураввар?..

КЪАДАРАН. Туну вагу мукьав лавхъун бачиннуввар?..

АЬЛИЛАВ. Варч, ва кIия-кIия арс, буттал кIану буручлан, дяъвилийн тIайла бувксса адиминархха... Тай зана бикIарча, тайннахь ци учиннувар? Тайннал иттав цитIий бурганну?..

КЪАДАРАН. Утти ина ци тIун най урар?.. Вища бюхъанссарив вагу мукьав лавхъун ачин?..

АЬЛИЛАВ. Да, ва бусурманчув акъариввар?..

КЪАДАРАН (ссибизлай). Ди… бусурманчуври…

АЬЛИЛАВ. Вартал, туну, кьулгьу бакъа, алхIам бакъа, бакьиялул кьанкь дакъа, ссахIлил кIюлаччатI бакъа, чапурнал куна, валттулун ливкIун кьаитаннув шяраву яла бусравма адимина?..

Ухай Аьбидинов. Цува НКВД–лул начальник ялун учIаврил махIаттал бувну, цинявппа, варх куну, ганал чулухунмай кIура баяй.

АЬБИДИНОВ (ала-салам, цичIав бакъа). Ца лахIзалийсса… (Плашетрава чагъаргу букан бувну). ЧIанкIуев Аьлилав? (Лагмава цинявннах ябитай. Цинявппа Аьлилавх бургай).

АЬЛИЛАВ (хъисвагу хIучI къакуну). Ттуйн учайссар…

АЬБИДИНОВ. Тавакъюри ттущал ачаву…

АЬЛИЛАВ. Чун?..

АЬБИДИНОВ. Чуннив тийх бусантIиссар…

АЬЛИЛАВ. БувчIунни… (Ца лахIзалийсса бакIгу кьус диртун, пикри буллай ацIай. Яла бакIгу гьаз дурну). Ва жаназалулсса баннинсса пурсат булуннав?

АЬБИДИНОВ. Юх-юх…Ттул чIун дакъассар…

АЬЛИЛАВ (хъисвагу бичи бакъа. Рихшантрай кунма). Дакъахьурча, вил чIун зия дансса чара жулгу бакъассар… (Лагма бацIуцириннахгу ябивтун). Ххирасса жямат, уссурвал, ссурвал, гьакссагу къаччиссия ва дужжагьраву зугу кьабивтун, зуя личIи хьун… ЧIалачIисса куццуй, уттиния тинмай ттущату ттула бияла зевххуссар…Аллагьнан кIулли оьрмугу та зеххинссарив… Утти зун барчаллагь, на багъишла итияра… (Къадараннуйн хъямала агьну). Багъишла ити, уссу… Утти на банмургу, ттухлу инава бува… Барчаллагь… (ХьхьичI Аьлилав, хъирив Аьбидинов бувккун лагай).

КЪАДАРАН (къагъ хьусса куна, хъанахъимур лаласун къабюхълай). Да… Да… Аьлилав, ина… ина ци барчаллагь тIий ура?..

Цинявппа бакIругу хьхьичIун дирчуну, пахъ багьай. Къадаран, бакIгу тиху-шихуннай лечлачи дурну нигьа увсун, лагмацириннах уруглан икIай, Духхай, мачIгу канихьну, Амату.

АМАТУ (жямат ласу бувхIун личIаврия хавар бакъа). Ама-ангъартал, тти цибанну… Алши бяйкьирча, щалла дуниял ялун леркьуну дачайссар тIар… Уттигу кIира аьравалттил ттупру чап куну бур…

Аматул увкумуних щилчIав ургъил къабай. Амату махIатталну лагмацириннах дуруглай дацIай.

КЪАДАРАН (Аматухгу урувгун, ца лахIзалийсса бакIгу хьхьичIун дуртун, къащилул пIякь увкусса куна, лахъну вахIшийсса чIуний аьтIий). Да, на оьрмулуву тачIав аьтIун къаивкIссарартал!..

Пардав.

РЯХХИЛЧИНМУР СУРАТ

Чани хъяхъа тIун гъан хъанахъисса чIун. Авансценалийх, къаттарисса ххютIлул чантайгу мукьавну, трудовойлия зана хьуну най бур Шамсият.

