Сказание о Кудым-Оше

Кудым-Ош йылiсь висьтас

Коми-пермяцкöй эпос сьöртi драма

 

Орсöны:

Кудым-Ош,  коми увтырлöн том пам, ыджыт вына морт
Пöвсин,  сылöн мам
Костö,  Кудым-Ошлöн гöтырпу, вогулка
Чикыш, увтырлöн тöдiсь, пöрись инька
Ашанъ, увтырись инька
Кабыр, памлöн ёрт
Тульган, том морт
Шудза  обряддэз нуöтiсь нывка, орсö пöлянöн
Дзуль, Шудза кодь жö нывка
Учкись,  лёк мужик
Оннян,  Анюшкарись инька-пам
Ваяси  Кудым-Ошлöн туйдöтiсь
Окся,  вогул увтырлöн окся (князь)
Камай,  вöрись, лешак
Сабри  Анюшкарись ыджыт тöдiсь
Неыджыт картинаэзын:
Увтырись отир, оксялöн охрана, шаман-вогул, сьöд морттэз-шышшез
 Анюшкарись нывкаэз, вöровкаэз.

            Действиеыс мунö виль эраись V-öт векö.

 

ФОНОГРАММА:     Сьыв, пöлян менам, гусьöник,
                              Не тэрмасьöмöн висьтась тэ
                              Аслат лайкыт сьылан кылöн
                              Чуд увтыр йылiсь висьтассэз,
                              Мед сьöлöмö-лолö босьтас
                              Нылiсь шудсö, нылiсь шогсö.
                              Мед мöдiк сьöлöмö сидзас
                              Важся говка
                                                             коми кыв!

                                                  ***

Сцена шöрын иньпöлöс, нiя касьтiсьöны. Обрядсö чулöтö ЧИКЫШ. Касьтылöны нiйö, кинöс вийисö разбойниккез, кин эз берт походсянь, кин вийсис вöралiкö, чери кыйтöн, кинöс гусялiсö. Сцена шöрас пызан, сы вылын сёян-юан ыджыт бекöрын да туисын. Тыдалö Ойпель идол.

ЧИКЫШ.  Кöдна абу ни миянкöт  –

                   Миян айез, зоннэз, ныввез  –

                    Кинöс вийисö лёк отир, –

                    Пым сёян дорö касьтылам! (Тэчö киэсö морос вылас крестöн).

                    Локтö вошшö, локтö вошшö!

БЫДÖННЫС.  Локтö вошшö, пöттöдз вошшö!

ЧИКЫШ.  Киннэз куйлöны йöз муын  –

                   Шуд кошшиссез, туй осьтiссез  –

                   Касьтам нiйö бытшöм кылöн,

                   Чöскыт дук дорö вошшöтам!

БЫДÖННЫС.  Локтö вошшö, пöттöдз вошшö!

ЧИКЫШ.  Горт дорйиссезöс касьтылам…

БЫДÖННЫС.  Локтö вошшö, пöттöдз вошшö!

ЧИКЫШ.  Кöднö босьтiс юыс, тыыс,

                   Нюр ньылыштiс нятьöсь гыркас…

БЫДÖННЫС.  Локтö вошшö, пöттöдз вошшö!

ЧИКЫШ.  Но, быдöннысö касьтылiм…  Локтö вошшö!..

БЫДÖННЫС.  Пöттöдз вошшö!

Горзöны инькаэз. ЧИКЫШ лэбтö киэсö вывлань, чöлöв керö. Сэсся сёйöны  –  босьталöны киэзöн бекöрись пельняннез, юöны.

                                                              ***

  ФОНОГРАММА:    Керкуоккез, дзик мутшаккез,

                             Муö пырöмась öшынви.

                             Пемыт вöр дюттьöтö нiйö,

                             Шондi шонтö да югдтö,

                             Кайез вайöны юöррез,  

                                 И бипур йöктан бипурнас

                             Вöтлö куллезлiсь чукöр.

 

                             Кöчлiсь туй кöиныс адззö,

                             Мортлiсь гортсö врагыс тöдö,

                             А чуд йöзлöн оланiнныс,

                             Дзик кайпоз

                                                  куш му вевдöрын,

                              Квать тöвныр вылын сулалö.

                              Куштö сiйö врагыс повтöг.

                              Чинö чуддэзлöн увтыр.

                         Ритуалыс помассис. Мукöдыс мунöны.

ПÖВСИН.  Ой, сьöлöмö менам кылö:

                    Памкöт мыйкö умöль лоис,

                    Лун-лун сы йылiсь ме тöжда…

                    Тöн Вакуль уськöтчис вöтö:

                    Иньва ю дорас пукалö,

                    Сьылö гажöн… Ой, ме тöда:

                    Эта… Эта умöль одзын!

                    Локтö ме дын сьöкыт кад!

ЧИКЫШ  (Пöвсинлö). Эн баит сiдз. Дугды чидны,

                         Умöль думаэтö чапкы,

                          Карзiсь рака моз эн пессьы,

                          А нето кытсалан мыйкö…

ПÖВСИН  (Чикышлö). Тэ бы еннэслiсь юасин

                   Памыс йылiсь… ёрттэс йылiсь…

                   Ме кывзiси  –  муыс чöлö,

                   Васö кывзi  –  сiя горзö…

                   Кыла: мыйкö лоис ныкöт…

                   Тэ, Чикыш, тöдмасьны кужан…

                   Сэсся кин отсалас меным?

ЧИКЫШ.  Но, юася инö… (Чирзö) Шудза!

                   Адззы Дзульöс, босьт пöляннэз,

                   Да кыкнанныт ме дын локтö! (Идол сайись кыскö сьöд йöрнöс, пасьталö сiйö, босьтö орсанпöв, вартан ёссез, кышалö сивяс, судзöтö гормöччан, пуктö сцена шöрас).

ИНЬКА.  Уськöтчасö кö бöра вирьюиссес, унаöс миянлiсь вийласö.

МÖДIК.   Ох! Кыным ни нывкаöс гусялiсö!..

КУИМÖТ.   Быдöннымöс вийласö…

НЁЛЬÖТ.   Гортнымöс нач куштiсö…

ВИТÖТ.   Мыля миянöс еннэс мыжйöны? Мыйöн нiйö сiдз лöгöтiмö?

ПÖВСИН.  Кык вежон ни памыс абу, абу некытшöм юöр.

КУИМÖТ.  Ловьяöсь я тiйö, миян дона морттэз? Ой ни да ой!

                                     Локтöны ШУДЗА  да  ДЗУЛЬ.

ЧИКЫШ  (отирыслö). Тiйö öнi татiсь мунö.

                                           Отирыс мунöны.

ЧИКЫШ.  Ноко, Вöрпельсö кытсалам да юалам, кин кытöн.

ЧИКЫШ, ШУДЗА да  ДЗУЛЬ сувтöны кытшöн моз, öтамöдныслö паныт. Пондöтчö ритуальнöй орсöм: ЧИКЫШ ёсёккезнас   –  сяр-сяр! ШУДЗА пöлянöн  –  пик-пик! ЧИКЫШ  –  сяр-сяр, ДЗУЛЬ  –  пик-пик! ЧИКЫШ  – сяр-сяр-сяр, ШУДЗА  –  пик-пик-пик! ЧИКЫШ  –  сяр-сяр-сяр! ДЗУЛЬ  –  пик-пик-пик! Орсны дугдöны, кытсалöны Вöрпельöс.  

ШУДЗА.  Вöрпель!

КУИМÖН.  Вöрпель!

ДЗУЛЬ.  Вöрпель!

КУИМÖН.  Вöрпель!

ЧИКЫШ.  Вöрпель! Вöрпель!

КУИМÖН.  Вöрпель! Вöрпель!   

          ЧИКЫШ кынымиськö вачкö ёссезнас пöв кузя, и быдöнныс бергöтчöны веськытланьö да пондöны гöгравны гормöччансö шондi паныт. Эта дырни орсöны да ветлöтöны сё перытжыка, и сьöрна шогмö ритуальнöй танец «Тупи-тап». Йöктöв керасö, и ЧИКЫШ пöвнас  –  сяр-сяр, ШУДЗА пöляннас  –  пик-пик , ЧИКЫШ  – сяр-сяр, ДЗУЛЬ  –  пик-пик,  и ЧИКЫШ чöвтö пöвсö, ёсёккеза гöйтансö, пуктö бокö да босьтö гормöччан. Нывкаэз тэчöны пöляннэзнысö, пуксьöны кекеркаöн, сайöвтöны синнэзнысö киэзöн. ЧИКЫШ гормöччаннас керö чарта. Пуктö гормöччансö кытшас. 

ЧИКЫШ.  Мийö корам тэнö, Вöрпель,

                  Тэнö, ыджыт вына енöс:

                  Тэ висьтав миянлö öнi, 

                   Мый пыд вöрын, нюрын керсьö,

                  Юэз дорын, туйез шöрын (пуксьö нывкаэслö паныт).

          Небурика пемдö, пондö пöльтны тöлок, мыччисьö мортлöн вуджöр  –  неятнöй, орлассьöм-косяссьöм. Кылöны нёштöм, нора шыэз.

ЧИКЫШ  (чеччö). Ой, мылякö лёк юöррез

                              Ыстö меным Вöрпель ен!..

          Сцена сайын кылö горöтлöм: «Локтöны, локтöны!» Сцена пыдöсын  мыччисьöны морттэз: нiя вайöтöны вийöм памсö. Ны бöрсянь локтöны ПÖВСИН, АШАНЬ да мöдiккез. ЧИКЫШ жагвыв мунö нылö паныт. Памлiсь шойсö пуктöны сцена шöрö.

ЧИКЫШ.  Шудза, Дзуль, отсалö меным

       Ловсö памыслiсь вайöтны!

Вартö орсанпöв кузя ёссезнас, сэсся дугдö. (Сувтö пидöс вылас шойыс дорö, куралö киэзнас  русö).   

ШУДЗА да ДЗУЛЬ пондöны норöн орсны пöляннэзнаныс, шойсö гöгравтöн. ЧИКЫШ лэбтö шойыслiсь кисö  –  сiя усьö; лэбтö коксö  –  кокыс усьö. Судзлалö русö киэзнас вывланись да коялö шойыс чужöмö.                                    ЧИКЫШ  (сувтö кок йылö, öлö орсiссесö). Сiя öнi оз ни саймы,

                                                                   Мöдöр югытас ни мунöм…

ПÖВСИН  (оллялö, сувтö пидзöс вылас). Ой, тэ менам сьöлöмшöрöй,

                                                                 Колин öтнамöс тай кöкны!

ОТИР.  О-о-о! Ой-я-ой!..

ПÖВСИН.  Кин нö менö, öтка иньтö,

                    Öнi дорьяс да гажöтас?

