Бир пери киби
Сонет
Кяр этмеди сенден узакъкъа кеткеним,
Дуйгъум сени нур санып, пешинъден кете.
Бир козь ташлап гонълюмни алгъанынъ ете,
Диване севгининъ эсири экеним.
Бу гъам диярында сенсиз бахт коралмам,
Юрек ура экен — сен ичюн яшарым.
Ашкъ эшкъына озендай толып-ташарым,
Эр шейден вазгечсем, сенден вазгечалмам.
Пейда олдынъ омрюмде бир пери киби,
Беслеген халис дуйгъум арта, азизим.
Куньдюзимнинъ, геджемнинъ сенсинъ саиби.
Ёкъ, бу къадар урулмакъ, берильмек етер,
Десем де озюме, нейлейим, аджизим.
Манъа сенсиз хаятым — олюмден бетер.