ШАМСИЯТ (чарил кьунттарий щябикIлай). Ухь-ва-вай!.. Иттинугу – цIукучIа, бавттунагу – бавачIа!.. БикIайкьай буттал кIану Багъдадри тIий... Ххуйшиву гьавалул… (БакIбахIу-лачак дакьин дуллай буна, ссавнийн бурувгун). Азарда журалий пар-пар тIисса бирлиянтру хханссар цIуртти… Хъунишиву яла цалагу… Агьа-гьа-ай!.. Гилах ссавний так-туксса бакъа цIуку ххал къашай, цивппагу – дахьа-махьа пIилцIу тIисса... Базу-базу тIирхъа буллалисса интнил ссихI ххалба… Гьунтти-сара дуцIинтIиссар лухччинул чIан… ДакI-ттиликI аьчух дуллалисса щюллишиврул дуцIинтIиссар дагмара дуниял… ХIурия тIутIул кьункьал ларсун дачинтIиссар дарарду.. БуккантIиссар щарнил агьлу хъу-лухччайн… (Цакуну дакIнин багьну, аьтIи макьандалий). Вав-шав, Шамалай, ина ттун дайсса лавмартшин!.. Вихлу нава бивкIусса хьурдай… Цукунсса лажиндаращалла утти на вил ниттилгу, ттула уссилгу хьхьичI бацIантIисса?.. (Пикрирдавун лагай. Яла цакуну бакIрай бавцIуну). Агьа-гьа-ай!.. МахIатталсса иш бакъарив – чани хъяхъа тIун дайдихьлай дунура, шярава я ажарттул э-оь, я ккаччил хIап баллай бакъар… (Бивзун, чантай мукьав дахълай). Дада ризкьилувун духханнин, шаппайн биярча хъинни… (Лагай).

Пардав тIитIай. Тава, нукIувасса Аматул къатта-къуш. Нузру, чIавахьултту бувккун бур. Миннун кIанай зулчIай тIий бухсса ххютIри. Лахъру-тах дачIи леркьуну дур. Къатлул манкьулат – цичIар дакъари.

ШАМСИЯТ (хьулувух бувххун най, нуз-кьун дакъасса хIисав хьуну). Вагь!.. Дадай!..  (БачIвасса къатта-къушних лагмава буруглай).  Ва ци ишри?.. Къатлул манкьулат… (ЧIавахьулттичIанмай хьуну). ЧIавахьулугу бакъари… (Лахъру-тахлий цIийннарай шанашисса Сияли хIисав хьуну, га Аматури тIий). Дадай!.. Ва дадай!.. (Хъюлчу-кIутIу дай).

СИЯЛИ (ццах куну, шанава чантI увкуну, ссинхралну Шамсиятлух дуруглан дикIай. Яла га Шамсият бушиврийн вих дакъа, хъиннура нигьа дурсун, анаварну лахъурттуяту дурчIун, къатлул ца мурцIув лячIай). Мма-мма-мамм! (Букьу, ттучIан гъан машара тIий, кару галай дуллан дикIай).

ШАМСИЯТ (Сияли ццахханнарал хьушиву бувчIуну, чансса паракьатну). Буттарссий, нигьа мабусари… (Цила хъазамраву ка дишай). Ванна на бура… На… Шамсият… Дада чуври?..

Сияли цийхра цурда каш-куш тIий, ва макI дурвав, кIихь дурвав тIий, цицIунна цурда лачIлай дур.

ШАМСИЯТ (чансса хьхьичIунмай хьуну). Вав-шав, тти на цибави?.. (АьтIисса чIуний ла-ахъну). Буттарсси-ий!..

Сиялин га мяйжаннугу Шамсият бушиву кIул шай. КIивагу цанницIун ца лавчIун, вав-шав-гьуя тIий, аьтIун бикIай.

ШАМСИЯТ (аьтIий буна, Сиялища итххявххун, мазрайну ва ишаннайну цIухлай). Буттарссий, ва къатта-къушнийн ци ливкри?.. Дада чуври?..

СИЯЛИ (цIими бансса чув ялун увкIун, хъиннура якьама хьуну, бав-бав тIий аьтIий, цичIав къакIулли тIий, кару кIутIу дуллай). Ммамм-ма..

ШАМСИЯТ (ганиярвагу лахъну леххаву тIий, аьтIий). Вав-шав, лухIи душмантал, жу зун ци оьшивуя дурсса-а!.. Ва ци дужжагьри, ци сиччинни!.. Дужжагьравугурив ахир инсанан вайксса ккаккан байсса?.. Зуйн лухIи бала ликкивухъул, лухIи душмантал!.. Ав-ав тти на ци бави?.. Чунмай ххяххава?.. Аман, шяраву цучIав акъарувкьай хьумурвагу бусан бюхъайсса?