ОТИР.  О-о-о! Ой-я-ой!..

ПÖВСИН.  Лёк синваöн öнi кувтöдз

                    Ковсяс синнэзöс гывьявны,

                    О-о-о-о! О-о-о-о!..

ОТИР.  Ой-я-ой!

ПÖВСИН.  Эз ло менам зарни ёртö,

                    Эз ло тай увтырлöн памыс!..

                    Кин увтырнымöс туйдöтас?

ОТИР.  О-о-о! А-а-а!

ЧИКЫШ.   Мича шондiным саясис,

                    Кыдз нö сытöг пондам овны?

ОТИР.  А-а-а! Ы-ы-ы!

ПÖВСИН.  Пöла борда кай моз öнi

                    Понда вартсьыны оланам!..

АШАНЬ.  Ок тэ, Ойпель уна сина,

                  Уна вына, уна тöдiсь,

                   Разь вунöтiн тэ миянöс  –

                  Сетiн памнымöс куль киö!

ОТИР.  А-а-а! О-о-о!

          ПÖВСИН, му вылас пукавтöн, олльöтö-горзö, вартö киэзнас боккесö, мусö, сыркьялö берся голоснас  –  перво лöнямоз, сэсся сё горöнжык, частожык ойзöмöн, медбöрын кутчисьö юрси бердас кыкнан киöн и усьö садьтöг.

                                     ПÖВСИНЛÖН олльöтан кыввез

Ой, дудiэз тi, гажа пöткаэз,

Тi видзöтö жö, небыт бордаэз,

Ланьтöм ёртö вылö  –  менам вурку вылö,

Тi видзöтöте да юалöте,

Мыля чöлö сiя, öтiк шы оз сет?

Не вöравны я мöдö ветлыны

Да думайтö сiя, мунны кöдöрö?

Али мунö бы мöдiк йöз ордö,

Мöдö вайны виль чышьян меным?

Ой, мыля сiя, зарни мортiньöй,

Лэбзис-пуркйыштiс гортся югытсис,

Пöртiс инькасö пöла бордаö?

Ой да, кусiс тай мича шондiö!

Ой да, пемдасö öнi синнэзö!..

Ой, тай, о-о-о-о!

 

МÖДÖДЗ  КАРТИНА

          Сцена пыдöсын пуовöй Ойпель. Сы одзын  –  ЧИКЫШ, ШУДЗА да ДЗУЛЬ. Нывкаэс сулалöны киэзнысö вывлань лэбтöмöн. Öтыслöн киас бекöрок маöн, мöдыслöн  –  быд рöма ситец тороккез.

ЧИКЫШ.  Ойпель, миян ыджыт енöй,

                   Тэ отсав миян увтырлö

                    Быдкодь лёккезiсь мездiсьны,

                    Врагöс гортаным не лэдзны,

                     Пöтын-гажын одзлань овны,

                     Памöс бöрйыны отсав!

                         Бокын моз сулалöны кык МУЖИК.

ÖТЫС.  Кылiн? Турандоз мöдöны юны. Кинöс жö памас пуктасö?

МÖДЫС.  Умöль кад сибалiс, лёк кад…

ÖТЫС.  Кин вермас лоны одзза памыс кодьöн? Сыкöт мийö бура олiм.

ЧИКЫШ.  Вöралiссеслö отсав тэ

                  И мöдiккезöс туйдöтлы…

                  Ась некöр, некöр оз куслы

                  Горын би да олан гаж!

МÖДЫС.  Мый лоас öнi? Кыдз овны пондам?

ÖТЫС.  Оз я ло памнас Учкись? Пöрись ни сiя, да олансö тöдö, авйö.

МÖДЫС.  А вермис бы Пöвсин. Анюшкарын тай инька жö памалö. И олöны

                  бура, некинкöт оз етшасьö-видчö… Памыслiсь иньсö, Пöвсинсö,

                  колö бöрйыны.

ЧИКЫШ. Ойпель, бытшöм енöй миян,

                  Босьт гöснечсö да козинсö,

                  Бур олан миянлö ысты!

                           ШУДЗА да ДЗУЛЬ гöснечасьöны-козьнасьöны.

ÖТЫС.  Оз, оз лöсяв Пöвсиныс, пöрисьöв ни да вынтöм. Колö Кудымöс.

МÖДЫС.  Кулöм памыслiсь зонсö? Томöв зонкаыт, томöв!

ÖТЫС.  Том, да дёка! И вына да повтöм. И мывкыда юра.

МÖДЫС.  Öддьöн дзирыт сiя, кыдз бы паныт эз понды сынны!

ÖТЫС.  Да мыйлö одзлань вöджжыны? Кыдз шуасö турандоз юиссес,

               сiдз и лоас.

МÖДЫС.  Сiдз, сiдз. Юасö турандозсö  –  и лоас виль пам.

ÖТЫС.  Ойпельыс отсалас…

ЧИКЫШ.  Тэ отсав миянлö, Ойпель!

          Чукöртчö отир. Петöны турандоз юиссез. ПÖВСИН вайö гöрд оропа шодз да перна. ШУДЗА да ДЗУЛЬ вайöны кучикись керöм да бура серöтöм юркытш, шондi сера паськыт йи.

ТУРАНДОЗ  ЮИСЬ.  Турандоз миян помассис.

                                      Дыр сёрнитiм, жугдiм юррез,

                                      Кинлö сетны дона пассэз –

                                      Гöрд оропа шодз да перна,

                                      Кин юравны татöн пондас.

МÖДIК.  И быдöнным öтмоз шуим;

                Кыдз велöтiсö бур еннэз…

КУИМÖТ.  Юралiсьöн öнi лоас

                     Одзза памыслöн пияныс…

НЁЛЬÖТ.  Сысся буржык мортыс абу –

                   Сiдз висьталiс турандоз!

ОТИР.  О-о-о! А-а-а!

              Сiдз, сiдз!

              Кин татöн мöдiкыс вермас?

ПЕРВÖЙ.  Этö пернасö да шодзсö –

                   Вежа пассэсö увтырлiсь

                   Сетö тэныт турандоз!

                   Тэ юрав, туйдöтлы сiдз жö,

                   Кыдз юралiс тэныт айыт.

                              ЧИКЫШ петкöтö Кудым-Ошöс одзасжык.

ЧИКЫШ  (Кудым-Ошлö). Öнi лоин тэ виль мортöн

                                          И, кыдз керсис важся кадö,

                                           Аслыт бöрйы тэ виль ним.

КУДЫМ-ОШ  (мамыслö). Кывзы, мам… Эд кöркö сетлiн

                                            Меным нимöс тэ. И öнi

                                             Кора тэнö, ассим мамöс:

                                            Адззы меным мöдкодь ним.

ОТИР.  Бура висьталiс Кудымыс. Сiдз и колö.

ПÖВСИН.  Миян отир пондiс чинны:

                    Кöда öшö, кöда кулö…

                    Кыным нывкаöс гусялiс

                    Тшыг кöин моз врагпöлöс!

                    Вына пам миянлö колö,

                    Сiйöн, зонö, шуа тэнö

                    Кыквыв нимöн  –  Кудым-Ош.

КАБЫР.  Öддьöн лöсялö! Тэ, Кудым, вына, дзик ош…

                 Кудым-Ош – эта памыс сьöртi.

ПÖВСИН  (Кудым-Ошлö). Тöда ме: тэ вына, повтöм,

                                            Да эд сiя, зонö, етша:

                                            Памлö колö мывкыд, мыла –

                                            Этö юрат видз прокод.

ЧИКЫШ.  Вайö зарниа юркытшсö –

                   Памлiсь медся ыджыт пассö!

                              Шудза сетö юркытш. Чикыш юркытшалö памсö.

                    Шондi сера йисö вайö –

                    Сыын  –  Шондi-енлöн вын.

           Дзуль сетö кушак, Чикыш йиöтö памсö, киськалö юрсö пöимöн, кöдö чепöльнас судзлалö патракись.

                   Ась жö шондi берегитас

                   Этö ыджыт мортсö пыр!

                   Ась лёк ваэз оз падмöтö,

                   Ась лёк биэз оз павкöтö,

                   Нюрись чуддэз оз ылöтö,

                   Ась пыд вöрись бур козиннэз

                   Сетас сылö Вöрпель ен!

ОТИР.  Ась, ась.

             Еннэсö ась оз вунöтлы!

ЧИКЫШ.  Эшö корамö Вакульöс:

                  Кудым-Ошыслö отсав!

ОТИР.  Отсав, отсав!

ЧИКЫШ.  Ойпель енöй! Тэ быдлаын

                   Кудым-Ошсö берегит!

ОТИР.  Берегит, Ойпель!

ЧИКЫШ.  Сувт жö, Кудым-Ош, веськöтчы,

                   Памскöй кокет вылö пыксьы,

                   Памскöй синнэзöн видзöтчы.

                   Памскöй мывкыдöн да вынöн

                   Горттö шуд ньылат иньдöт!

ОТИР.  Иньдöт. Велöт овны!

              Миянлö ай туйö лоан…

КУДЫМ-ОШ.  Отир! Миян бытшöм еннэс

                          Талун керисö, кыдз колö…

                          Тiйö менö юркытшалiт,

                          Шондi сера йи козьналiт –

                          Лои ме увтырлöн памöн…

                          Öнi кывзö, мый ме шуа:

                          Татöн абу бур оланыс,                  

                          Колö мунны татiсь, отир!

                          Колö кольны Сылпангорт!

ОТИР.  О-о-о!

АШАНЬ (икотаöн). Ай-яй-ви-и!

ЧИКЫШ.  Кольны горт, кытöн тэ чужин?

                  Мый тэ ыштан, Кудым-Ош?!

ОТИР.  Ог чапкö! Ог мунö!

КУДЫМ-ОШ.  Колям Сылпансö да мунам

                          Овны еннэс дын матöжык,

                          Ойпель син одзö поздiсям,

                          Изъюр мыс вылö сувтöтам

                          Да кытшöвтамö заплодöн  –

                          Керам аслыным виль кар!

          Отир шай-пай лоис, дзик неммис. Чикыш ветлöтö Кудым-Ош дынöт, лöгöн чушьялö да коккезнас чужьялö чуддэсö, кöдна бöбтöны памсö. Пöлiнясьöны пуовöй еннэс-идоллэс.

ЧИКЫШ.  Ась лёк мыжа сiйö мыжьяс,

                  Ась кымöр сiйö чарöтас,
                  Кöда лысьтас мунны сэтчин,

                  Вежа раснымöс нятьöсьтны,

                  Еннэзлiсь сэрпöсьтны му!

