Новоселье птичек

Автор:
Фатима Апсова
Перевод:
Фатима Апсова

АцIисква ртыдзталхьа

 

ДзынкIьасахахьан. Аквасса хьшвашва ашIамсуата йгIаквун. ХIвынчIвын. АцIла къвадама къьатIамазква йрыквчIваз ацIис гIвабджьачкIвынква ахьта йащуан. «Ауат ахьта тшъачвыкъарчIвахуаш гIвара гьрымамзапI» — хIва дазхъвыцтI апещ пха ахъышвла йгIакIылпшуаз ПIатIахвыц. Дада зны йгIайайхIвыз ажваква йгвы йгIанагхтI: «Агъныла йгIанхауа ацIисква швырцхърагIара атахъыпI» — хIва.

Ужвы ПIатIахвыц йгьизымчхIахуазтI дада абораква йрыцкьата апещ дгIашылхнадзкIьа.

— Дада, дада, йубума ацIисхвыцква ахьта йшащуа? Ауат гIвара рзыхIчпара атахъыпI. Уаргьи йухIватI хIырцхърагIара шатахъу… — ПIатIахвыц йгIашылхгIвацаз дада дищыхIалтI.

— ЙауыпI, йауыпI, зны схани гъвтшыткIи гIасрау, — йхIватI дада.

Ауат агIвыджьгьи дада йъамапсымаква ъагIвназ абора йнашылын, йацацхърагIумца агъвтшытква, ачIвымыгъква, акIвагъа, ахан гIарахвын цIисгIвара рчпауа йалагатI.  Дада рахIа йбаргвыз — ацIисгIвара ахъвква гIайрыхIазыртI, ПIатIахвыц ацIисква зквчалушыз айшва йрыхIазыртI. Аква ангIаквауа ацIисква аква йамырбгIауа йчара ахъазла жьора тыбгIакIгьи рчпатI.

Чвымла хIагIакI ацIла йкIыддыргылын, йхIазырхаз ацIисгIварагьи, ачартагьи, ажьорагьи дада ПIатIахвыц дицхърагIумца йхъайгылын йкIыдцIлайыркIылтI. АцIисква йырфушыз хъвдзы, гвадз, чIахъва хъваша, кIартIофжвы ачкIвынхвыц йгIайрыгIвын дада ацIисгIвара йкIныхIаз айшва къьакъьа йыквицIатI.

Даргьи апещ пха йгашылхын ацIисква йырчпушыз йазпшуа ахъышв йкIылачIватI. АцIисхвыцква бзидздзара агIвара йазыгIапссгIарныс гвы  гьырзымчпатI. ЙхъарачвамкIва гвыпта тшазыркIкIын йалацIыргIауа, йалагъвычIгъвычIуа агIварала йгIапшуан. УадыргIвана рыцIа йцIараз, рыцIа йхахваз ацIис гвытшпшкIвокIвачкIвын гIарылпссгIан агIвара йаргваныз акъвадама йыквчIватI. ЙнапшыгIапштI. Аргванква шварагIваракIгьи шаъамыз анаба, айшва йазыпссгIатI. АцIисчкIвын афачIвква йшрылтхаджьгIуз збаз анахьанат апсссгIачIвхвыцква зымгIвагьи гIапссгIатI, ауатгьи айшва тшнадзхъадрышвтI. АцIисква бжьыкI рхъыцIуанта! Адзын ква хьшвашва цIхъва амахымкIва йгIаквун. Ауаса ацIисхвыцква ауи хабаргьи йрымбауата йчун, йалацIыруан, йкьахвуан…

Дада дпшвырхъыччауа ПIатIахвыц йыжвгIвахъа дацкIласын йхIватI:

— Йубума, ПIатIа, ауат тыдзталхьа рчпитI. Уари сари йырзыхIчпаз атыдз шIыц йталхитI!

Новоселье птичек 

 

Была поздняя осень. Мелкий холодный дождь лил не переставая. На улице было грязно и неуютно. На голых ветках сидели, прижавшись друг к другу, мокрые птички. «Им холодно. У них нет домика», — подумал маленький Пата, сидя в теплой комнате у окна. Он вспомнил слова дедушки: «Птичкам, которые остаются зимовать в родных краях, надо помогать пережить холода».

Маленький Пата стал с нетерпением ждать, пока дедушка управится по хозяйству и зайдет в дом. Стоило дедушке появиться на пороге, как мальчик тут же пристал к нему:

— Дада!* Дада! Смотри, птички мерзнут на ветках! Надо построить им домик. Ты же сам говорил, что им надо помогать!
— Хорошо, хорошо, — согласился дедушка. — Сейчас найду доски, достану инструмент, и мы с тобой построим домик.

Пата оделся потеплее, и после того как дедушка позавтракал, они вдвоем взяли в сарае все необходимое и принялись за дело. Сложную работу дедушка взял на себя, а Пата ему помогал сделать что попроще. В конце концов получилась добротная крытая кормушка, которую они повесили на дереве. Пата сбегал за пшеном, набрал еще крошек хлеба и картошки. Все это насыпали птичкам.

Потом дедушка и внук зашли в дом и сели у окна ждать, что же будет дальше.

Птички собрались недалеко от приготовленного для них домика и начали громко чирикать, как будто обсуждали что-то важное на своем языке. Сначала ни одна из них не решалась подлететь к обеденному столику, но вот одна белогрудая птичка направилась к кормушке. Убедившись, что здесь нет никакой опасности, она села на столик и начала клевать крошки. Тут уж и все ее подружки осмелели. И начался шумный завтрак! На дворе лил холодный осенний дождь, но птички уже не чувствовали холода. Они весело чирикали и веселились по-птичьи.

Дедушка улыбнулся, легонько толкнул маленького Пату в плечо и сказал:

— Видишь, Пата, птицы справляют новоселье. Они вселились в новый домик, который мы с тобой для них построили.

 

* Дада — дедушка.

Рейтинг@Mail.ru