Чярхни кьатIуппай бувккун, цIа-цIа тIий, чIахху-чIарахнайн оьвтIун бикIай. Сияли, бан-битан бакъа, каругу тIитIин дурну, залданувун аьтIун дикIай. Яла, цивунна цурда леркьун, щявн дагьну, ххяппурттах аьрщи ххартI дуллан дикIай. Пардав лакьай. Пардав ларкьун махъгу тамансса хIаллай ялагу баллан бикIай Шамсиятлул, вав-шав-гьуя тIий, шяравуминнайн оьвтIутIисса чIу.

АРИЛЧИНМУР СУРАТ

Гара Аматул тIюва – гара сурат. ЧIавахьулттилу полданий, щала кIяла хьусса бакIрай лачакгу дакъа, кIизгу ябагъи бувну, ччаннугу хьхьичIунмай тIитIин бувну, ттуршал касакрайх халпри дахIлай, ссику далглай бур Шамсият. Ганил чIарав щядиркIун, цила тIартIсса кIяласса мучIал лачакрай, лухIисса буккурттул мачI дизлай дур Сияли.

ШАМСИЯТ («ссику» хъазамравун чIувин дуллай). МааьтIри, бавал, мааьтIри… Дада базаллува дуркIукун, на вин мампасивгу дулуннахха… Ккурмузругу булунна… Гьивчругу… Ккукку буканнав, дадал… ЦIанакул булуннахха… (Хъазам аьч буллан бикIай. Сиялил, канийх рирщуну, къабитай. Ссурхь куну, СияличIату тинмай хьуну, ялагу аьч буллан бикIай).

СИЯЛИ (Шамсиятлуйн дяъвай). Ммамм-ммамм-му!.. Гьо-гьо!.. (Хъап куну, Шамсиятлуща «ссику» экьи личай).

ШАМСИЯТ (Сиялил маз хъяврин бихьлай). Мю-мю-мю!.. ХIучIахъатай!.. (Бивзун, «ссику» гьаз дай. Сиялийн ххавххун, ганийн ттиликIну тинмайну щябивкIун, цIунилгу ссику ххира дуллан бикIай). Бавттурав, дадал… АьматIри, чани, аьматIри… АьтIурча, инава мамавлул буцайссара… (Хъаралун ка гьан дурну, ххяп учай. Цищава цийнма гъиди хьуну, эр-эр тIий хъян бикIай. Тамур хъаралагу ххяп учай – хъиннува лахъну эр-эр тIун бикIай. Тамансса хIаллай мукун цищалва цуппа тIуркIу тIийгу бивкIун, Сиялихунмай кIура бавну). Буттарссий, нану дакьил хьуннуча… Инна ттул Манкъу къабаттаннав?.. (Сияли, пIякь диркIун ганих дуруглан дикIай). Къабаттарча, на вин балайгу учинна… Учивив, буттарссий?..  (Сияли, цичIав къабувчIунма, бакIрал гьим дай). На балай учиннача, ина хъат рища, хъиннив, буттарссий?.. (Сиялин цичIав къабувчIай. Шамсиятлун гьарца суку-кьютIулух тамашалий дуруглан дикIай. Шамсият, бивзун, сценалул дянивгу бавцIуну, цаппаралийла гужрай хъугьугу куну, ца хIала-кала дурхсса макьандалий хIала-кала бувхсса балай тIун бикIай):

Ухьхьу ина жучIан, жул ппу Астталин,
Инту арияту ятту бувкIукун…
Жул багърал багъманчи – Компартиялул
Къарал цIакьсса бувну, тIутIайх бивчунну…

Балай дюхъ дакъа къуртал бай. Шамсият, урчIамур канил мукьва кIиссурах, ккарччахун бахчин бувну, лунттубакIгу ялавай кIункIу бувну, ца хIаллай, нигьа бувсъсса кунма, ссинхралну залданувун буруглай бацIай. Яла хIаллицIух кьацIлива кагу дурккун, хIалли-хIаллих цилва цуппа батIлай – батIлай, лап бунияла хьуну, ца лахIзалийсса ца точкалийн залданувун буруглай бацIай. Хъирив – чансса сситтулну ва хъинну аькьилну:

Муруллава, ххяллава
Мяъданну буккайссар тIар,
Вай Лакралми зунттава
Загьрулул пурх учайвав?..

Къурух гьанна бищурча,
МарцI лачIа ххяххайссар тIар,
Вай лакралми къурдарав
ЛухIи шатри ххяххайвав?..