КУДЫМ-ОШ.  Отир, тiйö менö тшöктат

                           Берегитны мортлiсь шудсö,

                           Сiйöн веськыта висьтала:

                           Кинлö шудыс абу дона,

                           Кин бы сетö юрсö враглö,

                           Сiя татчö кольччас ась!

КАБЫР.  Тэныт, Кудым-Ош, веритам,

                Мунам сэтчин, кытчö – тэ.

          Кабыр да шодза-ньöла морттэс сувтöны Кудым-Ош гöгöр.

ЧИКЫШ.  Ойпель мыжьяс сiйö, кöда

                   Вежа му вылö лöсьöтчö!

                   Сiя век муош моз пондас

                   Быкöн му пытшкас кыскасьны,

                   Мича шондi не адззывны!

                   Сiдз висьталi ме – Чикыш!

                  Шодза-ньöла морттэс бöр-бöр керсьöны Кудым-Ош дынiсь.

КУДЫМ-ОШ  (шондiлö). Шондi-ен, велöт миянöс,

                         Лэдз тэ юррезаным мывкыд

                         Да мыччав, кытчö поздiсьны!

          Югмö Кува ю дорись Изъюр мыс, отирыс сувтöны пидзöс вылö.

                         Адззат Шондi-ен мыччалö,        

                         Кытчö татiсь колö мунны!

                          Огö мунö – умöль лоас:

                          Сылпанас быдöнным кулам,

                          Ловйöн оз кольччы некин!

                          Эдö на разь мыдзö тiйö

                          Кулöммес дынын герьясьны?

                          Эдö на разь мыдзö тiйö

                          Полiсь кöччез моз сайласьны?

                          Дзир Кува дорись керöсыс,

                          Вежа расыс, вежа муыс

      Пондас дорйыны миянöс

                          Враг чукöрсянь лун и ой!

          КАБЫР сувтö ордчöн КУДЫМ-ОШКÖТ, сы бöрö сувтöны шодза-ньöла морттэс – горт дорйиссес, ны бöрö – мукöдыс. ЧИКЫШ сувтö пидзöс вылас, лэбтö киэсö вылö да брякнитчöмöн усьö кыминь. КУДЫМ-ОШ да сылöн ЁРТТЭС  мунöны сцена сайö. Ны бöрсянь иньдöтчöны мöдiккез. Кольччöны ЧИКЫШ да УЧКИСЬ.

 

КУИМÖТ КАРТИНА

Сылпангорт. Пуовöй идол одзын пукалö ЧИКЫШ, юрсö öшöтöмöн.

Сы дынö локтö УЧКИСЬ.

ЧИКЫШ.  Мый Изъюрыс йылiсь кывсьö?

                   Карныс керсис али эз?

УЧКИСЬ.  Пемытсянь пемытöдз ёркйöны, йыла заплод керöны… Да вылынö

        эд, медбы враг некысянь эз вермы пырны. Да эшö…

ЧИКЫШ.  Тырмас! Меным сысянь курыт…

                   Вежа расö кар сувтöтны!

                  Сiя карыс, ёрдöм карыс

                  Лоас отирлö шойнаöн!

                  Кылан, кыдз уннялö тöлыс?

                  Сiя – еннэзлöн лöг шыыс,

                  Этö Ойпель сiдз лöгасьöм!

                  Сiя сiдз миянöс мыжьяс –

                  Ловйöн оз кольччы некин!

УЧКИСЬ.  Дак мый öнi керны? Висьтав ноко, Чикыш. Тэ эд быдöс тöдан. Тэ

                  кужан и тöвсö, и васö, и мусö кывзыны. Еннэскöт верман

        сёрнитны… Мый пондам керны?

ЧИКЫШ.  Бертны Сылпанö, важ гортö,

         Кытöн олiсö ай-мамным,

         А виль памсö, Кудым-Ошсö,

         Кöда öштöма ылöссö,

         Кöда юрö кульыс пырöм,

         Колö кок вывсис пöрöтны –

         Вот мый колö керны, Учкись!

УЧКИСЬ.  Мы-ый? Кудым-Ошсö пöрöтны? Сiя эд миян пам! Турандоз

         керлiмö, туран юимö!

ЧИКЫШ.  Еннэс тшöктöны сiдз керны!

                   Кöда сувтас нылö паныт,

                   Лоас ёрдöм…Сiя кулас –

                   Вот Чикышлöн бöрья кыв!

УЧКИСЬ.  А кин памнас лоас?

ЧИКЫШ.  Лоан тэ! Сiдз Ойпель тшöктö.

УЧКИСЬ.  Ме-е? Ог я ме вöтась?

ЧИКЫШ.  Еннэс мыжйисö миянöс,

                   Мыля керамö не ны моз.

                   Этасянь и врагыс вельмис –

                   Сотiс керкуэз, гусясис…

УЧКИСЬ.  Вöлi сэтшöмыс, вöлi – лöгöтлiм еннэсö.

ЧИКЫШ.  Кудым-Ошсö кульыс чувйö.

                   Бöбмис сiя, асныралö,

                   Гортсö еннэзлiсь дзескöтö.

                   Лоан, Учкись, ыджыт мортöн,

                   Отирсö вайöтан татчö –

                   Иньва дорö, Сылпангортö,

                   Сэтöн пондам важмоз овны.

УЧКИСЬ. Тэ шуан, ме лоа пам? О-ö-ё… А мыля бы и не лоны? Ме и ачым сы

        йылiсь артавлi, кöр турандозсö юим. (Чöлöм бöрын.) Ме пукся памас

       Чикыш! Сiдз и керам. Отирсö бöр татчö, Сылпанас, вайöтам…

       Висьтав, мый керны öнi.

ЧИКЫШ.  Керам сiдз, кыдз Ойпель шуас.

                   А кытчöдз, мый ме висьталi,

                   Оз ков сы йылiсь баитны,

                   Мед некин эз тöд… Некин!

УЧКИСЬ.  Понда чöвны, Чикыш, кыдз чери.

 

НЁЛЬÖТ КАРТИНА

ФОНОГРАММА:   Ыджыт юэз озö косьмö,

                            Олан вужжез озö орö…

                            Дыр я, чожа я, но быдмас,

                            Ойпель син одзö поздiсяс

                            Кудым-Ошлöн гажа карыс,

                            Кöда ыждiс пыр, паськалiс,

                            Лоис аскодь коми карöн –

                            Нимыс сылö –

                                                   Кудым кар.

                                             

                                                          ***

Виль карын. Увтыр сэтчö локтö овны. ШУДЗА, ДЗУЛЬ да мöдiк нывкаэз пыртöны корзинаэз, пуктöны нiйö Ойпель идол одзö. Горалöны пöляннэз, пиксаннэз, орсанпöввез. ТУЛЬГАН да мöдiк вöралiссез Ойпель одзö пуктöны вöрпорсьлiсь туша. Локтöны КУДЫМ-ОШ, ПÖВСИН, сылöн киас турандоз, АШАНЬ, сылöн киас отопка, КАБЫР вайöтö нылочкаöс да зоночкаöс, пырöны мöдiккез. ТУЛЬГАН, КАБЫР да эшö кык мужик йöктöны вöралiссезлiсь ритуальнöй танец. Эта бöрын кынымкö инька йöктöны тшак-ягöд öктiссезлiсь ритуальнöй танец. ШУДЗА да ДЗУЛЬ орсöны пöляннэзöн, кинкö  – орсанпöлöн, пиксаннэзöн – челядьыс, нiя – йöктöны.

            Йöктöны да орсны дугдöны, одзас петö ПÖВСИН, киськалö турандозсис ырöшсö  быд ладорö.

ПÖВСИН.  Пешлы, кар, ырöш миянлiсь,

                    Тöд увтырлiсь олан кöрсö.

АШАНЬ.  Дозирайт, Суседко, карсö,

                 Татчö ась лёк вын оз сидз! (Копрасьö отопканас нёльнан ладорö, пуктö отопкасö сцена бокö.)

ПÖВСИН.  Ыджыт, енöй, Шондi-енöй,

                    Пырт миянöс карö овны!  (Сетö турандозсö Кудым-Ошлö, кресталö киэсö морос вылас, видзöтö кымöрö.)

КУДЫМ-ОШ  (юö, сетö турандозсö КАБЫРЛÖ).

                         Турандоз, тэ шондi ньылат

                         Öнi мунан киись киö,

                          Ась оланным сiдз жö кывтас

                          Шондi ньылат. Ась вынсялö,

                          Ёнмö-быдмö карным миян,

                          Öктö вын, чукöртö гаж!

КАБЫР.  Враглöн шодззез да ньöвьёссэз

                 Медбы татчö эз сибавлö!

СТАРИК.  Ась жö карыс лоас гора

                  Челядьлö да томпöлöслö,

                  А пöрисьмöм, вынтöм мортлö

                  Лоас шонытöн да лöньöн.

          Турандоз мунö шондi ньылат. Быдыс босьтлö сiйö да лэбтыштлö вывлань, да висьтавлö: «Юышт мекöт, Енiньöй!» нето «Ысты караным, Енушко, бур олан!», «Тырдоз тэныт, миян кар!»

            Пондö орсны пöлян, мöдiк, сярöтö пöв, пиксышалö пиксан. Шовкöтöны киэз, топöтöны коккез, аркмö ритуальнöй танец  «Тупи-тап». КУДЫМ-ОШ мунö бокö, тöждiсьö.

КАБЫР. Бытшöм кар миян  –  Кудымкар!

                   Да и памным öддьöн бытшöм!.. (Мунö КУДЫМ-ОШ дынö.) Тэ,

      Кудым-Ош, мыля инö гажтöм? Мый мöдiн керны, быдöс керин.

      Видзöт, кытшöм кар Кува ю дорö сувтiс – гусьöн некин оз пыр.

      Мыйсянь тöждiсян? Кытшöм шог сьöлöмтö зэлöтö? Ой, отир! Ноко,

      сьылыштам – памсö гажöтам! Пондöт, Тульган!

ТУЛЬГАН  (сьылö).    Ок, и сьылi бы ме, да,

                                    Ок, и сьылi бы ме, да,

                                    Сьыланкылö абу. (2-ись).

                                  

                                    Ок, гöтраси бы ме, да,

                                    Ок, гöтраси бы ме, да,

                                    Гöтырпуö абу. (2-ись).

 

                                     Эн тöждiсь, Кудым-Ош, да

                                     Эн тöждiсь, Кудым-Ош, да,

                                     Сьыланкывсö адззам. (2-ись).

 

                                      Тэ гöтрась, Кудым-Ош, да,

                                      Тэ гöтрась, Кудым-Ош, да,

                                      Гöтырпусö адззам! (2-ись).

КАБЫР.  Эм миян кар, эм миян вына пам – Кудым-Ош, да памика абу.

