Кто виноват

Чи у аххосджын?

 

Архайджытӕ:

Вадим (Стай), 18-аздзыд
Махар (Богъ), 24-аздзыд
Зураб (Кобрӕ), 26-аздзыд
Аслан (Сырд), 20-аздзыд
Габо, Вадимы фыд, 52-аздзыд
Нифӕ, Вадимы мад, 43-аздзыд
Ахпол, 40-аздзыд
Минӕт, йӕ ус, 45-аздзыд
Заретӕ, Минӕты чызг, 18-аздзыд
Аллӕ, 19-аздзыд
Асиат, Зурабы схӕссӕг мад, 48-аздзыд

Архайд цӕуы Ирыстоны горӕттӕй иуы.

 

ФЫЦЦАГ АРХАЙД

Ӕхсӕв. У талынг. Ӕрмӕст хъуысы, кӕрӕдзийы ныхмӕ рӕвдз чи фӕцӕуы, ахӕм уӕзласӕн ӕмӕ рог машинӕйы уынӕр. Сценӕйы ферттивынц сӕ цырӕгъты рухсытӕ. Чысыл фӕстӕдӕр райхъуыст, машинӕтӕ кӕрӕдзи куыд скъуырдтой, уый уӕззау цӕлхъ. Цыбыр рӕстӕджы фӕстӕ та фӕзынынц, инкассаторон машинӕ чи бастыгъта, уыцы лӕппуты ӕндӕргтӕ. Райхъуыст ӕхситт, ӕмӕ ӕндӕргтӕ фӕаууон сты.

Сындӕггай срухс вӕййы сценӕ: Габойы хӕдзар. НИФӔ цыдӕртӕ архайы, у тыхстхуыз.

    ГАБО (ӕрбацӕуы ӕд пъартфел). Ӕмбисӕхсӕвмӕ та куы бадыс, не ‘фсин.

   НИФӔ. Омӕ уӕдӕ куыд бафынӕй уон, иу дӕр уӕ хӕдзармӕ куынӕ зыны. Кӕм та фесӕфтӕ ды дӕр?

   ГАБО. Хъӕуы уыдтӕн. Ахсджиаг хъуыддаджы фӕдыл… Райсом дӕр та мӕ уырдӕм цӕуын хъӕуы. (Ӕрӕвӕры пъартфел.) Ӕмӕ нӕ лӕппутӕ кӕм сты?

   НИФӔ. Цы сын зонын!

   ГАБО. А фӕстаг рӕстӕджы нӕ кӕстӕр мӕлӕты ӕнафӕтты цӕуын райдыдта хӕдзармӕ. Фӕлӕ Ӕмзор кӕм ис? Телефонӕй дӕр не ‘рбадзырдта?

   НИФӔ. Нӕ. Банчы кӕй кусы, уый мӕ зӕрдӕмӕ нӕ цӕуы. Ӕхцатимӕ баст у йӕ куыст, цынӕ вӕййы!.. Уӕд та йӕ ӕндӕр ранмӕ аивиккам? Шофыры куыст алыран дӕр ссарӕн ис.

   ГАБО. Цӕй, ахӕм тӕссагӕй дзы цы ис? Мӕнгӕн нӕ фӕзӕгъынц: мады зӕрдӕ! Ӕмзорӕн ӕз ницӕмӕй тӕрсын, сӕрӕн у. Университеты дӕр мын дзы раппӕлыдысты. Фӕсаууонмӕ, дам, нӕм чи ахуыр кӕны, уыдоны ‘хсӕн бӕрӕг дары. (Бахудт.) Знон ӕй цыма чызгимӕ ауыдтон. Уӕд тааныхас кӕнис йемӕ?

  НИФӔ. Цӕй тыххӕй?

  ГАБО. Чындзӕхсӕв сын саразӕм. Сӕ хурӕй хъарм уыдзыстӕм мах дӕр. Гъестӕй гыццыл хъӕбул рагӕй нал арӕвдыдтон мӕ къухты ӕмӕ ӕнкъард кӕнын. (Ныххудтысты дыууӕйӕ дӕр.) Фӕлӕ Вадим кӕм ис?.. (Фӕтыхстхуыз.) Ӕгӕр ыл узӕлыс, не ‘фсин, йӕ чысылӕй нырмӕ. Кӕстӕр кӕддӕриддӕр буц у, фӕлӕ… Цыбыр ныхасӕй, лӕппуйы уаг мӕ зӕрдӕмӕ нӕ цӕуы. Мӕ фыццаг ус йӕ фыртимӕ цы фыдӕбӕттӕ ӕвзары, ууыл никуы ахъуыды кӕныс?

  НИФӔ. Цавӕрдӕр рецидивистимӕ барыс Вадимы?

  ГАБО. Лӕппу зын хъахъхъӕнинаг у… Азтӕ куыд згъорынц, ӕвӕдза! Ралӕгтӕ сты мӕ фырттӕ, ӕз та сӕ нывыл дӕр никуы федтон. Ӕдзух уыцы ӕнӕвдӕлон… (Ныуулӕфыд.) Уыцы мӕгуыр усы фыдӕбӕттӕ!..

   НИФӔ (тӕргайгондӕй). Уал азы фӕстӕ йӕ ферох кӕнын ӕмбӕлы, бӕргӕ!

   ГАБО. Чердӕм та аздӕхтай мӕ ныхас? Ӕз нӕ лӕппуйы кой кӕнын.

   НИФӔ. Ӕмӕ нӕ лӕппу ӕвзӕрӕй цы кӕны?

   ГАБО. Цӕмӕн ацыд заводӕй?

   НИФӔ. Йӕ зӕрдӕмӕ нӕ цыд уыцы куыст.

   ГАБО. Иу куыст дӕр уый аккаг нӕу! Ӕмӕ ӕниу цӕмӕн хъуамӕ куса, кӕд ӕмӕ йын йӕ дзыппытӕ цух нӕ уадзыс!

   НИФӔ. Цӕй, цастӕ йын авӕрын, уӕлдай капекк раттын ын куы нал уадзыс, уӕд?

   ГАБО. Уымӕн мыл тӕргӕйттӕ кӕны. Фӕллой кӕнӕд йӕхӕдӕг. Скъола тыхамӕлттӕй фӕцис, университетмӕ бацӕуын дӕр йӕ бон нӕ бацис ӕмӕ ныр иу ран бынат нал ары йӕхицӕн. Дзӕгъӕл хъеллау кӕны!

  НИФӔ. Ӕмӕ уым ды ницы аххосджын хоныс дӕхи? Горӕты зындгонд адӕймагыл нымад дӕ. Ӕхсӕнады кусӕг! Уыйбӕрц зонгӕтӕ дын – ӕмӕ дӕ лӕппуйы университетмӕ бакӕнын дӕ бон ма суӕд! Ӕз дӕуыл мӕ зӕрдӕ дардтон, уыййеддӕмӕ мӕхӕдӕг бацархайдтаин.

   ГАБО. Ӕмзорӕн дӕр ӕз баххуыс кодтон?

  НИФӔ. Ӕмзоры бон ӕнӕ ‘ххуысӕй дӕр уыд!..

Ӕрбацыд ВАДИМ, йӕ мидтыхст ӕмбӕхсы.

   ГАБО. Мӕнӕ ис! Лӕппу, фӕсӕмбисӕхсӕв у ныр. Кӕм та уыдтӕ?

  Л ӕ п п у, ницы дзургӕйӕ, йӕ хӕдоны цӕппӕртӕ ӕфтауы. Ныхас кӕнын дӕр дӕ нӕ фӕнды мемӕ?!

  ВАДИМ (рамӕсты). Цӕй, ма та райдай!

  НИФӔ. Цы дзыхӕй дзурыс уый дӕ фыдмӕ?!

  ВАДИМ. Омӕ уӕдӕ гыццыл саби нал дӕн, мӕ фӕдыл кӕсын цӕмӕн хъӕуы?

  ГАБО. Райсом ацӕудзынӕ мемӕ!

  ВАДИМ. Кӕдӕм?

  ГАБО. Заводмӕ. Ныллӕудзынӕ куысты.

  ВАДИМ. «Куыст-куыст»-ӕй мӕ иу ран куыд нал уадзыс, ӕвӕдза! Куыд кӕсын, афтӕмӕй дын дӕ къӕбӕр кӕй хӕрын, ууыл мӕсты  кӕныс, мӕ фыд.

  ГАБО. Ӕдзӕсгом ныхас! Мӕ къӕбӕр дын хӕлӕг кӕнын?!

  ВАДИМ. Ӕмӕ уӕдӕ цӕуыл стынг дӕ?

  ГАБО. Чи дӕ ӕмӕ, зӕгъын, цы дӕ?

  ВАДИМ. Заводы мӕ хорз кусӕгӕй фенай, уый дӕ фӕнды? (Ӕлхыскъныхасӕй.) Ӕмӕ цы кӕны! Алкӕмӕн сӕ ныййарджытӕ баххуыс кодтой университетмӕ бахауынӕн, фӕлӕ ды!.. Ӕмӕ раст бакодтай! Гъер фондз азы университеты куы фӕахуыр кӕнон, уӕд мӕ фӕллойӕ ӕнӕхай нӕ кӕныс уал азы дӕргъы?

  ГАБО. Цы, дам?! (Йе ‘хсӕрварс ын ныццавта.)

  НИФӔ (лӕппуйы йӕ аууон акодта). Уый цавӕр цӕф у, Габо?! Сывӕллонӕй дӕр ӕм куы никуы систай дӕ къух!

  ГАБО (тынг мӕстыйӕ). Райсом ацӕудзынӕ мемӕ заводмӕ!

  ВАДИМ. Ӕз никӕдӕм ацӕудзынӕн!

  НИФӔ (лӕппумӕ). Бынтон цӕхгӕр ӕм ма лӕуу ды дӕр! (Лӕгъстӕгӕнгӕйӕ.) Байхъус дӕ фыдмӕ, мӕ къона. Чи зоны, дӕ зӕрдӕмӕ фӕцӕуа дӕ куыст.

   ВАДИМ. Уӕддӕр мӕ дыууӕ мӕйы фӕстӕ ӕфсады рӕнхъытӕм...

   ГАБО. Ӕмӕ уыцы дыууӕ мӕйы та цы ми кӕндзынӕ?

   ВАДИМ. Хъуамӕ ацӕуон балцы, фенон истытӕ.

   НИФӔ. Омӕ, чи зоны, уый дӕр ӕвзӕр хъуыды нӕу,

   Габо. Уадз истытӕ фена лӕппу.

   ВАДИМ. Ӕхцайы тыххӕй уӕ нӕ бахъыгдардзынӕн.

   ГАБО. Ӕмӕ уӕдӕ кӕм ссардзынӕ?

   НИФӔ. Ӕццӕй?

   ВАДИМ. Кӕм?.. (Фӕрӕвдз.) Мамӕ, ды мын цы ‘хцатӕ лӕвӕрдтай, уыдон ныр цалдӕр азы ӕмбырд кӕнын.

   НИФӔ. Федтай, Габо, куыд фӕстауӕрцгӕнаг у! (Лӕппуйӕн хъӕбыс кӕны.) Мӕ цӕсты рухс! Мӕ къона!

   ГАБО. Равдис, кӕм сты де ‘хцатӕ?

   ВАДИМ. Ме ‘мбалмӕ. Нӕ чыссӕ иу у.

   ГАБО. Чи у де ‘мбал?

   ВАДИМ. Ницы йын у...

   ГАБО. Ӕгӕр уарзын нӕ райдыдтай дӕ удӕнцой?!

   ВАДИМ. Цӕрын мӕ фӕнды, мӕ фыд, цӕрын!

   ГАБО. Цӕрын?! Цӕмӕй?! Куыдӕй?!

   НИФӔ. Ныууадзут-ма уӕ тызмӕг ныхас, мӕ уд схауы! Райсом баныхас кӕндзыстут, ныр ӕнафон у... Ӕмзор дӕр куыд нал зыны!

   ВАДИМ. Ӕмӕ кӕм ис?

   НИФӔ. Йӕ куысты.

   ВАДИМ. Йӕ куысты? Йӕ улӕфыны мӕй куы нӕма фӕцис.

   НИФӔ. Нӕма фӕцис, фӕлӕ банчы шофыртӕй чидӕр фӕрынчын, ӕмӕ Ӕмзормӕ абон фӕдзырдтой.

   ВАДИМ (исдугмӕ джихау фӕцис). Уӕдӕ абон машинӕйыл куыста?..

   НИФӔ. Ӕмӕ дӕм цас диссаг фӕкаст? Телефоны дзӕнгӕрӕг – у с систа хӕтӕл. Чи дӕ? (Тарстхуызӕй.) Цы загътай?! (Хӕтӕл йӕ къухӕй феуӕгъд.)

   ГАБО. Цы хабар у?! (Бауад ӕмӕ райста хӕтӕл.) Чи дзуры уый? Рынчындонӕй? Нӕ лӕппу уым?!. Ӕмӕ цы кодта?! Ау?! (Тыхстхуызӕй ӕрӕвӕрдта хӕтӕл). Инкассаторон машинӕйыл цавӕрдӕр бандиттӕ сӕхи ныццавтой. Рӕвдздӕр рынчындонмӕ!

   НИФӔ. Мӕ хӕдзар фехӕлд! (Ацӕуы лӕгимӕ.) Мӕ хӕдзар фехӕлд!..

ВАДИМ ӕрвдзӕфау сагъдауӕй баззад.

Рухс ахуыссыд.

Минӕты хӕдзар. АХПОЛ, йӕ уӕлӕ халат, афтӕмӕй бады стъолы уӕлхъус ӕмӕ нуазы. Ӕрбацӕуы ЗАРЕТӔ ӕд хызын.

АХПОЛ. Заретӕ? Кӕм ма разындтӕ? Уал боны... Ӕз ам иунӕгӕй тухӕнӕй мӕлын, ды та!.. Куыд ӕнӕзӕрдӕ дӕ, куыд, Заре!

Чызгйӕ хызын ӕрӕвӕры, райсы цъылын ӕмӕ, ницы дзургӕйӕ, мӕрзы.

Фӕлӕ йӕ зыдтон, кӕй ӕрбацӕудзынӕ. (Сыстад ӕмӕ бацӕуы чызгмӕ.)

ЗАРЕТӔ. Ӕз хӕдзар ӕфснайынмӕ ӕрбацыдтӕн ӕмӕ мӕ ма хъыгдар.

    АХПОЛ. Нӕ дӕ хъыгдарын, Заре... Дӕ куыст кӕн. Ӕрмӕст дӕ уынгӕ кӕй фӕкодтон, уый дӕр цас у! Ехх, куы зонис, цас дӕ уарзын! Фыны дӕр ӕмӕ хъалӕй дӕр мӕ цӕстытӕ дӕ сурӕт йеддӕмӕ ницыуал уынынц. Цӕмӕн мӕ лидзыс дард, цӕмӕн?! (Баввахс та чызгмӕ.)

   ЗАРЕТӔ (тызмӕгӕй). Ма мӕ хъыгдар дын куы загътон!

   АХПОЛ. Нал у мӕ бон! (Ацахста чызджы, фӕлӕ йын уый цъылыны хӕцӕнӕй йӕ сӕр ныццавта ӕмӕ федде. Лӕг рамӕсты.) Уу-у, уынгты чызг! Хӕтаг! (Бацӕуы та стъолмӕ,ӕрбадт ӕмӕ нуазы.)

Ӕрбацӕуы МИНӔТ дыууӕ стыр фӕндаггон сумкӕимӕ.

О Хуыцау! Минӕт!..

   МИНӔТ (ӕрӕвӕры чумӕдантӕ). Тфу, бафӕлладтӕн!

   АХПОЛ. Омӕ телефонӕй цӕуылнӕ ӕрбадзырдтай? Дӕ размӕ нӕ ауадаин аэропортмӕ ӕмӕ дын дӕ хӕссинӕгтӕ нӕ фӕрогдӕр кодтаин? Ницы мын уыдаид уымӕй!

   МИНӔТ. Уынын, нозтӕй та хорз фӕкастӕ дӕхимӕ.

   АХПОЛ. Ӕнӕ дӕу мыл катай бахӕцыд ӕмӕ уӕд...

   МИНӔТ. Цы скатай дӕ, иу къорд боны бабыхсын дӕ бон нӕ уыд?

   АХПОЛ (тӕргайхуызӕй). Диссаг мӕм кӕсы, цӕмӕн фӕраст дӕ афтӕ ӕнӕнхъӕлӕджы Туркмӕ? Уымӕй дӕр Туркмӕ. Цӕмӕн?..

   МИНӔТ. Уымӕн ӕмӕ Турчы товартӕ бӕллиццагдӕр ӕмӕ асламдӕр сты.

   АХПОЛ. Ӕмӕ иунӕгӕй атахтӕ?

   МИНӔТ. Нӕ, цалдӕр сылгоймагимӕ.

   АХПОЛ. Ам та-иу дӕ клиенттӕ куы телефонӕй ӕрбадзырдтой, куы та-иу сӕхӕдӕг фӕзындысты. Цас ауӕй кодтаис уыцы хъылматӕй ацы бонты! Тынг фӕмӕгуыр кодтай нӕ чыссӕ, зӕгъгӕ, йӕ банымай, Минӕт.

   МИНӔТ. Уыдон йеддӕмӕ ма мӕ исчи агуырдта?

   АХПОЛ. Чи ма дӕ хъуамӕ агуырдтаид?

   МИНӔТ. Ӕвӕццӕгӕн, ничи.

   АХПОЛ. Цыма мӕ цыдӕр сусӕг кӕныс. Ус ницы дзуры. Стӕ-ма, цы ‘рбаластай Туркӕй? (Байгом кӕны уыцы фӕндаггон сумкӕтӕ ӕмӕ сӕм цымыдисӕй кӕсы.) Кӕсма сӕм! Бӕрӕг у, тынг хъӕугӕ товартӕ кӕй сты. Фӕлӕ не ‘мбарын, адон дӕ афтӕ ӕхсызгон цӕмӕн бахъуыдысты, кӕд ӕмӕ дӕ хъылматӕ фӕсивӕд хӕлофӕй скъӕфынц.

   МИНӔТ. Уый тыххӕй нӕ дзурдзыстӕм абон.

   АХПОЛ. Ӕниу раст кӕныс. Ӕхца нӕ бынтон ӕхсызгон хъӕуы. Ссардтон, дӕу цавӕр хъуыд, ахӕм хицӕн хӕдзар. Ис дзы замманай цӕхӕрадон, йӕ кӕрт – уӕрӕх.