Аьрщи ва щин дакьирча,
Чарттай тIутIив шайссар тIар,
Лакралми тIутIул ардайх
КьурумикI бишинавав?..

КъатлучIа къатта буллай,
Щархъурду дюхъайссар тIар,
Вай лакрал мюрщи щархъай
Ахирзаман бивзссарвав?..

Вийва бумургу бувну,
РахIатну шанай бурав?
Ттул ссу ПартIу-ПатIимай,
Лажинни бакI гьаз дува:

Ххярацлу яру мангъул
Инна ххяллайх бичайсса,
Вай лакрал мюрщи щархъай
ЩяйтIантрал мина ланъяв?..

Изу, Муртазааьлий,
Чув дур вил чIара кьюкьа?..
Вай дукъаргьу хъуруннин
Банмур-битанмур кьукьа:

УрчIамур ка дацIаннин,
Инна тур галай дайсса
Мюрш хъюруврал вай хъуру
Муччуччун кьадитанъяв?

Гьуя, Сяидхъал Гьарун,
ДакI асландалул барзуй,
Ттигу шанайна урав
Дарги-цIахъардал дазуй?..

Зунттаву кьунттал дянив
Хъу дугьлагьи мискинтал
Инна цачIун бувайсса
Ца кьини вай бакьинъяв?..

Хъазам лахIлахIи чиллуй,
Чул лахIай къирим мажар,
Да, ХIавинахъал Сяид,
Къурталссарив вил бажар?..

ДакI рахIат дурккун урав
Гуржи-азнавар чуллай?
Шанулагу уччарав,
Хъун Неххал чIу къабаллай?..

Ягу бияйрив тачIав
Вай лакрал мюрщи щархъайн,
Зурданул зулмулулу
Леркьу эяллал хъархъайн?..

ДахIалай бава дунан!
ХIалларай бута унан!
Азарвагу дахIалай
Бутталний мина дунан!..

Цила увкумунища цуппа нигьа бувсъсса кунма хьуну, цакуну цIунилгу нукIува кунма, мукьва кIисса кьацIливу бишай. Ца лахIзалий тукунма, ссинхралну залданувун буруглайгу бивкIун, щала залданувун зарзала дагьансса куццуй вевгу куну, никирттайн багьну, заккунттив жирттурдайх бишлай, ав-ав тIий, аьтIун бикIай. Хъиривгу аьтIий сценалийх куру-ххюру бихьлан бикIай. Цакуну гиччава ар-ар тIий хъян бикIай. Яла, бивзун, солдатнал кунма шагу бишлай, балайгу тIий, хьулучIан бачай:

Жу Советрал оьрчIруру,
Илкинссар жун гьар ххуллу,
Ххирар жун жула Ватан,
Жула хъун ппу Астталин…

Шамсият балайгу тIий, хьулучIан бивсса лахIзалуву, вещмешокгу канихьну, солдатнал янналуву, чансса аьрччагу тIий, сури-ххурину ухай Чаргас.

 ШАМСИЯТ (чаргаслуя нигьа бувсун, ла-ахъну). Вав-шав... Ве-е-е! (Ца лахIзалий, кIирагу ххяппух лажингу кIучI дурну, чIиралун лячIай. Яла хьулухун ххявххун, кьатIуппай лахъай. Чаргаслун га цурив къабувчIай. Ца лахIзалий ганил хъирив хьулувун уруглайгу ивкIун, хьулийх зулчIайтIи бувсса цIихълуйнгу каш куну, увчIлай-къаувчIлай, щядиркIнияра ссинхралну цахра дуруглагисса Сиялийн ящуну).

ЧАРГАС (щукь-щукьгу тIий СияличIан лечай). Буттарссий!..

СИЯЛИ (Чаргас усса бувчIуну, цал ххаришиврул цизунссарив къакIулну, кIирагу ка жирттурдайх рищай, яла ххяп-шаплий дизлай). Гьов-гьов-гьов!.. Ммумм-ммумм-мму-у-у!.. (Чаргаслул ганин дизан кумаг бай. Сияли бав-бав тIий аьтIий, ЧаргаслуцIун лачIай. Чаргас ганил каруннайн симандаливун ппай тIун икIай. Ахиргу макь дайгьин къархьуну, яру лихьлан икIай).

ЧАРГАС. Яр, буттарссий ва шяраваллийн, ва жула къатнийн ци ливкри?.. Дада, Шамсият чуври?..