                Эн тöждiсь, Кудым-Ош, сетам тэ сайö увтырсиным медбасöк  

                нывкасö!

          КУДЫМ-ОШ гöгöр пондöны йöктыны нывкаэз. Ны вылö памыс оз и видзöт, чöлö. Пöвсин дугдöтö йöктiссесö – кинас макайтö – иньдöтö. Нывкаэс сералöмöн мунöны. Ны бöрсянь мунöны и мöдiккес. Кольччöны КУДЫМ-ОШ, КАБЫР, ТУЛЬГАН и ПÖВСИН.

ТУЛЬГАН.  Кöч увтырын эм нывка – дзик акань. Сiя памыслöн нылыс.

КАБЫР.  Кöлö мунны Анюшкарö, сэтчин нывкаэс – ок-о-о! Дзоридзок

                кодьöсь! Ачым босьтi бы. Да гöтыра ни.

КУДЫМ-ОШ.  Гажтöм, гажтöм меным, ёрттэз!..

                           Карсö бурö жынгим-керим,

                           Шондi морос вылö лэбтiм,

                           Öнi ов бы да гажöтчы,

                           Но мылякö гажыс абу…

ТУЛЬГАН.  Кöч увтырын тэнат гажыт…

КАБЫР.  Анюшкарын гöтырпуэс…

КУДЫМ-ОШ.  Некытчö мийö ог мунö!

                          Уджыс тыр, а мийö лёбам.

                          Колö киэзöн вöрöтны.

                          Локтö ар – заптiсьны колö!

ПÖВСИН.  Ас йывсит, ме шуа, зонö,

                    Натьтö, оз жö ков вунöтны.

                    Кад ни, зонушко, гöтрасьны,

                    Медбы сэсся айöн лоны,

                    Меным – кагаöс гыччöтны –

                    Тэнчит зонтö – пам вежисьöс.

КАБЫР.  Кылан, Кудым-Ош, мый мамыт шуö? Каттьы сiйö пель саят!

                            КАБЫР да ТУЛЬГАН мунöны. Локтö ЧИКЫШ.

ЧИКЫШ.  Ме не овны локтi татчö –

                  Вежа расын лов веськöтны

                  Да каитчыны, юрбитны

                  Тiян лёк понда… Разь колiс

                  Керны карсö еннэс гортö?

                  Тэнö, Кудым-Ош, нёкыртас

                  Ыджыт мыжа, он кö кывзы

                  Тэ увтырнымлiсь важкыв.

КУДЫМ-ОШ.  Тэ бöра менö повзьöтлан?

                           Мый тэ карзан, кыдз и рака?

                           Но, да ась… Ме кывза тэнö,

                           Лёк тöдiсь… Висьтав важкывсö.

ЧИКЫШ.  Кывсис тай: гöтрасьны мöдан…

                   А важкылыс то мый шуö:

                   Гöтырпусö памыс адззас

                   Сизим ю сайö вуджавтöн,

                   Сизим крут керöс вожмавтöн…

                   Кыдзи керан этадз, сэки

                   Он ло мыжа…

КУДЫМ-ОШ.  А мыйöн жö

                           Сiдз ме еннэсö лöгöтi,

                           Мед кеймисьны йöз керöслö,

                           Тöдтöм юэзлö копрасьны?

ЧИКЫШ.  Сiдз важкылыс, мыся, тшöктö,

                   Кудым-Ош!.. Вежöртан, он?

КУДЫМ-ОШ.  И кытчö жö меным мунны,

                           Медбы мыжасянь мездiсьны?

ЧИКЫШ.  Сэтчин, кытöн шондi узьлö,

                   Лöз керöссэз, юэз сайö,

                   Кытöн олöны вогуллэз…

                   Юралiсьныс нылöн окся,

                   Сылöн ныв эм, дзик тай шондi,

                   Сiя – тэнат гöтырпуыт.

ПÖВСИН.  Тэ, Чикыш, он я бöбöтчы?

                    Кин висьталiс тэныт сiйö?

ЧИКЫШ.  Еннэзсянь ме этö кылi.

                   Еннэс менö оз бöбöтö.

                   Кудым-Ош, тэ кылан менö?

                   Колö кö судзöтны шудтö,

         Мун вогул ордö корасьны,

        Да тэрмась, эн каттьы кадсö:

        Шудыс дынö туйыс кузь!

КУДЫМ-ОШ.  Кыдзи еннэзлö сiдз колö,

                           Кыдзи мöднёж оз позь керны,

       Дак ме муна…Мыйлö лоны,

       Сiйö он орддьы некöр!

ПÖВСИН.  Зонö, зонö! Мый тэ кывзан

                     Лёк Чикышлiсь абутöмсö?

                     Кыла ме иньдöтö сiя

                     Тэнö кувны!

КУДЫМ-ОШ.  Öвсьы, мама!

                          Верма и не локны гортö,

                          Да сьöлöмö весь потö,

                          Сiя кыскö тöдтöм туйö,

                           И ме муна… Ашын вöрзям.

            КУДМ-ОШ мунö. Сы бöрсянь бобгöмöн мунö ЧИКЫШ.

ПÖВСИН  (киэсö кресталö морос вылас). Ойпель, дозирайт тэ зонöс –

                    Менчим гажöс, менчим шудöс!

                    Дорйы сiйö тэ вомидзсянь,

                    Лёк висянсянь, враг ньöвьёссянь,

                    Содты сылö вын да мыла!..

                    Босьт олансö менчим, Ойпель,

                    Босьт, а зонöс бöр вайöт!

 

ВИТÖТ КАРТИНА

КАБЫР, КУДЫМ-ОШ да ёрттэс петкöтöны пестеррез, шодззез да ньöвьёссез. Жагвыв чукöртчö отир, медбы кольлавны памсö туйö.

КАБЫР (сьылö). Ой-ё-о, ой-ё-о…

                              Туйыс кузь, керöса, юэза,

                              Вöрыс пемыт, нёштöм пуэза.

                              Мортлiсь вöрдсö нем оз видз. (2-ись.)

                              Ой-ё-о, ой-ё-о…

                              Сьöлöм лайкыта чепöссьыштлö,

Мича ныв дынö тэрмöтыштлö.

Нылыс мича, кыдз дзоридз. (2-ись.)

 Ой-ё-о, ой-ё-о…

                        Локтö КУДЫМ-ОШ, сувтö отир одзö.

КУДЫМ-ОШ.  Но, адззисьлытöдз, бур отир!

                          Кад тэрмöтö петны туйö.

                          Муна ме, кыдз тшöктö Ойпель,

                          Ойвыв муэзкöт тöдсасьны

                           Да вогуллэзкöт сёрнитны,

                           Шудöс кошшыны ме муна.

                           Ась и сьöкыт лоас туйö,

                           Но ме оксякöт пантася,

                           И, кыдз окся сетас нывсö,

                           Нылыс шуд миянлö ваяс,

                           Шогмас карын бур олан!

                           Но лöгöтi  кö ме енсö,

                           Да кытöнкö öшта юрöс –

                           Эд касьтывлö умöль кылöн!

ОТИР.  Эн баит сiдз! Берт!

              Адззы шуда гöтырпутö!

              Ась еныс осьтас бур туй!

              Берт чожажык!

         ПÖВСИН да АШАНЬ локтöны КУДЫМ-ОШ дынö. Пöвсинлöн киас кушак

           да  енпассэз (чудскöй бронзовöй скульптуркаэз). Ашаньлöн – турандоз.

ПÖВСИН  (сетö енпассэсö кыкнанныслö).

                    То – енпассэз, юр дорйиссез,

                     Ме кöрткылöн нiйö донтi,

                     А кöрткылыс  – вежа вын.

                     Пуктö нiйö сьöлöм бердö…

                       (КАБЫРСÖ йиöтö кушакöн.)

                    Эта йиыс – шондi паса

                    Да кöрткылöн жö вынсьöтöм.

                    Кыдзи пондас чуд сибавны,

                    Пукты одзас – чудыс падмас.

АШЫНЬ  (сетö турандозсö Кудым-Ошлö).

                 Но, пуксьыштö-ко да юö

                 Турандозсиным ырöшсö,

                 Босьтö гортлiсь, чужан мулiсь

                 Вынсö сьöраныт – кузь туйö.

        КУДЫМ-ОШ да КАБЫР юöны, сетöны юансö АШАНЬЛÖ.

                 Кöда кольччас турундозас,

                 Юат сэк, кöр гортö бертат.

                 Пондам лун и ой видзчисьны,

                 Ась отсалас бертны Ойпель!

ОТИР.  Пондам юрбитны тiян понда. Веськыт туй, волькыт туй!

ПÖВСИН.  Мунö енкöт, олö енкöт

                    Да куимöн гортö локтö.

           КУДЫМ-ОШ да КАБЫР мунöны. Отирыс кольлалöны нiйö.

 

КВАТЬÖТ  КАРТИНА

Пыд вöр. Пемыт рыт.

КАБЫР.  Шондiыс куимись ни водлiс узьны, куимись чеччылiс, а мийö

                сё мунам и мунам. Колö и миянлö шоччисьны.

КУДЫМ-ОШ.  Мыйкö нёштöм эстöн муыс –

                          Сё керöссэз да дзибьяин…

                          Кыла: эстöн бурыс оз ло.

                          Каям мыс вылас да сэтчин

                          И шоччисямö вöлись.

КАБЫР.  Тэ, Кудым-Ош, бура ни мыдзин, а керöс дорöдззас эшö вель  

                 ылын. Узям эстöн, ки-кок шоччöтам, а ашын асывнас иньдöтчам

                одзлань.

КУДЫМ-ОШ.  Но, дак мый? Ась лоас тэ моз:

                           Татöн ойсö и чулöтам.

КАБЫР.  Ольпасьöн небыт нитш лоас миян, а кодзула ойыс – шебрасöн.

                Отсав, Ойпель, бура шоччисьны, сайöвт миянöс лёк йöзсянь!..

      Тэ узь, Кудым-Ош, а сэсся менö вежан.

КУДЫМ-ОШ водö, онмöссьö. Уксö тупка, кретшкö утка, кинкö ружтö. КАБЫР пондö öмсö паськöтлыны, сунасьö, сэсся онмöссьö. Локтö УЧКИСЬ, видзöтö-керö да сайöвтчö. Недыр мыйись вайöтö бырöм-орöм паськöма СЬÖД МОРТТЭЗÖС. Нiя гусялöны узиссеслiсь шодззез да ньöввез, пондöны йöктыны-вежмасьны узиссес гöгöрын. КУДЫМ-ОШ да КАБЫР саймöны, СЬÖД МОРТТЭС кöрталöны нылiсь киэзнысö, асьнысö домалöны оча; чапкöны му вылö. СЬÖДДЭС  йöктöны, чирзöны-авзöны.