   МИНӔТ. Йӕ аргъ дӕр, ӕвӕццӕгӕн, ахӕм уӕрӕх у.

   АХПОЛ. Йӕ аргъӕй мӕ ма фӕрс! Фӕлӕ ницы кӕны. Цы нын нӕ фаг кӕна, уый самал кӕндзынӕ тагъд рӕстӕгмӕ.

   МИНӔТ. Хъуамӕ. Ацы иумӕйаг кӕрты цӕрыны бӕсты... Нӕ сыхӕгты цымыдис цӕстытӕй искуы фервӕз! Бынсӕфт фӕуой!

   АХПОЛ (ӕвиппайды). Фӕлӕуу-ма! Товартӕ ӕмӕ ӕхцатӕм фестӕм, фӕлӕ кӕрӕдзи нывыл уынгӕ дӕр куы нӕма фӕкодтам. Ӕгас цу, Минӕт! (Усмӕ йӕ къухтӕ бадардта.)

Ус бацыд ӕмӕ л ӕ д ж ы уӕрджытыл абадт, узӕлы йыл. Дӕхи ма дын кӕй федтон! Бауырнӕд дӕ, фыны дӕр ӕмӕ хъалӕй дӕр мӕ цӕстытӕ дӕ сурӕт йеддӕмӕ ницыуал уыдтой. Ӕнӕ дӕу мын нӕ хӕдзар рухс дӕр нал кодта.

   МИНӔТ. Ӕмӕ ӕниу ӕз къаддӕр мӕт кодтон дӕу тыххӕй? Дӕ уыргтӕ та дӕ нӕ бахъыгдардтой?

   АХПОЛ. Иучысыл. Фӕлӕ-иу, дӕу тагъд фендзынӕн, зӕгъгӕ, куы ахъуыды кодтон, уӕд-иу уыдон дӕр фӕсабыр сты.

    МИНӔТ. Чызгӕн тынг бафӕдзӕхстон, хорз дӕм нӕ зылд?

   АХПОЛ (ӕнахуыр хъӕлӕсӕй). Куыннӕма! (Заретӕ йын йӕ сӕр цы ран ныццавта, уым аныхта.)

   МИНӔТ (сыстад). Мӕхӕдӕг дӕр бӕргӕ тагъд кодтон хӕдзармӕ, фӕлӕ ма гыццыл цӕйдӕрты тыххӕй афӕстиат дӕн. (Ӕфснайы уат.)

  ЗАРЕТӔ (ӕрбацӕуы тарӕрфыгӕй). Ӕрбахӕццӕ дӕ, мӕ мад?

   АХПОЛ (чызджы фенгӕйӕ, рӕвдз сыстад ӕмӕ сумкӕтӕ ахгӕдта). Минӕт, адон уаты бӕрӕгастӕу цы ныууагътай, хъыгдаргӕ кӕнынц. (Сумкӕтӕ иуварс айста.)

   МИНӔТ. Цӕй тыхстхуыз та дӕ, Заре?

   ЗАРЕТӔ. Цӕуыл цин кӕнон? Дӕ балцӕй мын исты хорздзинӕдтӕ куы не ‘рластай, мыййаг.

   МИНӔТ. Ӕмӕ дын кӕд ӕрластон, уӕд та?

   ЗАРЕТӔ. Бузныг де ‘рхъуыдыйӕ, ницы мӕ хъӕуы дӕуӕй! Ӕз мӕнӕ мӕ хызынмӕ раздӕхтӕн, уыййеддӕмӕ дын дӕ хӕссинӕгтӕ уынгӕ дӕр нӕ фӕкодтаин. (Райсы йӕ хызын.)

    МИНӔТ. Цы та дыл ӕрбамбӕлд? Хӕдзар дӕр куынӕ бафснайдтай мӕнӕ.

   ЗАРЕТӔ. Дӕ хӕдзар мӕ хӕдзар нӕу, цы йӕ ‘фснайон?

   АХПОЛ. Минӕт, ды куы ацыдтӕ, уӕд дыккаг бон ай дӕр ацыд хӕдзарӕй. Ӕмӕ уӕдӕй нырмӕ кӕм лекка кӕны, уый бӕрӕг нӕу.

   ЗАРЕТӔ. Ӕнаккаг!

  МИНӔТ. Заре! Исчи йӕ фыдмӕ ахӕм дзыхӕй дзуры?!

  ЗАРЕТӔ. Чи у мӕ фыд? Дӕ лӕг уӕртӕ? Мӕ фыд дӕ куы ныууагъта, уӕд ӕм куыд мӕсты кодтон ӕз! Цыфыддӕр ныхӕстӕй йӕ ӕлгъыстон. Фӕлӕ уыйфӕстӕ бамбӕрстон, бынтон дзӕгъӕлы йӕ кӕй ӕфхӕрдтон, уый.

   МИНӔТ. Цӕрын нӕ зыдта! Хӕлиудзых уыд дӕ фыд!

   ЗАРЕТӔ. Йӕ сыгъдӕг фӕллойӕ цард, фӕлӕ дын уый ӕгъгъӕд нӕ уыд! Алы хъылматӕй дӕ сӕудӕджер кӕнын нӕ уагъта. Ӕмӕ уӕд уӕртӕ уыцы ӕдзӕсгом хӕрзкондимӕ сбастай дӕхи. Дӕ цардӕй бузныг дӕ, фӕлӕ мӕ хъысмӕтыл искуы ахъуыды кодтай?!

    МИНӔТ. Цы хъуаг дӕ?!

   ЗАРЕТӔ. Фехӕлдтай мын мӕ цард! Налдӕр мын фыды къона ис, налдӕр – мады! Куыд цӕрон ам мӕнӕ дӕ ахӕм лӕгимӕ?!

    МИНӔТ. Цы дын кодта?!

   ЗАРЕТӔ. Ды ам куынӕ вӕййыс, уӕд мӕ дӕ бынаты ӕвӕры, ӕнӕуаг ӕвнӕлд мӕм кӕны!

   МИНӔТ. Уый та цавӕр ӕмбисонд у, Ахпол?!

   АХПОЛ. Ма йыл ӕууӕнд, Минӕт! Иучысыл ӕй мӕ зӕрды фыдау арӕвдауын уыд, уый та йӕ чердӕм бамбӕрста! (Чызгмӕ.) Уый хӕлды нысан у!

    ЗАРЕТӔ. Цы цӕсгомӕй уӕндыс дзурын?!

    АХПОЛ. Гъемӕ кӕд афтӕ у, уӕд ӕз ацӕудзынӕн ардыгӕй!

    МИНӔТ. Кӕдӕм?! (Чызгмӕ.) Банцай, Заре!

    ЗАРЕТӔ. Ӕниу ӕй тыххӕй куы тӕрис, уӕддӕр ацӕуид! Уый дӕу тӕрсын кӕны. Зоны дын дӕ лӕмӕгъдзинад! Дӕ чыссӕ дын цъиры ӕмӕ ам паддзахы цардӕй цӕры!

    МИНӔТ. Ӕмӕ йын уӕдӕ дӕ зӕрды цы ис? Ахӕм рынчынӕй кусгӕ кӕна?!

   ЗАРЕТӔ. Чи у рынчын?! Нӕ фӕлӕ дӕ хынджылӕг кӕны, ды та йын дугъы уайыс! Ӕмӕ куыннӕ! Ахӕм хӕрзконд лӕджы сӕраппонд хи амарын дӕр ӕмбӕлы!

    АХПОЛ. Гъемӕ кӕддӕр кӕм куыстон, уым ныллӕудзынӕн фӕстӕмӕ, кӕд мӕ дохтыртӕ нӕ уадзынц, уӕддӕр! Уадз амӕлон, ӕмӕ ӕрцӕрай!

   МИНӔТ. Ницы ныллӕудзынӕ нырма, Ахпол! (Чызгмӕ.)Мӕ цардӕн дӕ уынаффӕгӕнӕг ничи кӕны, Заре!

   АХПОЛ. Дӕ мад мӕ цалдӕр азы хистӕр у, фӕлӕ йӕ дӕ хуызӕн ӕрыгӕттӕй дӕсыл дӕр нӕ баивдзынӕн. (Усыл узӕлы.) Йӕ фӕндон мын зынаргъ у кӕддӕриддӕр.

   ЗАРЕТӔ. Ӕрыгондӕр дзы кӕй дӕ, уымӕй дӕр ӕй дӕхиуыл бӕттыс!

   МИНӔТ. Ныхъхъус у дын зӕгъын, чызг!

   ЗАРЕТӔ. Дӕлдзӕх фӕут дыууӕйӕ дӕр мӕнӕ уӕ хӕссинӕгтимӕ! Ныр та уӕртӕ уыцы товартӕй дӕр сӕудӕджер кӕндзынӕ, мӕ мад, дӕ мӕлӕтхӕссӕг хъылматӕ дын фаг нал сты! Ӕз ныртӕккӕ фехъусын кӕндзынӕн пъӕлицӕйӕн дӕ хъылматы хабар! (Фӕраст дуармӕ.)

    АХПОЛ. Ӕрлӕуу!!! (Чызджы фӕндагыл алӕууыд.)Минӕт, уӕртӕ йӕ иннӕ уатмӕ бакӕн ӕмӕ йыл дуар сӕхгӕн! Дзӕгъӕл лекка кӕны уӕддӕр уынгты!

    МИНӔТ. Заре! Пъӕлицӕйӕн?! Ахӕм ӕгъатыр ми бакӕндзынӕ?!

Паузӕ

    ЗАРЕТӔ (бацӕуы мадмӕ). Ахицӕн у дӕ лӕгӕй.

    МИНӔТ (скуыдта). Цытӕ дзурыс, чызг!

    ЗАРЕТӔ. Цӕр уӕдӕ йемӕ! Ӕз дӕм мады номӕй нал бадзурдзынӕн! (Фыддӕрадӕн.) Чи зоны, ӕнӕ дӕу дӕр мӕ фарсмӕ чи ‘рбалӕууа, ахӕм ис! Тыхджын ӕмӕ сӕрӕн! (Фӕуайы, фӕлӕ йын лӕг йӕ къух ацахста.)

    АХПОЛ. Нӕ ацӕудзынӕ!

    ЗАРЕТӔ (сиды ӕххуысмӕ). Махар! Махар!

    МАХАР (фӕзынд ӕмӕ Ахполы уӕхсчытыл фӕхӕцыд фӕстейӕ, йӕхимӕ йӕ фӕзылдта). Хорз лӕг! Искуы ма Заретӕмӕ куы бавналай, уӕд мӕ мауал рахъаст кӕн! (Асхуыста йӕ, ӕмӕ уый бандоныл ӕрхауд, лӕппу та Заретӕйы йӕ дӕларм бакодта.) Хӕрзбон, папашӕ! (Акӕны чызджы.)

    МИНӔТ. Мӕ хӕдзарыл! Уый та чи у?!

    АХПОЛ (фӕгӕпп ласта). Чи у?! Дӕ чызджы хӕзгул! Федтай, йӕ рӕстӕг кӕимӕ ӕрвиты?! Уымӕн ацыд хӕдзарӕй – мӕ аххосӕй нӕ! Мӕныл та тугтӕ мысы, цӕмӕй йын ӕфсон уа уынгты хӕтынӕн!

    МИНӔТ (скуыдта). Ныббар, Ахпол. Ай цытӕ кӕны мӕ чызг, цытӕ?!

Рухс ахуыссыд.

Рынчындоны кӕрт. Бӕласы бын – бандон. ВАДИМ ӕрхӕндӕг хъуыдытимӕ рацӕуы йӕ тыхст рынчын ӕфсымӕры цурӕй, сбады.

   АЛЛӔ (ӕрбацӕуы). Куыд у де ‘фсымӕр, Вадим? Нӕма ӕрӕмбӕрста йӕхи?

   ВАДИМ (ӕрӕджиау). Нӕма.

   АЛЛӔ. Чи ис йӕ цуры?

   ВАДИМ. Мамӕ.

   АЛЛӔ. Ма тыхс... кӕд фӕхуыздӕр уаид рынчыны уавӕр.

   ВАДИМ (йе стыр маст ӕмбӕхсгӕйӕ). Чи зоны.

   АЛЛӔ. Фыдгӕнджытӕй никӕй ма ӕрцахстой?

   ВАДИМ. Нӕ.

   АЛЛӔ. Сырдтӕ! Цымӕ сын цавӕр зӕрдӕтӕ ис?! Уыдонӕй иуы фен ӕмӕ йын йӕ цӕстытӕм бакӕс!

   ВАДИМ (сыстад). Аллӕ! Куы не ‘рбацыдаис, уӕд хуыздӕр уыдаид.

   АЛЛӔ. Тыхсгӕ мӕ кӕныс?

   ВАДИМ. Тыхсгӕ кӕнын мӕхицӕй дӕр.

   АЛЛӔ. Вадим, бынтондӕр масты бар куы бакодтай дӕхи. Зын мын у.

   ВАДИМ. Цы дын у зын? Мӕ катаймӕ кӕсын?

   АЛЛӔ. О, уарзгӕ дӕ кӕнын! Ӕмбарыс? Уарзгӕ! (Иннӕрдӕм азылд.)

   ВАДИМ. Бузныг! Ныронг дӕ никуы фехъуыстон уыцы ныхас, кӕд ӕм тынг ӕнхъӕлмӕ кастӕн, уӕддӕр! Фӕлӕ мын ныр фӕтӕригъӕд кодтай, цӕмӕй мӕхиуыл фӕхӕцон!

    АЛЛӔ. Куыд уынын, афтӕмӕй зӕрдиаг ныхасыл дӕр нал ӕууӕндыс.

    ВАДИМ. Ӕууӕндӕн никӕуыл ис! Цъаммар сты иууылдӕр! (Сбадт та.)

   АЛЛӔ. Раст нӕ дӕ, Вадим! Йӕхиуыл йӕ зӕрдӕ чи нӕ дары, уый иннӕтыл дӕр не ‘ууӕнды.

   ВАДИМ. Ӕвӕццӕгӕн!..

   АЛЛӔ. Рацу нӕ заводмӕ, иумӕ кусдзыстӕм. Уым кусӕг фӕсивӕды ‘хсӕн бынтон ӕндӕрхуызы банкъардзынӕ дӕхи. Стӕй университетмӕ бацӕттӕ кӕндзынӕ... Фӕнды мӕ, цӕмӕй фӕсаууонмӕ иумӕ ахуыр кӕнӕм.

    ВАДИМ. Нӕ, ныртӕккӕ ахуырыл дӕр нӕ дӕн ӕмӕ куыстыл дӕр.

    АЛЛӔ. Вадим, ахӕм лӕмӕгъ ӕнхъӕл дын никуы уыдтӕн.

    ВАДИМ. Не ‘мбарыс, цы мыл ӕрцыд, уый!

    АЛЛӔ. Ӕмбарын! Де ‘фсымӕры мӕтӕй хъӕрзыс.

    ВАДИМ. О, фӕлӕ ма дзы ӕндӕр цыдӕр ис ноджы!.. Дуне мыл рафӕлдӕхы!

    АЛЛӔ. Уанцон нӕу! Цы хабар у?

    ВАДИМ. Нӕ, нӕ! Сӕнттӕ цӕгъдын!

    АЛЛӔ. Дӕ маст нӕ дих кӕныс мемӕ.

    ВАДИМ. Мӕ мастӕн дихгӕнӕг нӕй!

    АЛЛӔ. Зынаргъ дын куы уаин, уӕд ӕй дих кӕнис.

                                 Фӕзынд АСЛАН.

    ВАДИМ (зӕхмӕ кӕсгӕйӕ). Бузныг, Аслан, кӕй ӕрбацыдтӕ, уымӕй.

    АСЛАН. Нырма ӕрдӕбон базыдтон хъуыддаг.

    ВАДИМ. Ницы базыдтай нырма!

    АСЛАН. Цӕмӕй зӕгъыс, Вадим?

    ВАДИМ. Ничи уӕ зыдта, ме ‘фсымӕрӕй куыд сӕрыстыр дӕн ӕмӕ йӕ цас уарзын, уый! Уымӕй мын зынаргъдӕр кӕй ничи ис! Фӕлӕ ды нӕ зоныс, ӕппӕтӕй ӕвирхъаудӕр цы у, уый!

    АСЛАН. Ома?

    ВАДИМ. Ома мӕнӕ уе ‘ппӕт дӕр, мӕ разы кӕй уынын, уыдон кӕй не стут! Ӕндӕртӕ стут! Гӕды ӕмӕ хин!

    АЛЛӔ. Вадим!..

    ВАДИМ (ныхас исгӕйӕ). О, о! Гӕды! Мӕнӕ ды, мӕ уарзон!.. Суанг дӕуӕй дӕр тӕрсгӕ кӕнын! Мӕ уд мын куы аныхъуырай, мыййаг! Сымахӕй лидзын хъӕуы дард!

     АЛЛӔ. Сӕнттӕ цӕгъды фыртыхстӕй! Басабыр кӕнын ӕй хъӕуы. Дохтыр... (Ауад рынчындонмӕ.)

    ВАДИМ. Сӕнттӕ?! Нӕ, ӕрра кӕнын! Мӕ сӕры магъз фенкъуыст, уымӕн ӕмӕ дзы ӕнӕхъӕн денджыз абухы! Сымах та мӕ сабыр кӕнут! Куыдӕй?! Кӕд ныронг нӕма бамбӕрстон, цы ‘рцыд, уый! Фыны уынын ӕппӕтдӕр! Фыны! Куыд ӕбуалгъ фын у! Райхъал мӕ кӕнут рӕвдздӕр ӕмӕ дзы фервӕзон! Цӕй-ма! Уӕ бон нӕу?! Афтӕмӕй та зӕгъут, сӕнттӕ цӕгъдын! Нӕ, сӕнттӕ цӕгъдут уӕхӕдӕг!

    АЛЛӔ (фӕзынд фӕстӕмӕ). Вадим, де ‘фсымӕр!..

    ВАДИМ (сыстад). Цы ме ‘фсымӕр!..

  Чызг йӕ сӕр ӕруагъта.

   ВАДИМ. Нӕ, нӕ! (Ныхъхъӕр кодта.) Нӕ!!! (Ауад рынчындонмӕ, чызг дӕр – йӕ фӕдыл.)

   АСЛАН. Амард! Амард! (Тарстхуызӕй азгъордта иннӕрдӕм.) Амард!

  Рухс ахуыссыд.

Горӕтгӕрон хъӕды къох – цадмӕ ӕввахс. Ис дзы бӕласы дыууӕ лыггаджы ӕмӕ къодах. Ӕрбацӕуынц МАХАР ӕмӕ ЗУРАБ.