Нигьа-нигьагу буслай, чIу къахьунну бухай Шамсият. ХьулуцIра чIирайн ттиликIгу рирщуну, каругу чIирацIун лачIун дурну, Чаргаслухва Сиялих буруглай бацIай. Чаргаслун цал га хIисав къашай. Яла, такIу-макIуй, аьтIий, итакъаакьавай цацIунна ларчIсса Сиялиха Шамсиятлуйн я тIайла бавцIуну, ца хIаллай мюрш ивкIун уруглайгу ивкIун.

ЧАРГАС. Шамси-ят?.. Вагь… (Гужрай Сиялищагу итххявххун, ца-кIива ша хьхьичIунмай лавсун). Шамсият…Ссувай…

ШАМСИЯТ (гъан машара тIисса кунна, кIирагу кагу хьхьичIуннай тIитIин дурну). Ве-е-е!.. У-у… У-у..

ЧАРГАС (Шамсиятлул вевлуща нигьа увсун, унийва авцIунугу ивкIун, ялагу ца-кIива ша хьхьичIунмай ласай). Яр, Шамсият, ссувай, вийн ци бала ливккур?.. Вин на къаувчIлай урив?.. на вил уссу ура – Чаргас…

ШАМСИЯТ (тара куццуй каругу хьхьичIуннай тIитIин дурну). Ве-е-е! Къачча-къачча… Инсантал къачча-а-а! Лихъияра!.. Лихъияра!.. Лихъияра-а! (Чярхни хьулувун ххявххун, лихъай. КьатIату ялагу Шамсиятлул чIу баллай бур). Лихъияра! Дуду-Рамаза-ан!.. Данкка-Аьлий!.. Ттярай Ххажуй!.. Ххяппа-Мусса-а!.. Лихъияра-а!.. Лихъияра инсантал най бур!..

ЧАРГАС (къащилул жиг автIун, цал га унийва кьис икIай. Яла, агьи-агьи куну, аьтIунгу ивкIун, цала бакъасса ца вахIшисса чIуний леххаву тIий). Шам-си-я-ят!.. Ссувай Шамси-ят… (Хъап-шаплий, ганил хъирив увккун лагай).

Сияли сценалул дянивгу дарцIуну, чурхгу тиху-шихунмай лахIлахIи бувну, хъюлчу-кIутIу хъанай, мура куццуй, вахIшисса чIуний бав-бав тIий аьтIун дикIай. Ца хIаллава, зулуй-ккулуй, ттак-шак тIий, дахьа-махьа ликкурттай авцIуну, щала хилкьравунгу ахьлавгуну, укъавчIай хьуну ухай ХхуйтIу. ХхуйтIу ца хIаллай дурагу мяъна дакъасса ярунних залданувун уруглай ацIай. Яла, ца ша хьхьичIунмайгу лавсун, яругу няравун бюкьан бувну, ликкурттаща ухIан къавхьуну, га унийва щях ивщуну лагай. Му хIисав хьусса Сиялил, нигьа дурсун, хъит куну ца-кIива ша махъунмайгу лавсун, ца хIаллай дуруглай дацIай, яла хIаллих гъан хьуну занай, ХхуйтIул лагма дуккай, кьус диркIун, цума урив ккаккан, симандалувун мюрш дикIай.

СИЯЛИ (ххуйтIу ушиву бувчIукун, хъиннура нигьа дурсун, кару кIутIу-кIутIу дуллай)... Гьо-гьо-гьо!.. Гьо-гьо-гьо!.. Гьо-гьо-гьо!... (КIирагу ка дургьуну ХхуйтIу гьаз улан дикIай).

ХХУЙТIУ (цайна цува увкIун). На ккатилну ура… (КIулшилия лагай).

Циява ххуйтIун кумаг бакъашиву бувчIуну, Сияли, вагь-вугь тIий, ххяп-шаплий, кумагран Чаргаслуйн оьвчин, кьатIурдай лечай. Зал пахъ багьай.

ХХУЙТIУ (цIунилгу цайна цува увкIун, изан хIарачат буллан икIай. Изан къабюхъуну, никирттай ва каруннай мукьччаннай залданувун уруглай ацIай. Яла, махъва-махъсса гуж цачIун бавтIусса кунма, заданувун). До-о-о! Интантал!.. Зди тув будру?.. На катил ивчIавай ура!... (Каруннища ухIан къавхьуну, га унийва куру лагай).

Пардав.

Радиолувух баян буллай бур АхIмадхан-Султаннун кIилчин Совет Союзрал Виричувшиврул цIа дуллусса.