УЧКИСЬ.  Овсис оланыт, Кудым-ош. Ойпельыс бергöтчис тэлань бöрнас, и

                  тэ öнi чорзян эстöн, кырныш кыскалас синнэтö. И некин тэнö

                  касьтывны оз понды.

       Унньöвтö тöв, вирдыштö да гымыштö сiдз, что муыс зэгнитчö. СЬÖД

                     МОРТТЭС усьöны му вылас. Кылö ПÖВСИНЛÖН шы:

                              Ойпель, дозирайт тэ зонöс,

                              Содты сылö вын да мыла.

                              Босьт оланöс менчим, Ойпель,

                              Босьт, а зонöс бöр вайöт!

          КУДЫМ-ОШ орлалö кöртöтсö, КАБЫР кватитö шодззесö, öтсö чапкö  КУДЫМ-ОШЛÖ  и пондöны пессьыны СЬÖДДЭСКÖТ. Вирдалö, гымалö, СЬÖДДЭС полöмöн чепсасьöны, сэсся пышшöны. УЧКИСЬ сувтö пидзöс вылас.

УЧКИСЬ (Кудым-Ошлö).  Эн вий менö, Кудым-Ош! Менö Чикыш тшöктiс.

               Сiя тшöктiс менö… Эн вий… Пыр тэ дор лоа, тэ понда юрöс пукта…

               Кульыс пырис ме пытшкö…

КУДЫМ-ОШ.  Ог вöрзьöт ме тэнö, Учкись,

                           Мун, да сэсся эн пантасьлы!

                           Ов, кытчöдз новйöтас муыс…

                            УЧКИСЬ чеччö, перыта мунö.

КАБЫР.  Весь тэ сiйö лэдзин, Кудым-Ош. Сiя – морт вузалiсь. Тэнö бы сiя

                ловйöн эз лэдз.

КУДЫМ-ОШ. Мийö абу мортвийиссез,

                          Киэз ог пондö вирöсьтны.

                          Ась висьталас гортын, йöзын:

                          Памыс – морт, не вирьюись.

КАБЫР.  Ась лоас сiдз, вермасьны ог кутчы… Колö, натьтö, мунны эстiсь…

                Сё кырассэз да дзибьяин.

КУДЫМ-ОШ.  А-а, вöлись инö вежöртiн,

                           Кöр сьöлöмтö чуть эз бытшкö…

КАБЫР.  Вежöртi, сiйö, что кувны – не гор дорын шонтiсьны. Эгö кулö, дак

                пондам овны!

          Босьтöны ноппез, мунöны. КАБЫР сьылö.

                    Ой-ё-о, ой-ё-о,

                    Туйыс кузь, керöса, юэза,

                    Вöрыс пемыт, нёштöм пуэза. (2-ись.)

                    Ой-ё-о, ой-ё-о,

                    Мортлiсь вöрдсö нем оз видз.

                    Сьöлöм лайкыта чепöссьыштлö,

                    Мича ныв дынö тэрмöтыштлö.

.                   Ой-ё-о, ой-ё-о,

                    Нылыс мича, кыдз дзоридз. (2-ись.)

                    Ой-ё-о, ой-ё-о…

Чулалö дзибья вöр, керöсок, бöра мыччисьö дзибья вöр.

 

СИЗИМÖТ  КАРТИНА

Нюр дорын гажтöм, пемыт пельöсок. Пырöны КУДЫМ-ОШ да КАБЫР.

КАБЫР.  Мый эта лоö? Куимöтпырся этчö инмим. Важын ни пожума яг

                дорö колiс петны, а сiя абу. Кöр инö нюр дорсис мезмам? Не вöйны

                бы нятяс… Кылан, Кудым-Ош? Оз я Вöрисьыс кыскав?.. Вон кöс

                пу тыдалö, муна кайла сы вылö да видзöтча, ог я мыйкö казяв.

    КАБЫР мунö. Уксö тупка, кретшкö утка, кинкö сералö. КУДЫМ-ОШ гöгöр

                               вежмасьöны нёштöм вуджöррез. Кинкö горзö.

КУДЫМ-ОШ.  Ок, тэ-э!.. Отсав, енпас, мездiсьны куллессянь! (Кыскö писис оберегсö, нюжöтö кисö сiйöн öтлань, мöдлань, тэчö киэсö морос вылас перна мозöн). Шумыс лöньсьö, вуджöррес öшöны.

КАБЫРЛÖН  ШЫ.  Куды-ым! Тэ кытö-öн?!

КУДЫМ-ОШ.  Кабы-ыр! Ö-ö-öй! Лок татчö-ö!

          Нюр пыдöсас кылöны нёштöм шыэз. Локтö КАБЫР. Шыэс лöньсьöны.

КАБЫР.  Öдва адззи тэнö, Кудым-Ош! Öддьöн нёштöм эта дзибыс, лёк.

                 Тöнняся лёкжык. Неылö и мунi тэ дынсянь, а локны некыдз

                 ог инмы…Кинкö туйнымöс дзугö, гусялö.

 Сцена бокас кылö ваксьöм.

                  Эта – Чикышлöн уджыс, сё бы вийö миянöс. Чуддэсö да куллесö

                 миян туй вылö лэдзö… Но, ёрдöм гырк!..

          Сцена пыдöсын мыччисьöны вöровкаэз. Кабыр кыскö енпассö, бергалö сiйöн, тэчö киэсö морос вылас.

КАБЫР.  Дорйö миянöс, енпассэз, куллезсянь, содтö миянлö вын да мыла!

                                               Вöровкаэс öшöны.

КАБЫР.  Колö миянлö пышшыны! Эстöн – кульпоз! Но кöдöрö мунны?

                Гöгöр нёп да нюр.

КУДЫМ-ОШ  (видзöтчö).  Норовит, Кабыр, эн пизь. Миян эмöсь енпассэз.

КАБЫР.  Огö адззö туйсö, дак вöтясö миянöс нюрас.

                                    Кылö нёштöм голоса сералöм.

              Кылан, Кудым-Ош? Этö ваксьö Камай, татiсь вöрисьыс. Сiя и

              гусялiс туйнымöс!

                                            Кылö киксöм-сералöм.   

               Мöдöртам паськöмнымöс, Кудым-Ош.

                    Чöвтчöны, мöдöртöны паськöмнысö. Сералöны матынжык.

КУДЫМ-ОШ.  Öй, Камай, пöрись кокора!

                           Тöдам: этö тэ повзьöтчан!

                           Да эд мийö не полiссез!

                           Тэ, Камай, зэв мывкыд юра,

                           Но и мийö не бöбöлöсь!

                           Тэ, Камай, зэв ыджыт вына,

                           Но и ме эдö не вынтöм!

                          Пет вермасьны, эн сайлась!

               Вöрыс лöгöн увгö, ружтö, дзуртöны кöс пуэз.

КАБЫР (повзьö).  Мый тэ керан, Кудым-Ош?! Камайыс быдöннысö джагйö!

               А кыдз былись петас?

КУДЫМ-ОШ  (Камайлö).  Мый нö чöлан? Али повзин?

                                                Кудым-Ошыскöт кутчисьны?

          Лоис лöнь. Петö КАМАЙ. Öт кокас кузь нинкöм, мöд кокыс – кöмтöм. Öт пельпон вылас псь тор, быдöс летки-петки, мöдыс – куш. Кабыр повзьö, юрсö кутö киэзнас да уськöтчö му вылас.

КУДЫМ-ОШ.  Мыйлö туйнымöс тэ дзугин?

                           Сет öнi жö! Кыдз и он сет,

                           Нюрас пеллет ви сюйышта!

          Камай быднёж повзьöтлö: виксö, роксö, вежмасьö. Пам оз пов.        

КАМАЙ.  Новду, эн повзьы, Кудым-Ош?

КУДЫМ-ОШ.  Ог пов тэись ме, Камай.  

КАМАЙ.  Кыдз этö он?! Дак мыйлö нö ме сiдз мырси! Тьфу! Тэ кöть

                  нарошноись повзьышт!

КУДЫМ-ОШ.  Туй миянлö сет, Камай!

КАМАЙ.  Эг на эттшöм аснырсö адззыв. Шуан, повзьöтчыны кокнит? Юр

                 садьö бырис… А ме разь том? Ме ог и тöд, мымда ни ола. А сiя

       и орсöм могись оз повзьы! Кöть горзы эстöн!

КУДЫМ-ОШ.  Тэ эн бызды абутöмсö! Осьт, мыся, туйнымöс, кытчöдз

                           кымöрас тэнö эг шупкы!

КАМАЙ.  Эн дзирдав, Кудым-Ош.  Тэнат вын йылiсь ме важын ни тöда.

                  Кысь ни меным, пöрись кокоралö, тэкöт вермасьны?

                                   (Сцена сайын кылö гора ваксьöм).

КАМАЙ.  Ме осьта туйнытö, но сэк, кöр тэ, Кудым-Ош, висьталан

                  нетулика, да сiдз, медбы менö ылöтны вермин. Он куж, – швавья

                  пуэзöн пондат куйлыны!

КАБЫР.  Эн кутчы сыкöт, Кудым-Ош! Сiя сiсь пуö пöртас миянöс!

КАМАЙ (Кабырлö).  Сыть! (Кудым-Ошлö.) Мый нö чöлан, ыджыт вына морт?

КУДЫМ-ОШ.  Но, висьтала нетуликасö.

КАБЫР.  Садясь, Кудым-Ош!

КАМАЙ.  Ой, кытшöм бур! Ой, и бур! Важын ни вильсö нем эг кывлы,

                  а важжес, кöднö дяв пияннэс модьöны, пель садь ни бырöтiсö!

КУДЫМ-ОШ.  Но эн вунöт: кыдз шуим, сiдз и керам: кужа бöбöтны –

                          туйнымöс осьтан. И сэсся некöр он понды дзугны миянлiсь

                          вöралöм, вöрын öктiсьöм.

КАМАЙ.  А ог бöбась – лоат швавья пуэз да сiдз и сiсьмат. Но, висьтав

                 чожжык. Öк-ка-ка!

КАБЫР.  Эн кывзы сiйö, Кудым-Ош! Вияс миянöс!

КАМАЙ.  Сыть! (Пуксьö буржыка, лöсьöтчö кывзыны) Но, пондöт ни, некöр

                  видзчисьны, тэрмася пöртны тiянöс пуэзö. Öк-ка-ка! Киэзö лудöны

                  ни… Асьныт эд локтiт!

КУДЫМ-ОШ.  Кывзы инö… Пöжи ме ырöш, кринкаö потiс, ырöшыс киссис.

                          Ырöшсö вöрмöс сёйис да потiс.