   МАХАР. Нӕ, Кобрӕ, тӕрсын Стайӕ. Йе ‘фсымӕрыл исты куы ‘рцӕуа, уӕд ӕй йӕхицӕн дӕр нӕ ныббардзӕн ӕмӕ нӕ ауӕй кӕндзӕн.

   ЗУРАБ. Нӕ бауӕнддзӕн. Йӕ ныййарджытӕн йӕхи куыд схъӕр кӕндзӕн?

   МАХАР. Инкассаторон машинӕйы шофыр Стайы ‘фсымӕр цӕмӕн разынд? Стай нын йӕхӕдӕг куы загъта, йе ‘фсымӕр отпусчы ис, зӕгъгӕ.

     ЗУРАБ. Ӕппынфӕстаг, ӕз талынджы нӕ федтон, машинӕйы шофыр чи уыд, уый, мачи дзы уа! Цӕй, кӕд фервӕзид мӕлӕтӕй.

    МАХАР. Бӕргӕ!.. Куыд ӕнтӕф у! Фӕлӕуу, ӕз уӕртӕ ресторанӕй лимонад ӕрбахӕссон. (Фӕцӕуы, фӕлӕ ма ӕрлӕууыд.) Мыййаг мӕ Заретӕ куы агура, уӕд мӕм ам фӕлӕууӕд.

    ЗУРАБ. Ссӕудзӕн? Ӕмӕ Асланитӕ куы ссӕуой, уӕд нӕм ныхас куы уыдзӕн. Заретӕйы раз куыд?.. Уый хъуамӕ мацы базона. Абон ууыл не стӕм.

    МАХАР. Нӕ нӕ бахъыгдардзӕн. Исты ‘фсонӕй йӕ арвитдзынӕн.

   ЗУРАБ. Зӕгъ-ма ӕнӕхинӕй, ӕцӕгӕй йӕ уарзыс?

    МАХАР. Цӕй-ма, Кобрӕ!.. (Ацыд.)

    ЗАРЕТӔ (чысыл фӕстӕдӕр ӕрбацӕуы ӕд хызын). Дӕ бон хорз, Зураб. Иунӕгӕй дӕ? Ӕмӕ Махар кӕм ис?

    ЗУРАБ. Ныртӕккӕ йӕ ардӕм хъӕуы. Донмӕ ауад.

    ЗАРЕТӔ (хызынӕй систа гыццыл телефон, бафтыдта йӕ ӕмӕ йӕ бӕласы лыггагыл ӕрӕвӕрдта, хъуысы дзы рог эстрадон музыкӕ. Чызг кафӕгау кӕны йӕхицӕн, лӕппу та йӕм иуварсӕй кӕсы). Ахӕм ӕнтӕф рӕстӕджы ам улӕфын хорз у, нӕ?

    ЗУРАБ. Уӕлдайдӕр дӕ хуызӕн бӕлонимӕ.

    ЗАРЕТӔ. Бӕлонимӕ? Уый та куыд бамбарӕн ис?

    ЗУРАБ. Ды мӕ не ‘мбарыс, Заретӕ, фӕлӕ ӕз... Махар куынӕ уыдаид, уӕд афонмӕ мӕ бӕлон суыдаис, ӕмӕ ныр куыд хорз ӕрвитиккам нӕ рӕстӕг! Нӕ фӕлӕ, цы, уый зоныс?

    ЗАРЕТӔ. Цы?

    ЗУРАБ. Рагӕй дӕм ӕхсайы мӕ зӕрдӕ. Нӕ уарзондзинад куы сцӕхӕр уаид, уый мӕ фӕнды. Чи зоны, Махар дӕр сразы уа. Баныхас кӕнон йемӕ?

    ЗАРЕТӔ. Цытӕ дзурыс, Зураб? (Рафтыдта телефон.)

    ЗУРАБ. Дӕ зӕрдӕмӕ нӕ цӕуын?

    ЗАРЕТӔ. Никуы ахъуыды кодтон ууыл, уымӕн ӕмӕ мын ӕндӕр адӕймаг у зынаргъ.

    ЗУРАБ. Уӕдӕ йыл нырӕй фӕстӕмӕ хъуыды кӕндзынӕ. Чи зоны, ӕз дын ноджы зынаргъдӕр суон.

   ЗАРЕТӔ. Ныууадз-ма дӕ хъазын, Зураб!

   ЗУРАБ. Ӕз хъазгӕ нӕ кӕнын, Заретӕ. (Фӕхӕцыд чызгыл ӕмӕ йӕ тыхӕй ӕрбалхъывта йӕхимӕ. Уалынмӕ ӕрбацыд Махар дыууӕ лимонады авгимӕ. Уый фенгӕйӕ Зураб суагъта чызджы.)

    МАХАР (хиуылхӕцгӕ хъӕлӕсӕй). Ссыдтӕ, Заретӕ? (Ӕвгтӕ ӕрӕвӕры бӕласы лыггагыл.) Ануазут дон.

    ЗУРАБ. Ӕз Заретӕйы ануазынмӕ хъавыдтӕн, фӕлӕ мӕ ды бахъыгдардтай, Махар.

    МАХАР. Искӕй нозт ма нуаз, мӕ лымӕн, науӕд дзы дӕ гуыбын фӕрисдзӕн.

    ЗУРАБ. Уый бафӕлваргӕйӕ у.

    ЗАРЕТӔ (се ‘хсӕн фӕныхст). Ныууадзут-ма уӕ ныхас! Фӕлӕуу, мӕнӕ тагъд мӕ улӕфӕн рӕстӕг фӕуыдзӕн ӕмӕ мӕ уӕд афтӕ арӕх нал уындзыстут.

    ЗУРАБ. Цы йӕм тагъд кӕныс, мӕлӕты куыст дын куынӕ у, мыййаг. Рынчындоны санитаркӕ!

    ЗАРЕТӔ. Ма худ! Сымах бон ахӕм куыст ссарын дӕр куынӕ у.

   МАХАР (дӕлгоммӕ ныхасӕй). Цомут уӕртӕ цадмӕ, науӕд ацы ӕнтӕфы куы ссудзон, уымӕй тӕрсын.

   ЗУРАБ. Фӕлӕуу-ма, Махар. (Чызгмӕ.) Ды уал ацу, Заретӕ, феййафӕм дӕ.

   Ч ы з г ӕвгтӕ хызыны нывӕрдта ӕмӕ сӕ ахӕссы телефонимӕ.

   МАХАР. Цы ‘рцыд ам?

   ЗУРАБ. Куы ницы. Гуырысхо мыл кӕныс?

   МАХАР. Дӕ зӕрдыл ӕй бадар, ӕз мӕ комдзаг искӕй дзыхӕй нӕ фӕисын!

   ЗУРАБ. Ӕдылы дӕ, ӕвӕццӕгӕн. Чызгӕй фылдӕр цы ис! Арвит ӕй рӕвдздӕр, ӕмӕ нӕ ма хъыгдара!

   АСЛАН (ӕрбазгъордта тыхулӕфтгӕнгӕ). Ам стут?!

   ЗУРАБ. Цӕмӕн ссыдтӕ иунӕгӕй?! Стай нӕй?!

   АСЛАН. Нӕй! Йе ‘фсымӕр амард! Сӕфӕм, Кобрӕ!Исты ӕрхъуыды кӕн!

   ЗУРАБ (фырмӕстӕй Асланы риу ныццавта, уый фӕкалд). Ацӕут! Стаймӕ уӕ цӕст фӕдарут!

Рухс ахуыссыд.

Уыцы ран та дыууӕ боны фӕстӕ. Ӕрбацӕуы ЗУРАБ, у сагъӕсхуыз.

   МАХАР (фӕзынд). Кӕм фӕдӕлдзӕх Стай, уый бӕрӕг нӕй. Нӕ йӕ ссардтон! Ӕвӕццӕгӕн, нӕ бафӕрӕзта йе ‘фсымӕры мастӕн, ӕмӕ... Тӕссаг у нӕ уавӕр!

   ЗУРАБ. Куы рамбырд уӕм, уӕд... Сырд ссӕудзӕн?

    МАХАР. Хъуамӕ.

    ЗУРАБ. Кӕд Стай зӕрдӕдаргӕ нал у, уӕд ӕй...

    МАХАР. Цы бакӕнынмӕ хъавыс?

    ЗУРАБ. Нӕ мӕ ‘мбарыс ӕви?!

    МАХАР. Цытӕ дзурыс, Кобрӕ, уый ӕгӕр у!

    ЗУРАБ. Уӕдӕ нӕ ахӕстоны бамбийын кӕнын кӕна, уый дӕ фӕнды?! Уӕлӕуыл ингӕны! Уый топпӕй агӕрах кӕнынӕй фыддӕр куы у!

    МАХАР. Кобрӕ!.. (Ацыд.)

    ЗУРАБ. Фӕлӕуу-ма, Богъ! (Ацӕуы йӕ фӕдыл.) Богъ!

Ӕрбацӕуы АЛЛӔ, кӕйдӕр агуры. Стӕй бӕласы аууон алӕууыд.

      ВАДИМ (ӕрбацӕуы мӕстыгӕрӕй). Нӕма сты ам. Сӕ хъӕддаг лӕгӕт афтид у нырма.

   АЛЛӔ (бацӕуы лӕппумӕ). Вадим!

   ВАДИМ. Аллӕ? (Мӕстыйӕ.) Цӕмӕн ӕрбацыдтӕ?!

   АЛЛӔ. Ме ‘мбӕлттимӕ уӕртӕ цады былыл уыдтӕн ӕмӕ...

   ВАДИМ (ныхас исгӕйӕ). Исты зӕгъын дӕ фӕнды?!

   АЛЛӔ. Фӕнды мӕ дӕ зын сахат демӕ уӕвын.

   ВАДИМ. Бузныг! Фӕлӕ хуыздӕр уыдзӕн, куы мӕ ферох кӕнис, уый! Мӕнӕй дын ӕмбал нал ис!

   АЛЛӔ. Дӕ зӕрдӕ мыл истӕмӕй фӕхудт, мыййаг?

   ВАДИМ. Мӕ зӕрдӕйы уазал ӕнӕуынондзинад йеддӕмӕ ницыуал баззад! Цӕмӕн дӕ хъӕуы ахӕм ӕмбал?!

    АЛЛӔ. Дӕ масты ныхмӕ фӕлӕууын куыд нӕу дӕ бон? Ӕз та!.. Куыд тынг мӕ фӕндыд дӕ рыст фенцондӕр кӕнын!

   ВАДИМ. Никуы бафтдзӕн уый дӕ къухы! Ӕнцой бонтӕ нал ис мӕнӕн! Ныууадз мӕ иунӕгӕй. Ацу!

    АЛЛӔ (кӕуындзастӕй). Цы дыл ӕрцыд, Вадим?! Цардӕгас хъуамӕ цӕргӕ кӕна! Дӕ цардыл куыд исыс дӕ къух?! Цӕмӕн дӕ ам? Уыцы ӕмбӕлтты та агурыс?!

    ВАДИМ. Цавӕр ӕмбӕлтты?!

    АЛЛӔ. Иу хатт сӕ нӕ федтон демӕ? Ахӕстоны чи бадт, ахӕмтӕ сты. Зонынц сӕ ме ‘мкусджытӕ. Семӕ дын иумӕйагӕй цы ис?! (Йӕ къухыл ын фӕхӕцыд.) Цом ардыгӕй! Рацу уӕхимӕ!..

     ВАДИМ (асхуыста йӕ иуварс). Цы дӕ хъӕуы мӕнӕй?! (Фӕцӕуы чызгмӕ уыцы мӕстӕлгъӕдӕй.) Ацӕудзынӕ ӕви нӕ?!

    АЛЛӔ (фӕтарст дзы). Вадим! Дӕхи ӕрӕмбар!(Фӕаууон.)

    АСЛАН (ӕрбацӕуы чысыл фӕстӕдӕр). Стай, ссыдтӕ?

    ВАДИМ. Кӕм ис Кобрӕ? Йемӕ мӕ ныхасаг ис. Кӕддӕра цы цӕсгомӕй ӕрбакӕсдзӕн мӕ цӕстытӕм!

    АСЛАН. Нӕ йӕ зоныс, цы?

    ВАДИМ. Нӕ, хорз ӕй нӕ зыдтон! Нӕ зыдтон Богъы дӕр! Кӕуыл баууӕндыдтӕн! (Схъӕрзӕгау кодта.) Хъуамӕ амарон Кобрӕйы!

     АСЛАН. Ма бафӕлвар, науӕд бабын кӕндзынӕ дӕхи. Ӕнӕуый дӕр Кобрӕ ӕмӕ Богъ тӕрсгӕ кӕнынц, куы нӕ ауӕй кӕнай, уымӕй. Куыддӕр дыл сӕ зӕрдӕ нал дарой, афтӕ дӕ!..

     ВАДИМ. Мӕ ныййарджыты хъӕрзын!.. Куыд мӕстӕлгъӕдӕй агурынц сӕ фыдгӕнджыты! Цӕмӕй зонынц, сӕ туджджынтӕй иу сӕхи фырт кӕй у! Куы базоной хъуыддаг!..

    АСЛАН. Нӕ дын ӕй ныббардзысты никуы!

    ВАДИМ. Ӕмӕ уӕдӕ куыд?!

    АСЛАН. Дӕ маст дӕ зӕрдӕйы баныгӕн арф. Куы йӕ схъӕр кӕнай, уӕддӕр ма дзы цы рамбулдзынӕ? Кобрӕйы ӕмбӕлтты нӕ зоныс? Сӕргӕвддзысты дӕ! Дӕ ныййарджытӕн фӕтӕригъӕд кӕн. Дӕу дӕр ма куы баныгӕной, уӕд сӕ къӕхтыл нал слӕудзысты.

     ВАДИМ. Ныййарджытӕ!.. Цы ‘мбарӕм мах та ныййарджытӕн? Нӕ федтай, ныййарджытӕ куыд дзыназынц, уый! Цы амонд хӕссыс дӕ ныййарджытӕн ды?!

     АСЛАН. Стай!..

ВАДИМ (хъуыдыты ацыд). Цымӕ мӕ ныййарджыты бынаты ӕндӕр искӕй ныййарджытӕ куы разындаиккой, кӕннод мӕхи бынаты – кӕйдӕр ӕфсымӕр, чи сын бамбӕрстаид уӕд махӕй сӕ рыст? Чи уӕ ‘мбары мӕ катай, ме ‘мбӕлттӕ?! Мӕ маст уӕ кӕимӕ адих кӕнон? Ӕмӕ уӕ кӕй мастмӕ ӕвдӕлы, уӕхи удтӕн куы тӕрсут, уӕд?! Афтӕмӕй та мын ӕмбӕлттӕ хонут уӕхи! Ӕмбӕлттӕ!.. Уӕвгӕ цы сты ӕмбӕлттӕ? Семӕ баиу дӕ зонд, мидбылты дӕм худынц, ӕмӕ сыл ӕууӕндыс. Стӕй дын ӕвиппайды сӕ тых-сӕ бонӕй ахӕм цӕф ныккодтой, ӕмӕ дӕ астӕуыстӕг асаст. Хъӕрзыс, искӕмӕ ӕххуысмӕ фӕдзурын дӕр нӕу дӕ бон, уыдон та дӕм иуварсӕй кӕсынц, сӕ мӕгуыр удтӕн тӕрсгӕйӕ! Ӕмбӕлттӕ! О, мах ӕцӕг ӕмбӕлттыл кӕй нымайӕм, ахӕмтӕ!

    АСЛАН. Уӕддӕр дын фезмӕлӕн нал ис нӕдӕр размӕ, нӕдӕр фӕстӕмӕ!

    ВАДИМ. Мӕн тӕрсын кӕныс, фӕлӕ дӕхи фыдгӕнджыты зоныс?!

    АСЛАН. Чи сты?

    ВАДИМ. Уыдон дӕр Кобрӕ ӕмӕ Богъ! Мӕнӕй раздӕр дӕуыл сӕмбӕлд сӕ бӕллӕх. Сӕ аххосӕй бады дӕ фыд!

    АСЛАН. Цӕмӕй йӕ зоныс?

    ВАДИМ. Уӕ хӕдзары куы кайф кодтам, уый ма хорз хъуыды кӕныс? Кобрӕ дӕ дуканимӕ бӕгӕнымӕ куы арвыста, уӕд Богъ та хъазӕгау цавӕрдӕр дӕгъӕл систа уӕ лагъзӕй ӕмӕ йын йӕ ныв систа. Ӕз уӕд нӕма зыдтон, уый дӕ фыды ӕфтауцуаты дӕгъӕл кӕй уыд.

     АСЛАН. Уӕдӕ йӕ уыдон фӕкъахтой? Фӕлӕуу-ма, фӕлӕуу! Иухатт Богъы мемӕ акодтон уыцы ӕфтауцуатмӕ. Йӕ цӕстытӕ фырдисӕй цӕхӕртӕ акалдтой, уыцы хъӕздыгдзинӕдтӕ дзы куы федта, уӕд. Уыйфӕстӕ-иу мӕ арӕх баййардта, сымахмӕ, дам, абадӕм... Ӕмӕ куыд арӕхстджын къухӕй архайдтой! Гуыдыр дӕр йӕ бынаты уыд, дуар дӕр ӕнӕсаст. Уымӕн нӕ баци мӕ фыды бон йӕхи сраст кӕнын нӕдӕр тӕрхондоны, нӕдӕр, кӕй ӕфтауцуат уыд, уыдоны раз. Ноджы ма уыцы ӕхсӕв электрон рухс дӕр ахуыссыд, ӕмӕ пульт не скуыста – раст цыма фыддӕрагӕн!.

    ВАДИМ. Дӕ мад дын зоны дӕ хъуыддӕгтӕ?

    АСЛАН. Кӕцӕй! Бон-изӕрмӕ йӕ уынгӕ дӕр нӕ кодтон ӕмӕ нӕ кӕнын. Мӕ фыды дӕр афтӕ. Ӕдзух сӕ куысты уыдысты... Иунӕгӕй уӕвын та мӕ бон нӕ уыд. Ӕмӕ уӕд балымӕн дӕн лӕппутимӕ. Уыдон мӕ семӕ тыхӕй акодтой кӕйдӕр хӕдзар къахынмӕ. Афтӕмӕй мын лӕгъз фӕндаг ацарӕзтой ахӕстонмӕ. Ахӕстоны базонгӕ дӕн Богъимӕ дӕр... Кӕддӕриддӕр лӕмӕгъ, ӕнӕхин уыдтӕн, ӕмӕ мӕ уый

фесӕфта! Ныр та!.. (Скуыдта.) Бабын кодтон мӕ фыды дӕр!