КАМАЙ.  Бöбöтчан!

КУДЫМ-ОШ.  Кери ме кыдз уввезiсь асык; кынöмсö асыкалi, да уввесис

                          быдмис кыдз – йылыс кымöрас пыкöтасис.

КАМАЙ.  Ок, тэ!

КУДЫМ-ОШ.  Кайи ме кыдз кузяс кымöрас, видзöта: стчин гуттэзöс вежöны

                          вöрмöссэз вылö.

КАМАЙ.  Кыдз сiдз?

КУДЫМ-ОШ.  Куталi гуттэзöс, вежи нiйö вöрмöссэз вылö и мöдi

                         лэдзчöтны вöрмöссэсö му вылас, а кыдзыс абу – некытi 

                        лэдзчыны.

КАМАЙ.  ОК-ко-ко! Кыдз нö лэдзчыны мöдiн?

КУДЫМ-ОШ.  Начкылi подаöс, кучиккезсиныс гез кыйи, сы кузя пондi

                          лэдзчыны. А му бердöдззас гезыс эз судз.

КАМАЙ.  Ук-ка-ка-ка!

КУДЫМ-ОШ.  Тöждыштi невна, бöрöс гыж-гыж кери – ном шедiс. Кули

                          сiйö, гез кыйи.

КАМАЙ.  О-о! Ном кучикись  –  гез? Сiдз оз овлы!

КУДЫМ-ОШ.  Лэдзчи, лэдзчи – мусö эг судз.

КАМАЙ.  Ук-ка-ка!

                                     Вöрас сералöны жö.

                    (Вöриссеслö.) Дугдö ваксьыны! Эд гöрдлö!

                                     Серавны дугдöны.

                        (Кудым-Ошлö). Вашöт одзлань!

КУДЫМ-ОШ.  Му вылас мужик вöлi бипур керöма да лыс сотö, а саыс ме

                          бокöт кайö. Куталi сасö, гез кыйи, содтi.

КАМАЙ.  Ок, тэ! Ка-ка-ка!.. Ог верит!

КУДЫМ-ОШ.  Гезö бöра эз судз. Куни синнэзöс да чеччöвтi улö и нюрö

                          сибдi.

КАМАЙ.  Ак-ка-ка!

КУДЫМ-ОШ.  Локтiс тури, юр вылам поз керны пондiс.

КАМАЙ.  Юр вылат поз? Бöбöтан!

КУДЫМ-ОШ.  Кутi турисö коккезöттяс, ась, мыся, кыскас менö, а коккес

                          орисö, и туриыс лэбзис.

КАМАЙ.  Но и но!

КУДЫМ-ОШ.  Бокöттям вöлi мунö Камай, ме кутчиси сы коккез бердö и

                          петi нюрсис.

КАМАЙ.  Бöбöтчан! Эз вöв сэтшöмыс! Ме эг кыскав тэнö! Да ме… Да ме

                вöти бы тэнö. Кöр сiя вöлi, кöр? Кöр?.. Дак этö ме кыски тэнö? Ой...

КУДЫМ-Ош.  Ака! Раз лöгасин, сiдзкö, бöбасин! Ак, тэ, сэрпöсь гырк!

                         Ак, тэ, вöр чуд!

КАМАЙ.  А мыйлö ме тэнö нюрсис кыски! Мыся, ошкас менö, аттьö

                 висьталас, а тэ кешитчан пöрисьыс вылын!

КУДЫМ-ОШ.  Сет туйнымöс!

КАБЫР.  Сет, Камай! Кыдз баитчим, сiдз и керам.

КАМАЙ.  Ог сет! Ме лёк, ме вöр чуд! (Чöлöв керö.) Но, вот мый: кыдзи

                  тöдмалан менчим öтiк тöдмас, – сета.

КАБЫР. Ой, вияс сiя миянöс! Кинöскö разь сiя лэдзлiс ловйöн?

КАМАЙ.  Сыть! Нятьö тунга! (Кудым-Ошлö.). Ноко тöд: лунтыр узьö, рытнас

                  саймö да лэбтiсьö.

КУДЫМ-ОШ.  Сiя  – тэнат?

КАМАЙ.  И менам, и тэнат, и мöдiккезлöн.

КУДЫМ-ОШ.  Сiя  –  тöлiсь.

КАМАЙ.  (лöгасьö, топöтö коккезнас). Но, öтiкö тöдiн. Öнi мöдiк:  учöтик,

                  небытик, а ыджытöс дойдö…

КУДЫМ-ОШ.  Ном сёйö мортöс.

КАМАЙ.  Эн тöд! Сiя той менö сёйö! (Гыжьялö кок колассö).

 КУДЫМ-ОШ.  А менö – ном! (Вийö номöс.)           

КАМАЙ.  Эн тöд, мыся!  (Чеччöвтö.) Ме тэнö верми! Верми! И туйсö ог сет!

                 Швавья пуэзöн сiсьмат!  

КАБЫР.  Ö-ö, дак тэ шыблявны пондiн?

КАМАЙ.  А кин вöриссес коласiсь оз шыбляв ? Но, ась лоас тiян моз.

                  Ме талун рам. А öнi мöднёж вермасям.

КАБЫР  (Кудым-Ошлö). Сюрим, ульöн сёяс! Сысся вынажыкыс некин абу!

КАМАЙ.  Медодз ыксыны кутчам. Кин öддьöнжык горöтас, сiя и вермас.

КУДЫМ-ОШ.  Ыкöст инö.

КАМАЙ  (чатыртö юрсö, пöльтчö, ыкöстö). Кама-а-ай!

                    Зэгнитчö муыс, пуэс куснясьöны, кажöтöны.

КУДЫМ-ОШ.  Этö м-ы-й! Ме сiдз чирöста – пеллет тупкассясö, син

                           Бугыллет  вöрзясö!

КАМАЙ.  Ок, тэ-э! Чирöст инö! (Сувтö быкöн, сайöвтö синнэсö пасьторнас). Кабыр шутньöвтö Камайлö пеляс, Кудым-Ош вачкö Камай юр кузя шодзнас. Камай сувтö, зэгöтö юрнас, весöтö пеллесö, ниртö чуннезнас синнэсö.

КАМАЙ.  Тэ бöбöв тай, Кудым-Ош! Мыйлö сы бура чирзан?!

КУДЫМ-ОШ.  Ме верми тэнö, Камай. Сет туйнымöс!

КАМАЙ . Ог сет, ог! Кыдзи сета, дак мöдiк вöриссез серавны пондасö менö.

КУДЫМ-ОШ.  Ковсяс тэнö, Камай, кымöрас шупкыны.

КАМАЙ  (горзöм сорöн). Бöра луныс весь чулалiс, некинöс и повзьöтны эг

                 куж. Пöрисьми, тыдалö, ок-ко-ко!.. Оз ков менö кымöрас чапкыны.

                 Меным татöн бур… Босьтö туйнытö! (Бергалö местаас, мыйкö  бобгö.) Лэбö тöвчик. Пондöны сьывны кайез, сярöтö кыр, вöрсö югдöтö шондi.

КАБЫР.  То кытöн туйным. Адззи ме сiйö, Кудым-Ош, адззи!

КАМАЙ  (лöгöн). Сiя пö адззöма!.. Этö ме туйнытö сетi. Мунö, кытчö мöдiт.

                Ылöтiн тэ менö, Кудым-Ош, янöтiн. Сэсся дугда комиэслiсь

                туйнысö дзугны. Тiйö öддьöн дёкаöсь! (Юрнас зэгöтö). Муна иньö

                 дынö, ась кöть сiя жалейтас.

КУДЫМ-ОШ  (кыскö пестерсис гöснеч, сетö Камайлö). То чöскыттор тэныт. Ась

                         пияннэт öмнысö чöскöтасö. Да ась оз ыждалö миян вöрын.

КАМАЙ  (босьтö гöснечсö, вишкö нырнас). Ы-м-м! Ок, тэ-э! (Чикнялöмöн котöртö дзибьяинö.)

                     КУДЫМ-ОШ да КАБЫР банöвтöны паськöмнысö, мунöны.

КАБЫР (сьылö).   Ой-ё-о, ой-ё-о…

                             Туйыс кузь, керöса, юэза,

                             Вöрыс пемыт, нёштöм пуэза.

                             Мортлiсь вöрдсö нем оз видз! (2-ись.)

                             Ой-ё-о, ой-ё-о,

                             Сьöлöм лайкыта чепöссьыштлö,

                             Мича ныв дынö тэрмöтыштлö,

                             Нылыс мича, кыдз дзоридз (2-ись).

 

КЫКЬЯМЫСÖТ КАРТИНА

КУДЫМ-ОШ да КАБЫР мунöны рассэз бокöт, керöссэз дорöт, локтöны ыджыт ю дорö.

КАБЫР. Эта юыс медбöрья. Вуджам сiйö и лоам вогуллэз му вылын. Сьöд

                морттэзлö ог сетчö, Камайöс тэ кужин ылöтны, сэсся повны

                некинлiсь, локтам окся ордö, корасям дзоридз кодь мича нывсö да

                гортö ыджыт козинöн бертам. Гöтрасян, роднитчан оксякöт, и бура

                да бытшöма Кудымкарас пондам овны.

КУДЫМ-ОШ.  Ог на тöд, Кабыр, мый петас,

                           Ог тöд, кыдз панталас окся…

                           Кыла ме: Чикыш бöбöтiс.

                           Мыйлö эта сылö колiс,

                           нöдз ме эг на вежöрт.

КАБЫР.  Ноко ольпась лöсьöтам да ойям эстöн. Асылыс рытысся артажык,

                сiя и туйдöтас… Гажа пельöсок эстöн: ю гыасьö, руыс сöстöм.

                Бура шоччисям!

                                        Водöны узьны.

                Асывнас коккез асьныс котöртöны. Шоччись, Кудым-Ош, нем

                понда эн тöжды… Нальккес пытшкöт мунiм ни. Эта лöньын да

                гажын ловнымöс шоччöтам.

КУДЫМ-ОШ.  А  сьöлöмö мыйкö пессьö:

                          Эта лöньыс и полöтö.

КАБЫР.  Вод да узь, и сьöлöмыт лöньсяс. Öддьöн мыдзин, вот и пессьö

                 сьöлöмыт.

КУДЫМ-ОШ.  Сiдз и керам: водам узьны.

                          Былись, натьтö, кыдз тэ шуан,

                          Юлöн шыыс и онмöсьтас,

                          Ровно зыбкаын дюттьöтас.