      ЗУРАБ (ӕрбацӕуы Махаримӕ). Ам дӕ, Стай? (Дыууӕйӕ тӕфӕрфӕсгӕнӕгау ӕрлӕууыдысты Вадимы раз.)

Уӕззау паузӕ

Ӕмбарӕм дӕ зын уавӕр. Фӕлӕ уӕддӕр дӕхиуыл хӕц.

      МАХАР. Ӕндӕр ма цы гӕнӕн ис?

      ЗУРАБ. Кӕм уыдтӕ дыууӕ боны? Уӕхимӕ куынӕ  уыдтӕ.

     ВАДИМ. Цӕмӕй йӕ зонут?

     МАХАР. Дӕ сыхаг Заретӕйы дӕм цалдӕр хатты барвыстам.

     ВАДИМ. Мӕ ныййарджыты раз фӕлӕууын мӕ бон нӕ уыд.

    ЗУРАБ. Стай! Цы ахъуыды кӕндзысты дӕ ныййарджытӕ? Фӕгуырысхо дыл уыдзысты. Сӕ мастыл сын...

   ВАДИМ. Ӕмӕ сымах маст къаддӕр у?

    ЗУРАБ. Уымӕй дӕр цы мӕнг зӕгъыс! Куыд дӕм мӕсты кӕнын, куыд! Цӕмӕн нын загътай уыцы изӕр, де ‘фсымӕр отпусчы ис, зӕгъгӕ?!

    МАХАР. Ахӕм хъуыддаг ӕрцӕудзӕн, уый ӕнхъӕл та чи уыд!

    ЗУРАБ. Не ‘мбалы маст мах маст дӕр у.

    ВАДИМ. Нӕ, цыма уӕ мастӕй уӕ тасдзинад фылдӕр у!

    ЗУРАБ. Цӕмӕй хъуамӕ тӕрсӕм? Мах не ‘ппӕт дӕр иу уавӕры стӕм.

    ВАДИМ. Иу уавӕры?! (Йӕ дзыппы йӕ къух нытътъыста, афтӕмӕй бацӕуы Зурабмӕ ӕмӕ йын йӕ цӕстытӕм джихӕй кӕсы.)

    ЗУРАБ. Фыццаг хатт мӕ уыныс?

    ВАДИМ. Кӕддӕра, зӕгъын, цыхуызӕн сты ӕмбалы цӕстытӕ. Гъер ма дын дӕ зӕрдӕмӕ ныккӕс, цымӕ уый та цыхуызӕн у, сау ӕви хъулон! (Йӕ дзыппӕй фелвӕста кард ӕмӕ дзы Зурабы ныццӕвынмӕ куыд хъавыд, афтӕ йын уый йӕ къух ацахста.)

    ЗУРАБ. Лӕппу! (Йӕ кард ын байста, йӕхи та йын схойгӕ акодта.)

    ВАДИМ зӕххыл ахауд.

    ВАДИМ. Лӕгсырд!

    ЗУРАБ. Дӕхӕдӕг та чи дӕ?!

    ВАДИМ. Цъаммар! Дӕ туг дын баназин!

    ЗУРАБ. Ма дзы фӕхуыдуг у! Иунӕг хатт дӕ акодтам немӕ ӕмӕ фыдбылызы бахаудтам! Дӕхи ‘фсымӕр куынӕ бабын уыдаид, уӕд абон тынг ӕнӕмӕт уыдаис! Дӕуӕн уӕлдай нӕ уыд, машинӕйы чи бадти, уый! Уӕдӕ цы уӕлдай уыд мӕнӕн дӕр?! Уынгӕ дӕр ӕй нӕ фӕкодтон талынджы!

    ВАДИМ (сысты, ӕрӕджиау.) Ӕниу раст зӕгъыс: цы уӕлдай уыд мӕнӕн! Стӕй дӕуӕн дӕр!.. (Схъӕрзыд.)

Сафинаг! (Фӕцӕуы.)

     ЗУРАБ. Ӕрлӕуу! (Йӕ фӕндаг ын ахгӕдта.)

ВАДИМ бафӕлвӕрдта иннӕрдӕм ацӕуын, фӕлӕ уым та йӕ фӕндагыл алӕууыд МАХАР.

       ВАДИМ. Цы ма уӕ хъӕуы мӕнӕй?!

   ЗУРАБ. Кӕрӕдзи бамбарӕм дзӕбӕхӕй.

   МАХАР. Хуыздӕр уыдзӕн афтӕ!

    ВАДИМ. Тӕрсут?!

    ЗУРАБ. Ӕмӕ ды нӕ тӕрсыс? Куыддӕр исты – карз тӕрхон ӕнхъӕлмӕ кӕсы дӕумӕ дӕр.

    ВАДИМ. Зонын ӕй!

    МАХАР. Ӕмӕ уӕдӕ куыд?

    ВАДИМ. Гъеуый нӕ зонын!

   ЗУРАБ. Ацу ардыгӕй искӕдӕм дард. Науӕд дӕ ныййарджыты раз никуы ӕрӕмбардзынӕ дӕхи. (Йӕ дзыппӕй систа ӕхцайы тыхтонтӕ ӕмӕ йӕм сӕ бадардта.) Райс, уыцы изӕр нӕ къухы цы бафтыд, уымӕй дӕ хай. Искӕдӕм куы ацӕуай, уӕд дын цӕрыны фаг уыдзӕн.

    ВАДИМ (ӕрӕджиау райсы ӕхцатӕ ӕмӕ сӕм ӕнӕуынон цӕстӕй кӕсы). Тугӕйдзаг ӕхцатӕ! (Йӕ къухӕй ӕрхаудтой зӕхмӕ.)

    МАХАР. Стай, дӕ хай!

    ВАДИМ (дӕлгоммӕ ныхасӕй). Мӕнӕй стырдӕр «хай» уӕ никӕй фӕци уыцы изӕр. Адон мын уӕлдай сты!

    ЗУРАБ (иннӕтӕм). Цӕй-ма, цы йын кӕнӕм?! Уынут ӕй, зӕрдӕ дарӕн ыл нал ис. Богъ! (Кард баппӕрста Махармӕ, цы кӕнын хъӕуы, уый бакӕн, зӕгъгӕ. Фӕлӕ уый нӕ ацахста кард.)

АСЛАН (фӕлӕбурдта кардмӕ.) Кобрӕ, ӕрӕмбардзӕн йӕхи!

    МАХАР. Бакӕсӕм ма йӕм иучысыл.

Паузӕ

    ЗУРАБ (зӕххӕй сисы ӕхцатӕ). Уӕдӕ уӕд зон, Стай, дӕ дзыхыл хӕцын куынӕ базонай, уӕд бабын кӕндзынӕ фыццаджыдӕр дӕ мады.

ВАДИМ ӕм тызмӕг каст бакодта.

О, о! Дӕ мады! Де ‘фсымӕры мӕрдтӕй нал раздахдзын уӕддӕр, фӕлӕ дӕ мадӕн фӕтӕригъӕд кӕн. Цард дын уый радта! Мах ӕм куынал равдӕла, уӕддӕр дын ӕй иннӕтӕ...

   ВАДИМ (ӕрвдзӕфауӕй рацӕуы размӕ). Мамӕ!.. (Азгъордта.) Мамӕ!                                

 АСЛАН ауайы йӕ фӕдыл.

    ЗУРАБ. Кӕй йӕ ауагътам, уымӕй, чи зоны, фӕрӕдыдыстӕм. Цӕуылнӕ йӕ бахъуыддаг кодтай, Богъ?!

    МАХАР. Ӕз марӕг нӕ дӕн, Кобрӕ!

    ЗУРАБ. Уынын, ӕппындӕр дзы нӕ тӕрсыс.

    МАХАР. Мӕ уавӕр ӕндӕр у.

    ЗУРАБ. Куыд ӕндӕр у?!

     МАХАР. Уыцы изӕр ӕз уемӕ нӕ уыдтӕн. Уынджы иннӕ кӕронмӕ мӕ дӕхӕдӕг арвыстай хъахъхъӕнӕгӕй. Ферох дӕ и? Уӕзласӕн машинӕ дӕхӕдӕг самал кодтай, инкассаторты дӕр дӕхӕдӕг ныффу кодтай, стигъгӕ дӕр сӕ уӕхӕдӕг бакодтат!

    ЗУРАБ. Богъ! (Йе ‘фцӕгготмӕ йын фӕлӕбурдта.) Тӕссаг уавӕрӕй дӕхи иуварс ласыс?!

    МАХАР. Ӕмӕ уӕдӕ ӕз дӕр уемӕ къӕппӕджы бахауон?!

    ЗУРАБ. Уыцы изӕры фӕллойӕ дын дзӕгъӕлы бахай кодтон! (Асхуыста йӕ.)

    МАХАР. Кобрӕ! Нырма Асланы фыды ӕфтауцдонӕй мӕ хай нӕ федтон!

    ЗУРАБ. Ныртӕккӕ нӕ уымӕ не ‘вдӕлы! Мӕнӕ уал ацы хъуыддаг алыг уа, мачи дзы уа!

    МАХАР. Ацы хъуыддаг хорзыл алыг уа, уый мӕ нӕ уырны. Ӕвӕццӕгӕн, нӕ фӕндагӕн йӕ кӕрон разынд.

    ЗУРАБ. Афтӕ дӕм кӕсы?

    МАХАР. Ацы хатт ма мӕ сӕр куы аирвӕзид, уӕд ацы бирӕгъы цард ныууадзын хъӕуы. Сфӕлмӕцыдтӕн дзы! (Фырмӕстӕй.) Ӕлгъыстаг фӕуӕд!

    ЗУРАБ. Кӕй ӕлгъитыс?

     МАХАР (ӕрӕджиау). Нӕ зонын... Ӕвӕццӕгӕн, мӕ ницӕйаг ивгъуыд цард.

     ЗУРАБ. Иугӕр дӕ къахдзӕфтӕм фӕстӕмӕ кӕсын райдыдтай.

МАХАР. Йӕ фӕндаджы кӕронмӕ чи бахӕццӕ вӕййы, уый фӕстӕмӕ кӕсын райдайы! (Фӕаууон.)

     ЗУРАБ (иунӕгӕй). Дӕуӕн циу, профессоры фырт! Ды фырхъал ӕмӕ буцӕй ӕрра уыдтӕ, фӕлӕ ӕз та фӕстӕмӕ цӕмӕ ракӕсон, уый дӕр нӕй! Куыд ӕнӕуынон мын стут, адӕм, уе ‘ппӕт дӕр! (Ныхъхъӕр кодта.) Уе ‘ппӕт дӕр!

Рухс ахуыссыд.

Ногӕй та Габойы хӕдзары.

    ГАБО (ӕрбацӕуы фӕлладӕй). Ехх, лӕппу, лӕппу!.. Кӕм ма дӕ агурӕм? (Бацыд телефонмӕ кӕдӕмдӕр адзурынӕввонг, фӕлӕ аивта йӕ фӕнд.)

     НИФӔ (рацӕуы иннӕ уатӕй сау дарӕсы). Нӕ йӕ ссардтай? (Цӕссыгдзастӕй.) Кӕм ис мӕ лӕппу?! Кӕм ис мӕ фӕстаг ныфс?!

    ГАБО. Ссардзыстӕм ӕй... (Сбадын кӕны усы диваныл.) Дӕхиуыл хӕц, не ‘фсин.

    АЛЛӔ (ӕрбахоста дуар, стӕй ӕрбацӕуы). Бахатыр кӕнут, ӕз уӕ лӕппу Вадимы тыххӕй...

НИФӔ баризӕгау кодта.

Ӕрмӕст тӕрсгӕ ма фӕкӕнут. Сӕрӕгас у Вадим. Ӕрдӕбон ӕй горӕтгӕрон цады был федтон.

    ГАБО. Исты фыдми бакодта?

    АЛЛӔ. Нӕ зонын, фӕлӕ цы уынын, уый хорзыл нӕ нымайын. Вадим кӕимӕ вӕййы, уыдон, ахӕстонӕй чи рацыд, ахӕмтӕ сты... Цыбыр ныхасӕй, лӕппу сӕфы, ӕмӕ йӕм уӕ цӕст фӕдарут. Йӕ цард ӕппындӕр ницӕмӕуал дары. Бахатыр кӕнут, зӕрдӕсаст стут, уый зонын, ӕмӕ та уӕ сомбон ноджы кӕуинагдӕр фӕуа, уый мӕ нӕ фӕнды. (Дуармӕ азылдта йӕхи.)

     ГАБО. Рагӕй зоныс нӕ лӕппуйы?

    АЛЛӔ. Зонын. Йе ‘мбалыл мӕ нымадта.

    ГАБО. Ныр та?

    АЛЛӔ. Ныр?.. Ныр ӕндӕр хъуыддаг у. Хӕрзбон. (Ацыд.)

    НИФӔ (скуыдта). Ай хӕдзархӕлд куы кӕнӕм бынтондӕр!

    ГАБО. Уыцы ӕмбӕлттӕ!.. Цӕуын ӕм!

    ВАДИМ (фӕзынд уыцы фӕдисонхуызӕй). Мамӕ!

    НИФӔ. Вадим! (Сыстад ӕмӕ лӕппуимӕ кӕрӕдзийыл ныттыхстысты.) Мӕ цӕстытӕй цӕссыгты бӕсты туг куы кӕлы, уӕд дӕм уый куыд нӕ хъары?! Уал ӕхсӕвы дӕ хӕдзармӕ ма ‘рбацу! Нӕ судзаггаг мардыл кӕуӕм ӕви дӕу агурӕм?! Мӕ фӕрстӕ дын байхӕлой, Ӕмзор! Къӕбӕр дӕ дзыхмӕ кӕй хъуагӕй нӕ хастай, уыцы ӕфсымӕрӕй ныр ферох дӕ ном дӕр ӕмӕ кӕйдӕртимӕ йӕ рӕстӕг ӕрвиты! (Вадиммӕ.) Дӕуӕй ӕндӕр чи уаид, уый йӕ туджджынты агурид сонтӕй!

     ГАБО. Уыдон пъӕлицӕ дӕр агуры, бӕргӕ! (Сбадын кӕны усы.) Ӕруадз дӕхи. Ӕрсабыр у, не ‘фсин.

     НИФӔ. Куынӕ сӕ ссарой, уӕд мӕхи удӕгасӕй нал ныууадздзынӕн! Арв сӕ ӕрцӕва нӕ тӕригъӕдӕй! Цымӕ сӕ цавӕр ныййарджытӕ схъомыл кодтой нӕ фыдбылызӕн, цавӕр?!

    Л ӕ п п у баризӕгау кодта мады ныхӕстӕй, иуварс ацыд ӕмӕ, йӕ сӕр ӕруадзгӕйӕ, сагъдау лӕууы.

    ГАБО. Лӕппу, кӕимӕ вӕййыс, уыцы ӕмбӕлтты рагӕй зоныс?

    ВАДИМ. Цӕмӕн мӕ фӕрсыс уымӕй та?

  Паузӕ

    ГАБО. Райсом цӕуыс куыстмӕ ӕви нӕ?

    ВАДИМ. Нӕ.

    ГАБО. Уӕдӕ? Балцы?

    ВАДИМ. Балцы дӕр нӕ.

    ГАБО. Цы ми кӕнынмӕ хъавыс?

    ВАДИМ (ӕрӕджиау). Кӕд гӕнӕн ис, уӕд мӕ мацӕмӕй фӕрс.

    ГАБО (фӕмӕсты, фӕлӕ йӕхиуыл фӕхӕцыд, бацыд диванмӕ ӕмӕ усы фарсмӕ сбадт). Лӕппу, бынтондӕр дӕ рохтӕ суагътай! Цы кӕныс, цы дыл ӕрцыд?!

    ВАДИМ. Цы мыл ӕрцыд?! (Бауад ӕмӕ ныййарджыты уӕрджытӕм ӕрхауд. Стӕй чысыл фӕстӕдӕр тыхулӕфтгӕнгӕ сисы йӕ сӕр.) Цӕмӕн ӕрбацыдтӕн, цӕ?..

   НИФӔ (йӕ сӕр ын рӕвдауӕгау дауы). Фӕсмон ыл кӕныс? Ау?

   ВАДИМ. Диссаг!.. Раздӕр-иу мын уӕ рӕвдыд куыд ӕхсызгон уыд!

   НИФӔ. Ныр та? Тыхсгӕ нӕ кӕныс? Цы дын кодтам уагӕры, гормон? Тухӕнӕй нӕ цы марыс? Ӕви нын нӕхи маст ӕгъгъӕд нӕу?!

   ВАДИМ. Мамӕ!.. (Фестад ӕмӕ дуармӕ фӕцӕуы.)

   НИФӔ. Кӕдӕм?!

                                      Лӕппу ӕрлӕууыд.

Дӕ ныййарджытӕй де ‘мбӕлттӕм лидзыс?! Ахӕм ӕгъатыр дӕ?.. (Сысты.) Ӕвӕдза, ныййарджыты катай чи бамбарид?! Гыццылӕй уӕ мӕ уӕлныхты куы хастон, мӕ лӕппутӕ, уӕд мӕм куыд рӕсугъдӕй зындысты уӕ ацы бонтӕ! Мӕ амондджын фидӕн мӕм уӕ цӕстытӕй худти. Фӕлӕ абон!..

Цӕмӕн фестӕм фыдӕнхъӕл?! Нӕ иу фыртӕй царӕфтыд фестӕм, иннӕ та талынг къуымты цавӕрдӕр гуырысхойаг ӕмбӕлттимӕ йӕ рӕстӕг ӕрвиты! Куыстӕй та дӕрдты лидзы!..

    ВАДИМ. Курын дӕ, мамӕ!..

    НИФӔ (ныхас исгӕйӕ). Цӕмӕн дӕ хъӕуынц уыцы ӕмбӕлттӕ, цӕмӕн?! Ахӕмтӕ нӕ куы бацарӕфтыд кодтой, уӕд се ‘хсӕн цы зӕрдӕйӕ ӕрлӕууыс?! Де ‘намонд ӕфсымӕры куы нымаис!..

ВАДИМ (йӕ хъустыл фӕхӕцыд). Мамӕ! (Ауад иннӕ уатмӕ.)

    НИФӔ (йӕ фӕдыл). Куыддӕр уыцы зылын фӕндагыл ацӕуай!.. Мӕ зӕрдӕйӕ дӕ стондзынӕн! (Лӕгмӕ.) Куыд ӕмырӕхгӕд у йӕ зӕрдӕ! Цы ма уа уымӕй ӕвирхъаудӕр! Телефоны дзӕнгӕрӕг.