Водöны, ланьтöны. Горалö нора музыка. Ю дор вöрокись петöны мича паськöма нывкаэз-вöровкаэз. Одзас  –  шуч тыдалан платьеа, чаркиа, кузь чикися вöровка. Мöддэслöн юрсиныс кыйтöм, асьныс йöрнöс-дубасаöсь. Котiаöсь. Вöровкаэс басöка йöктöны, öвтышалöны-орсöны киэзнаныс, сибöтчöны узиссес дынö. Нiя чеччöны, вöровкаэс керöны куим кытш, орсöны, киэзнаныс малалöны мороссэз, каджжез, коккез  – ошшасьöны аснаныс. Платьеа вöровкаыс ветлö кытшись кытшö, корö киэзнас КУДЫМ-ОШÖС. Сiя думайтö, что сы одзын оксялöн нылыс, и кыскö пестерсис козин, лöсьöтчö сетны сiйö вöровкалö. КАБЫР мöдö мездыны КУДЫМ-ОШСÖ, но сiйö зэв кытшöвтöны  вöровкаэз, а КУДЫМ-ОШ эта коста нач öштiс морт вежöрсö. Вöровкаэс нуöтöнны КУДЫМ-ОШСÖ вöрланяс. КАБЫР казялö, мый артмö, и пöрччалö кушаксö да чапкö платьеа вöровкаыс одзö.

КАБЫР  (горöн). Панöвт, шондi пас, Кудым-Ошсö, эн лэдз сiйö пыртны

                вöровкаэс позö!

                              КУДЫМ-ОШ садясьö, вöровкаэс пышшöны.

КУДЫМ-ОШ  (лапкöтö Кабырöс). Аттьö тэныт, дона ёртö,

                                                        Кыскин менö чуддэс налькись!

                                                        Кöбы – эн, кинö бы пöртчи?

КАБЫР  (босьтö кушаксö). Не ме кыски нальксис, а мамытлöн шондi паса

                 йиыс. Нем абу вынажык, кыдз мамытлöн енакыв да енпас!

КУДЫМ-ОШ.  Но, дак мый? То асыв югдö,

                          Колö кыдзкö вуджны юсö.

                          Сэтчин шудным… Нето… Нето…

КАБЫР.  Некытшöм «нето»! Быдöс умöльыс бöраным ни! (Сьылö).

                Ой-ё-о, ой-ё-о…

                Туйыс кузь, керöса, юэза,

                 Вöрыс пемыт, нёштöм пуэза.

                 Мортлiсь вöрдсö нем оз видз. (2-ись.)

                 Ой-ё-о, ой-ё-о…

                 Сьöлöм лайкыта чепöссьыштлö,

                 Мича ныв дынö тэрмöтыштлö.

                 Нылыс мича, кыдз дзоридз. (2-ись.)

 

ÖКМЫСÖТ КАРТИНА

КУДЫМ-ОШ да КАБЫР вуджöны ю да кайöны берег вылö. Нiйö панталö Анюшкарись Оннян пам аслас отиркöт. КУДЫМ-ОШ да КАБЫР повзьыштöны: не враг чукöр я?

ОННЯН.  Локтö, локтö, дона гöссез!

                  Кудым-Ош, ме тэнö эстöн

                  Мöдiк лун ни эд видзчися.

КУДЫМ-ОШ.  Не Оннян я Анюшкарись

                           Менö локтöма пантавны?

ОННЯН.  Сiдз и эм: ме Анюшкарись

                  Оннян пам. Ме айтö тöдлi.

                  Вöлi сiя бытшöм морт!

КУДЫМ-ОШ.  Меным гажа этö кывны…

ОННЯН.  Но не сы понда ме локтi,

                 Медбы ошкыны кинöскö,

                 Локтi ме висьтавны тэныт,

       Мед эн мун вогуллэс ордö –

       Верман кольны сэтчин юртö!

КУДЫМ-ОШ.  Кин бöра бы дзебö менö?

                          Мый, Оннян, висьтавны мöдан?

ОННЯН.  Тэнö иньдöмась не шудла,

                  А лёк отир пурттэз увтö…

                  Сабри баб, тöдiсьным миян,

                  Этö кылöма важын ни!

                  Тэ эн мун вогуллэс ордö,

                   Кошшы шудтö Анюшкарись.

                   Лок миянö и адззылан,

                   Мымда мича ныввес карас!

                   Ачыт бöрйы, кöдö колö.

ОННЯН вачкыштö оча ки, локтö нывка чукöр, пондö сьывны-йöктыны.

          СЬЫЛАНКЫВ:  Быдмö расын, вöр коласын,

                                       Ема уввеза понуль, да, понуль,

                                       Олö карын, Анюшкарын

                                       Мича нывка-горадзуль, горадзуль.

                                             И-ик, у-ук,

                                              Мича нывка-горадзуль. (2-ись).

                                       Удав зонöй, чужмöр-зонöй,

                                       Тэ понульсö эн вöрöт, эн вöрöт,

                                       Мун тэ карö, Анюшкарö,

                                       Нывлiсь сьöлöмсö вöрзьöт, да, вöрзьöт.

                                             И-ик, у-ук,

                                             Нывлiсь сьöлöмсö вöрзьöт. (2-ись.)

                                       Ема улыс, понуль улыс

                                       Лоас öткодь рöма пыр, рöма пыр,

                                       Мича нывлö-горадзульлö

                                       И кельдöтны абу дыр.

                                             И-ик, у-ук,

                                             И кельдöтны абу дыр. (2-ись.)

                              Нывкаэс дугдöны йöктыны-сьывны, мунöны.

ОННЯН  (Кудым-Ошлö). Кысь мичажыксö тэ адззан?

                                         Тöда: некытшöм увтырын

                                          Абу сэтшöмыс… Но, бöрйы,

                                          Ло родняöн, Кудым-Ош!

КУДЫМ-ОШ.  Быд увтырлöн туйыс  –  аслас,

                          И быд мортлöн  –  сiдз жö аслас.

                          Сiйö Ен миянлö сетö.

                          Менам туйö  –  окся дынö.

                          Эстöн оз позь вежны нем.

ОННЯН.  А кыдз юртö сэтчин колян?

                 Эн чапкась бы, зонка, юрнат!

КУДЫМ-ОШ.  Кöда отир понда тöждö,

                          Юрыс понда оз тöждiсь…

                          Но, Кабыр, шоччисим, тырмас,

                          Öнi   –  одзлань! А Оннянлö,

                          Бур сьöлöмлö, – ыджыт аттьö! (Кресталö киэсö одзас). Локтö бедя старуха САБРИ, ыджыт тöдiсь. Оннян вешшö бокö.

САБРИ.  Ме мöдöдз олан ни ола:

                Босьтлiс татiсь менö Ойпель

                Да вились иньдöтiс овны…

                И, мый керсьö муыс вылын,

                Бура тöда ме быдöс.

ОННЯН.  Кывзы, Кудым-Ош, бытшöмик…

САБРИ.  Тöд, Кудым, Чикышыс тэнö

                Мöдö кидтыны олансис:

                Визыв ю саяс, пыд вöрас,

                Тэнö вöджжöны лёк морттэз,

                Мед шодзавны пым сьöлöмтö…

                (Оннянлö.) Сет Оннян, тэ Ваясисö,

                Ась мöдiклаöт нуöтас,

                Вирöсь шодза йöзсö орддяс.

ОННЯН.  Ваясиыс мекöт локтiс,

                 Ме быдöс сылö висьталi.

          Локтö не коми паськöма том морт  –  ВАЯСИ.

                 Ваяси  –  вогул увтырись,

                 Тöдö комиöн и ны моз,

                  И быд туйсö вöрсис тöдö.

САБРИ  (Ваясилö). Паськыт нюр пырйöт нуöтан,

              Ыджыт тыыс дорöт. Сысянь

              Эм туёк вогуллэс ордö.

              (Кудым-Öшлö). Тэ, Кудым, тöбав юрвемат:

              Кöр пантасян Окся нывкöт,

              Пондас син одзат пöртмасьны,

               И казялан сэк не сiйö,

               Мый бы мöдiн… Тэ не синнат,

               Тэ сьöлöмнат сэк видзöтчы –

                Сiя тэнö оз бöбöт.

                Эта йылiсь эн вунöтчы!

                Тöда ме, кык векся Сабри:

                Мортсö адззöны не синöн,

                Мортсö кылöны сьöлöмöн!

                Кыдзи кылан тэ сьöлöмнат,

                Окся нылыслiсь сьöлöмсö,

                Сэк казялан сылiсь мичсö…

                Кывзы пыр сьöлöмтö, пыр!

КУДЫМ-ОШ.  Аттьö тэныт, пöрись Сабри!

                           Мый висьталiн, юрам тэчи.

                           Кыдз висьталiн, сiдз и кера.

                    КУДЫМ-ОШ, КАБЫР да ВАЯСИ мунöны.

 

ДАСÖТ КАРТИНА

Вöрын кушинок. Локтöны ВАЯСИ, КУДЫМ-ОШ  да КАБЫР.

ВАЯСИ  (вишкö нырнас русö). Эстöн руыс мöдкодь ни. Эта  –  вогуллöн му.

                Матын оксялöн кар. Кывзам, мый шуас вогул му. (Водö, жмитчö

                пельнас му бердö, недыр мыйись чеччö)  Ой-вой, шы абу! Эн мун,

                Кудым-Ош, вогул ордö, мун Оннян ордö. Ыджыт лöнь – умöль

                Лöнь.

КУДЫМ-ОШ.  Ваяси, тэ тöд вот этö:

                           Кудым-Ош, кöр петас туйö,

                           Сэсся оз керсьывлы бöр!

                           Тэ мыччав миянлö туйсö,

                           Ачыт полан кö, дак кольччы.

ВАЯСИ.  Ваяси оз пов! Ваяси ёрттэсö оз чапкы, мунас! Мый Кудым-Ошлö,

      сiя и Ваясилö!

КАБЫР.  Тэ бур морт, Ваяси. Адзза ме: тэ – не полiсь. Да и мыйись повны

                 сэсся? Сьöд морттэзöс сырйим, Камайöс босьтiм, вöровкаэзлö эг

                 сетчö. Миянкöт, Ваяси, он öш! (Сьылö.):

                                Ой-ё-о, ой-ё-о,

                              Туйыс кузь, да локтö пом сылö,

                              А пыд вöрсис мийö ог полö…

                              Ой-ё-о, ой-ё-о…

ВАЯСИ.  Чöв, Кабыр! Вогул локтö!

          Вöрсис горöтлöмöн петöны вогуллэз, уськöтчöны КУДЫМ-ОШ да сы ёрттэз вылö, но мунiссес панталöны вогуллэсö повтöг и дорйисьöны шодззезöн. Вогуллэс пышшöны.

ВАЯСИ.  Ок-ок! Вогул повзьöтö бы миянöс. Ваяси тöдö: вогулсянь берсясö

                видзчись!