    ГАБО (сисы хӕтӕл). Хъусын. Ӕцӕг?..

Иннӕ уаты дуарыл фӕзынд ВАДИМ.

Бузныг (ӕрӕвӕры хӕтӕл.) Фыдгӕнджытӕй кӕйдӕр ӕрцахстой.

Пъӕлицӕйы ис. Дзурынц нӕм. Цом. (Фӕцӕуы усимӕ, фӕлӕ ма ӕрлӕууыд.) Лӕппу, ӕмӕ ды нӕ цӕуыс?

   ВАДИМ. Ӕз?.. Базонут уал хъуыддаг.

    ГАБО (фӕхъыг ын, фӕлӕ хиуылхӕцгӕ хъӕлӕсӕй). Макӕдӕм ацу уӕдӕ. Мӕ ныхас нӕма фӕцис демӕ.

    НИФӔ. Макӕдӕм, хъусыс?! (Ацӕуы лӕгимӕ.)

    ВАДИМ (иунӕгӕй). Ӕрцахстой?.. Цымӕ кӕй? Кӕд, мыййаг, рӕдыдӕй искӕй... Цӕуын хъӕуы пъӕлицӕмӕ. Цӕуын хъӕуы пъӕлицӕмӕ!..

Ӕмбӕрзӕн

 

 ДЫККАГ АРХАЙД

Изӕрӕй уынджы. Ис дзы даргъ бандон. Сындӕггай ӕрбацӕуы МАХАР, хъуыдытӕгӕнгӕ ӕрлӕууы бандоны раз.

    ЗАРЕТӔ (фӕзынд). Махар, цы ми кӕныс ам? Мӕн агурыс, мыййаг?

    Лӕппу ницы дзуры.

Ӕмӕ... цы кӕныс? Цавӕрдӕр сагъӕссаг хъуыдытӕ дӕ ӕрцахстой. Ныртӕккӕ дыл фырцинӕй базыртӕ разайдзӕн. Уымӕн ӕмӕ дын ӕз раргом кӕндзынӕн иу диссаджы сусӕгдзинад.

    МАХАР. Цавӕр?

    ЗАРЕТӔ. Ды суыдзынӕ фыд!

   МАХАР (фӕтыхст). Цы, дам?! (Иуварс ацыд.)

   ЗАРЕТӔ. Хъыг дын у?

   МАХАР. Заретӕ! Ӕз чи дӕн, уый зонгӕ кӕныс?! Демӕ афтӕ ӕнӕуый ӕрвыстон мӕ рӕстӕг. Кӕрӕдзи аирхӕфстам ӕмӕ ӕгъгъӕд фӕуӕд! (Абадт бандоны кӕроныл.)

   ЗАРЕТӔ (джихау фӕци). Аирхӕфстам?! (Чызджы уӕрджытӕ фӕдонзоныг сты, ӕрбадт бандоны иннӕ кӕрон.)

Паузӕ

Цымӕ мӕ хуызӕтты куыд уромы зӕхх! Митӕй мын мӕсгуытӕ самадтай, ӕмӕ дыл баууӕндыдтӕн. Дӕ ныфсӕй мӕхи банкъардтон тыхджын ӕмӕ суанг мӕ мадимӕ дӕр хъӕбысӕй схӕцыдтӕн йӕ лӕджы тыххӕй. Загътон, уыдзӕн мын мӕхи къона, мӕхи бинонтӕ.

     МАХАР. Цавӕр къона?! Цавӕр бинонтӕ?! Хӕдзар мын куынӕ ис! Мӕ ныййарджытимӕ нӕ бацӕрдзынӕн. Семӕ мын цы ахастытӕ ис, уый куы зоныс.

     ЗАРЕТӔ. Семӕ хыл дӕ, уымӕн ӕмӕ дӕм ӕхцайӕ нал кӕсынц. Ӕвзонгӕй дын дӕ фыд машинӕ балхӕдта, стӕй ӕхцаты цады аныгъуылдтӕ. Скъолайы ма ахуыр кодтай, афтӕмӕй хӕлын райдыдтай. Ахуыры мӕт дӕ нал уыд. Уӕд дӕ ныййарджытӕмашинӕ ауӕй кодтой, се ‘хцатӕ та дӕ арф ӕмбӕхсын райдыдтой. Фӕлӕ ӕнӕ ‘хца нал бафӕрӕзтай цӕрын ӕмӕ кӕйдӕр хӕдзар фӕкъахтай...

Лӕппу фӕгӕпп ласта.

Уый тыххӕй ахӕстоны фӕбадтӕ цалдӕр азы. (Сысты.) Ӕз зыдтон иууыл уыдӕттӕ, фӕлӕ уӕддӕр загътон, ӕрӕмбӕрстай дӕхи.

      МАХАР. Заретӕ!..

      ЗАРЕТӔ (ныхас исгӕйӕ). Бахатыр кӕн, дӕ ивгъуыд бонтӕй дын дӕ цӕст рӕхойынмӕ нӕ хъавыдтӕн. Фӕлӕ дӕ уӕддӕр, ӕвӕццӕгӕн, адӕймаг рауайдзӕн. Дӕ зӕрдӕ ӕмӕ мӕм дӕ цӕсгом ӕргомӕй равдыстай. Уый стыр лӕгдзинад у! Мӕхи тыххӕй та дӕм цы мӕсты кӕнон? Мӕ хуызӕн сӕрхъӕнтӕн афтӕ хъӕуы!

     МАХАР. Заретӕ, ныртӕккӕ цы уавӕры дӕн, уый нӕ зоныс. Гӕдыныхӕстӕй дӕ сайон, уый мӕ нӕ фӕнды. Уымӕн дын загътон афтӕ. Ныртӕккӕ мын мӕ уавӕртӕ ус ӕрхӕссын нӕ амонынц... Уӕд та иу къорд боны банхъӕлмӕ кӕсӕм.

    ЗАРЕТӔ. Цы уыдзӕн къорд боны фӕстӕ?

    МАХАР (ӕрӕджиау). Мӕхӕдӕг дӕр ӕй нӕ зонын.

    ЗАРЕТӔ. Ӕмӕ кӕд ныронг мемӕ дӕ рӕстӕг ӕрвыстай «афтӕ ӕнӕуый», уӕд ма мын демӕ иумӕйагӕй цы ис дарддӕр?

    МАХАР. Ӕрсабыр у, Заре... Уыйфӕстӕ аныхас кӕндзыстӕм...

    ЗАРЕТӔ. Ӕмӕ афтӕ ‘нхъӕлыс, ӕрсабыр ма уыдзынӕн?

    МАХАР. Хъус-ма...

    ЗАРЕТӔ (ныхас исгӕйӕ). Хӕрзбон! (Фӕаууон.)

    МАХАР (иунӕгӕй). Цы бакодтон ай? Иуӕрдыгӕй дӕр куынӕуал рӕстмӕ кӕнынц мӕ хъуыддӕгтӕ! (Ацыд.)

Фӕзындысты АСЛАН ӕмӕ ВАДИМ. АСЛАН Вадимы цонгыл хӕцы.

    АСЛАН. Пъӕлицӕмӕ цыдтӕ, Стай?! Бабын кӕнынмӕ нӕ хъавыдтӕ?! Ӕмӕ кӕд дӕхи цардыл нал ауӕрдыс, уӕд дӕ мадӕн та уӕддӕр куыд нӕ тӕрсыс?! Амардзысты дын ӕй!

    ВАДИМ. О, мӕ уавӕртӕ мӕм алырдыгӕй дзурынц, цӕмӕй мӕ дзыхыл хӕцон. Фӕлӕ ме ‘фсымӕры тыххӕй уыцы рӕстдзинад куыд баныгӕнон мӕ риуы? Йӕ рухс номыл мӕ къух сисон?!

    АСЛАН. Ууыл ма хъуыды кӕн ныртӕккӕ!

    ВАДИМ. Ноджы кӕйдӕр ӕрцахстой рӕдыдӕй!

     АСЛАН. Уадз уый аххосджын кӕной!

     ВАДИМ. Ӕнаххосӕй йӕ ӕфхӕрой?! Йӕ бынаты ды цы ми кӕнис!

     АСЛАН (ӕрӕджиау). Нӕ зонын.

    ВАДИМ (мӕстыйӕ). Цы ма уа уе ‘хсӕнмӕ бахауынӕй тӕссагдӕр! Бирӕгътӕ!

    АСЛАН. Цы кӕнын, уый мӕхӕдӕг дӕр нал ӕмбарын! Нал уынын мӕ фӕндаг! Цъысымы дӕн... (Рамӕсты.) Ме уӕнгтӕ мын рӕхыстӕй бӕттыс, ӕмӕ фезмӕлын никӕцырдӕмуал у мӕ бон!

    ВАДИМ. Ӕмӕ нӕ чи нӕ уагъта сабыр цӕрын! Чи?! Мӕ раздӕры сонт фӕндтӕ! Ӕвӕццӕгӕн, уыцы фӕндтӕ уыдысты мӕ фыдбылызы хос! Ныр нал ис сӕнттӕ дӕр, нал мын ис фидӕн дӕр!

    АСЛАН. Тӕрсын дӕ, Стай!..

    ВАДИМ (ныхас исгӕйӕ). Уыцы сырды номӕй мӕм мауал сдзур!

     АСЛАН. Куыддӕр исты – ӕз ницы зонын! Мӕн ма бабын кӕн, хъусыс?!

     ВАДИМ. Ницы зоныс? Ды!.. Дӕ фыдӕн дын ахӕм фыдми бакодтой де ‘мбӕлттӕ, ӕмӕ ма сӕ разы дӕ цыппӕртыл бырыс!

    АСЛАН. Зонын ӕй, ме ‘мбӕлттӕ мӕ цыфыддӕр знӕгтӕ кӕй сты! Фӕлӕ сӕ уӕддӕр мӕхи атонын нӕу мӕ бон! Куы йӕ зоныс, уыдонӕй иунӕг фӕндаг ис ӕрмӕст – мӕрдтӕм!

     ВАДИМ. Ӕмӕ уыцы фӕндаг мах фӕндагӕй цӕмӕй фыддӕр у?!

    АСЛАН. Ард сын бахордтон...

    ВАДИМ. Ард сӕрсӕфӕн былмӕ куы тӕра, уӕд ӕй халын хъӕуы!

    АСЛАН (кӕуындзастӕй). Цы мӕ домыс, Вадим?! Ацыхуызӕнӕй цавӕр раст хъуыдымӕ ӕрцӕуын у мӕ бон? (Йӕ риу хойы.) Кӕд ӕмӕ мӕнӕ ам сафтид бынтондӕр! Ницыуал дзы ис! Адавтой мын мӕ уд! Адавтой ӕппӕтдӕр! Нӕ уыныс?!

Паузӕ

Адӕммӕ куы фӕкӕсын уынджы... Чи дзы ӕд чингуытӕ хъӕлдзӕгӕй уайы кӕдӕмдӕр, чи йӕ куыстмӕ, чи та дзы афтӕ ӕнӕуи цӕуы йӕхицӕн ӕнцад-ӕнцойӕ, ӕдӕрсгӕйӕ...

Цас сӕм фӕхӕлӕг кӕнын! Хаттӕй-хатт мӕ ӕрфӕнды сӕкъӕхты бын ӕрхуыссын, цӕмӕй мӕ риуыл цӕуой ӕмӕ мӕ ссӕндой. Ӕнцондӕр мын уаид уый! Цӕмӕн сӕ дӕн ӕз иппӕрд? Мӕхи кӕуыл банцой кӕнон, уый куынал ис. Нал ис, цӕуыл ӕрӕнцой кӕнон, уый дӕр! Нал ӕй арын!

     ВАДИМ. Уый дӕхи нал арыс. Ӕниу ма чи ары махӕй та, цӕуыл ӕрӕнцой кӕна, уый?!

     АСЛАН. Ӕмӕ йӕ... ссарӕн нал ис?

     ВАДИМ. Ссар дӕхи!

     АСЛАН. Куыдӕй?

     ВАДИМ. Фыццаджыдӕр уал бафид дӕ аххос.

    АСЛАН (фӕтыхст та.) Мӕ аххос?!

    ВАДИМ. Ӕндӕр фӕндаг нӕй! Ныртӕккӕ йыл ацӕудзынӕ.

    АСЛАН. Ӕз?!

    ВАДИМ. Ацу Кобрӕмӕ, йӕ дамбаца йын адав ӕмӕ хотых сӕмбӕлын кӕн мӕныл.

    АСЛАН (фӕтарст). Цӕмӕн дӕ бахъуыд?!

    ВАДИМ. Мах не ‘ппӕты дӕр нӕ аххос бафидын хъӕуы!

    АСЛАН. Ӕмӕ?.. Нӕ мын ӕй ныббардзӕн Кобрӕ!

    ВАДИМ. Ӕндӕр фӕрӕз нӕй.

    АСЛАН. Уӕд та...

    ВАДИМ (ныхас исгӕйӕ). Ӕндӕр фӕрӕз нӕй!

    АСЛАН. Вадим!..

    ВАДИМ. Ӕндӕр фӕрӕз нӕй!

Аслан ӕвӕндонӕй ацӕуы, тарстхуызӕй.

Рухс ахуыссыд.

Асиаты хӕдзар. Уаты цыдӕртӕ архайы ус. Ӕрбацӕуы ЗУРАБ.

    АСИАТ. Лӕппу, бон-изӕрмӕ дӕ хӕдзармӕ цӕуылнӕ цӕуыс?  Пъӕлицӕ та дӕ агуырдта.

   ЗУРАБ. Цӕмӕн?

   АСИАТ. Фарстой, цытӕ, дам, архайы.

   ЗУРАБ (рамӕсты). Уыцы сырхпъагонджынтӕ!.. Цы дзуапп сын радтай?

   АСИАТ. Йӕ зӕрдӕйы фӕндиаг куыст, зӕгъын, нӕма ссардта.

   ЗУРАБ. Ахӕстоны бирӕ фӕкуыстон саубыны лӕвар, ӕмӕ ӕгъгъӕд фӕуӕд.

   АСИАТ. Фӕлӕ уӕддӕр исты куысты ныллӕууын хъӕуы. Ӕгуыст адӕймаг цӕстӕмхиц у. Искуы фыдбылыз куы ‘рцӕуы, уӕд фыццагдӕр ууыл фӕкӕнынц гуырысхо. Уӕлдайдӕр, раздӕр ахӕстоны чи бадт, ахӕмыл.

    ЗУРАБ (фырмӕстӕй). Уыцы ахӕсты гакк!

    АСИАТ. Зураб…

    ЗУРАБ (ныхас исгӕйӕ). Мӕ мад, цыма мын кӕддӕр, паспорты хайады чи кусы, ахӕм сылгоймаджы кой ракодтай.

    АСИАТ. О, уым хицауӕй кусы.

    ЗУРАБ. Хорз ӕй зоныс?

    АСИАТ (ӕрдӕгхъӕлӕсӕй). З-зонын.

   ЗУРАБ. Сыгъдӕг паспорт дын нӕ раттид?

    АСИАТ. Цӕмӕн дӕ бахъуыд?

   ЗУРАБ. Ӕрмӕст ӕнӕ уӕлдай фӕрстытӕй. Хъӕуы мӕ ӕвӕстиатӕй.

   АСИАТ. Ахӕм курдиатимӕ искӕмӕ бацӕуын нӕу мӕ бон.

   ЗУРАБ. Цӕй, ӕхцайӕ йӕм фӕкӕсдзыстӕм.

   АСИАТ. Дӕхи ӕрӕмбар, цытӕ дзурыс?!

   ЗУРАБ (тӕргайгондӕй). Ӕниу дӕм цы хатын! Мӕ хъуыддӕгты мын куы никуы баххуыс кӕныс уӕддӕр! Ӕмӕ мын ӕниу цӕмӕн хъуамӕ баххуыс кӕнай, дӕ туг, де стӕг куынӕ дӕн, мыййаг!

   АСИАТ. Зураб!.. (Хиуылхӕцгӕ хъӕлӕсӕй.) Мӕ туг, ме стӕг... Ӕдзух мын уыцы ныхӕстӕй мӕ зӕрдӕ кардау рӕхойыс!

    ЗУРАБ. Уӕд та мын зӕгъ, кӕм ис мӕ ныййарӕг мад? Цӕмӕн мын ӕй сусӕг кӕныс уал азы, мачи дзы уа? Зӕгъ мын ӕй – балӕггад мын кӕн фӕстаг хатт.

    АСИАТ. Ома куыд фӕстаг хатт?

   ЗУРАБ. Ӕвӕццӕгӕн мӕ фервӕздзынӕ а дыууӕ боны. Ардыгӕй хъуамӕ мӕхи айсон ӕвӕстиатӕй.

    АСИАТ. Цӕмӕн? Исты фыдми та?..

    ЗУРАБ. Уый тыххӕй нӕ хъӕуы дзурын!

   Паузӕ

     АСИАТ (кӕуындзастӕй). Куыд ӕгъатыр сдӕ, ӕвӕдза! Куыд мын фӕразыс уайдзӕф кӕнын та, лӕппу, дӕ туг, де стӕг нӕ дӕн, зӕгъгӕ? Мӕ бирӕ фыдӕбӕттӕ куыд рох кӕныс? Ӕмӕ ӕз зӕххы скъуыды дӕр ныххауон, фӕлӕ дӕхӕдӕг цытӕ кӕныс?! Ау, уымӕн ӕрвыстон ӕгъуыссӕг ӕхсӕвтӕ дӕ авдӕны уӕлхъус, цӕмӕй ныр искӕмӕн фыдбылыз хӕссай? Уымӕн-иу дардтон мӕ былтыл дӕ гыццыл хӕмпус къухтӕ, цӕмӕй абон сӕ фыдмийӕ искӕй цӕссыг кӕла?! О, цас мӕ фӕндыд уыцы къухты мӕ зӕрдӕйы хъарм бауадзын, цӕмӕй сӕ рӕвдыдӕй хайджын уой иннӕтӕ! Фӕлӕ мӕ бон нӕ баци.

Уый тыххӕй амарын ӕмбӕлы мӕн, гъе ‘рмӕст иннӕты ма хъыгдар!

     ЗУРАБ (зӕхмӕ ныджджих, мӕстыйӕ). Кӕм ис мӕ ныййарӕг мад?!