Куимнанныс локтöны вогульскöй кар дынö. Заплодiсь йыла майöггез вылын öшалöны поннэзлöн да морттэзлöн юр лыэз. Ны увдöрын  тыдалöны лöг чужöма пуовöй идоллэз. Карö пырны ыбöс игана.

КУДЫМ-ОШ.  Кывзы менö, ыджыт окся!

                          Мийö  –  чуд увтырись отир,

                          Кöда олö тасянь ылын.

                          Менам нимö  –  Кудым-Ош.

                          Бур юöррез тэныт ваям,

                          Тшöкты осьтны ён ыбöстö!

Осьтсьö паськыт ыбöс, петöны ВОИННЭЗ, кытшöвтöны локтiссесö. Петö ШАМАН, недырик орсö да йöктö локтiссес гöгöрöт да пырö бöр. Ыбöсас мыччисьö ОКСЯ.

ОКСЯ  (локтiссеслö). Ханха нан?

ВАЯСИ  (Кудым-Ошлö). Киннэз пö тiйö?

КУДЫМ-ОШ.  Висьтав: мийö – коми отир.

ВАЯСИ   (Оксялö). Ман коми мос.

ОКСЯ.  О, коми айка!

ВАЯСИ  (Кудым-Ошлö). О, коми мужик пö!

КУДЫМ-ОШ  (Оксялö). Тэ кин сэтшöмыс?

ВАЯСИ  (Оксялö). Нан ханха тамлö?

ОКСЯ.  Ам вогул си окся.

ВАЯСИ  (Кудым-Ошлö). Ме пö вогул увтырись окся.

ОКСЯ.  Ме – вогул увтырлöн окся.

             Дзор шаман тöдмалiс тэнö,

             Тэ пö былись Кудым-Ош,

              И бур могöн пö тэ локтiн.

    Адзза: Торум, миян енным,

    Тэнö ме одзö вайöтiс.

    Дак висьтав нö ассит могтö...

КУДЫМ-ОШ.  Кывсис меным: эм пö окся,

                          Сiя оксялöн пö ныв эм,

                          Да дзоридз кодь сiя мича…

ОКСЯ  (лöгасьö, киэзнас öвтö, коккезнас топöтö).

              Кин висьталiс этö тэныт?

              Абу, абу менам нылö!

              Лёк шайтан тэнö вайöтöм,

              А не Торум! Мун, тарöвтчы,

              Кысянь локтiн, Кудым-Ош!

КУДЫМ-ОШ.  Локтi нывтö ме корасьны,

                          Мича нывтö, ыджыт окся.

                          А раз инми локны татчöдз,

                          Дак отсалiс тiян Торум,

                          А туйдöтiс миян Ойпель.

ОКСЯ.  Тэ видзöт майöггес вылö:

              Сэтöн тöвзьöны юр лыэз

              Нылöн, кин корасьны вовлiс.

              Тэ вежöртiн? Мун, тарöвтчы

               Да вунöтчы туйсö талань,

               Кыдзи юртö он бы öшты!

КУДЫМ-ОШ.  Ме корасьны татчö локтi

                          И куш киöн татiсь ог мун:

                          Тэ Костöсö меным сетан,

                          Сiя  –  менам олан шуд!

ОКСЯ.  Кывзы менö… Менчим нылöс

              Лёк шайтан кöркö тшыкöтiс –

               Пöртiс сiйö нёштöм кульö…

               Сiя одзза кодьöн лоас

               Сэк, кöр сувтас нылö одзö

               Сылöн повтöм сьöлöмшöрыс…

               Но эз на вöв сэтшöм мортыс,

               Да и тэ эд повзян сылiсь!

          ОКСЯ мунö бокö, öзтö трубка, шытöг куритö. Стража мунö. Кудым-Ош кылö Сабри тöдiсьлiсь шы:

     «Мортсö адззöны не синöн,

                                Мортсö кылöны сьöлöмöн…»

ОКСЯ.  Сьöд кырныш то вöджжö тэнö,

              Сiя кылö бур сёянсö…

              Но тэ ачыт сылö сетчан

               (Горöтö кар пытшкас.)

                 Öй, петкöтö нылöс татчö!

Латтез вылын стража петкöтö нёштöм чужöма существоöс. ВАЯСИ да КАБЫР сiдз повзöны, что невна кок йылiсь оз усьö, и сайöвтöны киэзнанаыс чужöммезнысö. КУДЫМ-ОШ адззö мыйкö то кукань кодьö, то мича нывкаöс, кöда сылань нюжöтöм киэзнас корö:

                 ФОНОГРАММА:   Тэ эн повзьы, бöр эн керсьы:

                                           Ме не сiя, кöдö адззан.

                                           Пондан кö радейтны менö,

                                           Пöртча нывкаö бöра…

                И кылö САБРИ тöдiсьлiсь шы: «Кывзы пыр сьöлöмтö, пыр!..»

КУДЫМ-ОШ.  Ме, Костö, радейта тэнö:

                           Гöтырпуöн меным ло!

КУДЫМ-ОШ жагвыв сибöтчö КОСТÖ дынö. Вирдыштö, гымыштö, тöвчик  лэбтiсьö, кыло сералöм. Латтес вылiсь чеччö мича нывка. КУДЫМ-ОШ кутö сiйö киэзöттяс, нёджжалö, сэсся пондöны бергавны йöктöмöн. Горалö фонограмма.

                    Кудым-Ошлö паныт сувтiс

                    Горадзуль кодь мича нывка,

                    А чужöмыс – мича асыв,

Синнэс – Парма шöрись тыэз,

Лöнь шынньöлыс – би югöр!

Окся паймис, ровно кынмис,

 Кöр Костö шынньöвтiс сылö:

 Мичыс синнэсö гусялiс.

                    ***

Ыджыт гажсянь ОКСЯ пондö йöктыны.

                                         ***

                    Гажа пир пöрйöтас окся

                    Да иньдöтас нывсö туйö,

                    Уна пыжжезтыр козиннэз

                    Аслас отиркöт иньдöтас…

                    Гортö бертны – туйыс дженыт.

Пам Костöкöт локтас карö.

Турандозöн, ыджыт гажöн

Паныт нылö отир петас.

 

ДАСÖТIКÖТ КАРТИНА

Кудымкар. Ыбöсöт карö пырöны КУДЫМ-ОШ, КОСТÖ, КАБЫР, ВАЯСИ. Ны кок  увтö ШУДЗА ольсалö джодж дöра. ДЗУЛЬ быдöннысö пыркöтö понуль улокöн – весöтö сэрпись. АШАНЬ киськалö локтiссесö пöимöн, кöдö кыскалö патракись. ПÖВСИН сулалö кресталöм киэзöн.  Локтiссес крестöн тэчöны киэзнысö морос вылö, сулыштöны Ойпель одзын.

КУДЫМ-ОШ.  Ме ветлöтi дзибья вöрöт,

                          Вуджи юэз да керöссэз –

                          Сiдз олан менö новйöтiс,

                          И ме адззи аслым шудöс –

                          Гöтырпуöс, сьöлöмшöрöс:

                          Сiйö шуöны Костö!

Сцена шöрын оксялöн отир тэчöны козиннэз. КУДЫМ-ОШ да КОСТÖ гöгöртöны козиннэсö, сувтöны ПÖВСИН одзö. Пöвсин малалö Костöлiсь паськöмсö, сэсся кресталö морос вылас киэсö, сэсся зоныс пельпон вылö пуктö кушак, а Костö юр вылö  –  мича серреза бановöй юркытш.

ПÖВСИН.  Олö гажын, олö шудын,

                    Отамöднытö радейтö,

                    Коми отир понда тöждö!

КУДЫМ-ОШ.  Кытчöдз вартсьö лов-сьöлöмö,

                          Гортöс пыр понда зорöтны,

                          Бур оланлiсь от ыждöтны,

                          И Кудымкар вексö пондас

                          Овны уджöн, гажöн, шудöн!

Орсöны пöляннэз, орсанпöввез, пиксаннэз. АШАНЬ сетö ПÖВСИНЛÖ турандоз, ПÖВСИН сетö КУДЫМ-ОШЛÖ. 

АШАНЬ. Ырöшыс турандозас сизим лун пизис, сё тiянöс видзчисис. А мийö

                 сiдз жö пизим-видзчисим. Сэтiсь джынсö юитö мунтöдззаныт, мöд

                 джынсö öнi юö. Öтлаасисö джыннэс и сэсся оз янсöтчö.

                 КУДЫМ-Ош юö, сетö КОСТÖЛÖ. КОСТÖ нюкайтö и оз ю.

АШАНЬ.  Ö-ö, сiдзи, кага, оз туй! Пырин миян увтырö, дак и ырöшнымöс

                  велав юны.

ОТИР.  Велав, велав!

                              КОСТÖ юö, сетö турандозсö КАБЫРЛÖ.

КАБЫР.  Аттьö тэныт, турандозöй,

                Что видзчисин сы дырна!

          КАБЫР юö, сетö дозсö ВАЯСИЛÖ да пондö сьывны.

Мужик мортлö öддьöн долыт,

Кöр оз вись не юр, не пинь.

ВАЯСИ.  А эшö долытжык овлö,

       Эм кö сыкöт ордчöн инь.

ХОР.       А эшö долытжык овлö,

                Эм кö сыкöт ордчöн инь.

ИНЬКА.  Кинкö шуö иньсö джынöн,

                Кинкö шуö – сьöлöмшöр.

                Инька лолын – гортлöн выныс,

                Радейтöмлöн би югöр.

ХОР.       Инька лолын  –  гортлöн выныс,

                Радейтöмлöн би югöр.

ИНЬКА.  Не прокод югьялö шондi,

                 Овлö зэра-лыма кад.

                   Иньыт ордчöн, тэныт шоныт,

                   И оланын арт и лад.

ХОР.          Иньыт ордчöн – тэныт шоныт,

                   И оланын арт и лад.

                    Пондö йöктыны

КОСТÖ. Отирыс ошкö сiйö: «Видзöт, мый керö!» «А кужö эд!».

КОСТÖКÖТ йöктö КУДЫМ-ОШ. ОТИР гажöтчö, сералö. Мукöдыс йöктöны жö, ны коласын зоночка да нылочка.

          ФОНОГРАММА. Сьланкылыс борддэз вылын

                                          Локтö лэбзямö важ кадö,

                                          Кывзам сылiсь олан горсö,

                                          Важся веккезлiсь висьтассэз,

                                          Тöдам, кыдз олан пондöтчис,

                                          Миян му вылын пыд кадö,

                                          Кыдз Кува дорись увтырлöн

                                          Шогмис

                                                             ыджыт шуда

                                                                                    кар!

 

ЗАНАВЕС.