    АСИАТ. Ныронг дын ӕй сусӕг кодтон, цӕмӕй дӕ зонд ма ныссаджилтӕ уа. Тарстӕн, иунӕгӕй куы баззайон, уымӕй дӕр. Фӕлӕ ныр уынын, цӕмӕй тарстӕн, уымӕй мӕхи бахизын кӕй нал бауыдзӕн мӕ бон. (Йӕ дзыппӕй сисы гӕххӕтты гӕбаз.) Дӕ ныййарӕг мад ацы горӕты цӕры. Мӕнӕ дын йӕ адрис. Абон дын ӕй райсомӕй раттинаг уыдтӕн.

    ЗУРАБ (райсы гӕххӕтт ӕмӕ йӕм кӕсы). Уал азы кӕй агурын! (Дуармӕ фӕзылдта йӕхи.)

    АСИАТ. Фӕлӕуу!

Лӕппу ӕрлӕууыд.

Афтӕмӕй йӕм ма ацу. Фыццаг уал мӕм байхъус. Бынтон ӕгъатырӕй ма равдис дӕхи, ма йӕ бафхӕр. Ды йын куы райгуырдтӕ, уӕд мойгонд нӕма уыд.

    ЗУРАБ. Хӕтаг сыл?!

    АСИАТ. Ма дзур афтӕ! Ӕз уӕд уыцы арӕндоны дохтырӕй куыстон. Кӕуынӕй мардта, мӕгуырӕг, йӕхи!.. Цыппӕрӕм бон алыгъд арӕндонӕй. Алыгъд йӕ худинаджы номӕй, ӕви цӕй тыххӕй, нӕ зонын. Ацыд кӕдӕмдӕр дард. Уым смой кодта ӕмӕ цалдӕр азы фӕстӕ сыздӕхт нӕ горӕтмӕ.

    ЗУРАБ. Зоны дӕ?

    АСИАТ. Нӕ. Фӕлӕ йӕм уыцы азты мӕ цӕст дардтон ӕдзух. Дӕу дзы хъахъхъӕдтон.

    ЗУРАБ. Куы мӕ байса, уымӕй тарстӕ? Мӕ мӕтӕй марди ӕви, мачи дзы уа?! Ӕмӕ мӕ цӕмӕн райстай ды та? Уый куынӕ хъуыдтӕн!

    АСИАТ. Мӕ уавӕр ӕндӕр уыд. Зон, дӕ райгуырды агъоммӕ ӕз моймӕ уыдтӕн. Фондз азы фӕцардтӕн йемӕ. Кӕрӕдзи тынг бирӕ уарзтам... Фӕлӕ мын цот нӕ уыд, ӕмӕ дзы ацыдтӕн, цӕмӕй ӕвӕстаг ма фӕуыдаид. Мӕ лӕджы нӕ фӕндыд, ахицӕн уӕм, уый. Ӕндӕр гӕнӕн куы нал уыд, уӕд ын загътон, нӕ дӕ уарзын, зӕгъгӕ. Мӕнг ныхас ын загътон. Ӕппӕтӕй зынаргъдӕр мын йӕ амонд уыд. Зынаргъ мын у ныронг дӕр. Мӕ зӕрдыл куы ‘рлӕууынц, ус куы ‘рхаста, уыцы уӕззау бонтӕ!.. Ӕмӕ уӕд сфӕнд кодтон дӕу арӕндонӕй райсын, цӕмӕй дын снывонд кӕнон ме ‘ппӕт цард. Куыд амондджын уыдтӕн, цалынмӕ ма саби уыдтӕ, уӕдмӕ! Уыйфӕстӕ та... Дӕхӕдӕг ӕй зоныс, цы ‘рцыд, уый.

    ЗУРАБ. Дысон та цӕуыл куыдтай?

    АСИАТ. Дысон?.. Мӕ кӕддӕры мойыл ӕнӕнхъӕлӕджы фембӕлдтӕн горӕты. Бампылд, сау маст ӕй хӕры.

    ЗУРАБ. Цӕмӕн?

    АСИАТ. Йӕ лӕппу инкассаторон машинӕйы шофырӕй куыста ӕмӕ цавӕрдӕр фыдгӕнджыты къухӕй фӕмард.

    ЗУРАБ (фӕджих). Уый йӕ лӕппу уыд?

    АСИАТ. Зыдтай йӕ?

    ЗУРАБ (фӕтыхст). Нӕ... Фехъуыстон...

    АСИАТ (арф ныуулӕфыд). Ацу ныр. Кӕд дӕ дӕ ныййарӕг мадимӕ баззайын ӕрфӕнда – табуафси. Кӕд йемӕ цӕргӕйӕ дӕхи ӕрӕмбарис – хуыздӕр амондмӕ нӕ бӕллын.

Лӕппу ацӕуы. Ус йӕ фӕдыл тыхстхуызӕй кӕсы.

Рухс ахуыссыд.

Минӕты хӕдзар та. Уаты – МИНӔТ ӕмӕ АХПОЛ.

     АХПОЛ. Ӕмӕ ма мӕсты та цӕуыл кӕныс, Минӕт?

    МИНӔТ. Уӕдӕ ӕнцон у, ӕнхъӕлыс? Бон-изӕрмӕ базары лӕуу уӕйгӕнӕгӕй! Мӕ туркаг товартӕн се ‘мбис тыхамӕлттӕй ауӕй...

    АХПОЛ. Фӕлӕ сӕйрагдӕр уыцы хъылматӕ сты. Гуыбынджын уыдон кӕнынц чыссӕ. Цы сӕ фӕкодтай?! Дӕ клиенттӕ иудадзыг дзурынц телефонӕй.

    МИНӔТ. Ныртӕккӕ мын уыцы хъылматӕ уӕйгӕнӕн нӕй.

    АХПОЛ. Цӕуылнӕ?

    МИНӔТ. «Наркоконтрол» кӕй хонынц, уыцы ӕхсӕнады мӕ хӕстӕг сылгоймаг кусы ӕмӕ мын уый айфыццаг аивӕй фехъусын кодта... Чидӕр сӕм телефонӕй бадзырдта мӕн тыххӕй.

    АХПОЛ. Уый мӕнӕ нӕ сыхӕгтӕй исчи уыдаид.

    МИНӔТ. Бынсӕфт фӕуӕнт! Фӕтарстӕн, пъӕлицӕйы кусджытӕ нӕм куы баджигул кӕной, уымӕй, ӕмӕ уыцы хъылматӕ уайтагъд аиуварс кодтон нӕ хӕдзарӕй, мӕхӕдӕг та Туркмӕ ныццавтон, цӕмӕй уырдыгон уӕлӕдарӕс ӕмӕ сыгъзӕрин дзаумӕттӕ ӕрбаластаин уӕй кӕнынмӕ. Цы нӕ вӕййы, пъӕлицӕ нӕ куы фӕрса, цӕмӕй цӕрут, зӕгъгӕ, уӕд мын ӕфсон уыдзӕн. Ныр бамбӕрстай мӕ хъуыддӕгтӕ?

     АХПОЛ. Ӕмӕ сӕ мӕнӕй цӕмӕн басусӕг кодтай?

     МИНӔТ. Куы фӕтыхсай, зӕгъын.

     АХПОЛ (иуварсмӕ). Куы дзы фӕлидзон, уымӕй та фӕтарст. Иттӕг хорз у уый! (Усмӕ.) Цы кӕнӕм уӕдӕ

дарддӕр?

    МИНӔТ. Нӕма йӕ зонын. Пъӕлицӕйы кусджытӕ тынг дарын райдыдтой сӕ цӕст уыцы хъылматы зилдухмӕ. Сӕрра сты. Знон дыууӕ сылгоймаджы ӕрцахстой.

    АХПОЛ. Фӕлӕ уӕддӕр бирӕтӕ сӕ кӕнон кӕнынц, ссарынц амӕлттӕ.

    МИНӔТ. Цавӕр амал ссарон, кӕд ӕмӕ мӕ аууонӕй дӕр тӕрсын райдыдтон?

    АХПОЛ. Ӕхца нӕ хъӕуы, уый ӕмбарыс? Ӕхца! Уыцы хицӕн хӕдзар нӕ нӕ аирвӕздзӕн?

    МИНӔТ. Ӕмӕ мӕ мӕ иунӕг чызг куы аирвӕза, уӕд та? Алы бон дугъы уайын, бафӕллайын, мӕ чызгмӕ та мӕ нал ӕвдӕлы! Йӕ мӕтӕй цыдӕр тас бацыд мӕ зӕрдӕйы.

    АХПОЛ. Сӕр куынӕ и дӕ чызгыл! Уый йӕ зӕрдӕйы дзӕбӕхӕн йӕ лымӕнтимӕ хӕты, ды та йӕ мӕтӕй скатай дӕ ам! Мах цӕрын нӕ хъӕуы?!

    МИНӔТ (скуыдта). Цӕрын?!. Знон мӕ чызгыл амбӕлдтӕн рынчындоны раз – йӕ уындӕй мӕ буар барызт.

Йӕ мӕрдонхуыз цӕсгом – ивад, йӕ рустыл уайы цӕссыгтӕ.

Фӕрсын ӕй, цы кӕныс, зӕгъгӕ, – ницы дзуры. Цыдӕр ӕрцыд мӕ чызгыл!

 Паузӕ

    АХПОЛ (фӕфӕлмӕн). Цӕй… Дӕхи ма хӕр, Минӕт, ма тъиз. Чи зоны, ӕппӕтдӕр схорз уа. А фӕстаг рӕстӕджы нӕ ныхас ӕнӕуый дӕр кӕрӕдзийыл нал бады. (Бацӕуы усмӕ ӕмӕ йыл узӕлы.) Цӕмӕн хъӕуы хъаугъа?.. Фӕлтау та нӕхиуыл схӕцӕм.

Ус арахъы авгмӕ фӕлӕбурдта, рауагъта дзы ӕмӕ агуывзӕ радта лӕгмӕ, уый нуазы.

    ЗУРАБ (ӕрбахоста дуар ӕмӕ ӕрбацӕуы). Уе ‘зӕр хорз. Кӕй зӕгъын ӕй хъӕуы, мӕн хуызӕн хӕддзу уазӕгмӕ ӕнхъӕлмӕ нӕ кастыстут.

    АХПОЛ. Чи дӕ?

    МИНӔТ. Гъестӕй дӕ цы хъӕуы?

    ЗУРАБ (усмӕ ӕввахсдӕр бацыд ӕмӕ йӕм ӕдзынӕг ныккаст). Ды. Ды мӕ хъӕуыс.

    МИНӔТ. Цы хабар у?

    ЗУРАБ (Ахполмӕ). Ды, ӕвӕццӕгӕн, йӕ лӕг дӕ. Кӕд гӕнӕн ис, уӕд мӕ йемӕ иунӕгӕй ныууадз. Ныхасаг мӕ ис.

    МИНӔТ (тӕрсы). Нӕ, мӕ лӕг никӕдӕм ацӕудзӕн. Искӕй хӕдзармӕ афтӕ бабырс! Куынӕ дӕ зонӕм!

    ЗУРАБ. Базондзынӕ мӕ ныртӕккӕ. Ӕрмӕст мӕ тӕрсгӕ ма кӕнут. Мӕхи уӕздан дарын мӕ зӕрды ис, мачи дзы уа. Ӕмӕ куыннӕ! Кӕд ӕхсӕз ӕмӕ ссӕдз азы фӕцыдтӕн ардӕм ӕмӕ ӕппынфӕстаг ӕрбахӕццӕ дӕн.

    МИНӔТ. Цыдӕр сӕнттӕ! (Фӕраст ӕддӕмӕ, фӕлӕ Зураб йӕ фӕндагыл алӕууыд.)

    ЗУРАБ (Ахполмӕ). Цӕй-ма, хорз лӕг. (Дуармӕ йын ацамыдта.)

    АХПОЛ. Мӕ хӕдзарӕй цӕмӕн хъуамӕ ацӕуон?!

    ЗУРАБ (бацыд лӕгмӕ ӕмӕ йын йе ‘фцӕгготмӕ бавнӕлдта, уый дзы тӕрсӕгау кӕны). Ахӕм ӕгоммӕгӕс

уӕвын хорз нӕу, нӕ фыдыхай. Цӕугӕ ӕмӕ иучысыл сыгъдӕг уӕлдӕф аныхъуыр, науӕд дын, цӕвиттон, улӕфт нал фаг кӕны. Ӕрмӕст искӕмӕ фӕдзурынвӕнд ма скӕн, нӕхӕдӕг ам фаг стӕм уӕлдайджынтӕй, мачи дзы уа!

    МИНӔТ. Ацу уал уӕдӕ, Ахпол.

Лӕг, стъолыл агуывзӕ ӕрӕвӕргӕйӕ, ацӕуы.

    ЗУРАБ. Цӕй, куыд, мӕ мадыхай? Бынтон куы ферох кодтай уый дӕ фырты.

    МИНӔТ. Цавӕр фырты?

    ЗУРАБ. Арӕндоны кӕй ныууагътай, уый!

    МИНӔТ (фӕрохст). Арӕндоны?!

    ЗУРАБ. Хъавыдтӕ дӕ къахвӕдтӕ бамбӕхсынмӕ, цӕмӕй сыл дӕ фырт макуы сӕмбӕлдаид! Фӕлӕ сыл сӕмбӕлд ӕмӕ мӕнӕ дӕ разы ис!

                                                Паузӕ

     МИНӔТ (цыдӕрхуызӕттӕ аци, исдугмӕ лӕппумӕ нымдзаст, стӕй диваныл ӕруагъта йӕхи. Ӕрӕджиау сдзырдта тыххӕй). Ницы ‘мбарын.

    ЗУРАБ. Ӕмӕ цы бамбарай?! Мӕ сидзӕрбон куы базыдтон, уӕдӕй нырмӕ цы мӕстытӕ бавзӕрстон, уыдон бамбарын у дӕ бон ӕви?! Куыд хӕлӕг кодтон ме ‘мгӕрттӕм!.. Уыимӕ мӕ риуы рӕзыд ӕнӕуынондзинад. Фӕндыди мӕ ӕппӕт адӕмы дӕр ӕфхӕрын, уӕлдайдӕр та ныййарджыты! Ӕхсӕв фынӕй кӕнын дӕр мӕ бон нал уыд. Фӕлӕ-иу куы бафынӕй дӕн, уӕд та-иу мӕ мӕ маст ӕрбайрох ӕмӕ-иу ацыдтӕн мӕ ныййарджыты агурӕг. Куы-иу мӕм сӕхӕдӕг фӕзындысты ӕмӕ-иу мыл узӕлыдысты сӕ фӕлмӕн армӕй. Куы-иу райхъал дӕн, уӕд та-иу мӕ баз уыд мӕ цӕссыгтӕй хуылыдз. Цы ‘мбӕрстай ды уӕд дӕ фырты катайӕн?!

     МИНӔТ (ӕрӕджиау). Чи дӕ схъомыл кодта?

     ЗУРАБ. Чи?! Ӕцӕг сылгоймаг!

     МИНӔТ. Цы дын зӕгъон, нӕ мӕ бамбардзынӕ уӕддӕр.

     ЗУРАБ. Кӕд кӕйдӕр лӕппуимӕ хӕтын дӕ сӕрмӕ хастай, уӕд дӕ фырты дӕр ӕрхастаис дӕ сӕрмӕ! Фӕлӕ дын ӕнӕ мӕн лӕг ссарын ӕнцондӕр уыд!

     МИНӔТ. Ма мӕ ‘фхӕр!

     ЗУРАБ. Бахатыр кӕн, рӕвдауӕн ныхӕстӕм нал арӕхсы ме ‘взаг! Нӕ дын раппӕлдзынӕн мӕхицӕй, тӕссаг адӕймаг мӕ хонынц. Ӕз дӕн давӕг, дыууӕ хатты ахӕстоны бадтӕн! Ныр та мӕ хъуыддӕгтӕ бынтон ӕвзӕр сты. Хъуамӕ мӕ ӕвӕстиатӕй схонай дӕ фырт ӕмӕ мын райсай паспорт дӕхи мыггагыл, мачи дӕ уа!

     МИНӔТ. Паспорт дӕм нӕй?

     ЗУРАБ. Дӕ мыггагыл мӕ хъӕуы паспорт, мӕ мадыхай!

    МИНӔТ. Цӕмӕн?.. Мӕ фырт дӕ схонон, уый мӕ бон нӕу!

                                               Уӕззау паузӕ

    ЗУРАБ (сындӕггай бандоныл ӕрбадт зӕрдӕсастӕй ӕмӕ зӕхмӕ ныджджих). Ӕмӕ куыннӕ! Чызгӕй цы уыдтӕ, уый куы базоной адӕм, уӕд дӕ худинаджы ном дӕ уӕлӕ нӕ сӕрттивдзӕн?!

Фӕлӕ мӕ ма тӕрс. Паспорт ссар сусӕгӕй. Мӕнӕ дын ӕхца!.. (Баппӕрста йӕм ӕхцаты пачкӕ.) Мӕ

къухы бафтӕд, уыййеддӕмӕ афардӕг уыдзынӕн ардыгӕй.

     МИНӔТ (фӕныфсджын). Ӕцӕг? Ацӕудзынӕ?

     ЗУРАБ (мӕстыйӕ). Куыд бацин кодта! Цас ӕнӕуынон мын дӕ! Ӕз дӕм ӕрмӕстдӕр паспорты тыххӕй ӕрбацыдтӕн. (Сыстад.) Иннӕбонмӕ дын – ӕмгъуыд! Куынӕ ссарай паспорт, уӕд мӕ дӕхи хиз! (Йӕ дзыппӕй сисы гыццыл къам ӕмӕ йын ӕй йӕ къухы фӕтъыста.) Мӕнӕ дын къам. Ном ын ратт… Ном ын ратт, цавӕр дӕ фӕнды, ахӕм. (Фӕцӕуы.)

     МИНӔТ (сысты). Куыдӕй мӕ ссардтай?

     ЗУРАБ (ӕрлӕууыд). Зӕхх къуындӕг у – бамбӕхсӕн дзы нӕй!

                       Ӕрбацӕуы ЗАРЕТӔ ӕнкъардӕй.

     МИНӔТ. Мӕ чызг!..

     ЗУРАБ (фӕджих). Заретӕ?! Ды йӕ чызг дӕ?!

     ЗАРЕТӔ. Зураб, куыд нӕм ссардтай фӕндаг?

     МИНӔТ (чызгмӕ). Зоныс ӕй?

    ЗАРЕТӔ. Усгур ма ‘рбацӕуӕд. Уарзгӕ мӕ кӕны, мӕ мад.

    МИНӔТ (фӕсонт). О мӕ рафӕлдисӕг! (Йӕ дзыккутӕм фӕлӕбургӕйӕ.) Цы баййӕфта мӕ сӕр!

    ЗУРАБ. Ӕнамонд! Дӕ хуызӕн мадӕлтӕн сӕ цот дӕр – сӕхи хуызӕн!

    ЗАРЕТӔ. Зураб! Цы дын кодтам?! Цӕмӕн нӕ ‘фхӕрыс?!

ЗУРАБ. Ма мӕсты кӕн... мӕ хо. Мӕ хо! Ӕз ам исчи нӕ дӕн. Демӕ нӕ иу мад рауагъта дунейы рухсмӕ.

                       Чызг сагъдау лӕугӕйӕ баззад.

(Усмӕ.) Дӕ чызгимӕ не ‘хсӕн исты куы ‘рцыдаид, уӕд дӕ ныртӕккӕ къабазгай ныккодтаин! Фӕлӕ мӕ домӕн куынӕ баххӕст кӕнай, уӕддӕр мӕ дӕхи хиз! Ды та, Заретӕ!.. Дӕ мады макуы бафӕзм! Хъусыс?! Макуы бафӕзм дӕ мады!

Цӕй!.. (Усмӕ.) Фембӕлдмӕ уал, мачи дӕ уа! (Фӕаууон.)

                                                Паузӕ

    ЗАРЕТӔ. Уый... ӕцӕг загъта?

    МИНӔТ. О, ӕцӕг.

    ЗАРЕТӔ (цасдӕр йӕ бон сдзурын нӕу, стӕй йӕ цӕсгом йӕ къухтӕй амбӕрзта). Цымӕ, цӕмӕн райгуырдтӕн! Цӕмӕн мӕ ныййардтай, мӕ мад?! Ӕдзух дӕхи кой кодтай ӕмӕ цы рамбылдтай абон?! Чи зоны, мӕныл дӕр дӕ аххосӕй сайд ӕрцыд... Дӕ абоны царды мӕ сомбон федтон, ӕмӕ мӕ буар бауазал! Нӕ, ӕз дӕ фидиссаг цардӕй нӕ цӕрдзынӕн никуы! Ссардзынӕн мӕхи фӕндаг! Хӕрзбон! (Ацӕуы.)

    МИНӔТ. Фӕлӕуу, ӕз дӕр демӕ!.. Иунӕгӕй дӕ нал ауадздзынӕн! (Ӕхцаты пачкӕ ӕмӕ Зурабы къам йӕ дзыппы авӕргӕйӕ, фӕцӕуы.)

    АХПОЛ (фӕзынд). Ауадз ӕй! (Фӕстӕмӕ ӕрбасхуыста усы.)

                                Ус ӕнӕбонӕй ӕрхауд бандоныл.

Тыхӕй йӕ нӕхиуыл цы ныхасӕм?! Уынгты йӕм хуыздӕр кӕсы, ӕвӕццӕгӕн!

   МИНӔТ. Ацӕудзынӕн ӕз дӕр!

   АХПОЛ. Ды дӕр?!

   МИНӔТ. Ничиуал мӕ хъӕуы! Цӕмӕн фехӕлдтон мӕ фыццаг къона?! Цот амондджын куынӕ уой, уӕд

ныййарджытӕн дӕр амондджын уӕвӕн нӕй!

    АХПОЛ. Ма тагъд кӕн, Минӕт! Цы хорз фӕндтӕ нывӕстам, уыдон куыд рох кӕныс?!

   МИНӔТ. Нал мӕ ‘вдӕлы уыцы фӕндтӕм. Йӕ ивгъуыд бонтӕй хъӕрзын чи райдайы, уый йӕ сомбонӕй дӕр тӕрсгӕ кӕны!

   АХПОЛ. Чи уыд уыцы лӕбурӕг, кӕмӕй тӕрсыс?!

   МИНӔТ. Цард! Цард йӕхӕдӕг у мастисӕг! Ницы бары лӕгӕн! Дӕхи дзы хиз ды дӕр!

   АХПОЛ. Цӕмӕй дзы тӕрсон ӕз та?

   МИНӔТ. Дӕ цӕргӕбонты сылгоймӕгты фӕдыл фӕрахау-бахау кодтай, фӕлӕ дын бинонтӕ нӕ уыд.

Ӕнӕхӕдзар уыдтӕ, афтӕмӕй дӕ ӕрбакодтон мӕхимӕ. Мӕ чызгӕй та фӕхынджылӕг кӕнынмӕ хъавыдтӕ. Ӕнӕфсарм!.. Ӕз нал цӕрын демӕ!

    АХПОЛ. Чи уыд уыцы ӕнаккаг, зӕгъгӕ, дӕ куы фӕрсын!

    МИНӔТ. Уымӕй дӕуӕн ницы тас у. (Сыстад ӕмӕ фӕцӕуы дуармӕ.)

    АХПОЛ. Ницы тас у?! (Бауад усмӕ ӕмӕ йын йӕ уӕхсчытӕ ныттылдта.) Кӕм сты машинӕ, хицӕн хӕдзар, комфорт?! Дыууӕ азы дыл дзӕгъӕлы бахардз кодтон?! Дзӕгъӕлы дӕ фӕрӕвдытон?! (Стъолмӕ фездӕхт ӕмӕ фырмӕстӕй авджы хъуырӕйзыдӕй нуазы арахъ, цыма йӕ маст уымӕй суры, уыйау. Уӕдмӕ ус алыгъд, лӕг ма йӕ фӕдыл дуармӕ ауад.) У-у-у, зӕрронд! Стӕ-ма! Кӕм сты йе ‘хцатӕ, йӕ сыгъзӕринтӕ?! (Уаты къуымты агурынмӕ фӕци.) Нӕ сӕ ахаста?! Нӕ мӕ бастыгъта?!

                                       Рухс ахуыссыд.

Габойы хӕдзары та. ГАБО стъолы уӕлхъус цавӕрдӕр гӕххӕттытӕм кӕсы, стӕй сысты ӕмӕ сӕ пъартфелы нывӕры, хъавы йӕ куыстмӕ ацӕуынмӕ. Ӕрбацӕуы НИФӔ ӕд хызын.

   НИФӔ. Вадим ам ис?

   ГАБО. Йӕхиуыл дуар сӕхгӕдта.

   НИФӔ (ӕрӕвӕры хызын). Знон дӕр... Цӕвиттон, цӕуылдӕр катай кӕны. Йӕхи тухӕнӕй мары, фӕлӕ йӕ

махӕн нӕ хъӕр кӕны. Цӕуылнӕ уӕд? Ау, йӕ ныййарджытӕ не стӕм?

   ГАБО. Йӕ ныййарджытӕ... (Сыгъӕсты ныгъуылгӕйӕ.) Цӕмӕндӕр мӕ а фӕстаг рӕстӕджы мӕ хъуыдытӕ нӕ ивгъуыд бонтӕм ахӕссынц. Вадимы сабийы бонтӕм... Хъуыды ма кӕныс, цыппӕрӕм къласы йын скъолайы йӕ хорз ахуыры тыххӕй преми куы радтой, уӕд куыд цингӕнгӕ ӕрбатахт нӕхимӕ ӕмӕ дӕм куыд хъӕр кодта: «Мамӕ, преми мын радтой!..». Ды уыцы сахат гӕрстӕ ‘хсадтай ӕмӕ йын йӕ ныхас аскъуыдтай: «Дӕ къухтӕ ахс ӕмӕ бахӕр». Уый та фыццагау хъӕр кӕны. Уӕд ӕм ды тызмӕгӕй сдзырдтай: «Кӕмӕ дзурын, дӕ къухтӕ ахс!» Сывӕллон йӕ цинтӕ аныхъуырдта ӕмӕ дӕ фӕндон баххӕст кодта. Ӕз дӕр иннӕ уаты мӕ диссертацийыл куыстон ӕмӕ лӕппуйы цины ӕнкъарӕнтӕм мӕ хъус не ‘рдардтон. Уыйфӕстӕ рацыд дыууӕ азы ӕмӕ йын ногӕй радтой преми. Фӕлӕ нын уый хъӕр дӕр нал скодта. Афтӕмӕй рӕзыд... Хистӕр кълӕсты та ахуырмӕ йӕ хъус нал дардта. Сындӕггай чингуытӕй адард. Зӕрдӕйӕ дардӕй дарддӕр кодта махӕй дӕр. Немӕ йӕ лӕмбынӕг ныхасмӕ нал ӕвдӕлд. Не ‘вдӕлд мах дӕр... Лӕппу дӕумӕ хатыд, ӕрмӕстдӕриу ӕй ӕхца кӕнӕ ног дзаума балхӕнын куы хъуыд, уӕд. Йӕ домӕнтӕ йын ӕххӕст кодтай ӕдзух ӕмӕ дӕхицӕй бузныг уыдтӕ. Фӕлӕ ахсджиагдӕр цы уыди, уый нӕ ферох, не ‘фсин!

    НИФӔ. Цы?

     ГАБО. Йӕ риуы цы миддуне сӕвзӕрд, уый. Уыцы миддуне рӕзыд махимӕ нӕ, фӕлӕ, дӕлӕ подъезды, кӕрты, кӕннод-иу уынгты кӕимӕ фембӕлд, уыцы ӕмбӕлтты тӕфагӕй. Уыдоны зондахаст ын сси ӕппӕтӕй зынаргъдӕр. Мах та йын ӕцӕгӕлӕттӕ систӕм: нӕ чыссӕ – иу, нӕ зӕрдӕтӕ та кӕрӕдзийӕ – дард.

     НИФӔ. Ӕмӕ уӕдӕ Ӕмзор...

    ГАБО (ныхас исгӕйӕ). Ӕмзоры мӕ мад хъомыл кодта. Йе ‘ргом иууылдӕр сывӕллонмӕ аздӕхта. Ӕндӕр цӕстӕнгас уыд мӕ мадмӕ, ӕндӕр домӕнтӕ... Вадим демӕ уыд ӕдзух. Мӕн мӕ куыстӕй хӕрынмӕ дӕр не ‘вдӕлд.

    НИФӔ (уайдзӕфгӕнгӕйӕ). О, фӕлӕ дӕ цотыл уӕддӕр ӕгӕр ӕнӕмӕт уыдтӕ.

    ГАБО. Уымӕй раст зӕгъыс. Цалынмӕ нӕ фыдбылыз арвы цӕфау не ‘рцӕвы, уӕдмӕ... (Фӕцӕуы, фӕлӕ ма ӕрлӕууыд.) Нӕ лӕппуйы зӕрдӕйы дӕгъӕл афоныл нӕ къухмӕ нӕ райстам, не ‘фсин. (Иннӕ уаты дуармӕ амоны.) Ныр уыцы дуар ӕхгӕд у, ай-гъай! Йӕ байгом кӕнын нал у нӕ бон.

    НИФӔ. Ӕмӕ уӕдӕ цы чындӕуа?

    ГАБО. Нӕ зонын. Нӕ арын фӕрӕз.

    НИФӔ. Пъӕлицӕйы чи бады, уыцы фыдгӕнӕг йӕ аххосыл нӕма сӕтты?

    ГАБО. Нӕма.

    НИФӔ. Дыууӕ хатты, дам, ахӕстоны бадти.

    ГАБО. Рабӕрӕг уыдзӕн ӕппӕтдӕр. (Ацыд.)

    НИФӔ (иунӕгӕй). Фӕлӕ мӕ дисы ӕфтауы Вадим, иу хатт дӕр пъӕлицӕмӕ кӕй нӕма ацыд, уымӕй. Уыцы фыдгӕнджыты тыххӕй фӕрсгӕ дӕр никӕй бакодта. Цымӕ, цӕуылнӕ? Ау, ахӕм ӕнӕмӕт ӕмӕ уазалзӕрдӕ адӕймаг схъомыл кодтон?.. Цӕмӕн мӕ дары азымы Габо? Нӕ!.. (Ферхӕцыд, иннӕ уатӕй Вадимы рацӕугӕ куы федта, уӕд.)

      ВАДИМ (зӕхмӕ кӕсгӕйӕ). Мамӕ, мӕн тыххӕй ма ‘фхӕрут уӕхи. Сымах ницы аххосджын стут. Радтат мын цард, мӕ къӕхтыл мӕ слӕууын кодтат. Уымӕй дарддӕр та ӕппӕтдӕр мӕхицӕй кӕнгӕ уыд. Кӕдмӕ мын хъуамӕ мӕ къӕхтӕм аразат быцӕутӕ? Мӕ кары мӕ миты тыххӕй хъуамӕ ӕз дӕттон дзуапп уӕ разы, сымах нӕ фӕлӕ.

     НИФӔ (йӕ зӕрдӕ суынгӕг). Лӕппу!.. Ахӕм ныхӕстӕ дӕ куы никуы фехъуыстон.

     ВАДИМ. Мӕ аххосӕй цы мӕстытӕ ӕвзарут, уыдоны тыххӕй уӕ хатыр ракурын куы суаид мӕ бон!

     НИФӔ. Дӕ бон?.. Цӕуылнӕ у?

     ВАДИМ. Дӕ фарстӕн ратдзынӕн дзуапп, гъе ‘рмӕст ныхӕстӕй нӕ.

     НИФӔ. Нӕ дӕ ‘мбарын, лӕппу...

                                        Фӕзынд МИНӔТ.

    МИНӔТ. Нифӕ, иу кӕрты цӕрӕм уал азы, фӕлӕ дӕ никуы ницӕмӕй бахъыгдардтон. Баххӕст кӕн ацы хатт мӕ курдиат.

     НИФӔ. Цавӕр курдиат?

     МИНӔТ. Иу хӕрӕфырт мын ис... Мӕн йеддӕмӕ йын ничи ис зӕххыл. Ӕмӕ дзы, зӕгъын, мӕхицӕн фырт куы скӕнин. Уадз Заретӕйӕн дӕр ӕфсымӕр уа. Гъе фӕлӕ лӕппуйы тагъд рӕстӕгмӕ паспорт райсын хъӕуы мӕ мыггагыл.

    НИФӔ. Кӕдӕм тагъд кӕнут?

    МИНӔТ. Магаданмӕ кусынмӕ цӕуы, ӕмӕ афтӕмӕй ацӕуа, уый мӕ нӕ фӕнды.

           Вадим фӕкъӕрцхъус, йӕ мидкатай ӕмбӕхсы, афтӕмӕй.

   НИФӔ. Хъуыддаг фӕтагъд кӕнын мӕ бон у, кӕд, чи хъӕуы, уыцы гӕххӕттытӕ цӕттӕ сты, уӕд.

    МИНӔТ. Ӕмӕ... ӕнӕ гӕххӕттытӕй гӕнӕн нӕй? Цалынмӕ уыдоныл зилӕм... Хъуамӕ иннӕбон атӕха.

    ВАДИМ (сирвӕзт дзы). Атӕха?! (Йӕхиуыл фӕхӕцыд.)

    НИФӔ. Афтӕмӕй мӕ бон нӕу, Минӕт.

    МИНӔТ. Уый та куыд? Ды – паспорты хайады хицау, ӕмӕ дӕ бон нӕу?

    НИФӔ. Нӕу. Уый ӕгъдаухалӕн ми уаид.

    МИНӔТ. Курын дӕ, Нифӕ!

    НИФӔ. Кӕм уыдтӕ ныронг?

    МИНӔТ. Уыцы фӕнд мӕм хӕрз ӕрӕджы фӕзынд. (Скуыдта.) Фӕтӕригъӕд мын кӕн, Нифӕ! (Йӕ уӕрджытыл ӕрхауд.) Дӕ зынгхуыст Ӕмзоры хатырӕй!

    НИФӔ. Минӕт!

    МИНӔТ. Бафиддзынӕн ӕхца дӕр!

    НИФӔ. Ай цытӕ кӕныс, цытӕ?! (Ацыд иннӕ уатмӕ.)

    ВАДИМ. Паспорт райсынӕн фыццаджыдӕр къам хъӕуы.

    МИНӔТ (сысты). Ис мӕм мӕнӕ! (Йӕ дзыппӕй фелвӕста къам.)

    ВАДИМ (ӕркаст къаммӕ). Уайтагъддӕр ӕй зыдтон! Уый у!

    МИНӔТ. Зоныс ӕй?

    ВАДИМ. Ӕвӕццӕгӕн! Знон уӕм изӕрӕй куы бацыд, уӕд ӕй федтон. Нӕ рудзынг уӕ дуармӕ кӕсы... Чи дын у, зӕгъыс? Дӕ хӕрӕфырт?

    МИНӔТ. О.

    ВАДИМ. Ма сай! Заретӕ ӕмӕ дӕ хӕрӕфырты ӕхсӕн Хӕстӕджыты  уагахаст нӕй! Фӕлтау зӕгъ, йемӕ дын иумӕйагӕй цы ис?!

     МИНӔТ. Ӕппындӕр ницы!.. Зноны онг ӕй зонгӕ дӕр нӕ кодтон.

     ВАДИМ. Гъеуый мӕ уырны! Уыййеддӕмӕ нӕ хӕдзармӕ уыцы курдиатимӕ ӕрбацӕуын нӕ бауӕндыдаис. Ӕхца дын бафыста, мыййаг?

     МИНӔТ (скуыдта та). Тӕрсгӕ дзы кӕнын, Вадим!

    ВАДИМ. Бартхъирӕн дӕм кодта?

    МИНӔТ. Фервӕзын мӕ дзы кӕнут!

    ВАДИМ. Кӕд дӕм хъуамӕ фӕзына?

    МИНӔТ. Райсом изӕрӕй! (Дзуры иннӕ уатмӕ.) Нифӕ, ратт ын паспорт рӕвдздӕр ӕмӕ ахъуытты уа!

    ВАДИМ. Нӕ! Нӕ аирвӕздзӕн! (Рӕвдз фелвӕста дзыппыдаргӕ телефон ӕмӕ ӕлхъивӕнтӕй агуры.)

    МИНӔТ. Кӕм дзы бамбӕхсон мӕхи, мӕ бон бакалд! (Ацӕуы уыцы тарстхуызӕй.)

    ВАДИМ (телефонмӕ). Аллӕ?.. О, ӕз дӕн, Вадим. Тынг ӕхсызгон мӕ хъӕуыс. Хорз. Фӕзын уырдӕм. (Телефон нывӕрдта  йӕ дзыппы ӕмӕ фӕцӕуы.)

                            Дуарӕй ӕрбахызт АСИАТ сау дарӕсы.

     ВАДИМ. Ӕгас цу... (Иннӕ уатмӕ.) Мамӕ!

                               Рацӕуы НИФӔ. Вадим та фӕаууон.

   НИФӔ. Асиат?.. Ӕгас цу. Сбад.

    АСИАТ. Ме ‘рбацыдыл ма бадис кӕн, Нифӕ. (Ӕрбады диваныл, сбады Нифӕ дӕр.) Ды сау дарыс дӕ мард фыртыл, ӕз та – мӕ цардӕгас фыртыл. Мӕ уавӕр дӕ уавӕрӕй иучысыл хуыздӕр куы уыдаид, уӕд дӕм ницы хуызы ӕрбацыдаин.

Ингӕны кӕй баныгӕнынц, уый иу хатт амӕлы, фӕлӕ уӕлӕуыл адӕймаджы нывыл чи нал вӕййы, уый алы боны мард у. Уыцы маст ноджы уӕззаудӕр у. Зӕгъ-ма, цӕмӕн мын ныссастай мӕ цард? Цы дын кодтон?

    НИФӔ. Асиат, дӕхӕдӕг куы ацыдтӕ Габойӕ.

    АСИАТ. Хъыгаг у, мӕ фарст мын уыцырдӕм кӕй бамбӕрстай, уый.

    НИФӔ. Ӕмӕ уӕдӕ цӕмӕй зӕгъыс?

    АСИАТ. Ды хорз зыдтай, ӕз, арӕндонӕй цы сывӕллоны райстон, уый кӕй хъомыл кодтон. Раст зондыл лӕуд уыд. Коммӕгӕс, хӕларзӕрдӕ... Йӕ ныййарӕг мад мӕ ӕнхъӕлдта. Фӕлӕ мӕм иухатт скъолайӕ ӕрбазгъордта ахӕм мӕстӕлгъӕдӕй, ӕмӕ мӕ баййардта, чи у мӕ ныййарӕг мад, зӕгъгӕ. Йе ‘мбӕлттӕй иуимӕ фӕхыл, ӕмӕ йӕ уый «кӕйдӕр дзӕгъӕлзад» схуыдта. Де схӕссӕг мад, дам, дӕ кӕмдӕр ссардта. Ӕз ӕй сабыр кодтон, йӕ хъуыдытӕ йын иннӕрдӕм здӕхтон. Фӕлӕ-иу мӕм уый алы бон дӕр уыцы иу фарста

радта. Стӕй мӕм цыдӕр ӕнӕууӕнк цӕстӕй кӕсын райдыдта. Гӕнӕн куы нал уыд, уӕд ын схъӕр кодтон, йӕ ныййарӕг мад ӕз кӕй нӕ дӕн. Уӕдӕй фӕстӕмӕ мӕ лӕппуйыл цыдӕр ӕрцыд. Цыма ивддзаг фӕци... Дис кодтон, йе ‘мбал лӕппу цӕмӕй базыдта хъуыддаг? Мӕн фидарӕй уырныдта, скъолайы кӕй ничи зоны, мӕ лӕппу мӕхи фырт нӕу, уый. Суанг ма мӕ цӕрӕнбынат дӕр куы аивтон, цӕмӕй йӕ искӕй дзӕгъӕл ӕвзӕгтӕй бахизон.

    НИФӔ. Ссардтай уыцы лӕппуйы?

     АСИАТ. Ссардтон ӕй скъолайы. Дӕ сыхаг разынд лӕппу, дӕуӕй йӕ фехъуыста. Уӕдӕй нырмӕ ӕз цы фыдӕбӕттӕ ӕвзарын!.. Мӕ алы ныхас дӕр зыгъуыммӕ ӕмбарын райдыдта мӕ лӕппу. Гыццылдӕр исты, уӕд-иу мын бауайдзӕф кодта, дӕ туг, де стӕг нӕ дӕн, зӕгъгӕ. Нал мӕм хъуыста. Ӕмӕ йӕм тызмӕг сдзурын мӕ бон нал уыд. Тарстӕн, искӕдӕм куы ацӕуа ӕмӕ куы фесӕфа бынтон. Афтӕмӕй, йӕхи цыдӕриддӕр фӕндыд, уый кодта. Ӕмӕ ныр цыхуызӕн сси!.. Дыууӕ хатты ахӕстоны бадти... Зӕгъ-ма, Нифӕ, уыцы марг ын йӕ зӕрдӕйы цӕмӕн бауагътай? Рагӕй мӕ фӕндыд дӕ бафӕрсын, фӕлӕ мӕхи урӕдтон, цалынмӕ фӕрӕзтон, уӕдмӕ.

     НИФӔ. Асиат!.. (Мысы тыхстхуызӕй.) О, ӕвӕццӕгӕн ын уыцы марг ӕз бауагътон йӕ зӕрдӕйы. Габоимӕ куы баиу нӕ цард, уӕд бамбӕрстон, йӕ зӕрдӕйӕ кӕй нӕ ахицӕн дӕ. Иухатт та мын ӕргомӕй загъта, Асиаты хуызӕн сылгоймаг никуы ис, зӕгъгӕ. Ӕз мӕхимидӕг катайы бафтыдтӕн. Куыд тынг мӕ фӕндыд, ды рӕвдздӕр куы смой кодтаис, уый! Фӕлӕ дӕ курджытӕй ком никӕмӕн лӕвӕрдтай. Ӕмӕ уӕд тӕрсын райдыдтон, Габойы мын куы байсай, уымӕй. Фыркатайӕ мӕ цард зындон фестад. Куыд дӕм мӕсты кодтон, куыд!.. Цыдысты азтӕ, фӕлӕ дӕ сурӕт мӕ лӕджы зӕрдӕйӕ нӕ ахицӕн. Куыд цӕрыс, уымӕ ӕдзух йӕ цӕст дардта. Ӕмӕ мын иухатт та дӕ лӕппуйӕ раппӕлыд, иттӕг хорз, дам, ахуыр кӕны, стӕй, дам, хӕрзӕгъдау у. Нӕ дын зыдтон дӕ лӕппуйы. Иубон нӕ кӕрты сыхаг лӕппу йе ‘мбалимӕ бады ӕмӕ ныхас кӕнынц, цавӕрдӕр чиныг фӕлдахгӕйӕ. Ӕз куыстӕй ӕрбацыдтӕн. Нӕ сыхаджы ӕмбал, «мамӕ», зӕгъгӕ,

фӕхъӕр кодта ӕмӕ уынгмӕ азгъордта. Акастӕн йӕ фӕдыл – ды йыл узӕлыс. Мӕ маст та ногӕй сфӕйлыдта ӕмӕ мӕ дзыхӕй сирвӕзт: «Кӕйдӕр дзӕгъӕлзад! Цӕй мамӕ дын у!» Ӕвӕццӕгӕн, сыхаг лӕппу фехъуыста мӕ ныхас... Хатыр дӕ нӕ курын, Асиат. Мӕхӕдӕг дӕр ӕй нӕ барын мӕхицӕн. Ӕрмӕстдӕр ныр бамбӕрстон, куыд ӕнӕрхъуыды ӕмӕ ӕнаккаг ми бакодтон.

      АСИАТ (сыстад ӕмӕ арф ныуулӕфыд). Кӕрӕдзийӕн нывыл аргъ кӕнын нӕ зонӕм, нӕ. (Фӕцӕуы, фӕлӕ ма дуарӕй фӕстӕмӕ ракаст.) Афтӕмӕй та, фыдбылыз ныл куы ‘рцӕуы, уӕд райдайӕм агурын, чи у аххосджын, зӕгъгӕ! Йӕхи та нӕ ничи хоны азымджын. (Ацыд.)

                                   НИФӔ ныккуыдта.

                                      Рухс ахуыссыд.

                         Уынджы АЛЛӔ ӕнхъӕлмӕ кӕсы.

     ВАДИМ (ӕрбацыд). Аллӕ!.. (Ныхъхъус.)

      АЛЛӔ. Телефонӕй мӕм нӕ дзырдтай, ӕхсызгон мӕ хъӕуыс, зӕгъгӕ?

       ВАДИМ. О, фӕлӕ...

      АЛЛӔ. Фӕлӕ цы?

      ВАДИМ. Ардӕм цӕугӕйӕ... Цыдӕр тызмӕг хъуыдытӕ мӕ ‘рцахстой. Мӕ зонд сдзӕгъӕлтӕ!

     АЛЛӔ. Цӕуылнӕ мын раргом кӕныс, сусӕгӕй дын дӕ зӕрдӕ цы маст хӕры, уый? Цӕмӕн тухӕнӕй марыс мӕн дӕр? Дӕ мӕтӕй катайы амӕттаг фӕдӕн!

     ВАДИМ. Куы дын раргом кӕнон хъуыддаг, уӕд...

    АЛЛӔ. Нӕ мыл ӕууӕндыс?

    ВАДИМ. Дӕ уарзондзинад рахиздзӕн ӕнӕуынондзинадмӕ. Дӕхи та схондзынӕ ӕлгъаг, кӕй мӕ уарзтай, уый тыххӕй.

    АЛЛӔ. Никуы уыдзӕн уый!

    ВАДИМ. Уӕдӕ йӕ зон, ӕз фыдгӕнӕг кӕй дӕн! Ме ‘фсымӕры чи бабын кодта, уыдонӕй иу!

    АЛЛӔ (фӕсонт). Цы загътай?!

    ВАДИМ. О, о, Аллӕ! Ме ‘фсымӕры марӕг дӕн ӕз! Ӕнӕнхъӕлӕджы!..(Ферхӕцыд.)

Уӕззау паузӕ

      АЛЛӔ (ӕрвдзӕфау лӕууы). Цытӕ хъусын!.. Цӕуылнӕ Фехъусын  кӕныс ныронг пъӕлицӕйӕн?

      ВАДИМ. Уый афтӕ ӕнцон куы уаид! Мӕ ныййарджытӕ куы базоной хъуыддаг!..

       АЛЛӔ. Ӕмӕ йӕ кӕдмӕ ‘мбӕхсдзынӕ? Хъуамӕ сын схъӕр кӕнай ӕппӕтдӕр! Ӕвӕстиатӕй! Де ‘мбӕлттӕ!.. Ахӕм тӕссаг фыдгӕнджыты ӕмбӕхс!.. Уый ноджы стырдӕр фыдракӕнд куы у!

      ВАДИМ. Мӕ мады амарынӕй мӕм ӕртхъирӕн кӕнынц, куыддӕр сӕ банымудзон, афтӕ.

      АЛЛӔ. Ӕмӕ афтӕ бакӕнӕн нӕй, цӕмӕй йӕм ма бахӕццӕ уой?

     ВАДИМ. Нӕ раздзогӕн ма махӕй уӕлдай ӕндӕр ӕмбӕлттӕ дӕр ис. Дыууӕ хатты ахӕстоны бадти.

    АЛЛӔ. Дӕ мадӕн ма тӕрс. Нӕ заводы тынг сӕрӕн лӕппутӕ ис, уыдон ӕй бахъахъхъӕндзысты фыдгӕнджытӕй.

    ВАДИМ. Уыцы курдиатимӕ дӕм ӕрбацыдтӕн, Аллӕ. Ныр мын ӕнцондӕр уыдзӕн хъуыддаг алыг кӕнын.

    АЛЛӔ. Фехъусын кӕндзынӕ пъӕлицӕйӕн?

    ВАДИМ. Нӕ, хъуамӕ мӕхӕдӕг... Ацу, мӕ мадмӕ уӕ цӕст фӕдарут.

    АЛЛӔ. Де ‘мбӕлттимӕ схӕцынмӕ хъавыс?! (Ныттыхст лӕппуйыл.) Вадим! Ма сӕм цу!

       ВАДИМ. Диссаг... Мӕ мӕт ма кӕныс уӕддӕр? Тӕрсыс мын! Ӕнӕуынон дын нӕ фестадтӕн?

       АЛЛӔ. Дӕ хъизӕмӕрттӕ дын фаг не сты? Цы ма уа дӕ уавӕрӕй уӕззаудӕр!

      ВАДИМ (чызгӕн хъӕбысгӕнгӕйӕ). Ныббар, Аллӕ, раздӕр дӕ хорз нӕ уыдтон. Мӕ цӕстытӕ куырм уыдысты... Цӕмӕн гуырынц мӕ риуы, ныронг кӕй нӕ бавзӕрстон, уыцы ӕнкъарӕнтӕ? Цы пайда ма сӕ ис?! (Иуварс ацыд.)

      АЛЛӔ. Цӕмӕн зӕгъыс, Вадим?

      ВАДИМ. Дӕумӕ дард у мӕ фӕндаг.

       АЛЛӔ. Ӕнхъӕлмӕ дӕм кӕсдзынӕн мӕ цӕргӕбонты!

      ВАДИМ (фӕныфсджын). Дӕ цӕргӕбонты?! Бузныг, Аллӕ! (Схъӕрзӕгау кодта.) Бузныг! Дӕ уарзтӕй мӕ фӕндаг дӕумӕ ӕмбисцыбырдӕр фӕуыдзӕн.

Сценӕйы кӕрон фӕзынд АСЛАН, фены йӕ ВАДИМ.

Ацу, Аллӕ!

     АЛЛӔ. Уӕддӕр цы сфӕнд кодтай, Вадим?!

     ВАДИМ. Ацу!..

     АЛЛӔ (иуварсмӕ). Ног фыдбылыз та куы ‘рцӕуа!.. Рӕвдздӕр фехъусын кӕнон йӕ фыдӕн. (Фӕаууон.)

     ВАДИМ. Уӕдӕ, зӕгъыс, дӕ къухы бафтыд, Аслан?

     АСЛАН. Ӕрдӕбон дӕм мӕ мобильникӕй куы ‘рбадзырдтон. (Йӕ ронӕй райста дамбаца.) Мӕнӕ ис. Кобрӕ мӕм ӕй йӕхӕдӕг радта, цӕмӕй дзы дӕу...

     ВАДИМ (райсы йӕ). Ӕмзоры дамбаца!

     АСЛАН. Ӕмзоры? Уӕдӕ йӕм уӕд дыууӕ ис. Ӕнхъӕлмӕ мӕм кӕсы хъӕды къохы.

     ВАДИМ. Иттӕг хорз! (Дамбаца нывӕрдта йӕ дзыппы.) Цом ӕм иумӕ!

    АСЛАН. Ӕз – нӕ! Мӕхиуыл ӕй баууӕндын кодтон, йӕ фӕндон кӕй баххӕст кӕндзынӕн – ныр ӕм ӕууӕнкхорӕй фӕзынон?

     ВАДИМ (мӕстыйӕ). Ӕууӕнкхорӕй?! Ӕмӕ мах не ‘ппӕт дӕр ӕууӕнкхортӕ не стӕм?! Ӕууӕндыдысты ныл нӕ бинонтӕ, нӕ зонгӕтӕ ӕмӕ, цы адӕмы ‘хсӕн цардыстӕм, уыдон. Мах та сын фыдбылыз хастам! Цом, фӕстиатгӕнӕн нал ис!

     АСЛАН. Ӕнӕ пъӕлицӕ?!

     ВАДИМ. О! Уыцырдыгӕй сты уӕлмӕрдтӕ! Хъуамӕ Кобрӕйы мӕхӕдӕг акӕнон ме ‘фсымӕры дамбацайы фындзӕй йӕ ингӕны рӕзты!

      АСЛАН. Тынг тӕссаг у дӕ фӕнд!

      ВАДИМ. Уӕдӕ лӕуу ам! Ӕз дӕу тыххӕй дӕр ратдзынӕн дзуапп! (Фӕаууон.)

    АСЛАН. Бабын уыдзӕн! Бабын уыдзӕн Вадим! Рӕвдздӕр пъӕлицӕмӕ! (Азгъордта.)

                                     Рухс ахуыссыд.

Горӕтгӕрон та – хъӕды къохы. ЗУРАБ бӕласы лыггагыл бады, ӕнхъӕлмӕ кӕсы. Ӕрбацӕуы МАХАР нозтджынӕй.

     ЗУРАБ (мӕстыйӕ). Богъ!.. Уый хъуаг ма уыдыстӕм!

     МАХАР. Кӕд, зӕгъын, фервӕзин!

    ЗУРАБ. Фервӕзис? Цӕмӕй?

    МАХАР. Мӕ зонды муртӕй! Баназон сӕ, зӕгъын, цӕмӕй мацӕуылуал хъуыды кӕнон. Хъуыдыты куы ацӕуын, уӕд мыл дуне иннӕрдӕм афӕлдӕхы.

    ЗУРАБ (сыстад). Цыдӕр кӕныс, лӕппу! (Йе ‘фцӕггот ын ацахста.) Дӕхи мӕ хиз!

    МАХАР. Ӕз никӕмӕйуал хизын мӕхи! Суанг дӕ Кобрӕйы маргӕй дӕр!

    ЗУРАБ ӕй ныццавта, уый ахауд зӕххыл.

    ВАДИМ (фӕзынд ӕмӕ Зурабмӕ дамбаца ныддардта). Цӕугӕ, Кобрӕ, разӕй!

Уӕззау паузӕ

МАХАР сындӕггай сысты.

Цӕугӕ, зӕгъын! Куыдзы мард дын акӕндзынӕн!

    ЗУРАБ (ӕвиппайды йӕм басхуыста Махары ӕмӕ, йӕхи уый аууон фӕкӕнгӕйӕ, къахӕй скъуырдта Вадимы дамбаца – дамбаца асхъиудта иуварс). Хъуымыздзых!

     ВАДИМ ӕмӕ МАХАР Зурабмӕ баппӕрстой сӕхи. Тох кӕнынц йемӕ. Ӕппынфӕстаг  ЗУРАБ дамбаца фелвӕста йӕ дзыппӕй ӕмӕ дзы Вадимы багӕрах кӕнынмӕ куыд хъавыд, афтӕ йын йӕ дамбацамӕ фӕлӕбурдта МАХАР ӕмӕ нӕмыг уый уӕхскыл сӕмбӕлд. ВАДИМ зӕххӕй фелвӕста йӕ дамбаца ӕмӕ багӕрах кодта Зурабы, уый ӕрхауд – бӕласы лыггагыл ӕрдыдагъ. Уалынмӕ ӕрбайхъуыст пъӕлицӕйы машинӕйы сиренӕ. МАХАР, йӕ цӕф уӕхскыл хӕцгӕйӕ, йӕ уӕрджытыл ӕруадзы йӕхи. ВАДИМ ыл хӕцы. Фӕзынд АСЛАН дӕр.

 

Спектаклы иннӕ архайджытӕ дӕр, Ахполӕй фӕстӕмӕ, фӕзынынц сценӕйы фӕйнӕрдыгӕй ӕмӕ лӕппутӕм уыцы удаистӕй кӕсынц.

Ӕмбӕрзæн